Jenasis 6
6
Pipul bin dumbat nogudbala ting
1Wal bigmob pipul bin jidanbat langa ebri kantri na, en ola pipul bin abumbat bigismob biginini.
2Bambai na najakain spirit bin lukinatbat ol detlot purdibala gel, en detlot spirit bin go en pikimat wujan gel deibin wandim, en deibin merrit langa detlot gel.
3Afta na YAWEI det trubala God bin tok langa imselp, “Ai kaan kipgon larrambat ola pipul jidanbat laibala longtaim, dumaji olabat oni pipul. Wal oni 120 yiya dei garra gajimap. Afta tharran, binij.”
4Afta na detlot gel hubin merrit langa detlot spirit bin abum biginini olabat, en deibin gulum olabat Nefalim pipul, en afta wen olabat mami bin dai, detlot Nefalim pipul bin kipgon jidanbat langa olabat mami kantri, en deibin ol brabli strongbala pipul, en deibin jidan bigneim.#Nam 13:33
5Bambai na YAWEI bin luk ebrijing weya ola pipul bin dumbat bin brabli nogudwan, en God bin luk ebrijing weya deibin jinggabat olataim bin brabli nogudwan du.
6,7Wal wen God bin luk ola pipul bin nogudbala lagijat, imbin jidan brabli nogudbinji, en imbin tok langa imselp, “Wotfo aibin meigim dislot pipul olabat? Ai garra binijimap olabat langa ebri kantri. Ai garra binijimap ola pipul en ola enimul du. Wotfo aibin meigim olabat?” Lagijat na God bin tok.
Nowa
8Wal oni wanbala men deya bin meigim YAWEI gudbinji. Det men bin neim Nowa.#Meth 24:37; Luk 17:26; 1 Pida 3:20 9,10Imbin abum thribala san neim Shem, Hem en Jeifeth, en imbin gudbala men. Nobodi bin oldei faindim eni rong langa im, en imbin oldei bulurrum God brabliwei.#2 Pida 2:5
11,12Wal det taim na ol detlot pipul langa ebri kantri bin ol nogudbala, en dei nomo bin stap faidabat oldei.
Wal God bin lukinat olabat, en imbin luk ol detlot ting weya deibin oldei dumbat bin brabli nogud, dumaji olabat bin meigim ola kantri ebriweya nogudwan.
13Afta na God bin tok langa Nowa, “Ai garra binijimap ola pipul, dumaji olabat oldei dumbat nogudbala ting. Ebri kantri jidan oni garram detlot nogudbala ting. Wal ai garra binijimap olabat holot na. 14Bat yu garra meigim bout blanga yuselp. Yu garra meigim det bout garram gudwan timba, en yu garra peindim det bout garram bitjaman insaid en atsaid. 15Lagijat na yu garra meigim det bout. 133 mita longwei, 22 mita kroswei en 13 mita streit apendan, 16en yu garra meigim thribala rum langa det bout. Yu garra meigim lodanwan rum, midulwan rum en ontopwan rum, en yu garra pudum ruf langa det bout du, en yu garra libum gep olaran blanga windo, en yu garra meigim wanbala bigwan dowa langa said. 17Yu garra meigim det bout lagijat, dumaji ai garra jandim bigbala fladwoda langa ebri kantri, en det fladwoda garra draundim ebrijing, en ai garra binijimap ebrijing weya jidan laibala. Ebribodi garra dai.
18“Oni langa yu na ai garra meigim strongwan pramis. Yu garra gowin langa det bout garram yu waif en garram det thribala san blanga yu en garram olabat thribala waif. 19En yu garra gajim dubala difrinkain enimul, boiwan en gelwan, en yu garra pudum olabat langa det bout blanga bridabat afta wen det fladwoda garra godan. 20Yu garra gajim olkain bard en olkain enimul. Nomeda olabat bigwan o lilwan, bat stil yu garra gajim olabat, en yu garra pudum olabat langa det bout weya olabat kaan draun. 21En yu garra gajim daga du blanga yu en yu femili en blanga ola enimul.” Lagijat na God bin tok.
22Wal Nowa bin duwit langa God, en imbin dum ebrijing weya God bin dalim im blanga dum.#Hib 11:7
Aktualisht i përzgjedhur:
Jenasis 6: rop
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2019, Wycliffe Bible Translators, Inc. All rights reserved.