Luuka 3
3
Olaleya wa Yaahaya Namoosa
1Mwaakha wa khuumi na thaanu wa ofwalume wa Seezari Tibeeriyu, Ponsiyu Pilaatu ari nsatoro wa Yudeya. Herooti Antiipa ari reekule wa Kalileya na ttwiiye Filiipe na ye ari reekule wa Itureeya na Tarakhoniiti, na Lusaaniya ari reekule wa Abileeni. 2Anaasi na Kayifwa aari mahaakhimu awulu a tiini. Mwaakha aya pu otthuupo enkhiweeyo mattakhuzi a Nluku Yaahaya, mwaana wa Zakariiya, n'yaara. 3Ye khuzukulela miti zooshi zaattameliyeeyo muuttho Yorotaani, atafusiraka woosiwa wa othupwiya yoori aswaamihiwe twampi zaya. 4Nkhama etthiipo zaatikhiweezo nkithaapu ya napiyu Ezaaya:
“Owaapho ntthu ankhuwaaye n'yaara araka:
‘Mwitthenkeze tarikhi ya Mbwana,
na mookole miphiitelo zawe.
5Makunte ooshi asireliwe,
nyaako na kulu zooshi zishapweyisiwe,
tarikhi zoonyokowa zookoleliwe,
epile zoothipeya zishottheliwe.
6Atthu ooshi anteela woona
nusura ya Nluku.’ ”
7Yaahaya khusala awooza atthu apale aari otaaye woosiwa araka: “Khapila ya evili! Paani awuuziyeenini otthira hukhumu ya Nluku entaaye? 8Mwirette vitthu enthoonyezaaye yoori khweele mwathupwiya, mwihijilupeze yoori ‘Eburahiima ti papeetthu.’ Miiyo kiniwuuzani yoori khwa liwe ntthi Nluku onwahi owaattala aana a Eburahiima. 9Nshokha latthiiwa nshini wa mitathaari za miitthi. Wakhula muutthi ohiniimaaye mishumo zooshapweya ontta oshijiwa weeseleliwe va moottho.”
10Atthu khusala amuuzela araka: “Apho nirette niini?”
11Ye khuwaajipu yoori: “Otule ariina hempe piiri, moote amwinkhe otule ahina. Otule ariina etthu yoojiwa awaameele apale ahina.”
12Khulankha anamariphisa lumpuru yoori alawe oosiwe khumuuzela Yaahaya yoori: “Mwaaliimu, khi fweeyo nirette niini?”
13Ye khuwaajipu araka: “Mwihiriphise mwizitisa hisapu mwirumiweeyo.”
14Anajanka nayo khumuuzela yoori: “Khi fweeyo niri toovi?” Khuwaajipu yoori: “Mwihiwaanyakanye atthu mwiroromelaka kuvu zenu, wala mwihiwaalokoveze vitthu zohiiyi etthiipo, mwishukhurwele ethiito mwimpatthaaye.”
15Nroromelo wa atthu khusala weekezeleya, oonaka yoori talili Yaahaya ti Al-Masiihu. 16Ye khuwooza ooshi apale aariivo yoori: “Weekhweele miiyo kiniwoosanani maati, ila onta nkina ariina owahi wookiziti miiyo, wala akinsuhi ofukula mikhoyi za jampali zawe. Ye onteela owoosani na Rooho Ttakatthiifu na moottho. 17Onaaye fosholo mmakhono mwawe anttelaaye ophakulana tiriku na maveya. Athuule tiriku atthe vantthala vawe, maveya eeselele va moottho ohinzimaaye.”
18Khwa mattakhuzi makina awaatta, Yaahaya aari owaahirimiza na owaatafusirela atthu hapari zooshapweya. 19Na khunshowera nsatoro Herooti mwaasa wonrala Herodiya muukha wa ttwiiye na oretta vitthu zootakhala zawaatta. 20Aphano Herooti khweekezela zooshi epile, khuruma ofukeliwa Yaahaya nkalapooso.
Woosiwa wa Yinsa
21Wakathi aari owoosaavo atthu ooshi apale, Yinsa naye khuta attaaphale oteela woosiwa. Ye alompaka pinku khufukuwa, 22Rooho Ttakatthiifu khumwiishukhela nkhama jiwa. Khusiileya huula yoolankha pinkuuni eraka: “Weeyo o mwanaka wa wuupheta, na wookituvela channu.”
Ntathaari wa ojama wa Yinsa
23Yinsa wakathi aaziyeevo olaleya hapari zooshapweya aarettiye arina nyaakha talaathiini.
Ye aari waakanyeriwa wiiya mwaana wa Yuusufu, mwaana wa Heeli,
24Heeli aari mwaana wa Mataati,
Mataati aari mwaana wa Leevi,
Leevi aari mwaana wa Melikhi,
Melikhi aari mwaana wa Yanaayi,
Yanaayi aari mwaana wa Yuusufu.
25Yuusufu aari mwaana wa Matathiiya,
Matathiiya aari mwaana wa Amooshi,
Amooshi aari mwaana wa Nahuumu,
Nahuumu aari mwaana wa Heshiili,
Heshiili aari mwaana wa Nakhaayi,
26Nakhaayi aari mwaana wa Maathi,
Maathi aari mwaana wa Matathiiya,
Matathiiya aari mwaana wa Shemeeni,
Shemeeni aari mwaana wa Yosheekhi,
Yosheekhi aari mwaana wa Yuuda,
27Yuuda aari mwaana wa Zhuwaana,
Zhuwaana aari mwaana wa Reesa,
Reesa aari mwaana wa Zorobabeeli,
Zorobabeeli aari mwaana wa Sheyalitiyeeli,
Sheyalitiyeeli aari mwaana wa Neeri,
28Neeri aari mwaana wa Meelikhi,
Meelikhi aari mwaana wa Aadi,
Aadi aari mwaana wa Kosaamu,
Kosaamu aari mwaana wa Elimadaamu,
Elimadaamu aari mwaana wa Eeri,
29Eeri aari mwaana wa Yusuwe,
Yusuwe aari mwaana wa Elizeeri,
Elizeeri aari mwaana wa Yoriimu,
Yoriimu aari mwaana wa Mathaati,
Mathaati aari mwaana wa Leevi,
30Leevi aari mwaana wa Simiyooni,
Simiyooni aari mwaana wa Yuuda,
Yuuda aari mwaana wa Yuusufu,
Yuusufu aari mwaana wa Yoona,
Yoona aari mwaana wa Eliyakhiimu,
31Eliyakhiimu aari mwaana wa Meleeya,
Meleeya aari mwaana wa Meena,
Meena aari mwaana wa Matatha,
Matatha aari mwaana wa Nathaani,
Nathaani aari mwaana wa Daawuuda,
32Daawuuda aari mwaana wa Yeese,
Yeese aari mwaana wa Obeedi,
Obeedi aari mwaana wa Bowaazi,
Bowaazi aari mwaana wa Salimooni,
Salimooni aari mwaana wa Nashooni,
33Nashooni aari mwaana wa Aminataapi,
Aminataapi aari mwaana wa Raami,
Raami aari mwaana wa Hezorooni,
Hezorooni aari mwaana wa Pereezi,
Pereezi aari mwaana wa Yuuda,
34Yuuda aari mwaana wa Yaakhumpa,
Yaakhumpa aari mwaana wa Esiyaakha,
Esiyaakha aari mwaana wa Eburahiima,
Eburahiima aari mwaana wa Teera,
Teera aari mwaana wa Nahoori.
35Nahoori aari mwaana wa Serukhi,
Serukhi aari mwaana wa Reewu,
Reewu aari mwaana wa Peleekhi,
Peleekhi aari mwaana wa Heebere,
Heebere aari mwaana wa Sheela,
36Sheela aari mwaana wa Kayinaamu,
Kayinaamu aari mwaana wa Arifwakisaati,
Arifwakisaati aari mwaana wa Sheemu,
Sheemu aari mwaana wa Nuuhi,
Nuuhi aari mwaana wa Lameekhi,
37Lameekhi aari mwaana wa Methuseela,
Methuseela aari mwaana wa Enookhi,
Enookhi aari mwaana wa Yareeti,
Yareeti aari mwaana wa Mahalaleeli,
Mahalaleeli aari mwaana wa Kenaani.
38Kenaani aari mwaana wa Enooshi,
Enooshi aari mwaana wa Seethi,
Seethi aari mwaana wa Adamu,
Adamu aari mwaana wa Nluku.
Aktualisht i përzgjedhur:
Luuka 3: eko
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2020, Wycliffe Bible Translators, Inc. All rights reserved.