Luuka 12
12
Ohirimiza na olipisela
1Nakataalikha khuntti ya atthu khukusanyeya, mwaasa wa waatta akinoko khusala aluwatthana. Yinsa khuwooza khapula anakhiyoni awe yoori: “Phoole na fwaramento ya mafwarizeewu yiiyiye onaafikhi. 2Khayiivo yoovithiwa ehinteelaaye ovithuliwa na zooshi epile zoottiyeleliwa zinteela ojuwiwa.” 3Zooshi zinlupiwaaye n'yiiza, zinlawa zalupiwe nthana, na zooshi epile zinlupiwaaye sirini zinlawa zeeye payana.
Nimoove Nluku paasi
4“Miiyo kiniwuuzani ashirikha yoori: mwihiwoove apale anuulaaye mwiili, nawiisha khuhiretteli hatha etthu. 5Ila miiyo kinuuthoonyezani paani wa omoova: mwimoove Nluku, otule paata ya wuula mwiili, ariina owahi wa weeselela motthooni. Oto ti mwiriina ya omoova. 6Anyannyi athaanu attiitthi-attiitthi khanuuzanyisiwa sinku piiri? Ila apo aya khaavo mmote Nluku aninsahawaaye. 7Hatha na nyuuli za mmwishwa mweenu zooshi pi za waalakiwa. Mwihoove, mweeyo mwinaaye fwayita zayita anyannyi apo awaatta.”
Onkatthala Yinsa na otukhuru
8“Miiyo kiniwuuzani yoori: otule antukhurwaaye vakatthi wa atthu yoori namalottela aka, Mwaana wa Pinaatamu onteela otukhuru vakatthi wa malayikha a Nluku. 9Ila otule anikikatthalaaye vakatthi wa atthu, na ye onteela okatthaliwa vakatthi wa malayikha a Nluku. 10Wooshi otule anintarawaaye Mwaana wa Pinaatamu onswamihiwa, ila otule ankufurwelaaye Rooho Ttakatthiifu khanswamihiwa.
11“Amana mwithuuliwa olawa ophukiwa nsinakooka ama wa afwalume, mwihiiyane shaakha khwa nanna mwinttelaaye ojaakisa ama etthu mwinttelaaye olupa. 12Maana wakathi otthuupo Rooho Ttakatthiifu entta wuuthoonyezani etthu yoolupa.”
Thaajiri woohiina akhili
13Mwinyi mmote wa khuntti etile khunvekela Yinsa araka: “Mwaaliimu, omuuze ttwiiyaku akaawanyele maali epile alikhiyeeyo papeetthu.”
14Yinsa khunjipu araka: “Weyo, paani akirettiye wiiya namaphuka enu wala namwaawanya maali zenu?” 15Aphano khuwooza yoori: “Phoole na omaashokopho wa vitthu, mwaasa yoori ohaayi wa pinaatamu khunlipisiwa pi vitthu epile ampatthaazo.”
16Yinsa khulupa nlikaniso araka: “Aarivo mwinyi mmote wa thaajiri aaruweriyeeyo channu. 17Ye khusala awaza toono: ‘Kirette-ni? Akina vahali wootthaavo peewu zaka epi.’
18“Khulupa yoori: ‘Aaa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo. 19Nawiisha, kuuze nafusi yaka yoori: “Onaaye peewu na vitthu zawaatta zintoshelezaaye nyaakha zawaatta; ovumule, oje, onywe na ofurahi.” ’
20“Ila Nluku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’ ”
21Yinsa khumarisela araka: “Ntthu oto ori nkhama atthu apale anlipanaaye maali zaya ila mmakhono wa Nluku khahi mathaajiri.”
Onroromela Nluku
22Aphano Yinsa khuwooza anakhiyoni awe araka: “Tiito kiniwuuzaanini yoori: mwihiiye woovelavelela ohaayi enu, wala etthu mwinttelaaye oja, ama mwiili enu khwa etthu ya owalisa. 23Maana ohaayi ona fwayita khuluyeene zayita etthu yoojiwa na mwiili ona fwayita khuluyeene zayita kuwo. 24Mwiwoone anakhuku; khanzala wala khanuurula hatha ntthala khana loopwehavo vitthu zoojiwa zaya, ila Nluku oniwenkha etthu yoojiwa. Ila mweeyo mwinaaye fwayita khuluyeene zayita anyannyi apo! 25Paani wa mweeyo anwahaaye weekezela mansha awe hatha nkhama eetta oshukulikhela? 26Mweeyo khamwinwahi oshintta vitthu nkhama epo ttiitthittiitthi, khi mwinshukulikhela toovi kinoko zaya?
27“Moone nanna enwulaazo miitthi za ntthuttu na maluwa aya: yo khazinkhola khaazi, wala khazinsona. Ila wekhweele kiniwuuzani yoori: Seleyimaana na othaajiri wawe, khawaleeni kuwo zooshapweya nkhama maluwa apa. 28Moone, Nluku onwalisa nyaani za ntthuttu leelo ziriivo meesho zinttelaaye olukuziwa khatepeeni, wuuwalisani mweeyo channu atthu oopushuwa amini! 29Mwihishukulikhele etthu mwinttelaaye oja ama onywa. 30Maana amalapo pi anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo. 31Mweekese khapula ofwalume wa Nluku, vitthu zaya epo mwintta weekezeliwa.”
32Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani ofwalume awe. 33Muuzanyise zooshi mwiriinaazo, nzurukhu aya mwiwenkhe asikhini. Mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahinifiyaawo nantarawu wala maweephe yoori aharipu. 34Maana attaapho eniiyavo maali zawo rooho yawo eniiya attaapho.”
Anamarumeyela oojeekesela
35Yinsa khuvira alupaka yoori: “Mwiiye oojeekesela na khantteya zenu ziri zookhoziwa. 36Mwina yawiiya nkhama anamarumeyela aninwejelaaye mbwana aya yoori arutaka onjampo la harusi, amana apiiya nlako anfukulele nasaapiru. 37Ooparikhiyiwa anamarumeyela apale mbwana aya anttelaaye owaasikana eettaka ojeekesela. Kiniwuuzani khweele yoori, mbwana aya na ye ontta ojiwalisa yoori arumeye, awooze wiikhala vameeza asala awaarumeyela. 38Hatha nkhama ata osikhu layili ama lifwajiri, ooparikhiyiwa anamarumeyela apale mbwanaaka anttelaaye owaasikana ari oojeekesela. 39Ila eweeleyeni vitthu zaya epi: maana, mweenyewe nyuupa eriwaka eetta ojuwa wakathi antaavo natarawu, khaari olikhelela opwechiwa nyuupa yawe. 40Mweeyo theenya mwiiye woojilikanisa, maana wakathi antaavo Mwaana wa Pinaatamu pi opule mwihinaakhipwelaaye.”
41Aphano Pheeturu khumuuzela Yinsa yoori: “Mbwana, nlikaniso opo pu weetthu ama pu wa atthu ooshi?”
42Mbwana khujipu araka: “Ti paani eeyiyeeyo nsatoro wa waamineya na wa akhili, Mbwana awe amwinkhiyeeyo owaalokozela akarumeya azaawe na owenkha etthu yoojiwa amana ofiya wakathi? 43Wooparikhiyiwa karumeya otule Mbwana awe amana ataaka anttelaaye onsikana arettaka etthiipo. 44Weekhweele, kiniwuuzani yoori onttela olikheliwa maali zooshi. 45Ila karumeya otule amana eeya wootakhala rooho, ajilupezaka mweenyewe yoori: ‘Mbwanaaka ontta orupaza,’ khusala awaapiya akarumeya apale akina aakha na aalume, ajaka, anywaka na ahapaliwaka, 46mbwana wa karumeya otule onttela ota siikhu ahaari waakhipwelaaye na wakathi ahinjuwaaye. Ye ontta onhukhumu saaneene antthe puuro ya atthu oohaamineyi.
47“Karumeya otule anjuwaaye matakhelo a mbwana awe, ila khuhisala ajeekesela na khuhisala aretta epile antakhaazo mbwana awe, onteela ohukhumwiwa na ojaphiwa venkivene. 48Ila otule ahinrettaaye matakhelo a mbwanaawe mwaasa woohijuwi, onteela ojaphiwa na ohukhumwiwa vattitthiiru. Wakhula otule enkhiweeyo zawaatta ona yoorutisa zawaatta; na otule aalikheliweeyo zawaatta, onlawa avekeliwe venkivene.”
Waawanyeya mwaasa wa Yinsa
49Yinsa khurutela olupa yoori: “Miiyo kateela okhoza moottho va olumwenku, kaari otakha woona okholeliye! 50Ila yamwanzo kiina ya woosiwa khwa ohoowa, kiri muuthunku mpakha vitthu epi zirettikhane! 51Mweeyo mwinaakanyera yoori miiyo katiisa heeri voolumwenku? Wala! Kiniwuuzani khweele yoori, miiyo katiisa ohisiilani. 52Waaza nasaapi mpakha ninttaawo, nkatthi wa ojama wa atthu athaanu, onteela opuwamo waawanyeya; attatthu ohisiilanani apale awiri, apale awiri ohisiilanani apale attatthu. 53Paapa wuumana na mwanawe na mwaana wuumana na papaawe. Maama wuumana na mwanawe wankha, mwaana wankha wuumana na mamaawe, nkhwe wuumana na nkhwewe, nkhwe wuumana na nkhwewe.”
Alama za wakathi
54Yinsa khuwooza atthu aakusanyeyiyeeyo yoori: “Mweeyo amana moona liwiku leettaka phantte ya okhu lintupweelaawo njuwa mwilupaka yoori: ‘Entakha onya vuula’, khweele khurettikhana. 55Amana moona pheevo za kuusi mwinlupaka yoori: ‘Enteela opuwa haari’, khweele khurettikhana. 56Manaafikhi! Mweeyo mwinjuwa olupa alama za va tuniya na za otulu, aphano toovi mwihijuwaka olupa alama za wakathi opu?
57“Mwaasa aya niini mwihijuwaka othawula etile yiiyiyeeyo ya shariya? 58Amana weeyo na muumani awo mwilawaka wa namaphuka, enhithajiya osiilana khapula rakuzeene mwihinalawe, maana amana ofiya wa namaphuka ontta omuuza namweekesela ootthe nkalapooso. 59Miiyo kiniwuuza khweele yoori khunlaamo ohiripheeni nzurukhu woolikana.”
Aktualisht i përzgjedhur:
Luuka 12: eko
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2020, Wycliffe Bible Translators, Inc. All rights reserved.