Matiyò 15

Chyənà ghɨt ye yì kùnà lâŋ wù Fùyènù

(Mâk 7.1-13)

1Ghɨt a Falàsî ghɨ le nì chichàsu saksu lesu tî lô a Jèlusalèm ben yen Jisòs buf ha wun na, 2“À mò njwô ghə te jùmtìbàm sasu chyə wi chyəna be ghàhnà agha?” Ghɨna yə teka su wo.

3Jisòs kaha buf ha ghɨna na, “Njwô ghə te ghàn khɨma sak yi Fùyènì kum sak yani yi laki agha? 4Yènfù tì jis na, ‘Ngumli bâ nì nâ’, fî jis na, ‘À sùli nâbi nde bè wûn makə nè wûn, ma ghɨ nê hi kəta hi ywe wûn.’ 5Biyani ghàn yike na, wùt làhi tunhî hi fo a shyə ha bè wûn nì ha nè wûn beka wù ti lem na yi chehì mô ma yi ti chwûnà hi fo a shyə atɨna ha Yènfù. 6Yi chwûtè ha ghàn na, wùt mu wuna kəta wi hi ngumle bè wûn. À mò lum we ghàn kùnà gha Fùyènì atɨ̂n kum sak yani yi laki. 7Ghɨt a kam kama nê ghɨ̂n! Fòktì Ìsayà tî fôktì kə nâ tum à Fùyèn kum ghàn hamok na: 8Ghɨt ghɨ̂n kokhe mu nì jwo, ke wi mu ha shyə̀ le. 9Ghɨna yena a ngə̂k halô, jyâna ghɨna kokhe mu, beka ghɨna yike gha ma à fati à ghɨ̂t, lemlò na à mò tu sak tamtu.”

Jisòs fôktì gha ghe ghɨ nê na wùt hi yule wi

(Mâk 7.14-23)

10Jisòs jis ni toŋti ghɨt a dona ghê ghɨ bên, wù jis ha ghɨna na, “Ghàn yuti ma ghàn hi khə. 11À wijə shyə ghe wùt yə a ghɨ nê na wùt hi yule wi a Yènfù ashyə̂, à bɨlà mô gha ghe ghɨ fwo a wùt a yi jwô.”

12Jùmtìbàmsu wun se bên ki buf ha wun na, wò khə na wò ye jis ni ghɨt a Falàsî ti bâŋhì lâ agha?

13Jisòs fîsì ha ghɨna na, Ghɨ nè chwokalò nâbi ghə ghe ghɨ lema teka à yomi Bôm a nyə̂. 14“Ghàn de ghɨna. Ghɨna mò ghɨt a fefana, yena wi luktu, biyani khɨŋa hi tè chwùtè wu lum ha ghɨt a fefana ale. Fèfà ki chwûtì wu lum ha ghɨ le, ma ghɨna à jɨ̀m nê fen a yi be.”

15Bità jis ha wun na, “Fòkti gha ye ngàn mi yina yike ha ghàh.”

16Jisòs buf ha ghɨna na, “Ghàn baha yè mò ta hi ywo khɨli te ghɨt ale? 17Ba yi mô na ghàn yena wi na nâbi ghə ghe wùt yə ghɨ chwo a wun wù là, ghɨ kaha chyâ fwo kə yi fwô a wun wù wùn agha? 18Biyani, gha ghe ghɨ fwo a wùt yi jwô mò ma ghɨ lo a wun a yi təm, a mô gha ghe ghɨ nê na wù hi bu nì yulînì. 19Kwâktìnì be fwo a wùt yi təm nì gha be ghɨ le ni te, hi ywî nì hi chyə nì ywê wùt makə lɨm à wùt, nì jûmì yweni nì chwoŋi nì fəmi wamani nì hi fè jìs a ghâ be ale kum wùt. 20À ni mò gha ghe ghɨ nê na wùt hi bu nì yulînì, a bu na wùt yə teka wù su wo te sak yani yi laki chwùtè.”

Wùt ywên à tûm chwûtì bimî wuni ha Jisòs

(Mâk 7.24-30)

21Jisòs jis ni lo afû yen a bàh à yi tèk yi Tayà nì Sidòn. 22Wùt ywên yi lak yi Kanàn wùlè te wù ndùku chyə afû ben ha Jisòs hì bwata jyê jîsà na, “Kwohi seni ha mù a bâ, Wâ fə̀n Defìt! Wâ mù wù ywên yena ngə̂k nâ haŋaŋ beka wù kəta yohnà be.”

23Jisòs tê fîsì yi ghâ. Jùmtìbàmsu wunsu ben hì chyate wûn jîsà na, “Jùm wùt ywên wunâ a ghàhnà yi bàm, wù gbè bwata jyê ni, tàhè tûŋlu ghɨ̂tù.”

24Jisòs jis na, “Yènfù tum mu kə ha ghɨt a ma Isalì ghɨ̂n a ghɨ mô te njyə̀su ləhesu.”

25Wùt ywên atɨ̂n khɨŋti ben tûm a lwî a wun ashyə̂ jis na, “Bâ gàmti mu.”

26Jisòs jis ha wun na, “Yi jwôfà wi na ghɨ lyi mwə̀ mù yə̂mù mwəlà ma ghɨ maka ha busu.”

27Wùt ywên àtɨ̂n bimi jis na, “Mu khəlò yâ a bâ biyani khə kəbi na bè ndâ shihi yə̂, chyàksù hi chemlê, nâbi busu boŋa yə̂.”

28Jisòs ki jîs ha wun na, “Wò ti samhî hamok a nè wan! Yènfù nè nêlò gha ye wò khɨŋa.” Wâ wûn we tâ kə wu yu mefû.

Jisòs chwuk à ghɨt ghɨ dô kə ni

29Jisòs lô afû hi gbê yênà a yi bi lwi Galìlî, yen kwok a kun hì yùtè afû. 30Ghɨta hì bê ha wûn dô kə ni, lyê bê nì ghɨt a ngəhana nì ghɨ fefana nì ghɨt a kəblena nì kwùkù nì ghɨta ghɨ dô kə ni ghɨ yafa nì yaftu a tu nkì a tu nkì. Ghɨ ben ni lêmà a Jisòs ashyə̂, wù chwuk ghɨna. 31Ghɨt atɨna hì mô nì kani te kwùkù kaha jîsà, ghɨta ngəhana nì ghɨ kəblena gbê, fèfù kaha yena tu luk. Ghɨta yen, ni hi kokhe Yènfù ghɨt a Isalì.

Jisòs yəhi ghɨta ghɨ chyâ kamsù kìk

(Mâk 8.1-10)

32Jisòs toŋa jùmtìbàmsu wunsu jis ha ghɨna na, “Seni kwo lò mu ha ghɨt ghɨ̂n. Ghɨna ti chyə̂ nì ghàhnà a mu tuk mù tât chîn hì fê kəta wi shyə hi yə̂. Mu kòŋà wi hi jìs na ghɨna kolo a jiŋ. Wùt làhi fwo bôt a wu lum ma wù fən.”

33Jùmtìbàmsu wunsu buf ha wûn nâ, “Ghàh mò hi lyè afa mwə̀ mù yə̂mù a kun ni, mu kpene hi yəhe à ghɨ̂t atɨ̂n ghɨ dô ni?”

34Jisòs buf ha ghɨna na, “Ghàn kəta banlà mù sek afa agha?”

Ghɨna fîsì na, “Ghàh kəta ban sàmba nì yìlâ mù sek ni.”

35Jisòs jis ha ghɨt ghe na ghɨ ndokte a chyə̂. 36Ghɨna ndokò, wù lyi ban we sàmba nì yìlâ mù tɨ̂n. À nê hì mô te wù fo yòŋnà ha Yènfù, bəkti fo ha jùmtìbàmsu wunsu, ghɨna boŋ jyâtì yen ha ghɨta. 37Nâbi nde yə kwût. Jùmtìbàmsu wunsu kumti chyàk se su tì behe su lun kàsù sàmba. 38Ghɨt ghe ghɨ tì yə ndùku mô kam sù kìk, taŋa wi ywena nì mwəlà.

39Jisòs jis ghɨt atɨna kahi kolô, wù lye a ngwùk yen lumu a bàh à yi lak afa ghɨ ndùku toŋte na Magàdan.

Aktualisht i përzgjedhur:

Matiyò 15: bmv

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit Ŋwàklù Fùyèn Kàn Mù Fê (Cameron)

Matiyò 15

Vargje biblike të njohura nga
Matiyò 15

Dëgjoj Matiyò 15

Bibla:

Bum

Versioni: Ŋwàklù Fùyèn Kàn Mù Fê (Cameron) - bmv

Matiyò 15

Matiyò 15

Vargje biblike të njohura nga Matiyò 15

Dëgjoj Matiyò 15

Bibla:

Bum

Versioni: Ŋwàklù Fùyèn Kàn Mù Fê (Cameron) - bmv

Matiyò 15

Vargje biblike të njohura nga
Matiyò 15