Vargje biblike të njohura nga Génesis 39

Ndaje

Iro cantaincha quiso yoaqueri Tasorentsi JosÉ. Cameetsa isaviquimotapaaqueri nampitavacariri, yantaveetapaaqueneri.

Ari imataquero yamenacantaquero maaroni icantaqueriri. Tecatsi inquenqueshireaje Potifar, apatiro irointi iquenqueshireapiniti iroyea. Yora JosÉ cameetsa icanta, icameetsavorotaque.

Aisati ishinetaqueri iramenajeiteri yoiminquiyeetiri. Iriotaque cantacantirori paitarica irantayeteri.

Irosati yaacantantacari, yoiminqueacantaqueri caravosoqui itimajeitinta itsipapee yoiminqueacantayetiri pincatsari. Iro cantaincha icantani Tasorentsi quiso yoaqueri JosÉ. Itasoncaventaqueri icantashireacaacari amenajeitiriri yoiminqueeyetiri ineacameetsatantacariri.

Ari osamanitanaque isaviquimotaqueri JosÉ Potifar. Ora ijina oneaqueri icameetsavorotaque. Oquenqueshireasanotaqueri onevetacari. Aparo quitaiteri ocantavetari: —Nocoaque poonayena. Iro cantaincha te incoyeji. Icantanaquero: —Teeve, te oncameetsateji noonayempi. Pamene, ineacameetsataquena pijime, icantaquena namenacantiro maaroni timimoyetiriri. Meeca nosavicaque aca, tecatsi inquenqueshirete. Aca ivancoqui te intimeji pashini quempetenaneri; tempa ishinetaquenaro maaroni paitapeerica. Tecatsi intsaneacotena, apaniroquea avinti; tempa avirotaque ijina. Te noncoyeji noonayempi aisati te noncoyeji nantimoteri Tasorentsi caari cameetsatatsi.

Iro cantaincha aparo quitaiteri ijataque JosÉ pancotsiqui tsompoina irantaveetantajeari. Te intimaiteji nampirentsipee, irosati ajiricacotantavacari iitsaarequi, ocantiri: —Jentsiqueti, poonayena. Iro cantaincha itsaneanaca, ishiapitsatanacaro. Irointi yojocanaque iitsaare acoqui.