Jénesii̱s 4
4
Bi̱ katsꞌén Kaii̱n nga katsꞌénkꞌién Abee̱
1Kó Andaa̱n kisꞌiejo̱ chjo̱ón, kó na̱ Ebaa̱ tsaꞌa ndí, kó kisꞌiee̱ ngo ndí, sꞌe̱ «Kai̱n» ítꞌa jaꞌén, ngatꞌa̱ bi̱ katsó na̱ Ebaa̱: «¡Ndokꞌóchji̱í Néná nga kisꞌiena ngo ndí xíꞌin!» 2Jaskan kisꞌie nguinií ingo ndí, kó «Abe̱» ítꞌa jaꞌén. Kaii̱n tꞌananguii̱ katsꞌénxájin kó Abee̱ cho̱tsa̱nga̱ katsꞌénxchá.
3Kó nguije jaꞌa ni̱xtjin, ngo ndi̱ya Kaii̱n kijítsꞌenkꞌásꞌieén ngo kjo̱a̱tjó Néná nga kijíjoo̱ ngo tjín ni xi kamáxchaá. 4Kó Abee̱ ti̱ kijíjoo̱ Néná ngo kjo̱a̱tjó nga, kó jaꞌájin ndí xí tjoón cho̱tsa̱nga̱ xi kamáxchaá xi ꞌniú yiꞌi ngasee̱. Kó Néná achichí tsjá kamaá kjo̱a̱tjó xi katsꞌénkꞌasꞌien Abee̱, 5ta̱nga tsjájín kamaá kjo̱a̱tjó xi katsꞌénkꞌasꞌien Kaii̱n, kó tsijen kisꞌie kje̱n Kaii̱n nga katsꞌénxchán.
6Kósꞌe̱ Néná bi̱ katsoó Kaii̱n:
«Míkjo̱a̱a̱ nga ndasen tindyin ko̱jo nga tiniꞌínxchín kón ji. 7Tsi ndakjiꞌi ni xi tiniꞌín ji, ngatsjé ni̱xtjin nga tsja ka̱mana nga sa̱ꞌinjoꞌoo̱, ta̱nga tsi ndajínkjiꞌi ni xi tiniꞌín ji, jeé jè tsꞌénkoya nga sa̱ꞌínꞌoón xikoó ngo cho̱ tamá. ¡Ngata̱ boeꞌéndiejín ji nga sa̱ꞌiín jeé!»
8Ngo ndi̱ya Kaii̱n tjiantsobé ngu̱i̱jin kꞌijñáján katsoó Abe̱ ntsꞌi̱e̱, kó nguije jachó ngu̱i̱jin kꞌijñáján, Kaii̱n kijítsꞌuieé Abee̱, kó katsꞌénkꞌién.
9Kó ngu̱i̱chí sájín Néná bi̱ katsoó Kaii̱n:
—Ñá tikón Abe̱ ntsꞌie ji.
Kó bi̱ katsó Kaii̱n:
—Bejín an. A án tsꞌénkonda an ntsꞌié án.
10Kó bi̱ katsó Néná:
—Ánní nga ntsꞌie kiniꞌínkꞌín kon ji Kaii̱n. Jiín ntsꞌie ji xi katjon tꞌananguii̱ tsꞌénchji̱a̱ tsi̱ꞌe̱ nga sa̱ꞌinjeé ji. 11-12Ngotꞌe̱ ꞌne̱ tsobo̱a̱, an sa̱ꞌinjeé kó ndajín ko̱e̱je̱e̱ nga ku̱i̱ndyin ji. Kjiꞌa nga si̱ꞌinxéjin ji tꞌananguii̱, nguiti̱ jmí ni ka̱maxchájiín, ngatꞌa̱ ntsꞌie kiniꞌínkꞌín ji, kó tꞌananguii̱ katsꞌe jiín, kuíni nga ngo nda̱ xi ta̱xkiya kjótsoꞌbá són nga̱sondiee̱ ka̱ma ji xi jmíjiín nínga kꞌuijñá.
13Kó Kaii̱n bi̱ katsoó Néná:
—Kjo̱chókjo̱a̱jínna kui jé xí ta̱nisién ꞌniuú. 14Ngotꞌe̱ ꞌne̱ tiniꞌínjéní nga xikoó tsi ngo xota̱ xi ta̱xkiya kjótsoꞌbá ka̱ma an nga kotíjña an kui nga̱sondiee̱, kó nga ta̱ xi sa̱kórií an, sa̱ꞌínkꞌiénna.
15Ta̱nga Néná bi̱ katsó:
—Bo̱a̱jín ka̱ma. Tsi tjín xí sa̱ꞌínkꞌieén ji, yito bo̱a̱ kjiꞌi ngase ka̱majeé kui xi bo̱a̱ sa̱ꞌiín.
Kósꞌe̱ Néná ngo chi̱bo̱a̱ katsꞌénkaꞌa Kaii̱n, tsi̱ꞌe̱ nga jmíjín xi ta̱xkiya sa̱ꞌínkꞌién. 16Kó jatjo Kaii̱n nguindyi̱ko̱n Néná, kó ki̱a̱ kijíkꞌíjñá nanguii̱ xota̱ xi tjimásoón, ki̱a̱ xtji̱e̱e̱n nínga fotjo tsꞌueé ki̱a̱ ngu̱i̱ndie xi ꞌmí Endee̱n.
17Jaskan Kaii̱n kisꞌiejo̱ chjo̱ón, kó tsaꞌa ndí, kó katsen ndií kui xota̱chjo̱on, kui xi Eno̱k kiꞌmí. Kui ni̱xtjinján Kaii̱n iskjininkꞌa ngo na̱xi̱ńdá ꞌniú xi Eno̱k ítꞌa jaꞌén, xikó kiꞌmí ndií.
18Kuí bí xi̱ꞌbi̱ xi xota̱ tji̱e̱e̱ Kaii̱n:
Enoo̱k,
Iraa̱d,
Meujae̱l,
Metusae̱l,
ko̱jo Lamee̱k.
19Kó Lame̱k jó kamá chjo̱ón, ngo xi kiꞌmí na̱ Anda̱, kó xi ingoo̱ na̱ Sila̱ kiꞌmí. 20Na̱ Andaa̱ na̱aa̱n Jabaa̱l kamá, kó xota̱ tji̱e̱e̱ Jabaa̱l, ki̱a̱ kjindiboánii̱ xota̱ xi tjíndoꞌyá ndiꞌa xi tji̱xi̱ín cho̱ niꞌándani ko̱jo ki̱a̱ kjindiboáni xota̱ xi ꞌbítji̱e̱ cho̱o̱. 21Jabaa̱l kisꞌiee̱ ngo ntsꞌi̱e̱ xi Jubaa̱l kiꞌmí. Jubaa̱l kuí boá xi tjón tjón katsꞌénda arpa̱ ko̱jo yánaxo̱ xi fonie. 22Kó na̱ Silaa̱ kisꞌiee̱ ngo ndí xí Tubal Kaii̱n kiꞌmí, kó kuí boá xi ngo nda̱ chji̱ni̱e̱ki̱cha̱ kamá xi katsꞌénda kjín ni xi mandani bronse̱ ko̱jo ki̱cha̱, kó na̱ xi ꞌmí Naamaa̱ xí kamá ndichja Tubal Kaii̱n.
23Ngo ndi̱ya Lame̱k bi̱ katsoó nga jó chjo̱ón:
«Jún xi ínchjínna na̱ Sila̱ ko̱jo na̱ Anda̱:
¡ndaꞌyájnú nda̱na!
Tsi tjín xí sa̱ꞌínꞌónna,
ko̱jo tsi ngo xi ni xí ndajín sa̱ꞌínjo̱na,
tsi kjindí ko̱jo tsi xchá,
sa̱ꞌinkꞌién an.
24Tsi xi sa̱ꞌínꞌoón Kaii̱n
yito ndi̱ya ku̱i̱ꞌíchjí ngajo,
xi sa̱ꞌínꞌónna an,
ja̱koxi̱ boá nga ichítié ko̱jo kan yito bo̱a̱ kjiꞌi ka̱majeé kui».
25Kó ti̱ kisꞌiejo̱ nguiní chjo̱ón Andaa̱n, kó kisꞌiee̱ ingo ndí xíꞌin, kó Se̱t ítꞌa jaꞌén, kó na̱ Ebaa̱ bi̱ katsó: «Néná katsjána ingo ndí xí tikón ngajoo̱ Abee̱, kui xi katsꞌénkꞌién Kaii̱n.» 26Kó Se̱t ti̱ kisꞌiee̱ ngo ndí, kó Enoo̱ ítꞌa jaꞌén. Ndeskande koó kjiꞌa ikꞌítsi̱yanii̱ nga kiniꞌánkaxoma jaꞌeén Néná nga kiniꞌántsjaá.
Aktualisht i përzgjedhur:
Jénesii̱s 4: MAIX
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014