Nʋnʋlii 5

Ananiasɩ ‑nyɛ ɔ 'lɛnglɛ Safilaa 'sɔ a wɛlɩɩ

1‑Mä Zezwii a ‑nʋa gla'mö, nɩkpɛ ‑bhlʋ wa laa Ananiasɩ, ɔ ‑nyɛ ɔ 'lɛnglɛ Safilaa 'sɔ, ‑mä wa ‑wʋmö a‑a. 'Ylɩ ‑bhlʋ 'mö, 'n wa yiɛ 'wa 'lagblɛɛ 'pɛlʋ 'pä. 2Wa 'pɛɛ 'pɛlʋ 'wëë, 'n Ananiasɩ yiɛ ɛ monii a 'kïbhë ‑mä ‑sɛ, 'n ɔ yeaa 'nɛnɩ 'zʋ. Moni a 'kïbhë ‑mä'la ‑a tʋʋä 'wʋʋ, 'n ɔ yeaa ‑mä Zezwii 'a tietiewaa kwä. 3Ɔ ‑nyɛɛ ghlɛɛ ‑lɛ, 'n Piɛlɩ yoo nimï 'yɩbhä, ɔ lɛ naa: «Ananiasɩ, sɛ yɩ ‑wʋ ɔ 'mö zuzukuzoku a 'kifii Sataa, 'n ɔ ‑yimö bhä sa'a 'mö plɛ n‑n yi bhä 'lagblɛɛ a monii a 'kïbhë 'nɛnɩ 'zʋ 'nɩ? 'Wugɔmʋʋ 'Wlɩlɩ mö ‑n nʋä da'a ylʋ. 4Dɛ ‑nn a‑a ‑bhlɛ 'lagblɛɛ 'pɛlʋ 'pää, ‑nmö ‑kälɛ a‑a. ‑N 'pɛ'ɛɛ 'pɛlʋ 'wëë, ɛ monii, ‑nmö ‑kälɛ'ɛɛ 'yize. Zaa, ‑n ‑kä a 'yɩbhää, ‑n ye a ɛ 'wuë 'wʋ 'libhï. 'Saa bhä n‑n yi ɔ sa'a a ‑li nʋ? ‑N 'zʋä sa'aa, nɩkpɛɛ ‑nn‑ä ylʋ 'wʋ plɛ, ‑maa Lagɔ a'bhë mö ‑n plɛɛ ylʋ 'wʋ.» 5Piɛlɩ gbää ‑sɩbhä cuu, Ananiasɩ, 'n ɔ yiɛ zɛmö bhli, 'n ɔ yiɛ 'ku. Wɛlɩ 'la, ‑wa 'nwiɛ, nganɔɔ yinuëë 'wʋ tenyii. 6Nyɛgbayuë ‑mumuë ‑wa ‑wʋmö a‑a ‑lɛ, 'n wa yiɛ yi, 'n wa yiɛ ‑gäzɛɛ 'sɔlʋ, 'n wa yee zizaa mö.

7'Gïle ta a sɛ 'plɩɛ 'wëë, 'n Ananiasɩ a 'lɛnglɛ yiɛ yi. ‑Maa ɔ 'luwli a wɛlɩ ‑yɩ 'plɩɛ, ɔ 'niɛ ‑yi. 8Ɔ yiɛ, Piɛlɩ lɛ naa: «Safilaa, moni wa pɩa 'lagblɛɛ 'möö, ɛ 'wuë mɛ bhä da'a ‑a?» Ɔ lɛ naa: «Nn! Monii ɔ ‑nyɛɛ yiɛ da'aa, 'mö wa pɩa 'lagblɛɛ 'mö.» 9'N Piɛlɩ yo'ɛɛ nimï 'yɩbhä, ɔ lɛ naa: «Sɛ yɩ ‑wʋ ɔ 'mö ‑n ‑nyɛ ‑na 'luwli 'sɔ 'n a yi bhä wɛlɩ 'wʋ 'zʋnɩ a 'kä ‑Alowli 'a 'Wugɔmʋʋ ylʋ 'wʋ plɛ 'nɩ? A ‑kä ‑sɩbhä 'zʋ 'saa ɔ 'kanyɩɛ nʋ, a 'kʋ 'ylɩmö, nza bhä ‑a? Yɩɛ ‑wa zizaa ‑na 'luwlii, wa ‑wʋ yi dɔ'wʋ, wa ‑nyɛmö 'kä'ɛ ‑naa 'mämö.» 10Piɛlɩ gbää ‑sɩbhä cuu, 'n Safilaa yoo dlɩ 'mö zɛmö bhli, 'n ɔ yiɛ 'ku. Nyɛgbayuëa plɛɛ ‑mä, wa lɛ 'bhöö 'lɛɛ, ɔ ku‑u. 'N wa yoo 'wʋ 'libhï, 'n wa yoo ‑lɛ ɔ 'luwli a lesikpëa yɔwʋ zizaa mö. 11Zezwii a ‑nʋa a ‑zɩkpa 'mö a ‑nʋa, wa ‑nyɛ ‑wa 'nʋä ‑lɛ a wɛlɩ 'la 'sɔ, wa 'wuë nganɔɔ yinuëë 'wʋ tenyii.

Zezwii 'a tietiewaa yɛ zɩzɛ a ‑bɛ 'pä

12 Zezwii 'a tietiewaa, zɩzɛli 'kädɩɩ wa nʋä nɩkpabhë a 'yila 'klʋʋ, yɩ'ɩɛ muënɩ. Wa ‑nyɛ Zezwii a ‑nʋa 'wuë 'sɔ ‑mä Lagɔbudu 'Kɔdʋʋ 'mö a ‑gligbëa wa 'pää Salomɔɔ 'a 'nglɩɩ, ‑mä a zɛmö ‑mä wa 'yɩbhänɩɛ dlɩ ‑bhʋlʋ 'mö 'kwädlɩ 'wlu 'yize. 13‑Maa wa ‑kä ‑mä ‑wʋʋ, ‑muë 'nɩɛ Zezwii 'a wɛlɩɩ ‑gänɩɩ, nganɔɔ lɩbhʋää wa 'kʋä gla'mö plɛ a dɔ'wʋ. 14‑Sɩbhä yɩ ‑wʋ 'mö, ‑maa nɩkpaa 'wuë, 'zʋ wa zuëë tenyii. Nyɩbhɛlɩ ‑nyɛ 'ngwlɩ 'sɔ ‑wa ngluä 'wʋ wa 'kä Zezwii 'a wɛlɩɩ ‑gänɩɩ, 'n wa zumanɩɛ 'yize, 'n wa yinɩɛ tɛkänʋa ‑gömö.

15‑Lɛ a 'tɛnyɩ 'la 'mö, 'wa guzuwaa 'mö wa ‑nyɛɛ yiɛ, 'n wa 'pïluëë ‑sɩsɛlie ‑nyɛ ‑bhelie 'sɔ 'wʋ, 'n wa zuëë ‑lɛ 'yiokʋkʋyɔwʋ sɛ, nzɩɩ Piɛlɩ ‑kä 'plɩɛ yii, 'ɔ zuzukwëa 'käa wa gla'mö a ‑mumuë 'wʋ ghlɛnɩ wa 'käa yɛmanɩ. 16Nɩkpa ‑mumuë, wa 'bhöönɩ Zeluzalɛɛmö a ‑kʋkʋyɔwʋ a ‑gwlɩ ‑mimii ‑gömö 'n wa yiɛ. Wa ‑su guzuwa, wa su'ɛ nɩkpa ‑wa kää zuzukuzoku ‑gömö. Wa 'wuë, 'n wa yɛmanɩɛ ‑sɩbhä.

Wa yɛ Zezwii 'a tietiewaa ‑jie 'mö 'pä Lagɔ kʋä ‑mä ‑sɛ

17Yɩmö 'la 'wuë a za, Lagɔbʋbɔnyɔ 'kɔdɔɔ ‑nyɛ Sadwisɩɛwaa a ‑zɩkpa 'mö a ‑nʋä 'sɔ, 'yli Zezwii 'a tietiewaa këluëë. Wa lɛ naa: «‑A 'kä 'wa libhoo 'nigba.» 18'N wa yiɛ nɩkpa tie, 'n wa yuëë köbhä, 'n wa yuëë ‑jie 'mö 'pä. 19‑Maa sabʋsɛ, Lagɔzuzukwë ‑bhlʋ, 'n a yiɛ yi, 'n a yiɛ ‑jiebudu a ‑gbïlii kälɩ. 'N a ‑nyʋä yiɛ ‑mä 'wlʋ. 20'N a yuëë 'dɩ 'nyɛ nɩɩ: «A nɩ mö ‑mä Lagɔbudu 'Kɔdʋʋ 'mö, wɛlɩɩ ‑yɩ nyɛɛ ‑tiamö a ‑bhölɩbhölɛɛ, a 'kɩ nɩkpa 'nyɛ.» 21Wɛlɩɩ Lagɔzuzukwëa 'nyʋää, 'n wa yiɛ 'wʋ nglu. Zlɩ zɩɛ, 'zɔkpɔ 'pii 'mö 'n wa yiɛ mö 'n wa yiɛ ‑mä Lagɔwɛlɩɩ bhïlanɩ.

‑Lɛ a zlɩ 'la ‑bhʋlʋ ‑kpɔ 'mö, Lagɔbʋbɔnyɔ 'kɔdɔɔ, ɔ ‑nyɛ 'ɔ ‑gänɩwaa 'sɔ, 'n wa yiɛ Zwiiföwaa a ‑zijlituwa 'kädɩɩ 'wuë 'wlu 'yɩbha wa 'kä ‑zijle 'käda plɛ. 'N wa yiɛ nɩkpa ‑mä ‑jiebuduu 'mö tie wa 'kä Zezwii 'a tietiewaa kie mö. 22‑Maa wa möä, wa lɛ 'bhöö 'lɛ wa'aa ‑mä ‑wʋ. 'N wa yiɛ 'wlu sɩbhä. 23Wa yiɛ, wa lɛ naa: «‑A möä, ‑a lɛ 'bhöö 'lɛɛ, ‑jiebuduu, wʋ gbaa 'tɩɩ. 'Slʋjaa ‑wa kuuä, wa ‑wʋ ‑lɛ. ‑Maa ‑a kälɩɛ ‑lɛ, ‑a plɛɛ ‑mä, nɩkpaa 'nɩɛ ‑mä ‑wʋ.» 24Wa 'nyʋää ‑sɩbhä 'dɩɩ, Lagɔbudu 'Kɔdʋʋ a ‑kʋkʋwaa a 'kifii, ɔ ‑nyɛ Lagɔbʋbɔwaa a 'kifiea 'sɔ, wa lɛ naa: «Ɔɔ! 'Saa bhä sa'a 'nɩ? Nɩkpa nɩ a wɛlɩɩ, sɛ ‑a 'kɩ bhä köbhä 'nɩ?» 25Wa kɩ ngli cuu, 'n nɩkpɛ ‑bhlʋ yiɛ yi. Ɔ lɛ naa: «A ‑kɔfänɩɛ oo, ‑maa nɩkpaa a 'pä a‑a ‑jie 'möö, wa ‑wʋ ‑mä Lagɔbudu 'Kɔdʋʋ 'mö, wa ‑wʋ Lagɔwɛlɩɩ bhïla dɔ'wʋ.» 26'N 'slʋjaa a 'kifii yiɛ 'wʋ ‑sɔ, ɔ ‑nyɛ 'ɔ nɩkpaa 'sɔ, 'n wa yuëë kie mö. ‑Maa wa möä, wa ‑kʋä ‑glasɛ köbhä nɩkpabhë tuëa 'kpɩ 'mö 'lɩbhä a za, ‑gu wa ‑guä zaa, wa 'nuëë ‑glasɛ köbhä.

27Wa ‑nyʋä yiɛ, ‑lɛ ‑zijlituwaa 'wuë a 'yila 'klʋ, Lagɔbʋbɔnyɔ 'kɔdɔɔ, 'n ɔ yuëë nimï 'yɩbhä, ɔ lɛ naa: 28«Sɛ'ɛ ‑a 'nanyɩɛ bhä'ɛ 'dɩ 'nyɛ nɩɩ, a nɩ tɩ nɩkpɛ 'la a wɛlɩ mä'ä bhïlanɩɛ 'nɩ? A yɛ 'ɔ wɛlɩɩ Zeluzalɛɛmö a ‑glɔ 'wuë 'wʋ yie. A yɩbhä bhä a ‑kanyɩ ɔ 'kwiea a gbʋ ‑gömö 'zʋ ‑a?» 29‑Maa Piɛlɩwa lɛ naa: «‑A 'kɩ nʋ, ‑maa ɛ ‑kä Lagɔ ‑nyɛ nɩkpa 'sɔ a dɔ'wʋʋ, Lagɔ mö ‑a kä ‑a 'kää 'klʋkpamö zʋ. 30‑Maa sɛ a gbää da'a a dɔ'wʋ, abhʋaa kʋnɩɛ ‑tiamö Zezwii ‑lɛ su 'klʋ 'n ɔ yiɛ 'ku. ‑Maa Lagɔ ‑aa dɩbawa a dɩbawa 'wuë bʋbɔ a‑a, ɔ yɛ Zezwii glu ‑sɛ. 31Ɔ kɔ ‑mä ɔ luukɛ 'wʋ sɛ 'gïla, ɔ 'kä nɩkpaa 'wuë a Puënyɔ glɩnɩ. Ɔ za, Yizlaɛlɩ a ‑nʋa, wa ‑kä ligba wa 'kä 'wa ‑lizokuu kɛ'mö ‑sɛɛ, Lagɔ yi 'wa 'nyinylolii a gbʋʋ 'yi 'tatinɩ. 32‑Lɛ a wɛlɩ 'la, ‑tiawɛlɩɛ, nza ‑a nyɩɛ nɩkpa. ‑Anyɩgäsɛ ‑abhʋa 'nɩɛ bhïla, ‑maa 'Wugɔmʋʋ 'Wlɩlɩ mɔɔ bhïlanɩnyɩɛ 'mö. 'Ɔ 'Wugɔmʋʋ, nɩkpa 'wuë ‑wa zʋä Lagɔ 'klʋkpamö, sɛ ɔ yɩbhää ‑wa zʋä ‑sɩbhää, 'mö ɔ zuëë ‑gömö.» 33Wa gbää ‑sɩbhää, ‑zijlituwaa 'wuë, wa'aa ‑wa 'lɩlɩlɩ. Wa lɛ naa: «Nɩkpa nɩ, wa nɩ 'lɩbhʋä wa 'kä 'ku.» 34‑Maa Falizɩɛwaa a ‑zɩkpaa 'mö a nɩkpɛ ‑bhlʋ wa laa Gamaliɛlɩ, ɔ ‑wʋmö a ‑lɛ. Moyizɩ 'a Gböö a 'cɩanyɔ ‑bhlʋ, nɩkpa 'wuë zʋä tenyii 'klʋkpamöö, 'mö ɔ glɩnɩɛ. Nɩkpɛ 'la, 'n ɔ yiɛ ‑mä ‑zijlea 'mö 'wʋ ‑sɔ, ɔ lɛ naa: «Piɛlɩwa, a nɩ 'nyʋää ‑ka 'dɩ wa 'kä ‑bhlɛ zɛmö 'wlʋ.» 35Wa 'wlʋä zɛmö 'wëë, ‑n ɔ yiɛ 'mö ‑sɛnɩ, ɔ lɛ naa: 36«Yizlaɛlɩ a ‑nʋänyɩ, sɛ a gbää a 'kä nɩkpa 'la zʋ a dɔ'wʋ, a nɩ 'päa sasɛ dlɩ 'wë. ‑Maa a'bhï a ‑yi sɛ nɩɩ, 'ylɩ ‑bhlʋ 'mö, nɩkpɛ ‑bhlʋ mɔɔ 'wlʋä mä'ä ‑a 'bhele, mɔɔ la a‑a ɔnyɩ nɩkpɛ 'kɔdɔ, ɔ nglɩɛ a Tedasɩ. Nɩkpa a 'du ‑bhlʋ a sɛ mʋa nglu a‑a 'ɔ wɛlɩɩ 'wʋ 'n wa ‑wɔɔ a‑a nimï. ‑Maa wa 'lɩbhɔɔ 'n ɔ yiɛ 'ku 'wëë, ɔ ‑nʋa 'wuë, yɔwʋ wa ‑sɛnɩɛ 'lɩlɩlɩ, 'n ɔ 'nglɩ yiɛ nuë 'wʋ bhɩɛ. 37Yɩ 'plɩɛ 'wëë, 'tɛnyɩ wa 'zʋnɩɛ nɩkpa 'bɔgʋ 'möö, ɛ 'mö, nɩkpɛ ‑mɔmɔɔ ‑bhlʋ, 'n ɔ yi'ɛɛ 'wlʋ. Ɔ nglɩɛ a Zwidaa, Galilee a nɩkpɛ a‑a. Nɩkpa a 'kɔkɔmlɛ ‑gänɩ a 'ɔ wɛlɩɩ. 'N ɔ yi'ɛɛ ɔbhlɩ 'ku. Ɔ 'kuä 'wëë, ‑wa ‑gänɔɔ a‑a, wa 'wuë yɔwʋ wa ‑sɛnɩ'ɛɛ. 38Zaa, zɩ'ɛ a dɔ'wʋ, n nyanyɩ 'dɩ nɩɩ: Nɩkpa nɩ 'dɛɛ a wɛlɩɩ, a nɩ 'tatinii 'yi, a nɩ ‑sʋä kɛ yɔwʋ wa 'kä mö. ‑Maa 'wa 'saa wa ‑wʋä da'a 'wʋʋ, 'n yɩ ‑kä nɩkpa a 'yize a ‑li glɩnɩɩ, a yi zɩkö 'ylɩmö, yɩ yi 'yli bhɩɛ. 39‑Maa 'n yɩ ‑kä Lagɔ a ‑li glɩnɩɩ, sɛ a yi 'zʋ ‑kë, wa 'naa 'kɩa 'yi 'tatinɩ. Zaa, a 'nɛmanɩ anyɩ 'wʋ, ɛ tɩ ‑bhɩɛa nɩkpa a ‑muëë klɛnɩ Lagɔ 'a wɛlɩɩ ‑kplikpli 'yli 'mö a glɩnɩ.» Gamaliɛlɩ ‑sɛnɩɛ ‑sɩbhää 'möö, 'n ‑zijlituwaa yiɛ 'ɔ wɛlɩɩ 'wʋ nglu. 40'N wa yia'aa Zezwii 'a tietiewaa wäzɩ, 'n wa yuëë 'sɛlɩ, 'n wa yuëë 'dɩ 'nyɛ nɩɩ: «A tɩa'a ‑sɩkaa nɩkpabhë a 'yila 'klʋ Zezwii 'nglɩ ‑dɩ.» 'N wa yuëë kɛ yɔwʋ ‑sɛ 'n wa yiɛ mö. 41‑Maa Zezwii a ‑nʋa wabhlɩ, wa 'bhööä ‑zijlea 'wʋʋ, sɛɛ Lagɔ 'tatinuëë 'yi 'n wa yuëë Zezwii a za 'zwɩ zia a za, wa 'wuë 'mäna a 'yize. 42'Bhöönɩ ‑lɛ, zilaa 'wuë 'mö, ‑mä Lagɔbudu 'Kɔdʋʋ 'mö, 'n ‑mä 'wa 'ligbïï 'mö, 'n wa bhïlanɩɛ ‑mä Lagɔ 'a wɛlɩɩ 'kwädlɩ 'yize. 'N wa biaa 'Mänatɩtɩɩ ‑yɩ nʋä nɩɩ Zezwii, Puënyɔ Lagɔ ‑sɛɛ ‑lɛ 'mö ɔ glɩnɩɛ.

Aktualisht i përzgjedhur:

Nʋnʋlii 5: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2