Johana 16
16
1“Mimi nidzimwambira maneno gago gosi kumujenga, kwa hata mutsʼiuye nyuma. 2O atʼu a dunia andamuvuguza masinagogini. Na mwanzo hata ukati unadza urio mutʼu undakala uchiulaga mumwenga wenu, yiye unaona anamuhikirahikira Mulungu. 3Na ao andagahenda maneno gago kwakukala, kʼaamumanyire Baba Mulungu, na hata mimi. 4Ndo nidzimwambira maneno gago, kwa hata ukatiwe uchifika, mudze mukumbikire kukala, námwambira kare gago. Mino maneno gago tsʼimwambirire hangu mwanzo kwakukala, neri ni namwi.”
Kazi za Roho wa Mulungu
5Jeso waenderera kugomba achiamba, “Ela vino ninenda kwa yenihuma, na heka kʼaphana hata mumwenga wenu aniuzaye ga ko nendako? 6Hata itsʼiphokala mwi mudziudzala shenene myoyoni kwakukala, nidzimwambira maneno gago.
7“Bee ninamwambira jeri mino, kuuka kwangu ni maneno madzo kwenu, mana, nitsʼiphouka, yiye Mwavizi kʼandamukudzirira. Ela nichenda, nindakwendamuhuma amudzirire. 8Yiye Mwavizi achidza, undaafunulira lwazu-lwazu atʼu a dunia kukala, ana dambi, kʼaana haki na ulamuli wao ni wa ulongo. 9Yiye undaafunulira kukala, ana dambi, kwakukala, kʼaanikuluphira. 10Undaafunulira kʼaana haki, kwakukala, ninenda kwa Baba, namwi kʼamundanona kahiri. 11Na undaafunulira ulamuli wao ni wa ulongo, kwakukala, yiye mutawali wa yiyi dunia ulamulwa.
12“Mimi nicheri na manji ga kumwambira, ela kʼamwidima kugagwira vivi. 13Ela yiye Roho wa ujeri achidza, undamulongoza mumanye ujeri wosi, mana, yiye kʼandagomba gakwe mwenye, ela undagomba chila arisikiraro, na undamwambira chimbere maneno garigo gandalairira. 14Yiye Roho undaonyesa ubomu wangu, mana, undahwala garatʼu gangu amwambire mwimwi. 15Vya Baba vyosi ni vyangu. Gago ndigo gatumago hata nidzimwamba, yiye Roho wa Mulungu undahwala garatʼu gangu amwambire.”
Anafunzi a Jeso anashononeka ela andakudzahamirwa
16Jeso waenderera kwamba, “Usere ukati uchache nimuyaye, na ukati uchache uchichira, munone vivyo kahiri!”
17Phapho anafunzie anjine achiuzana vivi, “Unaambadze yuno achiamba, ‘Usere ukati uchache nimuyaye, na ukati uchache uchichira, munone vivyo kahiri!’? Na unaambadze achiamba, ‘kwakukala, ninenda kwa Baba Mulungu.’?” 18Ndo ao áenderera kuuzana-uzana, “Unaambadze yuno achiamba, ‘Ukati uchache’? Kʼahugamanya gago gakwe agombago.”
19Jeso wamanya kukala, ákala ahenza amuuze gago. Ndo achiaamba, “Vidze, munauzana-uzana dzulu ya godzikala ninagagomba phodzamba, ‘Usere ukati uchache nimuyaye, na ukati uchache uchichira, munone vivyo kahiri!’? 20Bee, ninamwambira jeri-jeri, mwimwi mundarira na mugwirwe ni mukunguru, ela atʼu a dunia o andahamirwa. Mundashononeka, ela shenene yenu yindagaluka raha. 21Mwimwi bee mudzihwalana na tʼadi ya muchetʼu wa tʼumbo. Muchetʼu wa tʼumbo achikala unasikira utsungu, undamona utsukirwa kwakukala, ukatiwe wa kusikira lwembe lunatsinza ufika. Ela achivyala mwanawe tu, riki zizo zosi nikuzinyala hata ukamona unatseka-tseka kwakukala, uvyala mutʼu phapha duniani. 22Ndo ni dza mwimwi namwi, vivi muna shenene. Ela nindamona kahiri, na phapho mundahamirwa, na kʼaphana mutʼu yendamuusira raha yiyo. 23Tsʼiku yiyo kʼamundaniuza utʼu. Ninamwambira jeri-jeri, Baba Mulungu undamupʼa chila chitʼu chondamuvoya kwa dzina rangu. 24Mwimwi hata vivi kʼamudzangwe kuvoya chochosi kwa dzina rangu. Ndo voyani namwi mundahewa, na kuhamirwa kondahamirwa mwimwi, bee kundakala kwa kamare.
25“Mimi nidzimwambira chitʼadi maneno gago. Ela ukati unadza urio tsʼindagomba namwi chitʼadi kahiri, ela nindamwambira maneno ga Baba Mulungu lwazu-lwazu. 26Tsʼiku yiyo, mundavoya kwa dzina rangu, na vivyo tsʼi kwamba ninaamba nindamuvoyera kwa Baba Mulungu. 27Tsʼivyo naambavyo vivyo, mana, yiye Baba Mulungu mwenye unamuhenza mwimwi, kwakukala, mwimwi namwi mudzinihenza, na munakuluphira kukala, nálaa kwa Mulungu. 28Mimi nálaa kwa yiye Baba Mulungu nichidza phapha duniani, na vino ninauka duniani ninenda kwa Baba Mulungu.”
29Phapho anafunzie achimwamba, “Ee, vivi bee unahwambira lwazu-lwazu kamare, hata kʼuhumira tʼadi kahiri. 30Vivi bee hudzimanya kukala, uwe unamanya chila chitʼu, hata mutʼu kʼatakiya kukuuza. Kwa vivyo, vivi vinahuhenda hukuluphire kukala, walaa kwa Mulungu jeri.” 31Jeso achiaudzidza achiaamba, “Vidze, munakuluphira vino? 32Bee ukati unadza, na hata mwanzo ni ufika kare, urio mundatsamukana mwimwi. Chila mumwenga wenu undakwenda kwao, na mino mundaniricha hichiyangu. Ela mino tsʼi hichiyangu kwakukala, Baba Mulungu u phamwenga nami. 33Enehu, nidzimwambira maneno gago, kwa hata mukale mwangu ndani, na phapho mukale na reri. Phapha duniani mundapata riki, ela kalani angumbau, mana, mino yiyi dunia nidziyirima.”
Aktualisht i përzgjedhur:
Johana 16: CHIDUR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr