Luuka 22
22
Shawuri za wuuliiwa Yinsa
1Osaleelaka ofiya wakathi wa orettiwa Njampo la Phaawu yoohiina Fwaramento, liniitthiwaaye Paashikowa#22:1 Nzina ntthi la Paashikowa lina maana a wakathi Nluku awaataphuliyeeyo meezirayiilu mmakhono wa amisuri., 2mahaakhimu a tiini na anamanozela a kano aari owaza shawuri zoomuula Yinsa, khuhisala ewaheya mwaasa wa owoova atthu.
3Aphano Epiliisi khumweetta Yuuda, aari wiitthiwaaye Eshikariyoote, wa khuntti ya apale khumi na awiri. 4Ye khulawa osiilanana mahaakhimu a tiini na attunkhulu a anamweekesela a Nyuupa Yoosifwiwamo, yoori eekese shawuri ya onkholisa Yinsa. 5Khwa mattakhuzi apale, yo khwiiya ofurahi, khumwaahiti Yuuda omwinkha nzurukhu. 6Ye khukhupali, khusala eekesa kiphenyo ya onkholisa Yinsa, woohiivo hatha ntthu.
7Khufiya siikhu ya orettiwa Njampo la Phaawu Yoohiina Fwaramento, siikhu yaya ethiito yaarina ya otwahiwa pwittipwitthi yoojeliwa Paashikowa. 8Yinsa khunruma Pheeturu na Yaahaya araka: “Mwilawe mwaattalele etthu yoojiwa yeetthu ya Paashikowa.”
9Yo khumuuzela yoori: “Ontakha naattalele vayi.”
10Ye khuwaajipu yoori: “Noofiya ositati mwinlawa mwansikane mwinyi apwecheriye yuuku ya maati. Mwinlotte mpakha nyuupa anttaamo. 11Mwimuuze mweenyewe nyuupa yaya eto yoori: ‘Mwaaliimu onuuzela araka: Ori vayi nsana aka wa omakavo, kinttelaaye onjavo paashikowa na anakhiyoni aka?’ 12Othuuto ontta wuuthoonyezani nsana nwulweene wa vatulu oriina zaana zooshi, mwaattalele attaapho njampo nttho.”
13Yo khulawa khusikana nkhama etthiipile Yinsa aawooziyeezo, khwaattalela etthu yoojiwa ya Paashikowa. 14Noofiya wakathi Yinsa na maaswihaapa awe khwiikhala vameeza. 15Khuwooza yoori: “Kaari ohithajiya venkivene onja Paashikowa vamote na mweeyo kihinalawe ohoowa. 16Kiniwuuzani yoori akinteela oja theenya njampo ntthi mpakha linttelaavo omariseliwa muufwalume wa Nluku.”
17Athuuliyeevo jiikira khunshukhurwela Nluku, khuwooza yoori: “Mwithuule mwaawanyena. 18Kiniwuuzani yoori akinrutela onywa nshumo wa nrayi wa wuuva mpakha ontaavo Ofwalume wa Nluku.”
19Athuuliyeevo phaawu, khunshukhurwela Nluku, khumeya khuwenkha khuwooza yoori: “Opu mwiili aka onttelaaye ovahiwa khwa mweeyo. Mwisala mwiretta etthiipi mwikifikhiraka miiyo.”
20Khwa nanna ethiito nawiisha oja khuthuula jiikira khulupa yoori: “Jiikira eti wahati mpheya onrettiwaaye ti taamu yaka, enttelaaye wiittikha khwa mweeyo. 21Ila mwijuwe yoori otule anttelaaye okikholisa ori vameeza attaapha vamote na miiyo. 22Mwaana wa Pinaatamu onlawa afwe khwa nanna etthiipo Nluku asharutheliyeezo. Ila wootakhaliwa ti otule anttelaaye onzinkula.” 23Yo khusala oozelana atthaaporu yoori anjuwe nlupa aari weettelaaye oretta etthu yaya eto.
Ariina fwayita ti paani?
24Aphano maaswihaapa khusala anyakulisana atakhaka onjuwa paani eeyiyeeyo nwulweene vakatthi vaya. 25Yinsa khuwooza yoori: “Afwalume a vathi apha aniiyana oshintta vakatthi wa atthu aya, na apale aneettettisaaye ofwalume oniwaatuvela olupeziwa onamaretta saana. 26Ila mweeyo mwihiiye toowo, nttunkhulu vakatthi venu eeye ti nttiitthi aya, otule anlokozelaaye eeye ti namarumeyela aya. 27Nttunkhulu ti paani, ti otule aniikhalaaye vameeza ama otule anrumeyaaye? Khaniiya otule aniikhalaaye vameeza? Ila vakatthi venu mweeyo, miiyo kiri nkhama otule anrumeyaaye. 28Mweeyo tiye mwinhoowaaye vamote na miiyo mphule kinzayiniwaamo. 29Nkhama etthiipo Paapa akinkhiyeeyo ofwalume, na miiyo kiniwinkhani mweeyo, 30yoori mwije na mwinywe vameeza vaka muufwalume mwaka, na mwiikhale va khukulu ya ofwalume yoori mwiphuke mahimo khumi na mawiri a Ezirayiilu.
31“Simawu, Simawu, Epiliisi avekela yoori oopepetthe nkhama tiriku. 32Ila miiyo koolompela yoori amini yawo ehizime. Amana orutela wiiya vamote na miiyo, owaalipisele azaawo.”
33Simawu khujipu yoori: “Mbwanaaka, miiyo kakhupali wuulotta hatha nkhama nkalapooso, hatha nkhama ofwa.”
34Ila Yinsa khunjipu araka: “Miiyo kiniwuuza weeyo Pheeturu, yoori leelo eti likukhuwi lihineekhe, onkikhana swaafu ttatthu oraka khunkijuwa.”
35Aphano Yinsa khuwooza araka: “Wakathi opule koorumiyeenini mwihina hatha nfukho wala napampa, ama shapatthu, niini yoosaleeliyeenini?”
Yo khujipu yoori: “Hatha etthu khayaanisaleeliye.”
36Ye khuwooza yoori: “Ila nasaapi eti otule ariina nfukho athuule na napampa awe anthuule. Otule ahina phanka oozanyise ajapi yawe oozanye. 37Nkhama etthiipo Nttakhuzi la Nluku linlupaazo yoori: ‘Ye onaalakiwa nkhama anamavonya.’ Miiyo kiniwuuzani khweele yoori sharuthi vitthu epi zirettikhane khwa miiyo, maana etile yaatikhiweeyo monkoni wa miiyo ena yoorettikhana.”
38Anakhiyoni apale khulupa yoori: “Fweeyo apha Mbwana ninaaye phanka piiri.” Ye khujipu araka: “Weesha mwaasa aya opo!”
Yinsa onlompa vamwaako wa Oluveera
39Khulankha khusala alawa vamwaako wa Oluveera nkhama etthiipo aazowereliyeezo, anakhiyoni awe khunlotta. 40Noofiya khuwooza yoori: “Mwilompe yoori mwihikwele muuzayiniwa.” 41Ye khuwaasusa vattitthiiru khukokhora khusala alompa araka: 42“Paapa amana otakha, okilaze jiikira eti ya ohoowa. Ila ehirettikhane otakha waka miiyo, arettikhane matakhelo awo.” 43Aphano khumpuwelela nlayikha la pinkuuni khusala linlipisela. 44Ari mmashakha, khusala alompa woojilipisavo, mattottonka oovujuwela wawe nkhama taamu khusala akwela vathi.#22:44 Aaya epi kithaapu kiina zaraku khina.
45Noolaavo aphale aari olompaavo, khweetta aphale aariivo anakhiyoni awe, khuwaasikana eettaka olala ari oohuzunikha. 46Khuwoozela araka: “Mwinlala ni? Mwilankhe mwilompe yoori mwihikwele muuzayiniwa.”
Okholiwa wa Yinsa
47Eettaka ottakhula nalelo, khupuwa khuntti ya atthu awaatta, na mmote wa apale khumi na awiri, otule aari wiitthiwaaye Yuuda, aawaalokozeliyeeyo, khumwaattama Yinsa yoori ampatikhe. 48Attaaphale Yinsa khuri: “Yuuda, Mwaana wa Pinaatamu oninkholisana opatikha?”
49Anakhiyoni awe nawoona vitthu epile khulupa yoori: “Mbwana, niwoomanane na phanka?” 50Aphano nakhiyoni mmote khushija nshiilo la nkhono nlume la karumeya wa haakhimu nwulu wa tiini.
51Ila Yinsa khuri: “Onlikhe ohinrutele!” Ye khukhola nshiilo la ntthu otule khunvonisa.
52Aphano Yinsa khuwoozela mahaakhimu a tiini na attunkhulu a anamweekesela a Nyuupa Yoosifwiwamo na attunkhulu a tiini apale aateeliye onkhola araka: “Mwakiteela na phanka na puutta nkhama kiiyiye namalokozela wa anazompere? 53Wakhula siikhu kaari wiiya vamote na mweeyo vaje wa Nnyupa Woosifwiwamo, khuhisala mwikikhola, aphano, opu wakathi enu na otule ariina ofwalume wa n'yiiza.”
Pheeturu oninkhana Yinsa
54Aphano Yinsa nookholiwa khulawaniwa mpakha nlikokoro wa haakhimu nwulu wa tiini. Pheeturu khusala anlottelela Yinsa woohimwaattami. 55Yo khukhoza moottho vaje khusala oottha, naye Pheeturu khuta attaapho khwiikhala. 56Njaazi mmote aariivo noomoona eekhaliye nshini wa moottho khumweekesa saaneene khuri: “Otu aari vamote na Yinsa.”
57Pheeturu khukhana araka: “Weyo mwanankha! Miiyo akininjuwa ntthu aya oto.”
58Noovira wakathi vattitthiiru, Pheeturu khooniwa ti ntthu nkina khumuuza yoori: “Weeyo o wa khuntti ethiitile.”
Ila Pheeturu khukhana araka: “Mwinyi, khahiyo miiyo!”
59Oviriyeevo wakathi mmote, ntthu nkina theenya khulupachacha yoori: “Weekhweele otu aari vamote na ye, maana otu aya naye nkalileya.”
60Pheeturu khujipu araka: “Mwinyi! Miiyo akinjuwa etthu mwinlupaaye.” Eettaka ottakhula etthiipile, likukhuwi khwiikha. 61Mbwana khuzukuluwa khumweekesa Pheeturu, ye khufikhiri mattakhuzi apale ooziweeyo ti Mbwana yoori: “Leelo ethiiti likukhuwi lihineekhe, onteela okikhana swaafu ttatthu.” 62Pheeturu khulaavo aphale vaya khusala alila ari wookafilikha.
63Atthu apale aari omweekeselaaye Yinsa khusala anveyisa na ompiya, 64khunfinikha omaasho wawe khusala amuuzela yoori: “Weeyo khahi o napiyu? Onlupe otu oopiyiyeeyo!” 65Khusala anlupeza mattakhuzi awaatta a mattukhano.
Yinsa onlawaniwa wa amashawuriiya
66Noocha khukusanyeya attunkhulu a mahaakhimu a tiini na anamanozela a kano, khuruma olawaniwa Yinsa wa mashawuriiya. 67Khusala amuuzela yoori: “Nkahaya, nkanuuze nkhama weeyo o Al-Masiihu.”
Ye khujipu araka: “Amana kiwuuzani khamwinkaamini, 68na amana kiwuuzelani khamwinkijipu. 69Ila waaza nasaapi ethiiti Mwaana wa Pinaatamu onttela wiikhala nkhono nlume wa Nluku Wa owahi.”
70Aphano ooshi khumuuzela yoori: “Apho niri weeyo o Mwaana wa Nluku?”
Yinsa khujipu araka: “Apho mweeyo mwalupa.”
71Yo khulupa yoori: “Nininhithajiya shaahiti theenya? Nansiila alupaka mweenyewe na nlomo awe.”
Aktualisht i përzgjedhur:
Luuka 22: eko
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2020, Wycliffe Bible Translators, Inc. All rights reserved.