Vargje biblike të njohura nga Lucas 11

Ndaje

Makö wanisala apa wi maaki, au ulu töpö na tä toita apii ma tä totoma taö öpaö. Hi tä hẽtu ha pö̃ Teusö a kulali, ĩ anö tä toita apii tä totoa satia taö öpaö. Teusö a õsi kua tolele, ĩ a toita apii wa nakaö ha, Teusönö kama õsi kua tolele, ĩ a totoa hö̃töki kitä‑ ĩ na Jesus a kuuma.

Teusö anö makö peama hö̃töo kitäö! Önö kutenö, kamakö na ĩ na sa kuu kule: “Teusö a na wa tä nakati ha, wa tä täli kitä. Wa tä tae totitioö ha, wa tä talali kitä. Thaka taka laa kule maaki, ‘Sa lisipokö o!’ ĩ na wa ku upaö ha, Teusö anö ĩ taka hãkoa hö̃töpali kitä” ĩ na sa kuu kule.

Teusö a na ai töpö nako wi ĩ töpö pewönö ĩ ai tä täa hö̃töli. Tä taepalati wi ĩ töpönö tä talali. Taka laa lototole ĩ taka kule ha, ai tä öpaiki nö, “Taka hãkopalöö!” a kuu pole, ĩ a wani na ĩ taka hãkoa hö̃töpali‑ ĩ na Jesus a kuuma.

Ĩ na a kuu ha, Jesus aiki, ‑Teusö a na makö hapalo nö, pi na makö kuupö: “Hapa. Sanöma samakö pewö aiki, ‘Teusö a hilo wi ĩ a pata totiatalo opa asawöö!’ ĩ na samakö pewö pi kuupöö! Teusö ai. Kawanö samakö simöa totio wi, ĩ tä waloa haitamaköö!

Kamisamakö na ai töpönö wanisala tä thaa pole, ĩ tä noa na samakö hĩso hö̃töla tä kuno mai, samakö hĩso wi, ĩ tä maa soa pätasoö. Ai töpö na kamisamakönö hĩso wi ĩ sama tä mapamanö nö, ĩ na samakö kuati kutenö, wanisala sama tä thaa wi, ĩ tä na a hĩso mapaloö! Sai tä sai patanö samakö wapa kutenö, wanisala sama tä thaa wi, ĩ tä na samakö noamaö!” ĩ na Teusö a na makö hapalo pi topa salo, ĩ na pö kuu!‑ ĩ na Jesus a kuuma.

Ĩ tä wakala pewö hamö nii wa tä totoma wi, huki ĩ tä totopa.

Koa taka sii kua wi na, ĩ na pili wa mamo kua hö̃töoö. Pili wa mamonö toita apii wa tä möö pi topa tä, pili wa õsi wakala apöki. Ĩ na tä kua tä, pili wa mamonö wanisala wa tä möö pi topa tä, wa õsi mumia apöki.

Ĩ na Jesus a kuu nö, ‑Koa wa taka sii hilimanö nö, wa taka sii pi sosama mai kitä. Koa taka hösöka ha solai wa sohoa mai kitä. Ai töpö lisipasoma, “Tä wakala topa apöle” ĩ na ai töpö pi kuupö, ösö tömö wa taka pi tikämaki.