Luka 6
6
Yesu la uwana məŋga aŋa vuɗ maduw ləv
(Mata 12.1-8; Mark 2.23-28)
1Vərdi anik, la vuɗ maduw ləv Yesu aguwà à uda la guf nalkama la abà. (Uwana bokuba hi) Azlaməna matapla la slaka aŋha tadzəkà manal gəl gà, ŋgaha tavərə̀slàh kà mapaɗay kà uwana may azà à atà.#5Musa 23.25 2Azla Farisəya anik tagòɗ à atà: “Kà mana kaɗahaw tatak uwana tetəvi la ahəŋ aŋa maɗàh uwaga, la vuɗ maduw ləv aw ma?” 3“Kay”, Yesu agòɗ à atà: “Akul kà, kadzèŋàw tatak uwana David aɗahàŋ la mok uwana may akə̀s la azladza uwana tagà atà nna aw takay? 4Masla, la azlaməna aŋha tahàd à gày Zəzagəla à agu, tazùw tatak may tsikaslaga, uwana maf à ahəŋ gà kà aŋa Zəzagəla pəra. Tekeɗika tetəvi la ahəŋ kà atà aŋa mazuway aw, say azlaməna mav tatak à Zəzagəla la uwana atà la tetəvi aŋa mazuway pəra.”#1 Samuyel 21.1-6; 3Musa 24.9 5Yesu agòɗ à atà aya: “Kona aŋa dza la uwana məŋga aŋa vuɗ maduw ləv uwaga.”
Dza la ahàl mamətsayga
(Mata 12.9-14; Mark 3.1-6)
6La vuɗ maduw ləv anik aya, Yesu ahàd à gày madəv kuɗa anik à agu, ŋgaha adzəkà matapla azladza la abatà. Dza anik la ahəŋ la abatà, uwana ahàl kaf aŋha kà mamətsayga. 7La abatà kà, azlaməna mapàhla mapəhay ala, la azla Farisəya tatsə̀ɓ sləm à Yesu la manərəzay, à baŋa awur dza uwaga ala la vuɗ maduw ləv, kà atà aŋa maɓəzal à tsəh, kà mapuw ala gudzi à gəl kà uwana apesew vuɗ maduw ləv. 8Ama Yesu asə̀l madzugway aŋatà, kiya uwaga agòɗ à dza uwana la ahàl mamətsayga: “Sà à afik, tsìzlla à tataka à abà, la abà gà, la huma azladza gesina.” Dza uwaga asà à afik, ŋgaha atsìzlla à atà à huma à gay la abatà. 9“La kità”, Yesu agòɗ à atà: “Gi la manavay la slaka aŋkul: Mapəhay gami ma avà à anu tetəvi aŋa maɗàh delga la vuɗ maduw ləv takay, awma maɗàh mawisiga ay? Maɓəl sifa aŋa dza, awma maz sifa aŋa dza ala, la uwana delga takay?” 10Atà gesina tatsə̀kal yewdi à gay, kiya uwaga Yesu agòɗ à dza uwaga: “Biyà ahàl ala!” Abiyà ahàl ala, ŋgaha ahàl adawur ala. 11Ama azla Farisəya la azlaməna mapàhla mapəhay ala tahə̀n ala la maŋor, ŋgaha la mapakàh ləv, ŋgaha tadzəkà mabay vok gay kà atà kà atà lakəl aŋa uwana asà à atà maɗehəŋ à Yesu à vok.
Yesu akasani azlaməna matapla kulo gəl aŋha səla
(Mata 10.1-15; Mark 3.13-19)
12La kaslà uwatà, Yesu ahàd à dadəgwal à afik kà madəv kuɗa la abatà, huyip ahə̀n à madəv kuɗa à gəl, adə̀v kuɗa à Zəzagəla. 13Mok uwana məl adawulla, azàla azlaməna asik aŋha, ŋgaha atsatsàmànì kulo gəl aŋha səla, uwana apakàtàla kà azlaməna matapla la slaka aŋha. 14Səmon (uwana avàl sləm Piyer bay) la deda aŋha Andəre, Yakuba, Yuhana, Filip, Bartelemi, 15Mata, Tomas, Yakuba kona aŋa Alfe, Səmon uwana tazàlal Zəlot, 16Yudas kona aŋa Yakuba, ŋgaha Yudas Iskariyot, uwana apaka masla məzam aŋa Sufəl Yesu.
Yesu atapla tatak à maham à ahəŋ dza
ŋgaha awara azlaməna ɗuvats ala
(Mata 4.23-25)
17Yesu asà à ahəŋ la dadəgwal la afik atà nna, ŋgaha asà à vadavaday à afik, kà uwana azlaməna asik aŋha aŋuvaw la abatà. Azlaməna kutso Yahudiya, la azlaməna gudəŋ Urusalima ŋgaha azlauwana la makəla aŋa gudəŋ Tir, la Sədon uwana la gay mukwà, atà gesina la abatà. 18Tasàhà à waŋ kà matsəɓal sləm, ŋgaha kà atà aŋa mawarla la azlaɗuvats aŋatà la abà. Azlauwana tasà ŋgərpa la ahàl aŋa azlamasasəɗok mawisiga babay kà, tawarà ala. 19Dèwdèw dza tayàh kà madəɓani Yesu, kà uwana ndzəɗa asahàh à uda la masla la abà, awàràhà atà ala gesina.
Barka la matsafay
(Mata 5.2-12)
20Yesu anərə̀z azlaməna matapla la slaka aŋha agòɗ:
“Marabay agay la akul uwana azlaməna kuɗa lagwa, kà uwana makoray Zəzagəla kà adàgay kà aŋkul.
21Marabay agay la akul uwana may az akul lagwa, kà uwana kadàɓəzawwal tatak may sakay sasakay.
Marabay agay la akul uwana katuwaw lagwa, kà uwana kadàkəɗaslaw.
22Marabay agay la akul à baŋa azladza tapəsew akul, takweska akul, tatsək à akul magoɗahay à gəl, ŋgaha tatərəɓ akul la mawisiga, kà Kona aŋa dza.#1 Piyer 4.14
23Ràbàw la vuɗ uwaga, ŋgaha vàlàhàw à zagəla kà uwana masik məŋga akud akul la zagəla, kiya uwaga à uwana azlababa aŋkul madzidziga tatərə̀ɓàhà azlaməna mapəh à atà gay à ahàl uwarà.
24Ama ŋgərpa agay la akul, akul azlagorobu, kà uwana kadazuwwaw.
25Ŋgərpa agay la akul, akul uwana kakoraw tatak sakay sasakay lakana, kà uwana may la uwana adàkaɗ akul.
Ŋgərpa agay la akul uwana kadakəɗaslaw lakana, kà uwana bawbaw kà, kadàgaw la mazaw la gəl la abà, ŋgaha kadàgahaw la iyaw tugwi la adi.
26Ŋgərpa agay la akul à baŋa azladza gesina tasləkaw akul, kà uwana kiya uwaga la uwana, azlababa aŋkul madzidziga taɗahàhàŋ la azlaməna mapəh à atà gay à ahàl fidaga.”
Mawoy masla məzam
(Mata 5.38-48; 7.12)
27“Ama gəpəh à akul, akul uwana katsəɓaw gi sləm: Wòyàw azlaməna məzam aŋkul, ɗahàw delga à azladza uwana tapəsew akul. 28Pìsàw gay à azlauwana à vok, tatsafla akul, də̀vàw kuɗa kà aŋa azlauwana tatərəɓ akul. 29Baŋa dza adeɗka à paŋaw à abà, gòlla anik uwanay à awtày aya, baŋa dza ahə̀l dawara aŋak kà, sàkal ahəl bəzi aŋha aya babay. 30Kəla dza uwana anav à ka tatak kà, vàl, baŋa dza azəɓ à ka tatak ala la gasa kà, kapùwla gudzi à gəl aw. 31Tatak delga uwana asa à akul azladza taɗahakulaŋ kà, ɗahàwàŋ à azladza anik bokuba uwaga suwaŋ kəla.”
32“Baŋa kawoyawwaŋ kà azladza uwana tawoya akul pəra ma, kà mana kakudaw masik anik aya ma? Kà uwana bà azlaməna tsakana babay kà, tawoya azlauwana tawoya atà babay suwaŋ pəra. 33Ŋgaha baŋa kaɗahawwaŋ delga kà azlauwana taɗahakulaŋ delga pəra ma, kà mana kakudaw masik anik aya ma? Amiyaka azlaməna tsakana kà, kiya uwaga à uwana taɗehəŋ babay. 34Baŋa kakəllaw goder à dza uwana kasəlaw, kà adàpəlay ma, kà mana kakudaw masik anik aya ma? Azlaməna tsakana babay kà, takal vok goder, ŋgaha atà aŋa mavàh vok aŋatà suwaŋ, kità ma: Uwa adàvà akul masik aya zlà ma uwa? 35Ama kəla kà: Wòyàw azlaməna məzam aŋkul, ŋgaha kə̀làw atà goder la kokuɗa madzugway kà mawul akul ala. Kiya uwaga kà, kadàɓəzaw à masik məŋga la slaka Baba uwana kərkər la afik, ŋgaha kadàgaw azlabəza aŋha. Kà uwana masla kà dziriga la huma aŋa azlaməna tsakana la azlaməna makəsafər gesina. 36Hə̀nàwla, la delga ŋgaha la vok mahamay, bokuba Baba aŋkul uwana adahənla la dzəɓa aŋha səla aw.”
Kaɗahaw seriya à azladza anik à gəl aw
(Mata 7.1-5)
37“Kaɗahaw seriya à azladza anik à gəl aw, ŋgaha Zəzagəla adàɗahakulla seriya à gəl suwaŋ aw; kaɗəkaw seriya à azladza à gəl aw, ŋgaha Zəzagəla adàɗəkakulla seriya à gəl suwaŋ aw, matsawaŋ azladza anik ala, ŋgaha Zəzagəla adàmatsakullaŋ ala suwaŋ. 38Vàw à azladza anik, ŋgaha Zəzagəla adàvà à akul: Zəzagəla adàtsak akul à zliba aŋkul à agu tsəŋ tsətsəŋ, tadàhatsəkwəŋ la maɗəkwəŋ serafaffa. La daram uwana kagurawla à azladza anik kà, uwaga la la uwana tadàgur à akul ala suwaŋ.”
39Yesu apə̀h à atà gay la gay la abà anik, agòɗ à atà: “Guləf aslala vok aŋa makəs guləf anik à ahàl takay? Awaŋ, atà səla nna tadàsakway à afək à abà. 40Masla matapla aɗuw masla matapalla aw, ama baŋa adàdəv matapla madzeŋay aŋha à gay kà, aslala vok aŋa magay bokuba masla.”
41“Kay, kà mana kanəŋa kəsaf la yewdi aŋa deda aŋak la awtày, ama aŋak uwana magol tsəkuɗ tsəkuɗ la awtày kà, kanəŋa aw ma, kà mana ma? 42Ŋgaha kagoɗay à deda aŋak: ‘Deda, sàk à gi, gəzəɓ à ka kəsaf la adi ala’. Kak, la gəl aŋak kà, kanəŋà magol tsəkuɗ tsəkuɗ uwaga la aŋak la awtày aw ma? Kak, masla magolla dza, zə̀ɓ aŋak la adi ala dadàŋ, ŋgaha la lig la ahəŋ kà, kadànəŋla lela kà mazəɓ kəsaf à deda aŋak la adi ala, la dziriga.”
Masəl ahàf kà la mayyay aŋha la vok
(Mata 7.16-20; 12.33-35)
43“Ahàf delga kà avà mayyay mawisiga aw, ahàf mawisiga babay kà, aslala vok aŋa mav mayyay delga aw. 44Iyay, kəla ahàf kà agay masəlayga la mayyay aŋha la vok. Dza aslala vok aŋa madəzl gudəv la matatàk la vok aw, ŋgaha bay, dza adəzl matavəruk la mazləɓ la vok aw. 45Dza delga kà, aɗehəŋ kà delga, kà uwana, uwana la ləv aŋha la tsəh kà delga. Dza mawisiga kà, aɗehəŋ kà mawisiga, kà uwana uwana la ləv aŋha la tsəh kà mawisiga. Kà uwana paŋaw aŋa dza kà, apəhay kà uwana la ləv aŋha la tsəh.”
Gay lakəl aŋa azlagày səla
(Mata 7.21-29)
46“Kà mana kazalaw gi ala: Sufəl, Sufəl, ŋgaha tsa kaɗahaw tatak uwana gəpəh à akul aw ma? 47Kəla uwabeyuwi uwana atsa à waŋ à slaka gulo ŋgaha atsəɓ sləm à kuda gulo kà, gəpəhakulla dza uwana gəgagazləla la masla. 48Masla kà kalkal la dza uwana atatukw matatukway aŋa gày aŋha kà à təhus à afik. Mok uwana iyaw adàdzəka mas à afik, akəl la lig gày, afaɗ aɗə̀ɗ la ndzəɗa, ama gày kà akalàh à ahəŋ aw, kà uwana tatətùkw kà à təhus à afik. 49Ama dza uwana atsəɓ sləm à gay gulo, ŋgaha akəs uwaga aw kà, masla kà gəgagazləla kà la dza, uwana aŋal gày à wuyyaŋ à afik. Mok uwana iyaw mukwà adàda à mukwà à afik, azəɓ gày uwaga gesina, adalla.”
Aktualisht i përzgjedhur:
Luka 6: mfh
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©2019, Wycliffe Bible Translators Inc. All rights reserve.