Matthew Ago di ini adina
Ago di ini adina
Ago buni Matthew yaku bura reyo una rofu niyo Sei yaku nitore reyo Iesu bi uni Moi vegu rina amiye. Ma Sei yaku Iesu dudu ini nitore rena ago ini vene rofu moi rama aeyo. Mina ago buni bi Jew vene maka de, kaere Iesu bi ini fogori vata nisi amegamo, idu kono tora noibanu di vene rofu.
Matthew yaku ini buka bura rei mona reyo. Ini adinari bi Iesu di vata niyo meda, ini babatiso rena ma Satani yaku ini uka maina regika nivena di ago bura reyo. Resi bi ini ago ogau nina, oteimana, ma amiye moi buni rena moimai Galilee ri mina bura reyo. Gabi Iesu yava ika oto dina Galilee gutuna Jerusalem ri ma ini metona furari di vegu mina bukari bura reyo. Mina metona vegu bi satauro ikoko reyadi ma dadi rae reyo.
Mina buka di agori Iesu bi Oteimana amiye tora, kaere bi Sei di ago gira ini rama nina di vava nufa. Ina ka Sei di ourefeidena amena sana di ago oteimaro. Ini oteimana ago tau di bado tora 5 bi: (1) Omuna ikari ogau nina ago; mina ago bi Sei di ourefeidena amena sana omari vene di vegu, reremama, ma buni buni (koro 5—7); (2) Moimai rena oteimana ago gira usi dina vene 12 rofu (koro 10); (3) Sei di ourefeidena amena sana omari di mokena ago (koro 13); (4) Usi dina vegu di adina di oteimana ago (koro 18); ma (5) Ari metona ma Sei di ourefeidena amena sana omari dena di oteimana ago (koro 24—25).
Beika sina ideri
Iesu Keriso di tutubena imito rina ma vata nina sina 1.1—2.23
John Babatiso di moimai 3.1–12
Iesu babatiso reyo ma Satani yaku ini uka maina regika niveyo 3.13—4.11
Iesu moimai ariara Galilee ri 4.12—18.35
Galilee gutuna Jerusalem ri 19.1—20.34
Metona fura Jerusalem atafuri ma ini ideri 21.1—27.66
Varika amiye dadi rae resi amiye atafuri baeyo di ago 28.1–20
Aktualisht i përzgjedhur:
Matthew Ago di ini adina: kqc
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2016, Wycliffe Bible Translators, Inc. All rights reserved.