Zaa 16

1Na gbʋ tanyɩa dlɩ 'wʋ bhɩɛ, a ‑tɩɩa ‑gömö panɩ, nza n 'nyanyɩɛ wɛlɩ 'la 'wuë. 2Zwiiföwaa 'a Lagɔbïdii 'mö, wa yeanyɩa ‑mä kpëti. 'Tɛnyɩ ‑mɛmɛɛ a'bhë ‑kä ghlɛɛ, nɩkpa ‑mumuë, wa yeanyɩa 'lɩbhä a 'kä 'ku. Wa ‑kä ‑sɩbhä 'zʋ dɔ'wʋ ‑wʋʋ, wa yi dlɩ 'pä nɩɩ, yɩ nɛnɩ ‑sɩbhä Lagɔ dlɩ yɔwʋ. 3Na dɩba Lagɔ, wa 'nɔɔ tɛkäsɛ ‑yi 'lɩlɩlɩ, na'bhë wa ‑nɩɩɛ'ɛ ‑yimö, nza wa 'kanyɩɛ sa'a 'zʋ. 4‑Maa 'tɛnyɩ wa 'kanyɩɛ sa'a 'mö 'zʋnɩɩ, ɛ ‑kä ghlɛɛ, a 'käa ligba nɩɩ, n gbä a ‑sɩbhä, nza n nyanyɩɛ ‑bhlɛ ‑sɩbhä 'dɩ. N ‑nyɛ abhʋa tɛɛ a‑a cuu, n 'nanyɩɛ a wɛlɩ 'la 'nyɛ. Ɛ'ɛ ‑bhö nyɩasɛ, ‑maa na'bhë, n ‑wʋanyɩ a ‑bhlɛ jijo'wʋ.

'Wugɔmʋʋ 'Wlɩlɩ 'a libhoo

5‑Maa ‑sɩkaa a dɔ'wʋ, ‑ɔ tieaa a‑a, ‑mä ɔ yɔwʋ, ‑mä n ‑wʋä 'bɩwʋ mö dɔ'wʋ. ‑Maa a gla'mö a nɩkpɛ ‑bhlʋ a'bhë 'nɩ 'yɩbhaa nimï nɩɩ: ‑Atʋ, mä ‑n mö bhä 'nɩ? 6‑Maa sɛ n 'nyanyɩɛ 'dɩ nɩɩ, n yɛɛ mö a za, swɩ kanyɩ yɔwʋ 'kunɩ 'lɩlɩlɩ. 7‑Maa ‑tiamö n nyanyɩɛ dɛ'ɛ 'dɩ nɩɩ, n ‑kä ‑mä na dɩba Lagɔ yɔwʋ 'bɩwʋ möö, mɩɩ kää a ‑li a ‑li 'mö. Ɛ'ɛ ‑bhö nyɩasɛ, ‑maa n 'nɩ ‑mä möö, ‑mɔ n gbä a‑a ‑ɔ 'kanyɩ swɩ nyɛmʋ 'mö 'pää, ɔ 'naa 'kä yi. ‑Maa n ‑kä ‑mä möö, n yeanyɔ 'yio 'wʋ 'pä. 8Ɔ ‑kä yii, mɔɔ 'kää 'bhlɩbhë 'ylimö tulanɩ nɩɩ, 'nyinylolii mi, Lagɔ a 'yila 'klʋ a 'mözlɔnɩzlɔnɛɛ mɛ, 'n Lagɔ 'a ‑zijlitutwee a dɔ'wʋ, wanyɩ wa dulaa. 9'Nyinylolii a dɔ'wʋ, sɛ wa dulaa wanyɩ ma‑a nɩɩ, wa ‑nɩɩɛ dlɩ 'wʋ ‑kä. 10Lagɔ a 'yila 'klʋ a 'mözlɔnɩzlɔnɛɛ a dɔ'wʋ, wanyɩ wa dulaa. Ɛ'ɛ ‑bhö nyɩasɛ, ‑maa ‑mä Lagɔ yɔwʋ ‑mä n ‑wʋä mö dɔ'wʋ, wa 'naa ‑kaaa'a 'ylɩmö.#16.10 Zezwii a 'yize mɔɔ zlɔnɩɛ 'mö Lagɔ a 'yila 'klʋ a dɔ'wʋ. 11Lagɔ 'a ‑zijlitutwee a dɔ'wʋ, wanyɩ wa dulaa. Ɛ'ɛ ‑bhö nyɩasɛ, ‑maa zuzukuzoku a 'kifii ‑ɔ 'kämanɩɛ mä'ä 'pɩwʋ a nɩkpaa ‑gömöö, 'ɔ ‑zijlea yɛ tuo 'wë.

12N kä abhlɩ 'kïbhï a ‑bɛ 'mlɩ n 'kanyi 'nyɛ, ‑maa n ‑yi sɛ nɩɩ dɛ ‑a ‑wʋä ‑bhlɛ ‑sɩkaa dɛ'ɛ, kɛ'mö yɩ 'kanyɩɛ 'tɛɛnɩ. 13‑Maa Gbëabhïlawugɔmʋʋ ‑kä yii, mɔɔ 'kanyiɛ gbëaa sʋlʋnɩ. Ɔnyɩ a 'nglɩ 'mö ɔ 'naa 'kä bhïla. ‑Maa wɛlɩɩ 'wuë Lagɔ 'kɔɔ 'nyɛɛ, 'mö ɔ 'kää bhïla. 'Saa 'kää bhäla ghlɛɛ, ɔ 'kanyɩ'ɛ yɩ 'dɩ 'nyɛ. 14Na'bhë, sɛ n 'kɔɔ 'na wɛlɩɩ 'nyɛɛ, ‑sɩbhä ɔ 'kanyiɛ 'nyɛ, nzɩɩ ɔ 'kä 'na nglɩɩ 'ghlimanɩ. 15‑Lii 'wuë ‑yɩ glɩnɩɛ na Dɩba a ‑lii, na ‑li yɩ glɩnɩmöä. Nza n gbää nɩɩ, sɛ n 'kää 'Wugɔmʋʋ 'na wɛlɩɩ 'nyɛɛ, ‑sɩbhä ɔ 'kanyiɛ 'nyɛ.»

'A ‑kɔnɩkɔnɛɛ yi 'mäna 'mö yinɩ

16«Sɛ'ɛ n gbää nɩɩ, ‑lɛ ‑kä 'tikïyie 'wʋ 'mö gwälɛ, a 'naa ‑kaaa'a 'ylɩmö. ‑Lɛ ‑kä'ɛ 'tikïyie 'wʋ 'mö gwälɛɛ, 'n a ‑kaa'ɛɛ 'ylɩmö.» 17Zezwii gbää sa'aa, 'ɔ ‑gänɩwaa a gla'mö a ‑mumuë, 'n wa yiɛ nimï 'yɩbhäyɩbhänɩ, wa lɛ naa: «Wɛlɩɩ ɔ bhïlaa da'a nɩɩ, ‑lɛ ‑kä 'tikïyie 'wʋ 'mö gwälɛ, ‑a 'naa 'kɔ 'ylɩmö, ‑lɛ ‑kä'ɛ 'tikïyie 'wʋ 'mö gwälɛɛ, a‑a lɛ 'kɔ'ɛɛ 'ylɩmö, sɛ yɩ sɛ bhä zɛmö 'nɩ? 'Saa wa la bhä'ɛ nɩɩ, na Dɩba yɔwʋ ‑mä n möä 'nɩ? 18Ɔ ‑kä sa'a ‑lɛ ‑kä 'tikïyie 'wʋ 'mö gwälɛ nʋʋ, ‑aaa 'wuë 'saa ɔ gaaa da'a ‑yi 'lɩlɩlɩ.» 19‑Maa Zezwii yɩbhlɩnɩɛ sɛ nɩɩ, wa yɩbhä wa 'kɔ nimï 'yɩbhää, ɔ lɛ naa: «Gbʋmö n gbä nɩɩ, ‑lɛ ‑kä ‑sɩkaa 'tikïyie 'wʋ 'mö gwälɛ a 'naa ‑kaa 'ylɩmö, ‑lɛ ‑kä'ɛ 'tikïyie 'wʋ 'mö gwälɛ, 'n a lɛ ‑kaa'ɛɛ 'ylɩmöö, yɩ za a 'yɩbhäyɩbhänɩ bhä nimï ‑a? 20‑Tiamö n nyanyɩɛ dɛ'ɛ 'dɩ nɩɩ: Abhʋa na ‑nʋa, na za ngäzɩ yeanyɩ 'lɩbhä, a yi 'wi. ‑Maa mä'ä 'pɩwʋ a 'yize a ‑nʋa 'mäna yuë wabhlɩ 'lɩbhä. A yi ‑kɔnɩ, ‑maa 'a ‑kɔnɩkɔnɛɛ yi 'mäna 'mö yinɩ.

21A'bhï a ‑yi sɛ nɩɩ, 'nglɔ ‑kä ‑sɩbhä 'bhööä yii, ɔ ‑yi sɛɛ 'ɔ ‑gbapögbapötɛnyɩɩ yɛ ghlɛ zaa, dlɩɩ libhoo tenyii. ‑Maa ɔ ‑käa'a ‑sɩbhä 'bhöö 'wëë, ‑gbapögbapɛ 'la 'wuë, 'wʋ ɔ dulwee. Ɛ'ɛ ‑bhö nyɩasɛ, ‑maa ɔ yɛ nɩkpɛ 'pɩwʋ ‑lɛmö a 'mäna ma‑a lɩbhɔɔ. 22Sɛ ‑bhʋlʋ ‑kpɔ 'la ‑sɩbhä a ‑wʋä. Sɛ n 'kanyɩɛ jijo'wʋ 'bhöö a za, nza 'a dilaa ‑wʋä 'yli klɛ dɔ'wʋ. ‑Maa n yeanyɩ 'wʋ 'sɔ jijo'wʋ yinɩ. ‑Lɛ a dɔ'wʋ 'mäna yeanyɩ 'wlu 'mänanɩ. ‑Lɛ a 'mäna 'la, ‑bɛ 'nɩɛ bhɛnɩ ɔ 'kanya dlɩ zɛmö ‑sɛ. 23‑Lɛ a zlɩ 'la 'mö, a 'naa ‑kaaa'a ‑lu ‑bhlʋ a'bhë 'wʋ 'yɩbhänɩ 'lɩlɩlɩ. ‑Tiamö n nyanyɩɛ dɛ'ɛ 'dɩ nɩɩ, 'saa a ‑kä na 'nglɩ 'mö na dɩba Lagɔ zɛla ‑kë, ɔ yeanyu 'nyɛ. 24Sɛ a 'maa ‑kaa ‑gänɩɩ, a'aa ‑bhlɛ na 'nglɩ 'mö Lagɔ ‑lu zɛla. ‑Sɩkaa a dɔ'wʋ, a nɩ zɛla Lagɔ, ‑maa ɔ yeanyɩ 'nyɛ. ‑Lɛ a dɔ'wʋ, 'a 'mänaa yi 'klʋ yie.

25Wɛlɩɩ 'wuë n 'nyanyɩɛ, 'nini 'mö n 'nyɛnanyiɛ. ‑Maa 'tɛnyɩ ‑bhlʋ yi ghlɛ, n ‑kä n 'kanyɩ 'dɩ 'nyɛɛ, 'naa 'kanyɩa'a 'nini 'mö 'dɩ 'nyɛnɩ. ‑Maa wɛlɩɩ 'wuë ‑yɩ bhïlaa na Dɩba 'a dɛɛ, gbëdanguu n 'kanyiɛ kɛ 'klʋ kälɩnɩ. 26‑Lɛ a 'tɛnyɩ 'la ‑kä ghlɛɛ, a ‑kä na 'nglɩ 'mö Lagɔ ‑lu zɛlaa, ɔ yeanyu 'nyɛ. Sɛ'ɛ n'n‑ä nɩɩ, ‑amöö 'kɔɔ yɔwʋ bhibhe 'wë ɔ 'kanyu 'nyɛ nʋ. 27Ɛ'ɛ ‑bhö nyɩasɛ, ‑maa na dɩba Lagɔ, ɔ'bhë ‑wa ɔ ‑waanyɩɛ. Sɛ a ‑waaa 'n a kɩɛ dlɩ 'wʋ nɩɩ ɔ dlɩ 'mö ‑mä n 'bhöönɩɛ a za, nza ɔ ‑waanyɩɛ. 28Na Dɩba a dlɩ 'mö ‑mä n 'bhöönɩɛ ‑tiamö, 'n n yiɛ mä'ä dʋdʋ 'wʋ yi. ‑Sɩkaa a dɔ'wʋ, mä'ä dʋdʋ 'wʋ ‑mä n ‑wʋa'aa 'bhöö dɔ'wʋ, n 'kä ‑mä ɔ yɔwʋ 'bɩwʋ mö.» 29Ɔ gbää sa'aa, 'ɔ ‑gänɩwaa lɛ naa: «‑Atʋ yɩɛ, ‑sɩkaa a dɔ'wʋ, ‑nn‑a'a 'nini 'mö bhïlanɩ, ‑maa gbëaa ‑n nyɩanyɩɛ 'dɩ. 30‑A ‑yia'a ‑sɩkaa sɛ nɩɩ, ‑n ‑yi ‑lii 'wuë, ‑nn‑a'a nimïyɩbhäsɛ ‑wʋ. Nza ‑a kɩɛ dlɩ 'wʋ a'bhë nɩɩ, Lagɔ dlɩ 'mö ‑mä ‑n 'bhöönɩɛ.» 31Ɔ lɛ naa: «A kɩa'a ‑sɩkaa dlɩ 'wʋ ‑a? 32Yɩ nɛnɩ abhlɩ, ‑maa a yɩɛ, 'tɛnyɩ ‑bhlʋ yi ghlɛ. ‑Lɛ a 'tɛnyɩ 'la 'mö, a ‑yii yɔwʋ 'bhöö, a 'kä bhʋlʋbhlʋ yɔwʋ ‑sɛnɩ, ‑mɔ 'kä 'ɔ sɛ mö, ‑mɔ 'kä 'ɔ sɛ mö n 'kä na 'yize ‑lɛ tʋʋ. ‑Lɛ a 'tɛnyɩ 'la, ɛ yɛ ghlɛ 'wë a'bhë. ‑Maa na 'yize ‑amöö 'nɩɛ 'kä ‑lɛ tʋʋ, ‑maa na dɩba Lagɔ ‑wʋʋ ‑gömö. 33Wɛlɩ 'wuë n 'kanyɩɛ yɔwʋ tɩɩ, miɛ da'a. Nyɩasɛ n 'nanyiɛ 'nyɛ, ‑maa a ‑kaa 'kwädlɩ 'wʋ ‑glɛ a 'käa 'tɩɩglɩglɛ ‑kä a za, nza n 'nyanyiɛ. A yia mä'ä 'pɩwʋ 'zwɩ a ‑bɛ zi. ‑Sɩbhä yɩ ‑wʋ 'mö, ‑maa ‑amö, n yɛ mä'ä 'pɩwʋ a ‑lizokuu 'wuë 'wlu 'plɩ zaa, a nɩ 'tɛmanɩa 'yli yɔwʋ.»

Aktualisht i përzgjedhur:

Zaa 16: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2