Matiyò 17

Kə̂k yi Jisòs kwuna a kun

(Mâk 9.2-13; Lûk 9.28-36)

1À hì mô yi bàm mu tuk tufa, Jisòs lyi Bità ghê Jêms nì wâ nè wûn Jon kwok ghê ghɨna a tô kùn yì chìk yìlè, yi dâfà kə ni wùt bu afû, 2yen tan afû kə̂k yi wuni bûŋhì kwuna kə ghɨna shyə̂ ni, hì bana kə te yuchwî. Njusu wunsu kahi hì fufa kə ni, fê njə̂ntè. 3Kə ni, Musìs ghê Ìlajà fwu a ghɨna yi kə̀k hì jîsà ha Jisòs. 4Bità ki jîs ha Jisòs na, “bâ, yi jwôfàlò te ghàhnà mò afân. Wò hì kôŋà ma mu ba wìmù mù tât, ma wò hi kəta à mòk, Musìs kəta à mòk, Ìlajà kəta ghɨ le.”

5Te wù tì baha jîsà mbàksù lesu fwu fufa kə ni chwo baŋ ghɨna. Jyə̀ fwu àtɨ̂n jis na, “Wùna mò Wâ mù wù kòŋ, mu saŋle kum wûn hanɨ̂ŋ. Ghàn hi ywo ha wûn.”

6Jùmtìbàmsù Jisòs sù yu jyə̀ mi yinâ hì fânà nâ haŋaŋ fenti a chyə̂ nì lâ. 7Jisòs ben kum ghɨna jis na, “Ghàn loti kə ghàn fi fan.” 8Ghɨna lôhì yi kə̂k shihi ki Jisòs mô kə wù nɨ̂ŋ.

9Ghɨna shihi kaha chwo a kun, Jisòs chîhì ha ghɨna na, “Kə ghàn nè fôktè ha wùt gha ye ghàn yena hi yaka te Wâ Wùt bè kpo ma ghɨ kaha lohi wûn a yi kpû.”

10Jùmtìbàmsu wunsu buf ha wun na, “Ni, njwô ghə te chichàsu saksu jìsà na a kəta Ìlajà hi bèn ashyə̂ agha?”

11Jisòs jis ha ghɨna na, “Yi mô kə nâ hamok na Ìlajà bènàlò, ma wù kaha fati nâ gha jɨ̀m. 12Biyani mu jìsà ha ghàn na Ìlajà mò ma wù shyə bên, ghɨta yen wûn, biyani tê khɨlî, hì kwote kəbi ghə ghê nê ha wûn. Ghɨna bè nê kəbi ni ha Wâ Wùt. Wù bè yenalò ngə̂k a ghɨna wô.” 13Wù jis ni, jùmtìbàmsu wunsu yu khɨli na wù yê jîsà kum Jon Fo Mòlû na ya wù ndùku mô Ìlajà.

Jisòs chwuk wan wù lɨmà wùlè wu kəta yohnà be

(Mâk 9.14-29; Lûk 9.37-43a)

14Te Jisòs tì kaha chwo a kun ben kwoti ghɨta ghɨ dô kə ni. Wùt wùlè fwu a ghɨna fùtɨ̂n tum a lwî a wun ashyə̂, 15jis na, “Bâba, kwohi seni ha wâ mù wù lɨmà wunâ. Wù fenalò, yena ngə̂k nâ haŋaŋ, faŋa wi hi fen a wu wùs nì kəbi a mòlû. 16Mu ye ben nì wûn ha jùmtìbàm sasu, wù ti ghak ghɨna hi chwûk.”

17Jisòs jis na, “Ema!” À mò yìni ngwàk yì be ni yì ta hi samhi ni? Ghàhnà ghɨn nè chyə tanà yàni shyəma ghàn khɨli gha agha? Mu nè kwuta təma ma mu tan yàni nì ghàn? Wù jis ni ki jîs ha wùt atɨ̂n na, “Bi nì wan àtɨ̂n afân ha mu.” 18Wù ben nì wûn, Jisòs kântì yohnà a be atɨna, ghɨ fwu a wan àtɨ̂n wù wùn, wù tâ kə wu yu.

19Jùmtìbàmsu Jisòs sù nyamti ben ha wun buf na, “Njwô ghə a yi ye ta ghaka ghàh hi jùm à fihe a yohnà be ghɨna agha?”

20Jisòs fîsì na, “À mò beka bimi yani tobte. Mu jìsà ha ghàn hamok na ghàn hì kəta yi bimî yi tobte te se ngwìk à fùsakhì, ghàn làhi jìs ha kùn yina na, yì lo afân ma yì yen a fokô, ma yì yen kə yâ. Ghàn hì kəta yi bimî ni, ma gha yile hi ta ghaka wijə ghàn.” 21[Ghàn làhi jùm à fihi nki yohnù be te ghɨna kə wu yu afa ghàn jə̂mà fê bama yi jwô.]#17.21 Ŋwàklù su dosu mwu su kəta wi luk wûn.

Jisòs fî jis kum kpu wuni

(Mâk 9.30-32; Lûk 9.43-45)

22Jisòs nì jùmtìbàmsu wunsu yen tan a Galìlî, wù kaha jìs ha ghɨna na, “Ghɨ nè bəklelò Wâ Wùt ha ghɨta 23ma ghɨ nê ywi wûn, ma à hi mô a mu tuk mù tât, ma ghɨ kaha lohi wûn a yi kpû.”

Gha tɨni hì fo ngə̂k ha jùmtìbàmsù wunsu nâ haŋaŋ.

Jisòs jis kum ŋwàklànà

24Jisòs ghê jùmtìbàmsù wunsu tî gbê yen tan a yi tèk yi Kàbanùm, ghɨt ghe ghɨ ndùku fye ka ŋwàklànà a ndâ Fùyèn ben buf ha Bità na, “Ba chichà wanù mâkàlò ŋwàklù a ndâ Fùyèn agha?” 25Wù bimî jis na wù mâkàlò.

À hì mô te wù kaha lye a ndâ, Jisòs yitì jis ha shyə̂ ki buf ha wun na, “Wò kwàktè na ghə a Samùn, na fə̂ntù mbyi tu fye ka ŋwàklànà ha ghɨta ghɨna ma ha tumu?”

26Bità fîsì na ghɨna fye ha tumu.

Jisòs ki jîs na, “Yi hì mô ni, ghɨta fu chyə kəta wi hi tè làk à ŋwàklànà ha fə̂ntù ghɨna tu. 27Yi mô kə nâ ni, biyani yi jwôfà wi na ghàh à wò ni ma ghɨna baŋhi lâ ha ghàhnà. Ndù wu lwi ma wò tumhi chyakfu, wò yitì kwo nâbi yìni yili ashyə̂, wo yâhì jwo yi tɨni ma wò yen ka kahu. Wò yen wo fihi yen lak ŋwàklànà ghàh à wò ha ghɨna.”

Aktualisht i përzgjedhur:

Matiyò 17: bmv

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit Ŋwàklù Fùyèn Kàn Mù Fê (Cameron)

Matiyò 17

Vargje biblike të njohura nga
Matiyò 17

Dëgjoj Matiyò 17

Bibla:

Bum

Versioni: Ŋwàklù Fùyèn Kàn Mù Fê (Cameron) - bmv

Matiyò 17

Matiyò 17

Vargje biblike të njohura nga Matiyò 17

Dëgjoj Matiyò 17

Bibla:

Bum

Versioni: Ŋwàklù Fùyèn Kàn Mù Fê (Cameron) - bmv

Matiyò 17

Vargje biblike të njohura nga
Matiyò 17