Aluki 6
6
Vo'osgo daarɛ yelle
(Amatie 12:1-8, Amarkɩ 2:23-28)
1Zifdõma vo'osgo daarɛ ayɩla tɩ Azezi la a karẽnbiisi dɔla vatɔ pʋam tɔlla, tɩ a karẽnbiisi kɔ si wẽena ɔbra. 2Tɩ Farisi dõma nẽrba basɛba yẽ ban ẽŋɛ bɛla la, yele ba yetɩ: «Bẽm tɩ yãma ẽŋɛ sɛla n sisri tõma vo'osgo daarɛ?»
3Tɩ Azezi lerge soke ba yetɩ: «Yãma ka karẽŋɛ Adavidi la a nẽrba la kɔm n yʋʋn dõnnɩ tɩ Adavidi ẽŋɛ se'em na? 4A yʋʋn kẽ la Nawẽnnɛ deego pʋam dɩkɛ borborɩ sɛba tɩ ba bĩŋe bɔ Nawẽnnɛ na obe. La sisri mɛ, nẽra nẽra ka obrɩ ba, sãn dagna Nawẽnnɛ kãabgɔ kẽma la mã'a. La Adavidi yʋʋn obe borborɩ bãma mɛ, dee bɔ a nẽrba la tɩ ba obe.» 5La Azezi ken yele ba mɛ yetɩ: «Nẽrsaala Dayʋa la n soe vo'osgo daarɛ.»
Bʋraa nu'ugo n ki, tɩ Azezi botɩ a yẽ ĩmã'asʋm
(Amatie 12:9-14, Amarkɩ 3:1-6)
6Vo'osgo daarɛ ayẽma tɩ Azezi kẽ Zifdõma wẽndeem zãsna nẽrba Nawẽnnɛ yetɔga. Tɩ bʋraa daan bɔna mĩ, tɩ a zʋʋgɔ nu'ugo ki. 7Tɩ Nawẽnnɛ lɔɔ karẽnsãandõma, la Farisi dõma la daan bɩsra Azezi wʋn botɩ nẽra la yẽ ĩmã'asʋm vo'osgo daarɛ la bɩɩ, a kãn botɩ a yẽ ĩmã'asʋm. Se'ere n soe la, ba daan eerɩ la so-sɛka tɩ ba wʋn yetɩ a sã'am bãma sisgo dõrɛ ẽ. 8Tɩ Azezi bãŋɛ ba tẽ'esgɔ la, yele bʋraa la nu'ugo n ki la yetɩ: «Isge ze'ele nẽrba la tẽŋasʋka.» Tɩ a isge ze'ele. 9Tɩ Azezi yele ba yetɩ: «Mam yetɩ m soke ya mɛ bɩsɛ, sore boe tɩ nẽra ẽŋɛ sõŋa vo'osgo daarɛ bɩɩ, a ẽŋɛ be'em? Sore boe tɩ a fãagɛ nẽra vo'osgo daarɛ bɩɩ, a kʋ ẽ?» 10Dee bɩsɛ ba wuu kaagɛ, dee yele bʋraa la yetɩ: «Tẽegɛ fʋ nu'ugo la.» Tɩ a tẽegɛ a nu'ugo la, tɩ a nu'ugo la yãŋa tẽegɛ ãna sõŋa. 11Tɩ ba sũnsõa yĩige halɩ tɩ ba bãnna ban wʋn ẽŋɛ Azezi se'em.
Azezi looge a karẽnbiisi pia la ayi
(Amatie 10:1-4, Amarkɩ 3:13-19)
12La wakat-ẽŋa tɩ Azezi daan sẽŋɛ ka zom tãŋa zuo tɩ a pʋ'ʋsɛ Nawẽnnɛ, bɔna bilam pʋ'ʋsra Nawẽnnɛ yʋ'ʋŋɔ wuu. 13Tɩ beere wiige, tɩ a wi a karẽnbiisi la, tɩ ba wa'am a zẽ'am. Tɩ a looge karẽnbiisi pia la ayi bãma pʋam. Bãma n de nẽr-sɛba tɩ a wʋn tõm na. 14Ba daan de la Asimõ tɩ Azezi sɩ a yʋ'ʋrɛ tɩ Apɩyɛɛrɩ, la A'ãndre n de Apɩyɛɛrɩ yɩbga, la Azakɩ, la Azã, la Afilipi, la Abatelemi, 15la Amatie, la Atoma, la Azakɩ sɛka n de Alfe bia la, la Asimõ sɛka n daan de Zelɔtɩ nẽra ayɩla la, 16la Azudaasɩ n de Azakɩ bia la, la Azudaasɩ Iskariyo sɛka n wʋn zãm Azezi la.
17La Azezi la a karẽnbiisi la ze'ele la tãŋa la zuo sige zẽ'e-sɛka n naagɛ taaba. La a karẽnbiisi basɛba zozo'e, la nẽr-kʋʋŋɔ zozo'e n yese Zude, la Zerizalɛm, la Tiiri la Sidõ so'olʋm n boe ko-kãtɛ nõorʋm na n lagsɛ bilam. 18Ba wa'am tɩ ba selse la Azezi yetɔga, dee tɩ a bɔ ba bã'adõma ĩmã'asʋm. La nẽrba basɛba n daan boe mĩ tɩ kʋlkã'arsɩ dɔla ba, tɩ ba daan yẽ ĩmã'asʋm. 19Tɩ nẽr-kʋʋŋɔ la wuu ɛɛra tɩ ba kalʋm ẽ, se'ere n soe la, pãŋa n yesrɩ a pʋam bɔ'ɔra ba wuu ĩmã'asʋm.
Zu-yẽlga la toogo yelle
(Amatie 5:1-12)
20Tɩ Azezi gorge bɩsɛ a karẽnbiisi la yetɩ: «Yãma sɛba n de nasdõma la tarɩ zu-yẽlga, se'ere n soe la, Nawẽnnɛ so'olʋm de la ya bõnɔ. 21Yãma sɛba kɔm n dõnnɩ lɛɛlɛ wã tarɩ zu-yẽlga, se'ere n soe la, ya wʋn ka di seke. Yãma sɛba n kaasrɩ lɛɛlɛ wã tarɩ zu-yẽlga, se'ere n soe la, ya wʋn ka la'ara. 22Yãma sɛba tɩ nẽrba sisri ya, dee bɔkra ya, tʋʋra ya, dee ka nanna ya wʋ ya de la tõon-be'ero dõma, mam n de Nẽrsaala Dayʋa la ĩyã la, tarɩ zu-yẽlga. 23Wakat-sɛka tɩ ba ɩtɩ yãma bɛla la, ẽŋɛ-ya sũ-yẽlga sɩrʋm, se'ere n soe la, ya wʋn yẽ yɔɔrɔ zo'oge mɛ Nawẽnnɛ yire. Bãŋɛ-ya tɩ ba yaabdõma yʋʋn ẽŋɛ Nawẽnnɛ nõtɔ'ɔsrɩba la bɛla.
24La yãma sɛba n de bõntatba la wʋn yẽ toogo, yãma n põn yẽ bõn-sõma la ĩyã. 25La yãma sɛba n tarɩ sɛla woo lɛɛlɛ wã tɩ la seke la, wʋn yẽ toogo, se'ere n soe la, ya wʋn ka sẽnna la kɔm. La yãma sɛba n la'arɩ lɛɛlɛ wã wʋn yẽ toogo, se'ere n soe la, ya sũure wʋn ka sã'am tɩ ya kaasɛ. 26La yãma sɛba tɩ nẽrba wuu pẽgrɩ ya la, wʋn yẽ toogo. Bãŋɛ-ya tɩ ba yaabdõma mẽ yʋʋn pẽgrɩ nõtɔ'ɔs-sɛba n de põmpɔrndõma la bɛla.»
Nõŋɛ-ya ya bɛ'ɛba
(Amatie 5:38-48;7:12)
27Azezi le yele ba yetɩ: «La mam yetɩ yãma sɛba n selsrɩ mam wã tɩ, ya nõŋɛ ya bɛ'ɛba, la sɛba n sisri ya la, ya ɩta ba sõŋa. 28La ya kã'ara kã'a-sõma bɔ'ɔra sɛba n kã be'em bɔ'ɔra ya la, dee pʋ'ʋsra Nawẽnnɛ bɔ'ɔra sɛba n ɩtɩ ya be'em na. 29Nẽra sãn wẽ fʋ pɛka ayɩla, fʋ basɛ tɩ a wẽ ayẽma la pa'asɛ. La nẽra sãn fãagɛ fʋ fu-kãtɛ, fʋ basɛ tɩ a to'oge fʋ fu-pɩka pa'asɛ. 30La nẽra sãn sose fʋ sɛla, fʋ bɔ ẽ. La nẽra sãn dɩkɛ sɛla n de fʋ bõnɔ, fʋ da yetɩ a bɔ fɔ fʋ bõnɔ na. 31La yãma n boorɩ tɩ nẽrba ɩta bõn-sɛba bɔ'ɔra ya la, ya mẽ ɩta bɛla bɔ'ɔra ba.
32La ya sãn nõŋɛ sɛba n nõŋɛ ya la mã'a, Nawẽnnɛ wʋn bɔ ya sɛla mɛ bɩɩ? Baa la tõon-be'ero dõma nõŋɛ sɛba n nõŋɛ ba mɛ. 33La ya sãn ɩta sɛba n ɩtɩ ya sõŋa la mã'a sõŋa, Nawẽnnɛ wʋn bɔ ya sɛla mɛ bɩɩ? Baa la tõon-be'ero dõma ɩtɩ la bɛla. 34La ya sãn pɛŋra sɛba tɩ ya tẽ'esrɩ tɩ ba wʋn yẽ lebse ya la, Nawẽnnɛ wʋn bɔ ya sɛla mɛ bɩɩ? Baa la tõon-be'ero dõma peŋrɩ tõon-be'ero dõma mɛ dee le tɔ'ɔsra bɛla.
35La, la sãn dɛna yãma, nõŋɛ-ya ya bɛ'ɛba, dee ẽŋɛ ba sõŋa. Peŋe-ya nẽrba dee da tẽ'esra tɩ ba le bɔ ya. Ya sãn ẽŋɛ bɛla, ya yɔɔrɔ wʋn zo'oge mɛ, la ya wʋn dɛna Nawẽnnɛ n gãnnɩ sɛla wuu kɔma, se'ere n soe la, a ɩtɩ sɛba n ka mi yel-sõnnɛ, la pʋtʋʋl-dõma sõŋa mɛ. 36Zɔta-ya nẽrba ninbãalga, wʋ ya Sɔ Nawẽnnɛ n zotɩ nẽrba ninbãalga se'em na.»
Da zɛrgra-ya taaba
(Amatie 7:1-5)
37«Da tɔgra-ya nẽra yelle yetɩ a ẽŋɛ be'em, tɩ Nawẽnnɛ mẽ kãn tɔgɛ ya yelle yetɩ ya ẽŋɛ be'em. Da zɛrgra-ya nẽrba, tɩ Nawẽnnɛ mẽ kãn zɛrgɛ ya. Basɛ-ya taaba taalɛ, tɩ Nawẽnnɛ mẽ wʋn basɛ ya taalɛ. 38Bɔ-ya ya taaba, tɩ Nawẽnnɛ mẽ wʋn bɔ ya. Nawẽnnɛ wʋn bɔ ya zo'oge wʋ ban dɩkɛ wan-kãtɛ makɛ pɩrɛ sõŋa tɩ la saara. Bõn-sɛka tɩ yãma dɩkɛ makɛ bɔ ya taaba la, bõn-ẽŋa tɩ Nawẽnnɛ mẽ wʋn dɩkɛ makɛ bɔ ya.»
39Tɩ Azezi daan makɛ makrɛ bɔ ba yetɩ: «Fʋa tã wʋn ve'ege fʋa mɛ tɩ ba wuu kãn lui boko pʋam? 40Karẽnbia ka gãnnɩ a karẽnsãama, la karẽnbia sãn zãsʋm sɛla woo ba'asɛ, a ãn wʋ a karẽnsãama la.
41Bẽm tɩ fʋ bɩsra sɔkɔ n boe fʋ sɔbia nifum, dee ka bɩsra dɔɔgɔ n boe fʋ mẽŋa nifum na? 42Fõn ẽŋɛ la wãne yɛta fʋ sɔbia yetɩ, a basɛ tɩ fʋ yese sɔkɔ a nifum, dee ka bɩsra dɔɔgɔ n boe fʋ mẽŋa nifum? Pʋlibsum dãana, dẽŋɛ yese dɔɔgɔ la fʋ mẽŋa nifum, dee yãŋa tã'agɛ yẽ sõŋa yese sɔkɔ la n boe fʋ sɔbia nifum na.»
Tɩa woo la a biɛ
(Amatie 7:16-20;12:33-35)
43«Tɩ-sõŋɔ ka wɔnnɩ biɛ be'ero. Tɩ-be'ego mẽ ka wɔnnɩ biɛ sõma. 44Ba bãŋrɩ tɩɩsɩ wuu la ba biɛ pʋam. Gõ'osɩ kãn wɔm kẽnkãma, la kẽkɔ mẽ kãn wɔm tã'ama.
45Nẽr-sõŋɔ sũure n ãn sõŋa botɩ a tɔgra la bõn-sõma, la nẽr-be'ego sũure n ka ãn sõŋa botɩ a tɔgra la bõn-be'ero. Se'ere n soe la, bõn-sɛba n boe nẽrsaala sũurum n yesrɩ a nõorʋm.»
Nawẽnnɛ yetɔga sakrɛ yelle
(Amatie 7:24-27)
46«Bẽm ĩyã tɩ yãma wi'ira mam tɩ ‹Zuudãana, Zuudãana›, dee ka ɩta mam n yetɩ ya ɩta se'em na? 47Nẽr-sɛka woo n sẽm mam zẽ'am, dee sɛlsra mam yetɔga, dee sakra ɩta mam n yele se'em na, mam wʋn pa'alɛ ya ẽŋa dãana n ãn se'em: 48A ãn wʋ nẽra n boorɩ tɩ a mẽ a yire, tũ paagɛ tãmpĩa, ẽebɛ a yire tãmpĩa la zuo. Tɩ saaga ni, tɩ ko'om pɩrɛ kʋlsɩ zoe wẽ yire la, tɩ a ka lui, ẽn mẽ sõŋa la ĩyã. 49La nẽr-sɛka n wõnnɩ mam yetɔga, dee ka ɩta mam n yele se'em na, ãn wʋ nẽra n mẽ a yire tẽntõnnɔ zuo, dee ka tũ ẽebɛ. Tɩ saaga ni, tɩ ko'om pɩrɛ kʋlsɩ zoe wa wẽ yire la, tɩ a kɔ'ɔn lui saam saam.»
Aktualisht i përzgjedhur:
Aluki 6: gurDBL
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2008, 2010, Wycliffe Bible Translators, Inc. All rights reserved.