Лука 14
14
Фарисейин хулаъ
1Саб султ йигъан Иса фарисйирин гьякимарикан сарин хулаз уьл ипӀуз гъюбакк ккуркьру; хъа, Дугъу гьапӀруш, дурари ул хъипнийи. 2Исайин улихь хамракк шид уч шлу аьзар кайи сар кас деънайи. 3Мициб дюшюшназ лигну, Исайи къанунчйирихьанна фарисйирихьан гьерхру:
– Султ йигъан духтирвал апӀуз хай шулин?
4Дурар ккебехъну гъузру. Дугъу му аьзарлу дидисну, сагъ дапӀну, хулаз деетуру.
5Мидихъди сабси Дугъу гъапи:
– Нагагь учвкан сарин бай вая йиц фуриъ абхъиш, дугъу, султ йигъ вушра, думу дишлади адабгъидаринхъа?
6Дурарихьан Исайиз жаваб тувуз гъабхьундар.
«Шли учв заан апӀури гъашиш»
7Дих дапӀнайидари ужудар йишвар ктагъуради дябкъну, Исайи дурариз тахалус ктибтуру:
8– Сари увуз сумчриз гъюб теклиф гъапӀиган, ужуб йишвʼин медеан, гьаз гъапиш гъач дупнайидарикан фужкӀа увутӀан артухъур вуди гъабшиш, 9хъа увузна дугъаз теклиф гъапӀури, увухьна дуфну: «Мушв гьадгъан йишв ву», кӀуруси дарибшри, даршиш думуган, начра дубхьну, харжи йишвʼин деуз мажбур хьидива. 10Саки увуз гъач дупнайиган, дуфну харжи йишвʼин деъ, увуз гъач гъапири, увухьна дуфну: «Дуст кас! Минаси кудучӀв» кӀуруганси. Гьадмуган увуз увухъди деънайидарин улихь артухъ гьюрмат хьибди. 11Фицики, шли чав учв за апӀури гъашиш, гьадму асккан хьиди, хъа учв аскканди дисрур заан хьиди.
Хулан эйсийиз туву тербия
12Хъа хулан эйсийизра Исайи кӀуру:
– Лисундин вая хябяхъдин хураг апӀруган, я яв дустариз, я яв чвйириз, я яв мирасариз, ясана девлетлу гъуншйириз гъач макӀан, дурари, увузра гъач дупну, уву гьивуб увухьна хътадабкруганси. 13Хъа шадвал апӀру вахтна аьжузариз, шикастариз, ликудариз, курдариз дих апӀин. 14Ва уву бахтавар хьидива, фицики дурарихьан чпиз гьивуб увуз кьяляхъ апӀуз хьибдар, хъа явра, дугъридар чӀиви гъашиган, гьисабнаъ хьибдияв.
Зурба дем дюзмиш гъапӀурикан тахалус
15Му гафар гъеерхьиган, Исайин гъвалахъ деънайидарикан сари кӀуру:
– Аллагьдин Паччагьлугъдиъ уьл ипӀрур хушбахтавар ву!
16Исайи дугъаз гьамци кӀуру:
– Сар касди, аьхю шадвал дюзмиш дапӀну, гизафдариз гъач гъапну 17ва, хябяхъ гъабшиган, чан лукӀ хялариз: «Гъачай, гьарсаб гьязур духьна» пуз, гьаъру. 18Хъа вардари, гаф саб дапӀнайиганси, кӀулар ккадагъуз хъюгъну. Сарпири дугъаз гъапну: «Узу жил гъадабгъназа ва узу, дина душну, дидиз дилигну ккунду, ккун апӀурза узлан хил алдабгъуб». 19Тмунури гъапну: «Узу хьуд жут йицар гъадагъназа ва узу дурариз лигуз душну ккунду, узлан хил алдабгъуб ккун апӀурза». 20Шубурпири: «Узу багарихьди эвлемиш духьнамиза ва гьаддиз гъюз шулдарзухьан» кӀуру. 21Хъа хъадакну гъафи гьадму лукӀру чан агъайиз гьамрар вари ктитну. Гьадмуган хъял кубчӀву хулан эйсийи чан лукӀраз гъапну: «Гъарах, шагьрин кючйиригъян дагну, тяди мина аьжузар, шикастдар, ликудар ва курдар хъади гъач». 22ЛукӀрура, душну гьаци дапӀну, кӀуру: «Агъа, яв буйругъ тамам гъапӀунза, вушра саб хъана йишв ими». 23Агъайи лукӀраз гъапну: «Душну, кючйириан хъана хъади гъач, йиз хулан суфра хъабцӀруси апӀин. 24КӀуразавуз: гьадму улихьна дих дапӀнайидарикан сарикьан йиз хураг ипӀидар».
Исайин ученик хьувалин шартӀар
25Сабан Исайихъди хайлин халкь гъюради гъабхьну ва Дугъу, дурарихьинди илдицну, гъапи:
26– Эгер сар кас Узухьна, чан адашна дада, хпирна веледар, чвйирна чйир, гьацира чан хусуси уьмур нигь дапӀну дарфиш, дугъкан Йиз ученик хьидар. 27Чан хач кьялʼин алдрурихьан, ва Узухъди дяргърюрихьан Йиз ученик хьуз хьибдар. 28Учвкан фунури, хулар дивуз ккунди, сифте деъну, дидиз удучӀвру харжар гьисаб дарапӀди, думу дивну ккудубкӀбан бадали фйир лазим вуш гьисабназ гъададагъиш, 29ва шибритӀар ирчну, хулар ккудукӀуз дархьиш, мици гъяркъдар вари дугъʼин гьамци кӀури аьлхъидарин: 30«Гьаму касдихьан, хулар дивуз хъюгъну, ккудуркӀуз гъабхьундар?»
31Ясана фуну паччагьди, чахъ йицӀуд агъзур эскер хъади, жара паччагьдиина дяви апӀуз гъягъруган, чаина гъюрайи къад агъзур эскер айи кьушмихъди дяви апӀуз удукьидиш, улихьмиди деъну, везирарихъди мясляаьт дарапӀди гъитур? 32Ясана, гьадму кьушум ярхлаъ имиди, дугъу дяви дарапӀбан бадали йикьрар апӀуз вакилар гьаидарин? 33Гьамци учвкан гьарурихьан, чаз вари айибдихьан гьудудучӀвиш, Йиз ученик хьуз хьидар.
Кьилан кьилзивал
34Кьил ужуб мутму ву; хъа эгер кьилан кьилзишин гъудубгиш, думу фти кьилзи апӀиди? 35Думу я ругдиз, я пейиндиз ярамиш дар; думу тина гатӀабхьур. Шлин ибариз ебхьураш, гъит ебхьри!
Aktualisht i përzgjedhur:
Лука 14: ТабГК
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2010, 2013, 2016, 2018, 2023