Югьан 12
12
Иса Чан дустарихъди Вифанияйиъ хьуб
1Пасхайин машквар ккебгъуз йирхьуд йигъ ккимиди, Иса Чав чӀиви гъапӀу Лазар яшамиш шулайи Вифанияйиз гъюру. 2Дурари Дугъан сагълугънаан хураг гьязур апӀуру. Марфа суфрайихъ Исайин гъайгъушнаъ айи. Суфрайихъ хъайидарихъди Исайин багахь Лазарра деънайи. 3Марʼямди, нард гьарин гизаф багьа вуйи марцци ягъ дубхну, Исайин ликарикан ктатуру ва Дугъан ликар чан кушарихьди кжикуру. Вари хал аьтринсиб ицци ниърахьди абцӀру.
4Исайин ученикарикан сари, хъасин Агъа масу туврури, Искариотдиан вуйи Симондин бай Ягьудайи кӀуру:
5– Гьаму ягъ, шубудварж арсран пулихъ масу тувну, пул касибариз пай апӀуз гьаз шулдайихъа?
6Дугъу мици, касибарин гъаннаъ ади ваъ, хъа учв тӀафал вуди хьпаз лигну гъапиб вуйи, гьаз гъапиш дугъахь уртахъ вуйи пулин мажник хьайи ва саспиган, чан тямягьяр гьуркӀуз, гьадму пуликан харж апӀуйи.
7Гьадмуган Исайи кӀуру:
– Думу сикинди гъитай! Дугъу му ягъ Узу накьвдик кивру йигъаз гьязур дапӀнайиб ву. 8Касибар гьарган учвухъди хьиди, хъа Узу учвухъди гьарган хьидарза.
9Жугьдарикан гизафдариз Иса душваъ айиб аьгъю дубхьну, Дугъу чӀиви гъапӀу Лазаризра лигуз кади, дурар Исайихьна гъюру. 10Гьадмуган маллйирин аьхюдари Лазарра йикӀбан къарар адабгънайи, 11гьаз гъапиш гьадгъулантина, кавхйирна маллйир гъитну, гизаф жугьдар Исайихъ хъугънийи.
Ерусалимдиз гъюрайи Иса тебрик апӀуб
12Хъайигъан машквраз гъафи халкь, Иса Ерусалимдиз гъюруб деебхьну, 13хурмайин гьарин кюлерра хьади, Исайин улихьна, гьамцдар чӀигъар апӀури, удубчӀвуру:
Агъайин ччвурнахъ гъюрайи Израилин Паччагьдиз
ужʼвал ибшри!
14Иса, саб гъудугъ дибихъну, гьаддиин элеуру, фицики Гирами китабариъ дибикӀна: 15«ГучӀ мапӀан, Сиондин риш! Лиг, яв Паччагь увухьна жигьил даждиинди гъиди».
16Исайин ученикар сифте мидин гъавриъ ахъундайи, хъа кьанди Иса Аллагьдин аднаъ гъашиган, Иса гьамци гъюваликан Гирами китабариъ дибикӀнайиб дурарин кӀваина гъафнийи, ва гьаци дурари Думу къаршуламишра гъапӀнийи.
Адмийири Исайикан ктибтуб
17Лазар чӀиви апӀруган, Исайихъди хъайидари дидин гьякьнаан варидариз ктибтури гъахьну, 18гьаддиз халкьди Иса гьамци тебрик апӀури къаршуламиш гъапӀнийи, гьаз гъапиш варидариз гьадму аьламат улупур Думу вуйибдикан деебхьнайи. 19Хъа фарисйири чиб-чпиз кӀуйи:
– Рябкъюранчвуз, фукӀа-мукӀа апӀуз ухьу кьувватсуз ву. Вари Гьадгъахъди гъягъюра!
20Аллагьдиз икрам апӀуз машквраз гъафидарин арайиъ грекарра айи. 21Дурари, Галилей уьлкейиъ айи Вифсайдайиан вуйи Филип кӀуру касдихьна дуфну, гьамци кӀури саб тӀалаб апӀуру:
– Я ич аьхюр, учуз Иса рякъюз ккунди ачуз.
22Филипди душну Андрейиз, хъа дурар кьюридра Исайихьна душну, Дугъаз мидкан ктибтуру.
23Исайи гъапи:
– Аллагьдин аднаъ шлу Инсаниятдин Балин сяаьт улубкьну! 24Гьякьлу вуйи гьякь кӀуразачвуз: сабан дяхнин удар жилʼина абхъну дарчӀиш, думу гьаци сабди гъубзди, хъа гъабчӀиш, диди бегьем мягьсул хибди.
25Шлиз чан уьмур багьади вуш, гьацири думу пуч апӀура, хъа шлиз гьаму дюнʼяйиин чан уьмур даккунди вуш, гьацири думу ккудудубкӀру уьмриз уьбхюра. 26Фуж Йиз гъуллугънаъ аш, гъит гьацир Йиз шилнаъди гъюри! Ва Узу наан аш, гьадушваъ Йиз гъуллугъчира хьиди. Фуж Йиз гъуллугънаъ аш, гьацир Йиз Адашди за апӀиди.
Исайи Чан аьжаликан пуб
27Гьамус Йиз юкӀв гъалабну абцӀна! Фу пну ккунду Узу? ПидикӀан: «Я Адаш! Узу гьаму гьялнаккан уьрх!» Саки Узу му дюнʼяйиз гьаддиз дуфназа – гьаму гьял бадали! Адлу апӀин Яв ччвур, Адаш!
28Гьадму арайиъ завариан дих атӀабгуру:
– Адлу гъапӀунза ва хъана адлу апӀидиза!
29Гьадушвахъ дугъужнайи халкь думу дихнахъ хъпехъурайи. Садари, завар гъарахну кӀурайи; тмундари, Дугъахъди малайик гъулхну, кӀуйи.
30Исайи дурариз жаваб вуди кӀуру:
– Му дих Узуз вуйиб дайи, хъа думу халкь бадали вуйи! 31Му дюнʼяйин суд апӀру вахт, магьа, хъубкьнура ву. Гьамус му дюнʼяйин гьякимдар (иблис) тина утӀуккну хьиди! 32Хъа Узу жилилан за гъахьиган, Узу варидарихьди Узухьинди иб тувуз гъитдиза.
33Гьаму гафариинди Дугъу дурариз, Учв фициб аьжалиинди йикӀуруш, улупнийи.
34– Учуз Гирами китабариан Месигь гьарган учухъди шлуваликан аьгъячуз, – гъапи халкьди. – Увхьан фици пуз шулвухьан, Инсаниятдин Бай завариз зигиди, кӀури? Ва фуж ву, Думу Инсаниятдин Бай?
35Исайи дурариз кӀуру:
– СацӀиб вахтнаътӀан акв учвухъди гъубзидар. Гьаци вуйиган, Учву мучӀушну ккадраъбан бадали, сабан акуди имиди, гъарахай. Фицики фуж мучӀушнаъди гъяраш, гьацириз учв наанди илтӀикӀнашра, аьгъдар. 36Хъа сабан учвуз аку апӀурамиди, аку аквнахъ хъугъай ва аквнан веледар хьидичва!
Гьаму гафар дупну, Иса гъягъюру ва дурарихьан жин шулу. 37Дугъу дурарин улихь гьамкьан аьламатар гъапӀнушра, аммаки дурар, дидизра дилигди, Дугъахъ хъугъдайи. 38Гьамци Ишая пайгъамбри дупнайи гафар тамам духьну ккундийи. Дугъу гъапнийи:
«Учхьан гъеебхьубдихъ фуж хъугъну, Агъа? Шлиз ачухъ гъабхьнухъа Агъайин кьудрат?»
39Ва гьаддиз дурар хъугъуз удукьрудар дайи, хъана Ишаяйи кӀуруганси:
40«Аллагьди дурарин улар кур гъапӀнийи, дурарин фикир хъунти гъапӀнийи, гьаци вуйиган, улар ади дярябкърудар ва фикирниинди гъавриъ адрахърудар. Гьаци ккундарш, Узухьинди илтӀикӀрийи, ва Узу дурар сагъ апӀидийза».
41Ишаяйи му гафар, чаз улихьмиди Исайин адлувал гъябкъиган, гъапидар вуйи.
42Агъсакъларин арайиъра кмиди Исайихъ хъугънайидар цӀиб адайи, хъа дурари дидкан, фарисйири чпи мистариан утӀруккбан бадали, ачухъди кӀурдайи. 43Адмийирин тярифар дурариз Аллагьдин адлувалтӀан зина вуйи.
Месигьди туву аьгъювалариинди ичв суд хьибди
44Исайи аьхю дихниинди гъапи:
– Фуж Узухъ хъугъраш, гьацир Узухъ хъугърадар, хъа Узу Гьаурихъ хъугъра. 45Шлиз Узу рякъюраш, гьацириз Узу Гьаур рякъюра. 46Узу акв вуза ва Узухъ хъугъру гьарсар мучӀушнаъ гъудрузбан бадали дюнʼяйиз дуфназа. 47Эгер шлиз Йиз гафар деерхьну, дурар тамам дарапӀиш, Узу гьацирин суд апӀидиза, гьаз гъапиш Узу дюнʼяйиз суд апӀуз ваъ, хъа думу уьбхюз дуфнайир вуза. 48Узу шли нигь апӀураш ва Йиз Гаф кьабул апӀуз даккнириз, гьамустӀанра судья а: Узу дупнайи Гаф – магьа судья, гъиямат йигъан суд апӀрур! 49Фицики Узу Йиз Узхьан гъапиб дариз – му Узу гьау Адашдин, Узуз вуйи амур ву, фу кӀуруш ва фици кӀуруш. 50Узуз аьгъязуз: Дугъан амур – му зат ккудудубкӀру уьмур ву. Узу анжагъ Узуз Адашди йип гъапиб кӀураза.
Aktualisht i përzgjedhur:
Югьан 12: ТабГК
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2010, 2013, 2016, 2018, 2023