Vargje biblike të njohura nga Lucas 19

Ndaje

Sanöma töpönö wanisala tä thaahe nö, töpö monöa soaso noai, sanöma sa kupaso noai, ĩ sanö ĩ sa töpö tae kotio pa, sa töpö täa koanani, ĩ na sa töpö thama pia salo, sa huu kipili‑ ĩ na Jesus a kuu totioma.

Teusö ai. Kawanö kaikana wa tä simönö noai, ĩ a pata totiapalaö! Hi tä hẽtu hamö töpö kulali, ĩ töpö pi topapalotipököö! “Teusö a totiatalo opa asawöö!” makö pewö kuupököö!‑ lope epii ĩ na töpö kupalo opatima.

Ĩ na Sakeu a kuu ha, Jesus aiki, ‑Sakeu a hai, ĩ Abraão a hai ĩ tolewö tä naiwö. “Teusö a pitili” Abraão a pi kuu kua noai na, ĩ na Sakeu a pi kuu kua hö̃töoö. Önö kutenö, Sakeu a, kama ai töpö, ĩ na töpö kui töpönö wanisala tä thaa noai, huki ĩ tä na Teusö a hĩso mataso ke. Teusö anö ĩ töpö täa koni ke. Ĩ töpö hai, ĩ Teusö ulupö töpö kupaso keö!

A tua läa soatakö noai, ĩ ha Jesus a hasuola nö, a möö nonoa nö, ‑Sakeu ai! Lope epii a ithoa kõtaloö! Huki au sai a na sa kukö taso kitäö!‑ ĩ na Jesus a kuuma. Ĩ na Jesus a kuu ha, lope epii Sakeu a ithoa haia kõtalo nö, a pi mönahapalo opa nö, Jesus a kai kõa soatasolöma.

Ĩ na ĩ töpö kupaloti tä, Sakeu a öpa hatukupalo nö, Jesus a na a hapalo nö, ‑Pata! Pi naka. Töpö matipö mi ipii, ĩ töpö na wani sa tä thapo asale, ĩ ai sa tökö hẽtu totoki, ai sa tökö hẽtu thaa hö̃töli, ĩ na sa kua pia salo. Ai tä hai ĩ sitipa sa kökö thomönini, ĩ a na pe epii sitipa sa kökö totoa hö̃töki pia salo‑ ĩ na Sakeu a kuuma.

Ĩ na töpö kupaloti tä, ai patiseu töpö nokapalo naitile, ĩ töpö aiki, ‑Pata! Kawa na hi töpö satehe epii töpö nokapaloti pole, ĩ töpö na, “Ĩ na pö wani kuti tihöö! Pö lalupalo tihöö!” ĩ na wa kuu mi salo‑ ĩ na töpö kuuma. Ĩ na töpö kuu ha, Jesus aiki, ‑Teusö a na hi töpö hapalo nö, “Teusö ai. Kawanö kaikana wa tä simönini, ĩ a pata totiapalaö!” ĩ na hi töpö kuu lalupalo mi tä, hi maa mapö paale, ĩ na ĩ mapö kuu lalupalo kua pasio kitäö!‑ ĩ na Jesus a kuuma.