Tobit 2
2
Jiñi Tobit mi sutk'iñ ti xpots'
1Che' bakibä k'iñ tsa' k'otiyoñ ya' ti kotot, tsa' ikoloyob jiñi kijñam yik'ot kalobil Tobías. Che'äch tsa' ujti, che' woliyoñ lojoñ kmel k'iñijel ika'ba' Pentecostés, mu'bä ijalilel bolonp'ej iyuxk'al (49) k'iñ, jiñob tsa' imelbeyoñob weñ uts'atbä we'el uch'el. 2Che'bä tsa' buchleyoñ ya' ti we'te' yik'ot tsa' kila jiñi bälñäk'äl, tsa' ksu'be jiñi Tobías:
«Kalobil, yom asajkañ juñtikil wiñik, lak pi'älob, tsa'bä chojki lok'el ti Nínive, k'ajtibeñ mi xuk'uläch ipusik'al ti Lak Yum, ya'i päyä tilel ik'ux iwaj lak kik'ot. Wäle maxto añik mi jkajel ti we'el jiñto ma' julel».
3Tobías tsa' lok'i majlel isajkañ yik'ot che' tsa' sujti tilel tsi' isu'beyoñ: «¡Ktat, ujtel itsänsäñtel juñtikil israelitabä, ya' tsi' iñol käyäyob ti' yojlil tejklum!»
4Tsa' se' ch'ojyiyoñ ya' ti we'te', ma'añik tsa' kchäñ u'bi bajche' yu'bil jiñi kwaj, tsa' majliyoñ ti' yojlil tejklum. Tsa' jkuchu jiñi xsajtel ya'i tsa' kpäyä majlel ti jump'ejl alä otot cha'añ mik ch'ujul muke' che' ochix k'iñ. 5Ti wi'il tsa' cha' sujtiyoñ k'äläl ti kotot, tsa' kajiyoñ ti' ts'ämel cha'añ mik säk'esañ kbä kome tsa' ktälä juñtikil chämeñbä, weñ ch'ijiyemoñix tsa' kaji jk'uxe' kwaj 6tsa' kaji kña'tañ jiñi it'añ tsa'bä iyälä jiñi x-alt'añ Amós che' bakibä k'iñ tsi' su'be ti' tojlel jiñi tejklum Betel:
«Awilañ,
jiñi la' k'iñijeltak mi' kaj isujtel ti ch'ijiyembä,
ixku jiñi la' k'aytak mi' kaj isujtel ti uk'el».
Ya'i tsa' kajiyoñ ti uk'el.
7Che' tsa'ix kaji ti bäjlel jiñi k'iñ, tsa' ktop'o jiñi lum ya'i tsa' kmuku chämeñixbä. 8Che' woli kmuke, jiñi kpi'älob ti chumtäl tsa' kajiyob ti wajal, che' jiñi woli yälob:
«Ili Tobías ma'añik mi' iña'tañ. Maxto wajali tsa' iyäläyob itsäñsañob ti' kaj cha'añ mi' imuk jiñi xsajtelob, tsa'to puts'i. Wäle, woli icha' mel, ¿Machbä añik ibäk'eñ?»
9Ti jiñi jachbä ak'älel käläx añ tikwal. Jiñ cha'añ tsa' ts'ämiyoñ ya'i tsa' kajiyoñ ti ñoltäl ti' ñäk' jiñi ts'ajk ti jumpat, ixku ma'añik tsa' kmoso jkol. 10Ma'añik tsa' kila mi ya' ti' chañelal jiñi ts'ajk ya'añ jiñi imet xmate'mut; tsa' kaji kubiñ woli ti yajlel ju'bel ita' tikäw tsa' k'oti ya' ti kwut. Läk'älix cha'añ xpots'oñ mij kajñel, awilañ säk petsañ tsa' majli jiñi kwut. Che' jiñi tsa' kajiyoñ ti majlel ba'añ jiñi xts'äkaya cha'añ mi' lajmesäbeñoñ, che' tsa' chäñ majli kch'äme' jiñi ts'ak ñumeñ tsa' kaji ti asiyel jiñi kwut, k'äläl jiñto che' tsa' juñyajlel sajti jiñi kwut.
Chäñp'ej ja'b ma'añik tsa' kwis k'ele pañämil, ixku jkerañob tsa' kaji iweñ melob ipusik'al. Jiñi kichak' Ajicar cha'p'ejl ja'b tsi' käñtayoñ, k'äläl jiñto tsa' k'axi majlel ya' ti Elimaida. 11Ti jiñbä k'iñ jiñi kijñam ik'aba' Ana tsa' kaji imel iye'tel mu'bä imelob jiñi x-ixikob, tsi' päsä jiñi itsutsel täñäme', tsi' cha'le jalbal ja'el. 12Pejtelel chuki mi' imel mi ilaj choñ, yik'ot jiñi mu'bä imañbeñob mi tojbeñob.
Ya' ti wukp'ej tsik jiñi uw ik'aba' Distro, jiñi kijñam tsa' joloñi jump'ejl ijalbal, ya'i tsa' ich'ämbe majlel jiñi mu'bä imañbeñob. Jiñob tsa' ilaj tojbeyob ijalbal, tsa'to ak'eñti junkojt alä täñäme' ti' imajtañ. 13Che'bä jiñi kijñam tsa' k'oti ya' ti' otot, jiñi täñäme' tsa' kaji ti weñ uk'el. Che' jiñi tsa' kpäyä tilel jiñi kijñam, ya'i tsa' k'ajtibe:
—¿Baki tsa' tili ili alä täñäme' ila ti otot? ¿Machba tsa' axujch'i? Yom ma' cha' sutk'ibeñ iyum. Kome mach mejlik laj k'ux jiñi xujch'ibilbä aläk'äl.
14Jiñi kijñam tsa' kaji isu'beñoñ:
—Jiñi mu'bä imañbeñoñob kalbal tsi' itojbeyoñob, che' ja'el tsi' imajtañ ak'eyoñob ili alä täñäme'.
Joñoñ ma'añik tsa' kñopbe, kisiñtikoñ cha'añ chuki tsa' imele, tsa' ksu'be cha'añ mi' majlel icha' sutk'ibeñ iyum. Tsa' mich'a, ya'i tsi' isu'beyoñ:
—¿Chukito ik'äjñibal ak'uxbiya yik'ot toj takbä amelbal? ¡Wäle laj tsikilix chuki añ ti apusik'al! Che'eñ.
Aktualisht i përzgjedhur:
Tobit 2: CholDc
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Biblia Chol de estudio con DC- Derechos reservados por SBM