Matyù 14
14
Ndwuumə̀ nɨ Heròdə̀ à lə̀ zhwuutə̀nə a Jònə ngàŋə̀ àŋâ àkẅiirə̀ nchyə
(Mrk 6.14-29; Luk 9.7-9)
1A lə̀ pə nkwùə̀ ghu, Heròdə̀ nɨ à lə̀ pənə ɨ̀fò Galìlyə̂ a zuʼù ànwùə̀ mbə̀ʼə nɨ̀linə̀ nɨ Yěsû, 2ntyiʼə̀ nshwəŋə̀ ambo pɨ̀ntsɨ̀ pɨ ntoʼò pɨ ɨ̀fò lo, “A tyìʼə̀ Jònə ngàŋə̀ àŋâ àkẅiirə̀ nchyə nɨ à zhwuumə̀nə a nɨ̀wɨghə̀. La ɨ̀sùmə nɨ mɨ̀tɨ̀ŋnə̀ mə nfàʼà amwuə ze la.”
3Ntiinə a lə̀ kɨnə pə nkwùə̀ ghu la nɨ Heròdə̀ à kô mə a Jònə nkorə̀ e nchyâ a ndâ ɨ̀tsaŋə̀ ntii Hèrodyàsə̀ ngẅùə momaa e Filibə̀. 4Ntiinə Jònə à lə̀ ghə̀nə ambo ze nshwəŋə̀ lo, “Mbòomə ɨ̀wə̀ənə̀ à nèrə̀ lo ka a kùʼnə̀ e ambo ghò a nɨ zoʼò a mə̀ngyə̌ wə̀.” 5À lə̀ patə mmə ntàʼà zhwuutə̀ pə a Jònə la, mmə mbô ɨ̀myə̂ mɨ pə̀ənə̀ ntiinə pobə lə̀ pyiimə̀nə lo Jònə a ngàŋə̀ ntwuumə̀ Nẅùə̀.
6La nkwùə̀ nɨ njyə̂ nɨ pɨ lə̀ pyə̂nə a Heròdə̀ ɨ̀ lə̀ kùʼnə, moonə̀ Hèrodyàsə̀ ghu mə̀ngyə̌ à lə̀ tô mbinə̀ àpinə̀ a mbyə̀ pànə̀ nɨ pɨ lə̀ fuŋə̀nə la, ntyiʼə̀ ngɨ̀rə̀ ntɨŋmə̀ Heròdə̀ ɨ pə nɨ nɨ̀ghaʼà. 7A Tyiʼə̀ nkaʼà lo, “Mbɨ ŋâ e nɨ àzwuumə̀ àtsùmə̀ nɨ à pyiitə̀nə!” 8Mǎ e a tinə̀ e nshwəŋə̀ lo â shwəŋə̀ ambo Heròdə̀ lo, “Ŋâ àtwuə̀ Jònə ngàŋə̀ àŋâ àkẅiirə̀ nchyə ambo mɨ̀ŋə̀ amwuə àpàpə̀ àkaŋə̀.”
9Mbɨ̀ŋmə̀ ɨ̀fò ɨ̀ lə̀ kwɨghə̀ mbə̀ʼə ànwùə̀ ghu, la tsaʼnə à lə̀ kàʼnə a mbyə̀ pànə̀ la, a shwəŋə̀ lo pɨ ghɨ̀rə̀ a lenə. 10À lə̀ twuumə̀ pànə̀ pɨ ghə̀ ndə̂ àtwuə̀ Jònə a ndâ ɨ̀tsaŋə̀, 11ndòo àtwuə̀ ghu ŋŋâ ambo mômə̀ngyə̌ wa a ghə̀ ŋŋâ ambo mǎ e. 12Ɨ̀zùŋə̀ ndzùmə̀ Jònə lə̀ zuʼù, ngə̀ ndòo àkwuə̀ e ntẅəŋə̀, ntyiʼə̀ ngə̀ ntiitə̀ a Yěsû.
Yěsû a zə̂ pə̀ənə̀ nkaamə̀ ɨtaanə̀
(Mrk 6.30-44; Luk 9.10-17)
13Nkwùə̀ nɨ Yěsû à lə̀ zuʼnə ànwùə̀ zèrə zə mbə̀ʼə Jònə la, à lə̀ myàʼtə̀ alyiʼə ghu nkwuunə̀ amwuə àkànwuʼə ndèrə̀ e amwuə yètse alyiʼə nɨ ka pànə̀ lə̀ pə e ghu mbə̀ʼə pə e ghu ze nɨ ze. Nkwùə̀ nɨ àpùŋə̀ pànə̀ za lə̀ zuʼnə a lenə la, pobə lə̀ furə̀ amwuə mɨ̀mbòmpə mɨ ɨ̀laʼà ɨ̀mobə ngyìinə̀ nɨ mɨ̀kwùə̀ ndzùŋə̀ e ghu. 14Tsaʼnə Yěsû à lə̀ mənə nfurə̀ amwuə àkànwuʼə za, à lə̀ zəənə̀ àpùŋə̀ pànə̀ za, ntɨŋmə̀ e ɨ lẅenə̀ nɨ àsòmnə̀. A tyiʼə̀ mbarə̀ pɨghoonə nɨ pɨ lə̀ pənə amwuə pobə.
15A pə a nkwə̌ njyə̂ ghu, ɨ̀zùŋə̀ ndzùmə̀ ɨ̀pe tô nshwəŋə̀ ambo ze lo, “Nkwùə̀ ɨ̀ zə̀ ndàŋə̀, alyiʼə zə a pə ɨ̀fùmə̀. Ghɨ̀rə̀ pànə̀ pə sìimə̀ mbə̀ʼə pobə ghə̀ ntàʼà àzwuumə̀ yè zɨghə̀nə amwuə pɨ̀tse ɨ̀laʼà ndzwuunə̀ ndzɨghə̀.”
16Yěsû a kẅùə̀ ambo pobə lo, “Mbə̀ʼə pobə sìimə̀ ghobə apə̀. Pɨghə àtwuə̀ ɨ̀pɨ̀ŋmə̀ àzɨghə nɨ tàʼà àzwuumə̀ ŋŋâ pobə̂ zɨghə̀.”
17Pobə kẅùə̀ ambo ze lo, “Àzwuumə̀ nɨ pəə pənə nɨ zèrə̀ a ɨ̀shyə̂ nɨ̀ghə̂ a ndàʼà ntsɨŋə̀ àpaanə̀ ɨtaanə̀ nɨ ɨ̀swuə̀ ɨpaa.”
18Yěsû a shwəŋə̀ lo, “Nɨ̀ lòo pèrə ntô ŋŋâ ambo mɨ̀ŋə̀.” 19A shwəŋə̀ ambo àpùŋə̀ pànə̀ za lo pobə̂ nwuunə̀ a ɨ̀shyə̂ aŋunə nɨ̀yìinə. Nkwùə̀ nɨ pobə lə̀ nwuunə̀nə a ɨ̀shyə̂, à lə̀ lòo ntsɨŋə̀ àpaanə̀ za ɨtaanə̀ ŋŋaŋə̀ ɨ̀myə̂ ɨ̀me a àtɨ̀ghə ŋŋâ a mɨyàa ambo Nẅùə̀ mbiʼtə̀ a zèrə ŋŋâ ambo ɨ̀zùŋə̀ ndzùmə̀ ɨ̀pe pobə ghàpə̀ ambo pànə̀ pa. 20Ŋwùə̀ ntsùmə̀ à lə̀ zɨghə̀ ndzwurə̀, ɨ̀zùŋə̀ ndzùmə̀ ɨ̀pe pa chi ndyàa ɨ̀chepə̀ ndẅenə̀ mɨnkaamə ntsòbə̀ ɨpaa. 21Mbyàŋnə̀ nɨ lə̀ zɨghə̀nə mɨ̀zɨghə̀ mə lə̀ pə tsaʼa nkaamə̀ ɨtaanə̀, la ka pɨ shaŋə̀ e pə̀ngyə̌ pobə ɨ̀poonə̀.
Yěsû a yìinə̀ àtwuə̀ nchyə
(Mrk 6.45-52; Jòn 6.15-21)
22Yěsû à lə̀ zùŋə̀ ngɨ̀rə̀ ɨ̀zùŋə̀ ndzùmə̀ ɨ̀pe kwuunə̀ amwuə àkànwuʼə ntwuumə̀ ndèrə̀ amwuə zhyə̀ ndzìnə a mbyə̀ ze. A tyiʼə̀ ngoŋə̀ a ndzùmə̀ nsìimə̀ àpùŋə̀ pànə̀ za. 23Tsaʼnə àpùŋə̀ pànə̀ za lə̀ sìimə̀nə la, à lə̀ koʼò ndèrə̀ àtwuə̀ mbarə̀ a nɨ chàʼtə̀ a Nẅùə̀ ze nɨ ze nkwùə̀ nkwə̌. 24Nkɨ pə nɨ àkànwuʼə za a mìntə̀ mə ndèrə̀ amwuə nchyə ndyə̌ sàa ntiinə fèrə̀ à lə̀ tɨ̀ŋnə̀ nchyə ɨ tyiʼə̀ ntinə̀ ndèrə̀ ntinə̀ nkwə̂.
25A pə a nkòʼò njyə̂, Yěsû a yìinə̀ àtwuə̀ nchyə ntô ambo ɨ̀zùŋə̀ ndzùmə̀ ɨ̀pe pa. 26Nkwùə̀ nɨ pobə lə̀ zəənə̀nə e a mə ngyìinə̀ àtwuə̀ nchyə la, àlùmə a lə̀ kəʼə̀ a ghobə, àkẅàrə̀ a kwuunə̀ a ghobə, pobə tyiʼə̀ nshwəŋə̀ lo, “A àzhyòbə̀.”
27Yěsû à lə̀ faʼa nshwəŋnə̀ ambo pobə lo, “Nɨ̀ ẅìimə̀ mɨ̀ntɨŋmə̀ ɨ̀mɨghə, a mɨ̀ŋə̀, kò nɨ̀ pô.”
28Pità a shwəŋə̀ ambo ze lo, “Ndòʼnə̀mbyə̂, à tə mbə ghò wə̀ shwəŋə̀ ambo mɨ̀ŋə̀ lo n̂tô a nɨ̀pwùnə ghò àtwuə̀ nchyə ghə.”
29Yěsû a shwəŋə̀ ambo ze lo, “Tô!”
Pità a furə̀ amwuə àkànwuʼə za ngyìinə̀ ntô ambo Yěsû. 30La tsaʼnə à lə̀ zəənə̀nə a fèrə̀ wa la, àkẅàrə̀ a lə̀ kwuunə̀ e a pìʼnə̀ a nɨ mìnə̀ amwuə nchyə, ntyiʼə̀ nkyiinə̀ ngyìi lo, “Ndòʼnə̀mbyə̂, chwarə̀ mə̀!”
31Yěsû a faʼa nshwùumə̀ àpô e ngẅìimə̀ e nshwəŋə̀ lo, “Àpyiimə̀ ntɨŋmə̀ o a tyiʼə̀ nkɨ̂ tyìʼə̀ lə mbə̀ʼə àkə? A ghɨ̀rə̀ àkə wə̀ pə nɨ mɨnkə?”
32Nkwùə̀ nɨ pobə lə̀ koʼnə nkwuunə̀ amwuə àkànwuʼə za, fèrə̀ wa à lə̀ ləənə̀. 33Pànə̀ nɨ pɨ lə̀ pənə amwuə àkànwuʼə za pyiimə̀ lo, “A tyìʼə̀ nkǔŋə nkuŋə lo ghǒ Moonə̀ Nẅùə̀.”
Yěsû a parə̀ pɨghoonə a àlaʼà Gennesaret
(Mrk 6.53-56)
34Tsaʼnə pobə lə̀ twuumə̀nə ndèrə̀ àlaʼà Gennesaret, 35pànə̀ pɨ alyiʼə ghu lə̀ zəənə̀ e nzhyə̂, ntsàa ntwuumə̀ alyiʼə alyiʼə a mɨ̀mbwùnə mɨ àlaʼà lo pɨ̀ shwatə̀ pɨghoonə ntô nɨ pèrə ambo Yěsû. 36Pobə lə̀ puʼù mbô ambo ze lo â myàʼtə̀ pɨghoonə pa pɨ pètə̀ àtsəŋə̀ atsəʼə e. Pànə̀ pɨ̀tsùmə̀ nɨ pɨ lə̀ pètə̀nə lə̀ tɨ̀ŋnə̀.
Aktualisht i përzgjedhur:
Matyù 14: pny
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2017, Cameroon Association for Bible Translation and Literacy