ಮತ್ತಾಯೆ 4
4
ಯೇಸುಗು ಆಯಿನ ಶೋಧನೆಲು
(ಮಾರ್ಕೆ 1:12,13; ಲೂಕೆ 4:1-13)
1ಬೊಕ್ಕ ಯೇಸು ಸೈತಾನಡ್ದ್ ಶೋಧನೆ ಆವೊಡು ಅಂದ್‌ದ್ ಆತ್ಮೆ ಆಯನ್ ಕಾಡ್‌ಗ್ ಲೆತ್ತೊಂದು ಪೋಯೆ. 2ಯೇಸು ನಲ್ಪ ದಿನ ರಾತ್ರೆ ಪಗೆಲ್ ಉಪವಾಸ ಮಲ್ತಿ ಬೊಕ್ಕ ಆಯಗ್ ಬಾರಿ ಬಡವು ಆಂಡ್. 3ಅಪಗ ಆ ಶೋಧಕೆ ಯೇಸು ಕೈತಲ್ ಬತ್ತ್‌ದ್, “ಈ ದೇವೆರೆ ಮಗೆ ಆದಿತ್ತಡ ಈ ಕಲ್ಲ್‌ಲೆನ್ ರೊಟ್ಟಿ ಆಪಿಲೆಕ್ಕ ಅಪ್ಪಣೆ ಕೊರ್ಲ,” ಅಂದ್‌ದ್ ಪನ್ನಗ, 4ಯೇಸು, “‘ನರಮಾನಿ ರೊಟ್ಟಿ ತಿಂದ್‌ಂಡ ಮಾತ್ರ ಬದುಕುಜೆ. ದೇವೆರೆ ಬಾಯಿಡ್ದ್ ಬರ್ಪಿ ಪ್ರತಿಯೊಂಜಿ ಪಾತೆರೊಡ್ದು ಬದುಕುವೆ,’ ಅಂದ್‌ದ್ ಬರೆತ್ಂಡ್,” ಪಂಡೆ.
5ಅಪಗ ಸೈತಾನೆ ಯೇಸುನು ಪರಿಶುದ್ಧ ಪಟ್ಟಣೊಗು ಲೆತ್ತೊಂದು ಪೋದು ದೇವಾಲಯದ ಗೋಪುರದ ಮಿತ್ತ್ ಉಂತಾದ್ 6ಆಯಡ, “ಈ ದೇವೆರೆ ಮಗೆ ಆದಿತ್ತಡ ಮುಲ್ತುಡ್ದು ತಿರ್ತ್ ಲೈಪುಲ.
‘ದೇವೆರ್ ತನ ದೂತೆರೆಗ್ ಅಪ್ಪಣೆ ಕೊರುವೆ;
ನಿನ ಕಾರ್ ಕಲ್ಲ್‌ಗ್ ತಾಂಟಂದಿಲೆಕ್ಕ
ಅಕುಲು ನಿನನ್ ಕೈಟ್ ದೆರ್ತ್ತ್ ಪತ್ತ್‌ವೆರ್,’ ಅಂದ್‌ದ್ ಬರೆತ್ಂಡ್,” ಅಂದ್‌ದ್ ಪಂಡೆ.
7ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವನ್ ಪರೀಕ್ಷೆ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ ಬರೆತ್ಂಡ್,” ಅಂದ್‌ದ್ ಪಂಡೆ.
8ಐಡ್ದ್ ಬೊಕ್ಕ ಸೈತಾನೆ ಆಯನ್ ಬಾರಿ ಎತ್ತರದ ಪರ್ವತೊಗು ಲೆತ್ತೊಂದು ಪೋದು ಲೋಕದ ಮಾತ ರಾಜ್ಯೊಲೆನ್ಲಾ ಐತ ಮೈಮೆನ್ಲಾ ಆಯಗ್ ತೋಜಾಯೆ. 9ಬೊಕ್ಕ ಸೈತಾನೆ, “ಈ ಎಂಕ್ ಅಡ್ಡಬೂರ್ದು ಆರಾಧನೆ ಮಲ್ತ್ಂಡ ಉಂದೆನ್ ಮಾತ ನಿಕ್ಕ್ ಕೊರ್ಪೆ,” ಪಂಡೆ.
10ಅಪಗ ಯೇಸು ಆಯಡ ಪಂಡಿನಿ, “ಸೈತಾನಾ, ಈ ಮುಲ್ತುಡ್ದು ಪೋಲ, ‘ನಿನ ದೇವೆರಾದುಪ್ಪು ಕರ್ತವಗ್ ಅಡ್ಡಬೂರ್ದು ಆಯನ್ ಒರಿಯನೇ ಆರಾಧನೆ ಮಲ್ಪೊಡಂದ್‌ದ್ ಬರೆತ್ಂಡ್.’”
11ಅಪಗ ಸೈತಾನೆ ಆಯನ್ ಬುಡ್ದು ಪೋಯೆ. ಬೊಕ್ಕ ದೂತೆರ್ ಬತ್ತ್‌ದ್ ಆಯಗ್ ಉಪಚಾರ ಮಲ್ತೆರ್.
ಗಲಿಲಾಯೊಡು ಯೇಸುನ ಸೇವೆ
(ಮಾರ್ಕೆ 1:14,15; ಲೂಕೆ 4:14,15)
12ಯೋಹಾನೆ ಸೆರೆಮನೆಟ್ ಬೂರಿಯೆ ಪನ್ಪಿ ಸುದ್ಧಿನ್ ಯೇಸು ಕೇಂಡ್ದ್ ಆ ಜಾಗ್‌ನ್ ಬುಡ್ದು ಗಲಿಲಾಯ ಸೀಮೆಗ್ ಪಿರ ಪೋಯೆ. 13ಐಡ್ದ್ ಬೊಕ್ಕ ನಜರೇತ್ ಪನ್ಪಿ ಊರುನು ಬುಡ್ದು ಜೆಬುಲೋನ್ ನೆಫ್ತಲೀಮ್ ಪನ್ಪಿ ನಾಡ್‌ಗ್ ಬತ್ತ್‌ದ್ ಕಡಲ್ದ ಕೈತಲಿತ್ತಿ ಕಪೆರ್ನೌಮು ಪನ್ಪಿ ಊರುಗು ಪೋದು ಉಂತಿಯೆ. 14ಉಂದೆಡ್ದ್ ಯೆಶಾಯೆ ಪನ್ಪಿ ಪ್ರವಾದಿಡ್ದ್ ಪಂಡ್ದುಪ್ಪು ಪಾತೆರ ನಡತ್ಂಡ್. ಆ ಪಾತೆರ ದಾನೆಂದ್ಂಡ,
15“ಜೆಬುಲೋನ್ ಸೀಮೆಲಾ ನೆಫ್ತಲೀಮ್ ಸೀಮೆಲಾ
ಯೊರ್ದಾನ್ ತುದೆತ್ತ ಅಂಚಿ ಕಡಲ್ದ ಕೈತಲುಪ್ಪು ಸೀಮೆಲಾ
ಪಿದಯಿದ ಜನೊಕುಲು ಉಪ್ಪು ಗಲಿಲಾಯ ಸೀಮೆಲಾ
16ಕತ್ತಲೆಡ್ ಬದ್‌ಕಿನ ಈ ಸೀಮೆದ ಜನೊಕುಲೆಗ್ ಮಲ್ಲ ಬೊಲ್ಪು ತೋಜ್ಂಡ್.
ಗರ್ಗಂಡ ಕತ್ತಲೆದ ದೇಶೊಡುಪ್ಪುನಾಕುಲೆಗ್ ಸೂರ್ಯೆ ಮೂಡ್ದು ಬತ್ತ್ಂಡ್.”
17ಆನಿಡ್ದ್ ಯೇಸು, “ಪಶ್ಚಾತಾಪ ಪಡೆಲೆ ದಾಯೆಗಂದ್ಂಡ ಪರಲೋಕ ರಾಜ್ಯ ಕೈತಲ್ ಬೈದ್‌ಂಡ್,” ಅಂದ್‌ದ್ ಸಾರಿಯೆರೆ ಸುರು ಮಲ್ತೆ.
ಯೇಸು ಶಿಷ್ಯೆರೆನ್ ಅಜತೊಂಡಿನವು
(ಮಾರ್ಕೆ 1:16-20; ಲೂಕೆ 5:1-11)
18ಯೇಸು ಗಲಿಲಾಯ ಕಡಲ್ದ ಬರಿಟ್ಟ್ ನಡಪುನಗ, ಪೇತ್ರೆ ಪನ್ಪಿ ಸೀಮೋನೆ ಬೊಕ್ಕ ಆಯನ ಮೆಗ್ಯೆ ಅಂದ್ರೆಯೆ, ಮೆಗ್ಯೆಪಲಯಾಡ್ಲು ಬಲೆ ಬೀಪುನೆನ್ ತೂಯೆ. ಅಕುಲು ಮೀನ್ ಪತ್ತುನಾಕುಲು. 19ಆಯೆ ಅಕ್ಲೆಗ್, “ಎನ ಬೆರಿಯೆ ಬಲೆ; ಯಾನ್ ನಿಕ್ಲೆನ್ ನರಮಾನಿಲೆನ್ ಪತ್ತುನ ಬೆಸ್ತೆರಾದ್ ಮಲ್ಪುವೆ,” ಅಂದ್‌ದ್ ಪಂಡಿ ಕೂಡ್ಲೆ, 20ಅಕುಲು ತನ್ಕುಲೆ ಬಲೆನ್ ಬುಡ್ದು ಆಯ ಬೆರಿಯೆ ಪೋಯೆರ್.
21ಯೇಸು ಅಲ್ಪಡ್ದ್ ದುಂಬು ಪೋನಗ ಬೇತೆ ಇರ್ವೆರ್ ಮೆಗ್ಯಪಲಯಾಡ್ಲು ಜೆಬೆದಾಯನ ಮಗೆ ಯಾಕೋಬುನ್ಲಾ ಆಯನ ಮೆಗ್ಯೆ ಯೋಹಾನನ್ಲಾ ತೂಯೆ. ಮೊಕುಲು ತನ್ಕುಲೆ ಅಮ್ಮೆ ಆಯಿ ಜೆಬೆದಾಯಡೊಪ್ಪ ಓಡೊಡು ತನ್ಕುಲೆ ಬಲೆನ್ ಸರಿ ಮಲ್ತೊಂದಿತ್ತೆರ್. ಯೇಸು ಮೊಕ್ಲೆನ್ಲಾ ಲೆತ್ತೆ. 22ಕೂಡ್ಲೇ ಅಕುಲು ಓಡೊನ್ಲಾ ತನ್ಕುಲೆ ಅಮ್ಮೆರೆನ್ಲಾ ಬುಡ್ದು ಯೇಸುನ ಬೆರಿಯೆ ಪೋಯೆರ್.
ಯೇಸು ಸೀಕ್‌ಲೆನ್ ವಾಸಿ ಮಲ್ತಿನವು
(ಲೂಕೆ 6:17-19)
23ಇಂಚ ಯೇಸು ಗಲಿಲಾಯ ಇಡೀ ತಿರ್ಗ್‌ದ್ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಪರಲೋಕ ರಾಜ್ಯದ ಸುವಾರ್ತೆನ್ ಸಾರಿದ್ ಜನೊಕುಲೆನ ಮಾತ ತರತ ಸೀಕ್‌ಲೆನ್, ಮಾತ ತರತ ಬೇನೆಲೆನ್ ಗುಣ ಮಲ್ತೊಂದು ಬತ್ತೆ. 24ಆಯನ ಸುದ್ಧಿ ಸುರಿಯ ದೇಶೊಡಿಡೀ ಪರಡಿನೆಡ್ದ್ ಮೆಯಿಟ್ ಸೌಖ್ಯದಾಂತಿನಾಕುಲು, ಪಂಡ ತರತರತ ಸೀಕ್‌ಲೆಡ್ದ್ ಭಂಗ ಬರ್ಪಿನಾಕುಲೆನ್ಲಾ, ದೆವ್ವ ಪತ್ತ್‌ದಿನಾಕುಲೆನ್ಲಾ, ಮೂರ್ಚಂಡೆ ರೋಗದಾಕುಲೆನ್ಲಾ, ಪಕ್ಷವಾತದಾಕುಲೆನ್ಲಾ, ಆಯನ ಕೈತಲ್ ಕನವೊಂದಿತ್ತೆರ್. ಆಯೆ ಅಕ್ಲೆನ್ ಗುಣ ಮಲ್ತೆ. 25ಬೊಕ್ಕ ಗಲಿಲಾಯ, ದೆಕಪೊಲಿ, ಯೆರೂಸಲೇಮ್, ಯೂದಾಯ, ಯೊರ್ದಾನ್ ತುದೆತ ಆಪೆ ಮರ್ಗಿಲ್‌ಡ್ದ್‌ಲಾ ಮಸ್ತ್ ಜನೊಕುಲು ಗುಂಪುಗುಂಪಾದ್ ಆಯನ ಬೆರಿಯೆ ಬತ್ತೆರ್.
Aktualisht i përzgjedhur:
ಮತ್ತಾಯೆ 4: ತುಳು
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
New Life Literature