Jn 1

Giɛ yɛ ɛy fóon ɛychii

1Nè lu ɛ kenkɛɛte nɛ Giɛ lu, ɛy nè lu ghene Feyine. Giɛ nɛ̂ yin nè lu Feyin. 2Əb nè lu ghene Feyine se kenkɛɛte. 3Feyine nè bom əbfua əbjim nɛ lu nɛ̀ Giɛ nɛ̂ yin. Kefaa wiy kɛ Feyine nè bomen nɛ wiy nɛ̀ Giɛ yin. 4Ɛychii nè lòò se wen, nɛ ɛychii nɛ̂ yine lu kekaaken se wele-mesoŋ. 5Kekaaken kine bane ɛ məme nfiine, nɛ lòó nfiine jia limse.#1.5 Limse ko gese lu ge: Keele ka ke luun.

6Wel əblee nè lô se lu wɛ Feyine nè tumen nɛ ɛ́ toŋte ge Joon. 7Əb nè gwiy se fekte kum ɛyban nɛ̂ yi ka ghele keele, è fo ɛytem se ɛyghene. 8Joon se wene ngeŋ nè báà se lu ɛybane yɛ́ tene, dî è gwiy se fekte se ghele kum ɛyghene. 9Ɛyban nɛ̂ yine lu nkante kekaaken kɛ ke gwiyen ɛ mbi è se foo ɛyban se wel əbjim.

10Əb nè lu ɛ mbi, nɛ Feyine nè bom əbfua əbjim nɛ̀ wen, dî mbi jia keele wen. 11Əb nè gwiy ɛ wene kelik, dî ghele wene jia fiisen wen. 12Ghel ɛlee fiisen wen, əb me fo əbtaawe se ghene ge ghene yɛ lu ghon ə Feyin, dii ghel ghɛ ɛ́ nè foon ɛytem se wen. 13Ghene nè báà se lu ghon ə Feyin ge ɛ́ bii əblam nə wele-mesoŋ, jia semte wel se bii ghene, jia kwaate wel, nè lu ɛykwaate ə Feyin.

14Giɛ nɛ̂ yin nè gwiy è sɛɛ se wele-mesoŋ, è se chii ɛ ghɛsene məm. Ghɛsen se yɛne əbfon ə wen, nɛ lu əbfon wɛ əb nè kiin ka wán ə Feyin wɛ əbmok. Əb nè chame ɛysene ghel naa se ŋaŋ gese lu wel əbluuy.

15Joon nè lô suŋnen se ghele kum wen. Əb nè suuy ge: Lu wen nɛ̂ vi wɛ mɛ nè suuyen ge: Wel əblee gwiye ɛ mɛ ɛybam, dî nɛ əb ngaŋte è chia mɛ, bek ge ɛ́ nè bii mɛ nɛ əb nè shi.

16Se lu bek ka əb chammen ɛysene yɛ́sen naa se ŋaŋ, wɛ əb fóon ɛybose se ghɛsen, toke nɛ̀ ɛybosee. 17Moses nè gwiy nɛ̀ nchil se ghele ka Feyine nè tumen. Jesus Christ gwiy kɛ́ wene nɛ lu nɛ̀ ɛycham ɛysen nə Feyine gese nɛ̀ əbluuye. 18Wel nè bɛɛy ghàà yɛn Feyin, buu kɛn wán ə wen wɛ əbmok wɛ əb luun ɛ Bay ɛybee. Lu wen wɛ əb nɛ́ɛ́yen nɛ ghele keele Bay.

Joon tun ge yi wiy vi wɛ ɛ́ nè yiosen

(Mat 3.1-12; Mak 1.1-8; Luk 3.1-18)

19Ghɛ́ mbiy nə ghele Juuse tum ghɛ́ ntaŋlee ɛlee ghene ghel ɛlee ghɛ ɛ́ nè fɛ́len ɛ ndaa-ɛykokse ɛ Jolesalem ge ghene ndu è bif se Joon ge sɛ lu wen ndɛ-a?

20Ghene ndu, Joon jia tɛn se suŋnen, dî è suŋnen kelaanen ge: Mɛ báà se lu Vi wɛ Feyine nè Yiosen.

21Ghene me bif ge: Wɛ̀ lu ndɛ? Wɛ̀ lu Elija-a?

Joon fise ge: Ɛngaŋ! Mɛ báà se lu wen. Ghene gese bif ge:

Wɛ̀ lu wele ntum nə Feyine wɛ ɛ́ chiyten-a?

Əb tûn!

22Ghene me suuy se wen ge: Fekte wel wɛ wɛ̀ luun əbghen se ghɛs. Ghɛs lu se ndu nɛ̀ ɛyfisee, se ghel ghɛ ɛ́ kè tumen ghɛs. Wɛ̀ suuy gee ghɛ kum ngeŋ ə yiɛ?

23Joon fise ge: Mɛ lu wel wɛ wele ntum nə Feyine wɛ Ezaya nè suuyen ge:

“Giɛ wene jaŋe əbkwak ge:

Ghɛn nɛyte kevəə jii se Báàba é ke yɛ nduu ɛ titiy!”

24Ghel ghii nè lòò ntum ghele kenone Falisee, 25è me bif se wen ge: Ka wɛ̀ wiyen Vi wɛ Feyine nè Yiosen, wiy Elija, wiy wele ntum nə Feyine, wɛ̀ se foo moo bek ghɛ?

26Joon fise ge: Mɛ foo nɛ lu moo, dî nɛ wel əblee lu ɛ ghɛne məm ɛ leenen, nɛ ghɛne bɛɛy ghàà keele wen. 27Əb bo gwiye ɛybam, nɛ chèmè lu kɛn nkfəəse guose ɛvəə nə wen fene mɛ báà se lu kekwɛnten ka lòó mɛ yayte.

28Əbnəə vin nè gan ɛ Betani ɛ njine jio Joldan ghàà Joon nè fóon moo.

Joon din ge Jesus lu wan-njiɛ nə Feyine

29Əbtəke yio, Joon yɛn Jesus ka əb gwiyen, è suuy ge: Dii wan-njiɛ nə Feyine, wɛ əb lɛyse mbeese mbi. 30Lu wen nɛ̂ vi wɛ mɛ nè suŋnen kum wen ge: Wele gwiye ɛybam chia mɛ, bek ge ɛ́ nè bii mɛ nɛ əb nè se shi. 31Mɛ nè báà se ke wel wɛ luun wen, dî è gwiy è se foo moo se ghele se nɛɛy ge ghele Islaele keele wen.

32Joon suuy dì, è me din ge: Mɛ nè yɛn Keyioy nɛ ke səəke ɛyyio ka kenlal è gok ɛ wen əbghun. 33Mɛ se mɛ ngeŋ nè báà se ke wen, dî nɛ Feyin Fɛ Fe nè tumen mɛ ge mɛ yɛ foo moo nè lô suuy se mɛ ge: Wɛ̀ nɛ̂y yɛn nɛ Keyioy səəke è guo ɛ wel əbghun, fene lu wen wɛ əb nɛ̂y yɛ foo nɛ lu Keyioy Kelanene. 34Mɛ nè yɛnmen, è me se fekte se ghɛn ge wel nɛ̂ vi lu wán ə Feyin.

Jesus kiile ghon-ɛyfɛl nə wene ghɛ́ mbiye

35Əbtəke gese yio, Joon se tiy ghene ghon-ɛyfɛl nə wen ɛlee ɛbaa. 36Jesus gese se chia, Joon gese yɛn wen è suuy ge: Dii wan-njiɛ nə Feyine.

37Ghon-ɛyfɛl nə Joon ghii yio dì è me se nduu ɛ Jesus ɛybam. 38Jesus benle è yɛn nɛ ghene gwiye ɛ wen ɛybam è bif ge: Ghɛne kɛŋe ghɛ? Ghene fise ge: Labbi (dii ge ndinte) wɛ̀ chii ghááy?

39Əb fise ge: Ghɛn gwiy è yɛn. Ghene me ndu ghene ghe Jesus è yɛn ghaa əb nè chiin, è me gok fo, əbtəke mɛyse jiɛ ghene bek ka nè shiin ɛ keleŋe nfam.

40Wel əblee se ghel ghɛ ɛbaa ghɛ ɛ́ nè yion ka Joon suŋnen kum Jesus è se jumte wen nè lu Andole wɛ wán-no ə Simon Bita. 41Ka Andole yɛnen Jesus ɛ leghɛ è me kɛŋ wán-no ə wene Simon è suuy se wen ge: Ghɛs yɛnmen Mesaya (dii ge Christ) nɛ lu ge, Vi wɛ Feyin nè yiosen. 42Andole me liɛ Simon è ndu so se Jesus.

Jesus tuŋ ɛyshiɛ ɛ Simon əbghun è suuy se wen ge: Kéné lu wɛ̀ Simon, wɛ wán ə Joon? Ɛ́ nɛ̂y yɛ toŋte wɛ̀ ge Sefas. (Ɛyghel yɛ Sefas lu ge Bita, nɛ lu ge ɛyghok.)

Jesus liɛ Filib ghene Natanael se ghon-ɛyfɛl

43Əbtəke yio, Jesus liɛ ge yi ndu ɛ Galilee, è loo ndu è yɛn Filib, è suuy se wen ge: Gwiy ɛ́ loo. 44Filib nè lu wele Betsaida, ka Andole ghene Bita. 45Filib ndu è yɛn Natanael, è suuy se wen ge: Ghɛs yɛnmen wel wɛ Moses nè nyaken ɛ ŋwaale tesak, ghele ntum nə Feyine gese nyak ge əb náà gwiy. Əb lu Jesus wɛ̂ Nazalet, nɛ lu wán ə Josɛf.

46Natanael bif se wen ge: Lɛ lòó njuŋ fəy ɛ Nazalet-a?

Filib suuy se wen ge: Gwiy è yɛn.

47Jesus yɛn ka Natanael gwiyen se yɛne wen è suuy ge: Lɛɛ naa nkante wele Islael lɛ! Kenlife wiy ɛ wene məm!

48Natanael bif se Jesus ge: Wɛ̀ ghan lɛɛy se geese keele mɛ? Jesus fise wen ge: Mɛ kè lô se yɛne wɛ̀ ɛyshaa fekake fig nɛ Filib geese jaŋe wɛ̀.

49Natanael me suuy ge: Ndinte, wɛ̀ lu wán ə Feyin! Wɛ̀ lu əbfone Islael!

50Jesus suuy se wen ge: Wɛ̀ fo ɛyteme yiɛ san ɛ leenen bek ka mɛ suuyen ge mɛ kè yɛn wɛ̀ ɛyshaa fekake fig-a? Wɛ̀ nɛ̂y yɛn əbnəə əbchio əbyúméné wɛ əb chian kine. 51Jesus gese suuy se wen ge: Mɛ suuy əbluuy se wɛ̀ ge: Wɛ̀ náà yɛn ɛyyio nɛ ɛy dise, è yɛn nɛ nchiyse-ndaa nə Feyine koke gese chio ɛ ketuu nə Wanwel.

Aktualisht i përzgjedhur:

Jn 1: oku

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

©CABTAL, 2012

Mësoni më shumë rreth versionit Ŋwaale Feyin; Kelek Kefɛɛ