Mataio 4
4
Artohtoh narsá Iesu
Mar 1:12-13; Luk 4:1-13
1 # Eba 2:18, 4:15 I pákánbung ái Iesu a masar alari dan á Ioridan, Tanián ái Káláu a lami uri pokon mau suri ái Satan na longoi artohtoh uri narsán. 2#Kal 34:28Ái Iesu kápate ani tekesi táit arwat mai ahat i sángul á bung, má pasi ák matpám. 3Ngorer ái Satan a turpasi suri tohtoh Iesu mák parai singin ngoromin, “Ngo iáu Natun ái Káláu, ki una dos i bos hat minái suri dák arkeles uri balbal.” 4#Nag 8:3Mái Iesu a kosoi ngo, “Pinpidan si Káláu a parai ngo,
‘Kápte ngo namnam masik a lu támri liu kán kálámul suri na rakrakai, kápte!
Rakrakai uri liu muswan kán kálámul a hut sang tili worwor si Káláu.’”
5Má namur ái Satan a tohtoh Iesu mul mák lam pasi urami Ierusalem mák aksimi iamuni i kuir ungán rum i rumán osmapak. 6#Sak 91:11-12Mái Satan a parai si Iesu ngoromin, “Ngo iáu Natun ái Káláu, ki una roh tilatung uradi bim. Kabin pinpidan a parai ngoro minái,
‘Ái Káláu na tari palai kán tan angelo má da ololoh timan iáu.’
Má pinpidan a parai mul ngo,
‘Tan angelo da sáng pas iáu mai lim di
suri ngorer na mák suski kikim i hat.’”
7 # Nag 6:16 Mái Iesu a kosoi ngoromin, “Pinpidan si Káláu a parai mul ngo, ‘Koion una tohtoh Konom er kam Káláu!’”
8Má namur ái Satan a tohtoh Iesu mul má a lam pasi uri pungpung a tuan alami sang, má a inngas tari singin á tan balis no on á naul matmatngan pokon turán tan táit imi lolon i di mul. 9Má namur a parai si Iesu ngo, “Tan táit no min ina tar noi singim. Na kaiam no sár ngo una pur dirtapul má unák lotu uri narsang.”
10 # Nag 6:13 Mái Iesu a kosoi ngo, “Táu alar iau, Satan! Pinpidan si Káláu a parai ngo,
‘Una lotu uri narsán ái Konom kam Káláu,
má ái masik sár una para agasi!’”
11Má ngo ái Satan ákte arahi má kán tan artohtoh uri narsá Iesu, ki ák han pas má alari, má namur tan angelo di hut má dik tangan Iesu.
Ái Iesu a tangkabin kán him á Galiláiá
Mar 1:14-15; Luk 4:14-15
12 # Mat 14:3; Mar 6:17; Luk 3:19-20 Má namur ngo dikte obop Ioanes i batbat kalar, ái Iesu a longrai ngorer má a aptur mák han ur Galiláiá. 13Kápte a lala kis ák dol á Nasaret ái Iesu, mái sár a han mák lu kis á Kapernaum i bimán rum a kis pátmi dan taliu á Galiláiá i balis káián aru mát er si Sebulon mái Napitali. 14A han máng kis á Kapernaum ái Iesu suri ák tapam hut muswan i worwor káián tám worwor tus ái Aisaia er a parai ngo,
15 # Ais 9:1-2 “Tan kálámul tili risán er di kis i kuir bim si Sebulon mái Napitali,
má te di kis i risán tilik tas
má i balsán dan á Ioridan
má Galiláiá,
16matananu er di liu i kuron.
Mái sár da mákái talas na sol uri tanián i di.
Má talas na kaura uri narsá di
ái rung di liu i pákpák án minat má nák atalsa di.”
17 # Mat 3:2, 19:27 Má turpasi i pákánbung erei sang, ái Iesu a tangkabin pasi kán arbin mák parai ngo, “Gama tánlak alari kamu sápkin má gamák hol kaleng, kápkabin páput má lolsit tilami bát suri ái Káláu na kátlán i git!”
Ái Iesu a kilkila pasi ahat i tám soksok
Mar 1:16-20; Luk 5:1-11
18Má ngo a lu hanhan tangrai risán dan taliu á Galiláiá, ái Iesu a mák rugar tuán er diar soksok isu mai uben iatung i dan erei. Ái Saimon, kesi ngisán ái Petero, mái Enru er tuán, diar aru tám soksok. 19Mái Iesu a parai si diar ngo, “Gaur lákám, má gaurák mur i iau, má inak atintin gaur suri gaura tám soksok pasi matananu ur káián ái Káláu!” 20Má ngo diar longrai ngorer, káp melek mul má diar aptur alari kándiar tan uben iatung má diará turpasi mur i Iesu.
21Má ngo ái Iesu a lu lákláklák iamunang, a mákái aru natun ái Sebedaio, ái Iakobo mái Ioanes, ditul támán leget i kánditul uben iatung i mon. I pákánbung a mák diar ái Iesu, a kilkila pas diar 22alar Sebedaio iatung. Má káp melek sár diar aptur má diar má han tiklik mam Iesu.
A aratintin mák arbin mák araliu ái Iesu
Luk 6:17-19
23 # Mat 9:35; Mar 1:39; Apo 10:38 Má ngorer ái Iesu a han mák lu aratintin tangrai boh rumán lotu i balis á Galiláiá no. A arbin mai lain arbin suri lolsit tilami bát, mák asengsegeng i matananu alari kandi toltolom sasam. 24#Mar 6:55Má arbin uri Iesu a han arkaliut no i balis er mák han átik á Siria. Má ngo matananu di longrai ngorer, io di hut i narsán mam rung di sasam ngorer i rung a rangrang i kápán páplun i di, mái rung a porta i di á sápkin tanián, mái rung a mat i balsán i di, mái rung mul di gokgok. Mái Iesu a asengsegeng i di no sár. 25#Mar 3:7-8Má ngorer tilik lala matananu taladeng tili tan malar di lu murmur on. Tan malar erei a turpasi til Galiláiá ák han átik á Dekapolis, má til Ierusalem má Iudáiá má tili kesi balsán dan á Ioridan mul.
Aktualisht i përzgjedhur:
Mataio 4: sgz
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2009, Wycliffe Bible Translators, Inc. All rights reserved.