Aluki 7

Azezi botɩ Rom sʋda-kɛ'ɛma tõntõnna yẽ ĩmã'asʋm

(Amatie 8:5-13)

1Azezi tɔgɛ bɛla wuu bɔ nẽrba la ba'asɛ, dee sẽŋɛ la Kapɛrnaʋm. 2Tɩ Rom sʋda-kɛ'ɛma bɔna mĩ tara a tõntõnna tɩ a nõŋɛ. Tɩ tõntõnna la bẽ'era dee la a ki. 3Tɩ sʋda-kɛ'ɛma la wõm Azezi yelle, tõm Zifdõma kẽma basɛba a zẽ'am tɩ ba sose ẽ yetɩ, a wa'am wa botɩ a tõntõnna la yẽ ĩmã'asʋm. 4Tɩ ba sẽŋɛ Azezi zẽ'am ka tĩi belem ẽ yetɩ: «Bʋraa la de la nẽr-sõŋɔ. 5A nõŋɛ tõma buuri mɛ, la ẽŋa n mẽ wẽndeego bɔ tõma. Bɛla ĩyã, mõrgɛ sõŋɛ ẽ.» 6Tɩ Azezi dɔla ba wɛ'ɛsa ka lɛm yire la, tɩ sʋda-kɛ'ɛma la le tõm a sɩrdõma tɩ ba yele ẽ yetɩ: «Zuudãana, da nãmsɛ fʋ mẽŋa. Mam ka narɩ tɩ fʋ wa'am mam yire, 7bɛla ĩyã tɩ mam tẽ'esɛ yetɩ mam mẽŋa ka narɩ tɩ m wa'am fõn zẽ'am. Wen tɔgɛ yetɔga mã'a, tɩ m tõntõnna la wʋn yẽ ĩmã'asʋm. 8Se'ere n soe la, nẽrba n soe mam, la mam mẽ soe la sʋdaasɩ basɛba. Mam sãn yele sʋda-sɛka yetɩ: ‹Sẽŋɛ›, a we'esɩ mɛ. La mam sãn yele ayẽma yetɩ: ‹Wa'am›, a sẽm mɛ. Mam sãn yele m tõntõnna yetɩ: ‹Ẽŋɛ wãna›, a ɩtɩ mɛ.» 9Azezi n wõm bɛla la, la daan di'ige ẽ mɛ, tɩ a wẽrgɛ yele nẽr-sɛba n dolɩ ẽ na yetɩ: «Mam yetɩ yãma mɛ tɩ mam nãn ka yẽ nẽra n bɔ mam sɩra wʋ bʋra-ẽna wã, baa Ɩsrayɛlɩ buuri la pʋam mam ka yẽ.» 10Tɩ sʋda-kɛ'ɛma la n tõm sɛba la lebe a yire ka yẽ tɩ tõntõnna la tarɩ ĩmã'asʋm.

Azezi botɩ pɔkõorɛ bia vo'oge

11Bɛla poorʋm, Azezi we'esɩ la tẽŋa ayɩla yʋ'ʋrɛ n de Nayin, tɩ a karẽnbiisi, la nẽrba zozo'e dɔla ẽ. 12La Azezi paagɛ tẽŋa la nõorʋm, tʋ'ʋsɛ la nẽrba n zɛɛrɩ budibla n ki wɛ'ɛsa tɩ ba ka laagɛ. Budibla la ma de la pɔkõorɛ. La a bia de la ẽŋa mã'a. Tɩ tẽŋa la nẽrba zozo'e daan kɔlgɛ ẽ dɔla wɛ'ɛsa. 13La Zuudãana Azezi n yẽ pɔkõorɛ la, tɩ a ninbãalga yõkɛ ẽ, tɩ a yele ẽ yetɩ: «Da kɛlla.» 14A yele bɛla dee sẽŋɛ paagɛ kalʋm na sãŋandɛ la, tɩ nẽr-sɛba n zɛɛrɩ kũm na ze'ele, tɩ a yele kũm na yetɩ: «Budib-polle, mam yetɩ fʋ tɩ fʋ isge.» 15Tɩ sɛka n ki la vo'oge isge zĩ'ire, yãŋa tɔgra. Tɩ Azezi yele a ma la yetɩ: «Fʋ bia n bɛla.» 16Tɩ dabeem kẽ ba wuu, tɩ ba pẽgra Nawẽnnɛ yetɩ: «Nawẽnnɛ nõtɔ'ɔs-kãtɛ n wa'am tõma zẽ'am.» Dee le yetɩ: «Nawẽnnɛ n wa'am tɩ a sõŋɛ a nẽrba.» 17Tɩ yetɔga la saagɛ Zude so'olʋm, la tẽn-sɛba n lɛm na wuu, tɩ ba wõm Azezi n ẽŋɛ se'em.

Azã n mise nẽrba ko'om pʋam tõm a karẽnbiisi Azezi zẽ'am

(Amatie 11:2-19)

18Tɩ Azã karẽnbiisi tɔgɛ bõn-bãma wuu pa'alɛ ẽ. Tɩ Azã wi a karẽnbiisi bayi 19tõm ba Zuudãana Azezi zẽ'am, tɩ ba ka soke ẽ yetɩ: «Fõn de la sɛka tɩ Nawẽnnɛ yetɩ a wʋn wa'am na bɩɩ, tɩ gu'ura nẽra ayẽma?» 20Tɩ karẽnbiisi la sẽŋɛ ka paagɛ Azezi zẽ'am yele ẽ yetɩ: «Azã sɛka n mise nẽrba ko'om pʋam na n tõm tõma yetɩ, tɩ soke fʋ bɩsɛ, fõn de sɛka tɩ Nawẽnnɛ yʋʋn yetɩ a wʋn wa'am na bɩɩ, tɩ gu'ura nẽra ayẽma?» 21Wakat-ẽŋa Azezi daan botɩ bã'adõma zozo'e tɩ bã'asɩ to'oto'ore tarɩ ba, la sɛba tɩ kʋlkã'arsɩ dolɩ ba n yẽ ĩmã'asʋm, dee botɩ fɔɔsɩ zozo'e nini yẽta. 22Tɩ Azezi lerge sɛba tɩ Azã tõm na yetɩ: «Sẽŋɛ-ya ka yele Azã yãma n yẽ bõn-sɛba, dee wõm se'em na wuu: Fɔɔsɩ nini yẽtɩ mɛ, tɩ kɔɔrnɔ sẽnna, tɩ kõnkɔma yẽ ĩmã'asʋm le ãna sõŋa, tɩ wansɩ wõnna, tɩ kũm vɔ'ɔra, tɩ nasdõma wõnna Nawẽnnɛ kõ-yẽlga. 23La nẽr-sɛka n ka lebrɩ poorʋm mam ĩyã tarɩ zu-yẽlga.»

24Sɛba tɩ Azã tõm na lebe kule mɛ. Tɩ Azezi yãŋa tɔgɛ nẽrba la Azã yelle yetɩ: «Yãma daan sẽŋɛ mõom tɩ ya ka bɩsɛ la bẽm? Yãma sẽŋɛ ka bɩsɛ la mõogɔ tɩ kʋsebgo mĩini bɩɩ? Ayɛɩ. 25La bẽm tɩ yãma sẽŋɛ ka bɩsɛ? Yãma sẽŋɛ ka bɩsɛ la nẽra n yɛ fu-sõma bɩɩ? Ayɛɩ. Nẽr-sɛba n yɛɛrɩ fu-sõma dee tarɩ bõn-sõma la, kẽ'erɩ la na'adõma yiɛ pʋam. 26La yãma sẽŋɛ ka bɩsɛ la bẽm? Ya sẽŋɛ ka bɩsɛ la Nawẽnnɛ nõtɔ'ɔsa bɩɩ? Ẽe. La mam yetɩ ya tɩ a de la nẽra n gãnnɩ Nawẽnnɛ nõtɔ'ɔsa. 27La de la ẽŋa yelle tɩ la gʋlsɛ Nawẽnnɛ gõŋɔ pʋam tɩ Nawẽnnɛ yetɩ:

‹Mam tõntõnna n wãna

tɩ mam tõm tɩ a dẽŋɛ fʋ nẽŋa malgɛ sore bɔ fɔ.›

28Mam yetɩ ya tɩ nẽrsaalba tɩ ba dɔgɛ la wuu pʋam, nẽra ka boe n gãnnɩ Azã, la nẽr-sɛka n de pɩka Nawẽnnɛ so'olʋm na pʋam gãnnɩ Azã mɛ.

29La nẽrba la wuu, baa la lampo-tɔ'ɔsrɩba la n wõm Azã yetɔga la, ba basɛ tɩ Azã mise ba ko'om pʋam mɛ. Bɛla pa'alɩ mɛ tɩ ba sakɛ mɛ tɩ Nawẽnnɛ n tarɩ sɩra. 30La Farisi dõma, la Nawẽnnɛ lɔɔ karẽnsãandõma n zagsɛ tɩ Azã ka mise ba ko'om pʋam na, ba zagsɛ la bõn-sɛba tɩ Nawẽnnɛ yetɩ a ẽŋɛ bɔ ba la.»

31Tɩ Azezi le yetɩ: «Bẽm tɩ mam wʋn dɩkɛ makɛ la zamãan-ẽna wã nẽrba n ɩtɩ se'em na. Ba ɩrgɔ wõn na bẽm? 32Ba ãn wʋ kɔma n zĩ da'am wi'ira taaba yetɩ: ‹Tõma peebe wɩɩsɩ mɛ, tɩ yãma zagsɛ ka wa. Tɩ tõma yõom kʋʋrɛ yõoma, tɩ yãma ka kɛlla.› 33Se'ere n soe la, Azã n misri nẽrba ko'om pʋam na wa'am mɛ wa lʋta nõorɛ, dee ka yũura dãam, tɩ ba yetɩ kʋlkã'arga n dolɩ ẽ. 34Tɩ Nẽrsaala Dayʋa la wa'am wa dita dee yũura, tɩ ba yetɩ, a de la dita, la dã-yũura, la lampo-tɔ'ɔsrɩba la tõon-be'ero dõma sɩrɛ. 35Nẽr-sɛba n sakrɩ Nawẽnnɛ yɛm n boorɩ se'em na n mi tɩ a tarɩ yɛm.»

Azezi boe Asimõ yire

36Farisi nẽra ayɩla yʋ'ʋrɛ n de Asimõ n daan wi Azezi tɩ a wa'am ẽŋa yire tɩ ba di. Tɩ Azezi sẽŋɛ yire la ka zĩ'ire bɔna mĩ tɩ a di. 37La pɔka n boe tẽŋa la pʋam tõnna yalsɩ tõoma. La pɔka la n wõm tɩ Azezi boe Farisi nẽra la yire dita la, tɩ a tarɩ albatrɩ dugla n pɩrɛ la tɩdarɛ kaam yũuŋo n ãn sõŋa wa'am Azezi zẽ'am. 38Yãŋa ze'ele lɛm Azezi nãma bɔba kɛlla. Tɩ a nintãm yɛsra tɔgra Azezi nãma zuo. Tɩ pɔka la suure duuse Azezi nãma la, la a zomto, dee kɔkɛ a nãma la, sõogɛ ba la tɩdarɛ kaam na.

39Tɩ Farisi nẽra la n wi Azezi la yẽ bɛla, tẽ'esɛ yetɩ: «Bʋra-ẽna sãn dɛna Nawẽnnɛ nõtɔ'ɔsa, a wʋn bãŋɛ nɩ pɔg-ẽna n kalʋm ẽ wã n de nẽr-sɛka, a wʋn bãŋɛ nɩ tɩ a tõnnɩ la yalsɩ tõoma.»

40Tɩ Azezi yele ẽ yetɩ: «Asimõ, mam tarɩ la sɛla tɩ m yele fo.» Tɩ Asimõ lerge ẽ yetɩ: «Karẽnsãama, yele!» 41Tɩ Azezi yele ẽ yetɩ: «Nẽra n daan boe tɩ nẽrba bayi tara a sãnnɛ. Nẽra ayɩla sãnnɛ de la lig-kõba kɔbsnuu. Tɩ ayẽma la mẽ sãnnɛ dɛna lig-kõba pinuu. 42Tɩ ba daan ka tãna wʋn yɔ ẽ a ligri la. Tɩ a basɛ ligri la bɔ ba. Bãma bayi la, ãne n wʋn nõŋɛ ligri la dãana gãnna?» 43Tɩ Asimõ lerge ẽ yetɩ: «Mam tẽ'esɛ tɩ sɛka sãnnɛ n zo'oge la.» Tɩ Azezi yele ẽ yetɩ: «Fõn lerge se'em na de la sɩra.» 44Dee gelge bɩsɛ pɔka la, yele Asimõ yetɩ: «Fõn yẽ pɔka wã? Mam n kẽ fõn yire la, fõn ka bɔ mam ko'om tɩ mam peege m nãma. La pɔka la peege mam nãma mɛ la a nintãm, dee duuse ba la a zomto. 45Fõn ka kɔkɛ mam tɩ la pa'alɛ tɩ fʋ to'oge mam sõŋa. La mam n kẽ'em na, pɔka la kɔkɛ mam nãma mɛ ka basɛ. 46La fõn ka nã'asɛ mam ẽŋɛ kaam mam zuugo, la a sõogɛ mam nãma mɛ la tɩdarɛ kaam. 47Bɛla ĩyã tɩ mam yele fʋ yetɩ, Nawẽnnɛ basɛ a tõon-be'ero n zo'oge la taalɛ mɛ. Bɛla n soe tɩ a nõŋrɛ la zo'oge. La nẽr-sɛka tɩ Nawẽnnɛ basɛ a tõon-be'ero taalɛ fẽfẽe la, a nõŋrɛ mẽ de la fẽe.»

48Azezi yele bɛla, dee yele pɔka la yetɩ: «Fʋ tõon-be'ero taalɛ ka le bɔna fʋ zuo.» 49Tɩ sɛba n daan diti la ẽ na tɔgra la taaba sɔkra yetɩ: «A tẽ'esɛ tɩ ẽŋa de la ãne basɛ nẽrba tõon-be'ero taalɛ?» 50Tɩ Azezi yele pɔka la yetɩ: «Fõn bɔ mam sɩra la ĩyã n fãagɛ fɔ basɛ. Sẽŋɛ la sũ-mã'asʋm.»

Aktualisht i përzgjedhur:

Aluki 7: gurDBL

Thekso

Ndaje

Copy