Aluki 4
4
Asũtãana makɛ Azezi
(Amatie 4:1-11, Amarkɩ 1:12-13)
1Azezi daan ze'ele la Zʋrdẽ kʋlaam lebe, tɩ Nawẽnnɛ Sɩa la kɔ'ɔn bɔna la ẽ. La Nawẽnnɛ Sɩa la tarɩ ẽ sẽŋɛ la weem. 2Bilam tɩ Asũtãana makɛ ẽ dabsa pinaasɩ. La dabsa pinaasɩ la pʋam a ka di sɛla sɛla, tɩ a kɔm dõnna. 3Bɛla tɩ Asũtãana yele ẽ yetɩ: «Fʋ sãn sɩrɩ dɛna la Nawẽnnɛ Dayʋa, fʋ yele kugre wã tɩ a lebge dia.» 4Tɩ Azezi lerge ẽ yetɩ: «La gʋlsɛ Nawẽnnɛ gõŋɔ pʋam yetɩ:
‹Nẽrsaala kãn vɔa dia mã'a ĩyã.› »
5Tɩ Asũtãana tarɩ ẽ sẽŋɛ ka zom tãŋa zuo, pa'alɛ ẽ dũnia so'olʋm wuu nif-kabsɩgɔ pʋam. 6Dee yele ẽ yetɩ: «Bãna wuu de la mam n soe, bɛla mam tã wʋn bɔ nẽr-sɛka woo tɩ mam boorɩ mɛ. Mam wʋn bɔ fɔ dũnia wã na'am la wuu, la so'olʋm bãma wuu pẽka. 7Fʋ sãn ka dũma tẽŋa nã'asɛ mam, ba wuu wʋn dɛna la fõn dẽnnɛ.» 8Tɩ Azezi lerge ẽ yetɩ: «La gʋlsɛ Nawẽnnɛ yetɔga pʋam yetɩ:
‹Nã'asra Zuudãana Nawẽnnɛ,
dee sakra ẽŋa ayɩla mã'a.› »
9Tɩ Asũtãana le tarɩ ẽ sẽŋɛ Zerizalɛm ka zom Wẽnde-kãtɛ la zuo yele ẽ yetɩ: «Fʋ sãn sɩrɩ dɛna la Nawẽnnɛ Dayʋa, fʋ ze'ele kalam ẽkɛ bisge tẽŋa, 10tɩ la gʋlsɛ yetɩ:
‹Nawẽnnɛ wʋn tõm a malɛkadõma tɩ ba gu fo.
11La ba wʋn kɔkɛ fɔ la ba nu'usi
tɩ fʋ kãn wẽ fʋ nã'arɛ la kugre.› »
12Tɩ Azezi lerge yetɩ: «Nawẽnnɛ gõŋɔ yele tɩ:
‹Da makɛ fʋ Zuudãana Nawẽnnɛ bɩsɛ.› »
13La Asũtãana n daan makɛ Azezi bɛla wuu zɩgɛ koŋe la, a basɛ ẽ dee gu'ura la a sãn le yẽ folle.
Azezi n pĩ'ilum a tõoma Galile tẽŋa
(Amatie 4:12-17, Amarkɩ 1:14-15)
14La Azezi daan lebe Galile la Nawẽnnɛ Sɩa la pãŋa, tɩ a yʋ'ʋrɛ kɔ'ɔn saagɛ zẽ'a wuu. 15La a ẽn zãsna la nẽrba Nawẽnnɛ yetɔga Zifdõma wẽndeto pʋam, tɩ ba wuu pẽgra ẽ.
Nazarɛtɩ nẽrba ka bɔ Azezi sɩra
(Amatie 13:53-58, Amarkɩ 6:1-6)
16La Azezi daan sẽŋɛ la Nazarɛtɩ, ban daan uge ẽ tẽn-sɛka la. Tɩ Zifdõma vo'osgo daarɛ tɩ a kẽ ba wẽndeem wʋ ẽŋa ẽn kẽ'era se'em na, yãŋa isge ze'ele tɩ a karẽŋɛ. 17Tɩ ba dɩkɛ gõn-sɛka tɩ Nawẽnnɛ nõtɔ'ɔsa A'ezayi yʋʋn gʋlsɛ la bɔ ẽ. Tɩ a lakɛ gõŋɔ la yẽ zẽ'e-sɛka tɩ a boorɩ la, yãŋa karẽŋɛ wʋ zẽ'a la n yele se'em na:
18«Zuudãana Nawẽnnɛ Sɩa n boe la mam,
ẽŋa n looge mam bɔ mam pãŋa,
tɩ m bʋglɛ sũ-sã'aŋɔ dõma sũure,
tɩ m mõolɛ kõ-yẽlga la bɔ nasdõma,
dee tõm mam tɩ m tɔgɛ bɔ yamsɩ tɩ ba wʋn yẽ yolsgo,
dee tɔgɛ bɔ fɔɔsɩ tɩ ba nini wʋn pike,
dee yese sɛba n boe nãmsgɔ pʋam la basɛ,
19dee mõolɛ tɩ wakatɛ paagɛ ya,
tɩ Zuudãana wʋn ẽŋɛ nẽrba yel-sõnnɛ.»
20La ẽn karẽŋɛ ba'asɛ la, a lebe laglɛ gõŋɔ la mɛ bɔ sɛka n gu'uri gõnnɔ la, dee zĩ'ire. Tɩ nẽr-sɛba wuu n boe wẽndeem na bɩsra ẽ zĩi. 21Tɩ a yele ba yetɩ: «Zĩna, lɛɛlɛ wã, sɛla tɩ ba gʋlsɛ Nawẽnnɛ gõŋɔ pʋam tɩ yãma wõm wã, la ẽŋɛ wʋ lan yele se'em na.» 22Tɩ ba tɔgɛ pẽgɛ ẽ, la a yetɔg-sõma la tɩ a tɔgɛ la di'ige ba mɛ. Dee tɩ ba sɔkra yetɩ, la ka de Azozɛfʋ dayʋa la n wãna? 23Tɩ Azezi yele ba yetɩ: «Mam põn mina tɩ ya wʋn makɛ makrɛ ẽna bɔ mam yetɩ: ‹Tɩɩm dãana, tɩbɛ fʋ mẽŋa.› La ya wʋn ken yele mam yetɩ: ‹Bõn-sɛba tɩ fʋ daan ẽŋɛ Kapɛrnaʋm tẽŋam tɩ tõma wõm na, ẽŋɛ bɛla nõo fʋ mẽŋa tẽŋam kalam mẽ.› » 24Tɩ Azezi le yele ba yetɩ: «Mam yetɩ ya la sɩra, tɩ ba ka nannɩ Nawẽnnɛ nõtɔ'ɔsa baa ayɩla a mẽŋa tẽŋam. 25La de la sɩra tɩ mam yetɩ ya tɩ: Pɔkõpa zozo'e yʋʋn boe Ɩsrayɛlɩ tẽŋam A'eli wakatʋm na mɛ, la saaga ka ni yʋʋma atã la wõr-sɩyoobɩ, tɩ kɔm yʋʋn ba bɔna tẽŋa la wuu pʋam. 26La Nawẽnnɛ ka tõm A'eli yetɩ a sẽŋɛ pɔkõ-bãma zẽ'am. A tõm ẽ na pɔkõorɛ n boe Sarɛpɩta n boe Sidõ so'olʋm pʋam na zẽ'am. 27La kõnkɔma zozo'e yʋʋn boe Ɩsrayɛlɩ tẽŋam A'elize wakatʋm na mɛ, la baa ayɩla ka yẽ ĩmã'asʋm, la Anãamã sɛka n yese Siiri so'olʋm na mã'a n yẽ ĩmã'asʋm.» 28La ban wõm bɛla la, sɛba n boe wẽndeego la pʋam wuu sũure daan yĩige mɛ. 29Tɩ ba isge ve'ege Azezi tẽŋa la pʋam yese. Tẽŋa la boe la tãŋa zuo. Tɩ ba tarɩ ẽ sẽŋɛ zẽ'e-sɛka n zãagɛ la tẽŋa la, ba daan boorɩ tɩ ba zã'agɛ ẽ basɛ mɛ tɩ a lui ki. 30La Azezi kẽ la nẽr-kʋʋŋɔ la tẽŋasʋka fõrgɛ.
Bʋraaga tɩ kʋlkã'arga tarɩ ẽ
(Amarkɩ 1:21-28)
31Bɛla poorʋm, Azezi sẽŋɛ la Galile tẽŋa ayẽma yʋ'ʋrɛ n de Kapɛrnaʋm, tɩ Zifdõma vo'osgo daarɛ daan paagɛ, tɩ a sẽŋɛ ba wẽndeem ka zãsna nẽrba Nawẽnnɛ yetɔga. 32Tɩ a zãsŋɔ la daan di'ige ba, a yetɔga la n tarɩ pãŋa la ĩyã. 33Tɩ bʋraa daan bɔna wẽndeem na tɩ kʋlkã'arga tara ẽ, tɩ a tĩi kaasɛ yetɩ: 34«A'a! Azezi n de Nazarɛtɩ nẽra, fõn bẽm yelle n boe la tõma? Fõn wa'am tɩ fʋ sã'am na tõma? Mam mi fõn de sɛka, fõn de la pʋpeelem dãana n ze'ele Nawẽnnɛ zẽ'am.» 35Tɩ Azezi tãsɛ kʋlkã'arga la yetɩ: «Go'oge, yese dee basɛ bʋraa la!» Tɩ kʋlkã'arga la lʋbɛ ẽ nẽrba la wuu nẽŋam, dee yese, la a ka pɔglʋm ẽ. 36Tɩ ba wuu palẽŋa ẽkɛ tɩ ba yele taaba yetɩ: «Yetɔga ẽna de la bẽm? A tarɩ la pãŋa la ke'eŋo, dee tãsra kʋlkã'arsɩ, tɩ ba yɛsra.» 37Tɩ Azezi yʋ'ʋrɛ saagɛ zẽ'e-bãma wuu.
Azezi botɩ nẽrba zozo'e yẽ ĩmã'asʋm
(Amatie 8:14-17, Amarkɩ 1:29-34)
38Tɩ Azezi isge ba wẽndeego la pʋam yese ka kẽ Asimõ yire. Tɩ Asimõ dɛɛm-pɔka bẽ'era, tɩ a ĩyã ba tʋlgɛ. Tɩ ba tɔgɛ a yelle bɔ Azezi, 39tɩ a sẽŋɛ ka suure a zuo, dee tãsɛ bã'a la yetɩ a basɛ ẽ. La ẽn yele la, bã'a la basɛ ẽ mɛ, tɩ a isge tɔtɔ ẽŋɛ ba sãanɔ.
40Tɩ wẽnnɛ daan bɔna mĩ kẽ'era, tɩ ba tarɩ bã'adõma tɩ bã'asɩ buuri to'oto'ore tarɩ ba, sẽŋɛ Azezi zẽ'am. Tɩ Azezi dɩkɛ a nu'usi paglɛ ba nẽra woo zuo, tɩ ba wuu yẽ ĩmã'asʋm. 41La kʋlkã'arsɩ daan yesrɩ mɛ dee basra nẽrba zozo'e, dee kaasra yetɩ: «Fõn de la Nawẽnnɛ Dayʋa.» Tɩ Azezi tãsɛ ba, ka basɛ tɩ ba tɔgɛ sɛla sɛla, se'ere n soe la, ba daan bãŋɛ tɩ a de la Krisi n de Fãagra la.
Azezi mõolɩ Nawẽnnɛ kõ-yẽlga Zifdõma wẽndeto pʋam
(Amarkɩ 1:35-39)
42Tɩ beere wiige, tɩ Azezi yese tẽŋa la pʋam sẽŋɛ zẽ'e-sɛka tɩ nẽra ka boe mĩ. Tɩ nẽrba zozo'e ɛɛra ẽ. La ba daan yẽ ẽ mɛ, bɔɔra tɩ ba gu ẽ tɩ a da le yese ba zẽ'am. 43La Azezi yele ba yetɩ: «Dẽnɩ tɩ mam mõolɛ kõ-yẽlga pa'alɛ Nawẽnnɛ so'olʋm n ãn se'em tẽnsɩ basɛba mẽ pʋam, la de la bɛla ĩyã tɩ Nawẽnnɛ tõm mam.» 44La a ẽn mõola kõ-yẽlga la Zifdõma wẽndeto pʋam mɛ.
Aktualisht i përzgjedhur:
Aluki 4: gurDBL
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2008, 2010, Wycliffe Bible Translators, Inc. All rights reserved.