Zaa 2

Wa yɛ ‑mä Kanaa 'nglɔ 'wʋ bhli

1Yɩ 'plɩɛ sa'a 'wë a ylɩɩ a tanɛɛ 'mö, ‑mä Galilee‑bhölɩɩ 'mö a glɔ ‑bhlʋ wa laa Kanaa, 'n wa yiɛ ‑mä 'nglɔ 'wʋ 'bhli. Nglɔɔ a 'wʋbhlidɛ 'la, Zezwii a ‑da ‑wʋmö a ‑lɛ. 2Zezwii a'bhë, ɔ ‑nyɛ 'ɔ ‑gänɩwaa 'sɔ wa wäzɩmuë a, wa 'kä nglɔɔ 'wʋ 'bhli. 3‑Maa wa ‑wʋä nglɔɔ 'wʋ 'bhli dɔ'wʋʋ, duvɛɛ wa nɩmä a‑a, 'n ɛ yiɛ bhɩɛ, 'n Zezwii a ‑da yoo 'dɩ 'nyɛ, ɔ lɛ naa: «Yɩɛ, nʋʋ yɛ bhɩɛ.» 4Zezwii lɛ naa: «'Nyɩa, 'na 'saa n 'kää nʋʋ, ‑nmö ‑kaa bhä 'dɩ 'nyɛ n 'kʋ nʋ ‑a? 'Na 'tɛnyɩ 'nɩɛ ‑bhlɛ ghlɛ.» 5Zezwii gbää sa'aa, 'n ɔ da yiɛ fɛtɩɩ a 'yliwʋwaa 'dɩ 'nyɛ nɩɩ: «Na yowli, sɛ ɔ 'kanyɩɛ ɔ'bhë 'dɩ 'nyɛɛ, ‑sɩbhä a nɩ 'zʋ.» 6Lɛ 'ligbë 'la 'mö, ‑balakï 'kädɩ gbʋplʋ ‑wʋ a ‑lɛ. Yɩ bhɛnɩ yɩ 'kä bhʋlʋbhlʋ 'nyukpälɩ a gwlɩ ngbï a sɛ 'mö plɛ. ‑Lakï 'la, Zwiiföwaa ‑kä wa 'kä Lagɔ bhibhee, sɛɛ Gböö gbää wa nɩ wɔlɔ kplɩ yɔwʋ, wa 'kä 'wlɩlɩ plɛ Lagɔ a 'yila 'klʋ a dɔ'wʋʋ, wa ‑kä ‑sɩbhä 'zʋä yii, yɩ 'mö, ‑mä wa luä. 7'N Zezwii yiɛ 'fɛtɩɩ a 'yliwʋwa 'la 'dɩ 'nyɛ nɩɩ: «A nɩ yie ‑lakï nɩ 'nyu 'wʋ.» 'N wa yiɛ nyuu 'wʋ yie ‑blɛblɛ. 8Wa yiiɛ 'wëë, Zezwii lɛ naa: «A nɩ 'lua'a ‑sɩkaa 'tikïyie, ‑ɔ ‑wʋä lilea 'ylii, a 'kɔnyɩ ‑mä kwä.» 'N wa yonyɩɛ ‑mä kwä. 9'N ɔ yuä ngli 'yɩ. Ɔ lɛ zʋ a sɛ'ɛ, nʋä. Ɔ'ɔ a'bhë dɛɛ nʋ 'la yɛ 'bhöönɩ ‑yi, ‑maa 'yliwʋwaa ‑wa 'lu a‑a nyuu, wa ‑yi wabhlɩ sɛ. Ɔ 'yuä ngli 'wëë, 'n ɔ yiɛ nglʋkwänyɔɔ a'bhë wäzɩ. 10Ɔ lɛ naa: «Wa ‑kä 'kwädlɩ 'bhlii, nʋ a ‑nʋʋ, 'mö wa nyɛɛ nɩkpaa 'wë, wa ‑käa'a ‑bɛ 'wʋ 'nɩmää, ‑wʋʋä sasɛ nɛnɩɩ, 'n wa lɛmuä. ‑Maa ‑nmö ‑naa, nʋ a ‑nʋʋ mö ‑n kwïlaa ‑këë, n‑n 'wulua'aa ‑sɩkaa 'yli.»

11‑Mä Galilee a ‑glɔɔ wa laa Kanaa, sa'a ‑sɩbhä Zezwii 'pänɩɛ ‑mä 'ɔ tɛkäzɩzɛɛ, 'n ɔ yiɛ ‑sɩbhä 'ɔ 'ghïlinɔɔ 'yli 'wälanɩ. 'Bhöönɩa'a da'a, 'ɔ ‑gänɩwaa, dlɩ wa 'tɛɛnɔɔa'aa. 12Yɩ 'plɩɛ sa'a 'wëë, 'n ɔ yiɛ 'wʋ ‑sɔ. Ɔ ‑da mɔ, ɔ ‑daayuë muë, 'ɔ ‑gänɩwaa kökä, ‑glɔɔ wa laa Kapɛnaɔmö, 'n wa yiɛ ‑mä mö. Wa ‑sɛ ‑mä 'ylɩya.

Zezwii yɛ ‑mä Lagɔbudu 'Kɔdʋʋ 'mö a 'pɛlʋpäwaa kpëti

(Matie 21.12-13; Maakö 11.15-17; Lwiikö 19.45-46)

13Zwiiföwaa 'a Galɛ'möwlʋfɛtɩɩ mɛɛ lɛ 'kää ghlɛ, zaa, 'n Zezwii yiɛ ‑mä Zeluzalɛɛmö mö. 14Ɔ ghlɛɛ ‑mä, 'n ɔ yiɛ ‑mä Lagɔbudu 'Kɔdʋʋ a 'ligbëa 'mö plɛ. Ɔ lɛ 'bhöö'ɛ, 'pɛlʋpäwa su ‑mä. ‑Muë pä 'bhila 'pɛlʋ, ‑muë pä wïla 'pɛlʋ, ‑muë pä ‑kpakwie 'pɛlʋ. Moni a 'mözigbanɩwa ‑wʋmö'ɛ ‑mä. Wa glɩ 'wa 'tebhlii yɔwʋ. 15'N Zezwii yiɛ 'likpï 'wʋ 'libhi, 'n ɔ yiɛ ‑kpliyi lɩbhä, nɩkpa 'la 'wuë, 'n ɔ yuëë kpëti, wa ‑nyɛ 'wa wïlaa ‑nyɛ 'wa bhilaa 'sɔ. 'Wa zigbanɩ a‑a moni 'möö, 'wa monii, 'n ɔ yee 'kwlɛ 'mö 'päpänɩ. 'Wa 'tebhlii, 'n ɔ yiɛ 'gbliza. 16'N ɔ yiɛ ‑kpakwiea a 'pɛlʋpäwaa 'dɩ 'nyɛ nɩɩ: «A ‑nyɛ 'a ‑kpakwiea nɩ 'wlʋ ‑mä. ‑Maa na dɩba Lagɔ 'a ‑buduu, a nɩ tu 'pɛlʋpädɛ 'wʋ 'zʋa!» 17Zezwii 'nyʋää ‑sɩbhä 'dɩɩ, 'n 'ɔ ‑gänɩwaa yiɛ ‑mä Lagɔ 'a 'bɔgʋʋ 'mö a wɛlɩkïbhë ‑bhlʋ 'wʋ ligbanɩ. Wɛlɩkïbhë 'la sɛ'ɛ a nʋä nɩɩ: ‑Na'a ‑buduu a ‑wawʋʋ a za, na dlɩ si.

18Zwiiföwaa a 'kädɩ ‑mumuë ‑wa ‑wʋmö a‑a ‑lɛ, 'n wa yiɛ Zezwii nimï 'yɩbhä nɩɩ: «'Saa ‑n nʋä dɛ'ɛɛ, Lagɔ mɔɔ tiamu bhä 'wʋ ‑a? Ɛ ‑kä ‑sɩbhä ma‑a, 'pänɩɛ ‑ka dɛ'ɛ ‑aa 'yila 'klʋ zɩzɛ, ‑a 'kä sɛ ‑yi.» 19Zezwii lɛ naa: «Lagɔbudu 'Kɔdʋ nɩ, a nɩ wlʋ. ‑Maa a ‑kʋʋ wlɛ 'wëë, n yu 'ylɩ ta 'mö 'wlu 'libhïnɩ.» 20Wa lɛ: «'Ylʋbö a gwlɩ 'sɔ 'ylʋbö gbʋplʋ, 'mö wa 'sɩbhänɩɛ Lagɔbudu 'kɔdʋ nɩ. Mö ‑n gbä bhä ‑naa, wa nɩ wlɛ, ‑n 'kʋ 'ylɩ ta 'mö 'sɩbhänɩ ‑a?» 21‑Maa Zezwii nʋä da'a nɩɩ, Lagɔbudu 'Kɔdʋʋ, ‑tiamö a ‑budu ɔ'ɔɔ gaaa, ‑maa ɔnyɩ ɔ gaa. 22Zaa, ‑zlɩ Zezwii 'kuä 'wë a ylɩɩ a tanɛɛ 'mö, ɔ gɔlɔɔ, ɔ 'wlʋä gluu, 'n 'ɔ ‑gänɩwaa 'a dilaa yiɛ wɛlɩkïbhë nɩ a da bhlinɩ, 'n wa yiɛ sɛ yɩbhlɩmanɩ nɩɩ, Lagɔ 'a 'bɔgʋʋ 'mö a wɛlɩɩ ‑nyɛ ɔ'bhë 'a bhïlawɛlɩɩ 'sɔ, ‑tiawɛlɩ yɩ glɩnɩɛ.

Zezwii ‑yi nɩkpɛ a 'mlɩ a dlɩ

23Zwiiföwaa 'a Galɛ'möwlʋfɛtɩ 'la a 'tɛnyɩ ‑bhʋlʋ ‑kpɔ 'mö, Zezwii ‑wʋ ‑mä Zeluzalɛɛmö, zɩzɛ ɔ pää, nɩkpa a ‑bɛ 'yɩɛ 'ylɩmö a za, wa kɔ dlɩ 'wʋ. 24‑Maa Zezwii ɔbhlɩ, wa 'wuë ɔ 'nuëë dlɩ 'wʋ ‑kä. Ɛ'ɛ ‑bhö nyɩasɛ, ‑maa wa 'wuë ɔ ‑yuë sasɛ. 25'Saa nɩkpɛ glɩnɩɛ, wa 'kɔnyɩ sʋlʋnɩ, ɔ 'niɛ sɛ tɛlɩ, ɛ'ɛ ‑bhö fʋ, ‑maa ɔ'bhë, ɔ ‑yi nɩkpɛ a 'mlɩ a dlɩ.

Aktualisht i përzgjedhur:

Zaa 2: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2

Zaa 2

Vargje biblike të njohura nga
Zaa 2

Dëgjoj Zaa 2

Bibla:

Bété, Guiberoua

Versioni: BdG2 - bet

Zaa 2

Zaa 2

Vargje biblike të njohura nga Zaa 2

Dëgjoj Zaa 2

Bibla:

Bété, Guiberoua

Versioni: BdG2 - bet

Zaa 2

Vargje biblike të njohura nga
Zaa 2