Lwiikö 11

Zezwii yɛ ɔ ‑nʋa bhibhebhibhesɛ 'cɩa

(Matie 6.9-13; 7.7-11)

1'Ylɩ ‑bhlʋ 'mö, dɛ ‑bhlʋ ‑lɛ Zezwii möä 'n ɔ yiɛ Lagɔ bhibhe. Ɔ bhibhee 'wëë, 'n ɔ ‑gänɩnyɔ ‑bhlʋ yoo ‑mä ghlɩ. Ɔ lɛ naa: «‑Alowli, sɛɛ Zaa Batisɩ 'cɩa a‑a 'ɔ ‑gänɩwaa bhibhebhibhesɛɛ, 'cɩamönyɩ'ɛ ‑abhlɩ ‑sɩbhä.» 2Zezwii lɛ naa: «A ‑kä Lagɔ bhibhee, a nɩ nʋ nɩɩ:

‑Aa dɩba Lagɔ,

nɩkpa 'wuë nɩ 'ghlimanɩ ‑na 'nglɩ.

‑Na'a 'kämanɔɔ nɩ ghlɛ glɔ.

3Sɛɛ zila zɩɛ 'yize,

‑a'a 'saa ‑a 'kää lii, nyɩanyu.

4‑Yaya, 'tatinɩ ‑a'a 'nyinylolii a gbʋʋ 'yi.

Ɛ'ɛ ‑bhö nyɩasɛ ‑maa,

nɩkpaa ‑kanyɩ 'nyinyloli 'wlu nʋʋ,

‑a 'tatinɩ yɩ gbʋ 'yi.

‑Tɩnyɩ 'yi 'tatinɩ, ‑a nɩ tɩ 'nyinyloli 'mö bhlinɩ.»

5Zezwii 'nyʋää sa'a 'dɩ 'wëë, 'n ɔ yiɛ wɛlɩ ‑bhlʋ 'wʋ pälɩ, ɔ lɛ naa: «A gla'mö a ‑nɔ ‑bhlʋ ‑kä zlɩjijo'wʋ ɔ 'tua ‑gbële nuë 'wʋ bhɔtɔɔ mö, ɔ ‑kä nɩɩ: 'Tua n bhiamö, ‑sɔ 'wʋ ‑n ‑kaa lile 'tikïyie 'nyɛ, 6‑maa n yɛ lowlunyɔ ghlɩ. Na 'tua ‑bhlʋ mɔɔ ghlɛɛ ‑sɩkaa glɔ, ‑maa n'n‑ä lililu ‑kä n 'kɔ 'nyɛ. 7N ɔ 'tua 'la ‑kä ‑mä ‑budu 'mlɩ ‑wʋ, ɔ ‑kä nɩɩ: 'Tatinɩɩ 'yi n 'kä ngämö, ‑maa n yɛ ‑lɛ ‑gba 'wë. N ‑nyɛ 'na yuëa 'sɔ, ‑a yɛ sɛ pö 'wë zaa, 'naa 'käa'a 'wʋ ‑sɔ n ‑kamö lile 'nyɛ. 'N ɔ ‑kä ‑sɩbhä nʋʋ, 8sɛ'ɛ n nyanyɩɛ dɩ nɩɩ: Ɔ 'tua a'bhë yi a nimï ‑sɛ yi oo, ‑maa ‑mɔ'la 'nɔ kɛ yɔwʋ ‑sɛ ɔ ‑kɔɔ zɛla 'yize, ɔ yi 'wʋ ‑sɔ klɩpaa 'saa ɔ 'yɩbhänɔɔ ɔ yonyɩ 'nyɛ.

9Nza n nyanyɩɛ 'dɩ nɩɩ, a nɩ zɛla ‑maa wa yeanyɩ 'nyɛ. A nɩ tɛlɩ sɛ ‑maa a yi ghlɩ. A nɩ bhɔtɔ ‑gbïlii, ‑maa wa yi ‑lɛ kälɩ. 10Ɛ'ɛ ‑bhö nyɩasɛ, ‑maa ‑ɔ zɛlaa, 'mö wa nyɛɛ. ‑Ɔ tɛlɩɛ sɛɛ, mɔɔ ghlɩɛ. ‑Ɔ ‑wʋä ‑lɛ ngloluë 'wʋ ‑ɔ bhɔtɔɔ, ɔ za wa kälɩɛ ‑lɛ.

11Sɛ'ɛ n gbää nɩɩ, a gla'mö a ‑nɔ ‑bhlʋ, 'n ɔ 'yu ‑kɔɔ zibhiyi zɛlaa, ɔ yo bhä tɩmɛ 'nyɛ ‑a? 12‑Maa 'n ‑kɔkɔgïyi ɔ ‑kɔɔ zɛlaa, ɔ yo bhä Lagɔgbïte 'nyɛ ‑a? 13Zaa, abhʋaa glɩnɩɛ abhlɩ 'kpʋkpʋwaa, a ‑yi'ɛ 'a yuëa ‑li a ‑li a 'nyɛsɛɛ, mɛɛ 'kä zi'e a Dɩba ‑ɔ ‑wʋ ‑mä ghäyɩ 'wʋ, 'n 'ɔ yuëa ‑kɔɔ 'Wugɔmʋʋ 'Wlɩlɩ 'yɩbhänɩɩ, mɔɔ 'naa 'kʋänyɩ bhä ‑gömö 'zʋ ‑a?»

Wa yɛ Zezwii wɛlɩzoku bhïlanɩ

(Matie 12.22-30; Maakö 3.22-27)

14'Ylɩ ‑bhlʋ 'mö, 'n Zezwii yiɛ nɩkpɛ ‑bhlʋ yɛmanɩ. Zuzukwëzokwë ɔ kää ‑gömö. Zuzukwëzokwë 'la a 'nglɩ 'mö, ɔ'ɔ ‑dɩ gbʋ 'lɩlɩlɩ. 'N Zezwii yonyɩɛ ‑gömö kpëti. A 'bhooo ‑gömö cuu, 'n ɔ yiɛ gbʋ ‑dɩ. Nɩkpa 'wuë ‑wa ‑wʋä ‑lɛ, 'n ngli yuëë yɛ. 15‑Maa wa gla'mö a ‑mumuë lɛ naa: «Zuzukuzoku a 'kifi Bɛzebilɩ mɔɔ nyɛɛ Zezwii 'mötɛɛnɔ 'n ɔ kpëtie zuzukuzoku nɩkpa ‑gömö.» 16Mumuë, zɔvasɛ wa nyɔɔ 'dɩ nɩɩ: «N ‑n ‑kä ‑tiamö nɩɩ, Lagɔ mɔɔ tieamöä nʋʋ, 'pänɩ dɛ'ɛ ‑aa 'yila 'klʋ zɩzɛ ‑a ‑kamö 'ylɩmö.»

17Zezwii yɩbhlɩnɩɛ 'wa dlɩpäsaa, ɔ lɛ naa: «'Bhlɩ ‑bhlʋ 'mö a nɩkpa ‑kä 'ylimö ‑känɩ, wa ‑kä wa 'yize tʋ gwɩɩ, ‑pa wa bhɩɛɛ 'yli, 'wa ‑bïdii 'wuë sɛ yɩ ylɛɛ. 18Zaa, Sataa ‑kä ɔnyɩ tʋ ‑lɛ, ɔ ‑nyɛ 'ɔ bhlɩɩ 'mö a ‑nʋa 'sɔ wa ‑kä 'ylimö ‑känɩɩ, 'wa saa 'naa 'kä bhä da'a ‑pa 'yli bhɩɛ ‑a? Nyɩasɛ n'n‑ä ‑sɩbhä gbä, ‑maa a lɛ nɩɩ: Bɛzebilɩ mɔɔ nyɩaaa 'mötɛɛnɔ 'n n kpëtiɛ ɔ 'lizuzukuzokuu. 19Zaa, sɛ a nʋä a'bhï da'aa, 'n Bɛzebilɩ mɔɔ ‑kaa 'mötɛɛnɔ 'nyɛ 'n n ‑kä zuzukuzokuu kpëtii, a gla'mö a ‑nʋa ‑wa kpëtiɛ, ‑ɔ nyʋä bhäa'a wabhlɩ 'mötɛɛnɔ 'n wa kpëti bhä ‑sɩbhä 'nɩ? 'Saa a gla'mö a ‑nʋa nʋä da'aa, mɩɩ tulanɩɛ 'ylimö nɩɩ, a'aa zugwë ‑kä. 20‑Maa ‑tiamö a dɔ'wʋ, Lagɔ 'a 'mötɛɛnɔɔ mʋʋ ‑wʋʋä ‑gömö, nza n kpëtiɛ zuzukuzokuu. Zaa, n ‑kä ‑sɩbhä 'zʋʋ, a nɩ 'nwi 'mö nɩɩ, 'pɩwʋ mää Lagɔ 'kämanɩɛ kanyɩ yɔwʋ 'dio.

21A ‑yi sɛ nɩɩ, nɩkpɛ ‑kä 'mö 'tɛɛ, ɔ ‑kä 'päpäli ‑su, 'n ɔ ‑kä 'ɔ ‑buduu ‑kʋʋ, ‑bɛ 'nɩ ghïlo 'wi 'wʋ. 22‑Maa nɩkpɛ ‑mɔɔ 'tɛɛ 'mö tenyii ‑ɔ zoo 'wʋ, ɔ ‑kä yii, ɔ ‑nyɔɔ 'sɔ wa ‑kä gwɩ 'n ɔ ‑kɔɔ 'wlu 'plɩɩ, 'ɔ gwɩnɩlii 'wuë ɔ 'tɛɛnɩ a‑a dlɩ 'mö ɔ sɔɔ kä'mö, 'n ɔ libhïä 'ɔ ‑lii 'wuë 'wʋ 'n ɔ dilaniɛ.

23Sɛ'ɛ n gbää nɩɩ, ɔ ‑nɩɩ nimï ‑wʋʋ, 'ylimö ɔ ‑nya'mö ‑känɩɛ. ‑Ɔ ‑nɩɩ kwänɩ ‑a 'kä 'wlu 'yɩbhaa, gbɔlanɩ ɔ gbɔlanɩɛ.

Zuzukwëzokwë yi 'bɩwʋ

(Matie 12.43-45)

24N nɛ naa, zuzukwëzokwë ‑kä nɩkpɛ ‑gömö 'bhöö, ‑mä a möä 'muse 'klʋ, 'n a zizinɩɛ ‑mä 'mö, 'n a tɛlɩɛ ‑mä glɩdɛ sɛ. ‑Maa 'n a 'nɩa'a ‑mä glɩdɛ ghlɩɩ, sɛ'ɛ a nʋä nɩɩ: N 'kää 'wlu sɩbhä, dɛ n 'bhöönɩ a‑a, n 'kä ‑lɛ mö. 'Na ‑buduu 'mö mä n 'wlʋ a‑a, n 'kää ‑mä 'bɩwʋ mö. 25'N a möä, a ‑kä lɛ 'bhöö 'lɛ, nɩkpɛɛ a 'wlʋ a‑a 'mö, 'n ɔ ‑kä ‑bhɩɛ ‑budu a ‑mu wa yɛ 'mö yɩlɩpö 'wë, wa yɛ 'wlu gïganɩ 'tɩɩ, 26'wlu a sɩbhä'ɛɛ, 'n a möä a 'bhɩa ‑mimii ngbi'sɔ kie. Yɩ 'wuë, 'n yɩ yiɛ nɩkpɛ 'la ‑gömö. ‑Lɛ a dɔ'wʋ, nɩkpɛ 'la a ‑gömögbʋʋ, 'mö wʋ 'tɛmanɩɛ tenyii, 'n wʋ ziɛ tɛkädɔ'wʋ a saa 'wʋ.»

Tiamö a ‑jɔlʋ

27Zezwii 'nyʋää sa'a 'dɩ 'wëë, ‑mä nɩkpa 'wuë gla'mö, 'n 'nglɔ ‑bhlʋ yiɛ ‑mä gbʋ ‑dɩ. Ɔ lɛ naa: «‑Nmö nɩkpɛ nɩ, nglɔɔ ‑ɔ 'plɩɛ ‑na nɩkplokwëa, ‑ɔ 'nyɩamöä, 'ɔ ‑jɔlʋ!» 28Ɔ gbää sa'a, Zezwii lɛ naa: «Sɛ'ɛ ‑n kä a‑a ‑n 'kä nɩɩ, nɩkpa ‑wa ‑pʋnɩɛ sasɛ Lagɔ 'a wɛlɩɩ 'yukwli, sɛ yɩ gbää ‑wa zʋä ‑sɩbhä, mʋa kää ‑jɔlʋ 'mö.»

Nɩkpa lɛ 'dɛɛ wa 'nɩ 'yɩ zɩzɛ 'ylɩmö

(Matie 12.38-42)

29Nɩkpaa ‑wa yinɩɛ Zezwii, wa zumanɔɔ yɔwʋ plupluu, ɔ lɛ naa: «‑Sɩkaa a nɩkpaa, 'kpʋkpʋwa wa glɩnɩɛ. Wa yɛa Lagɔ ‑gömö panɩ 'wë, 'n wa tɛlɩ'ɛɛ ‑bhlɛ zɩzɛ a ‑mɛɛ 'bhöönɔɔ kä'mö sɛ. Nyɩasɛli wa nʋä! Zɩzɛ ‑mɛmɛɛ 'nɩɛ ‑bhölɩ, 'n ɛ 'nɩ ‑bhö Zonasɩ a ‑nɛɛ mɛ. 30Sɛɛ Zonasɩ bhïlanɩ a‑a ‑mä Ninivö Lagɔwɛlɩɩ, 'n ‑mä a ‑nʋa yi a‑a sɛ yɩbhlɩmanɩ nɩɩ Lagɔ mɔɔ tioo, sɛ ‑bhʋlʋ ‑kpɔ 'la, ‑sɩbhä Nɩkpɛ a 'Yu 'a Lagɔwɛlɩɩ a bhïlabhluu kää wʋ 'kä ‑sɩkaa a nɩkpaa 'ylimö tulanɩ nɩɩ, Lagɔ mɔɔ tioo.

31Sɛ'ɛ n gbää nɩɩ, Sebaa a 'bhlɩlɛnglɛ, sɛ ɔ 'bhöö a‑a ‑mä ɔ 'bhele 'yuku 'yuku, 'n ɔ yiɛ ‑a'a bhla'mö a 'bhlɩlowlii Salomɔɔ Lagɔ 'nyɛɛ tenyii 'nɛɛnɔ ‑mä ghlɩ, ɔ 'kä 'ɔ 'nɛɛnɩwɛlɩɩ 'yukwli ‑pʋnɩ a za‑a, a ‑yi ‑sɩbhä. ‑Maa Lagɔ 'a ‑zijle 'kädaa a zlɩɩ 'mö, sɛɛ nglɔ 'la ‑pʋnɩ a‑a Salomɔɔ 'yukwlii, a ‑nɩɩɛ ‑sɩbhä 'yukwli ‑pʋnɩ zaa, mɩɩ 'kanyɩɛ gbʋ köbha. Ɛ'ɛ ‑bhö nyɩasɛ, ‑maa nɩkpɛ a ‑mɔɔ 'ghïliɛ ‑ɔ ziɛ Salomɔɔ 'wʋʋ, mɔɔ ‑wʋanyɩaa dɛ'ɛ 'dɩ 'nyɛ dɔ'wʋ. 32Lagɔ 'a ‑zijle 'kädaa a zlɩɩ ‑kä ghlɛɛ, a ‑nyɛ Ninivö a ‑nʋa 'sɔ a dɔ'wʋ, a ‑nɩɩ 'mö yɩ 'kää tenyii 'tɛɛ. Sa'a sɛɛ Zonasɩ möä ‑mä 'wa ‑glɔɔ 'mö, 'n ɔ yuëë Lagɔwɛlɩɩ 'nyɛ, 'n wa yiɛ ligba 'n wa yiɛ 'wa ‑lizokuu kɛ'mö ‑sɛɛ, n 'nyanyɩɛ Lagɔwɛlɩɩ, a'aa abhlɩ ‑sɩbhä 'zʋ zaa, mɩɩ 'kanyɩɛ gbʋ köbha. Ɛ'ɛ ‑bhö nyɩasɛ, ‑maa nɩkpɛ a ‑mɔɔ 'ghïliɛ ‑ɔ ziɛ Zonasɩ 'wʋʋ, mɔɔ ‑wʋanyɩaa dɛ'ɛ 'dɩ 'nyɛ dɔ'wʋ.»

'Napɛɛ a ninea

(Matie 5.15; 6.22-23)

33«Nɩkpɛ a ‑mɔɔ 'kä 'napɛ 'yi ‑dɩ 'wë, ‑ɔ 'kɛ zizaa, ‑ɔ 'kɛ'ɛ ‑käka zɛmö 'zʋʋ, ɔ'ɔɔ ‑bhölɩ. ‑Maa wa ‑kä 'napɛ 'yi ‑dɩɩ, ghäyɩ wa bizee, nzɩɩ ‑wa plɛɛ ‑mä ‑budu 'mö 'käa sasɛ sɛ yɩlɩɩ. 34Nɩkpɛ a 'yila, yɩ 'kä ‑bhɩɛ 'napɛ. ‑Na'a yilaa ‑kä sasɛ lɩɩ, ‑na 'wuë lɩlɛ 'mö ‑n nɛmöä. ‑Maa 'n yɩ ‑kä 'klʋ yuluu, ‑na 'wuë 'yuylukwë 'mö ‑n nɛmöä. 35Zaa, ‑nmö nɩkpɛ, 'nɛmanɩ ‑nanyɩ 'wʋ, lɩlɛ 'la ‑ɛ ‑wʋmöä 'möö, ɛ tɩa 'wʋ 'ngïmo, ‑n tɩa 'yuylukwë 'mö nɛmö. 36'N ‑na'a kpökpaa a dɛ ‑bhlʋ 'nɩa'a 'yuylukwë 'mö ‑wʋʋ, lɩlɛ mö ‑n nɛmöä ‑na 'wuë, ɛ 'kä ‑bhɩɛ 'napɛɛ ngälamö 'kwädlɩ 'wʋ.»

Zezwii yɛ Zwiiföwaa a 'kädɩɩ wɛlɩ bhïlanɩ

(Matie 23.1-36; Maakö 12.38-40)

37Zezwii bhïlaa 'wëë, 'n Falizɩɛyi ‑bhlʋ yoo ‑mä 'ɔ mä'a wäzɩnɩ, wa 'kä 'wʋ linɩ. Zezwii ghlɛɛ ‑mä, 'n ɔ yiɛ ‑lɛ lilea yɔwʋ sɛ glɩ. 38‑Maa wa ‑kä wa 'kä li, sɛɛ Zwiiföwaa 'a Gböö gbää wa nɩ wɔlʋ kɛ wa 'kä 'wlɩlɩ plɛ Lagɔ a 'yila 'klʋ a dɔ'wʋʋ, ɔ'ɔɔ ‑sɩbhä kɛ wɔlʋ 'n ɔ yiɛ ‑lɛ sɛ glɩ. Falizɩɛyi 'la, ɔ 'yɩɛ ‑sɩbhä 'ylɩmöö, 'n yɩ yoo ngli yɩa. 39‑Maa ‑Alowli lɛ naa: «Abhʋa Falizɩɛwa, sɛ a ‑wʋä, n ‑kamö ‑sɩbhä sʋlʋnɩ. N nɛ naa: 'A 'kɔpɩɩ ‑nyɛ 'a 'bïï 'sɔ, yɩ 'ku yɔwʋ a 'yize, ‑lɛ a wɔlʋä, ‑maa ‑mä a 'mlɩ, gugwaguguu ‑nyɛ kpʋkpʋʋ 'sɔ, mɩɩ suä ‑mä. 40‑Ɔɔ'nɛɛnɩwanyɩ, Lagɔ ‑ɔ ‑bhɛɛ ‑lɛ ku yɔwʋʋ, mɔɔ 'nɩɛ bhä ‑mä 'mlɩ ‑bhɛmö ‑a? 41Zaa, 'a 'mölinɩlii, a ‑kä yɩ 'kä ‑tiamö 'wlɩlɩ plɛ nʋʋ, yɩ 'mö a lilea, a nɩ 'nyɛma yɩ 'pʋawaa, ‑lɛ a dɔ'wʋ, a ‑nyɩɩ 'sɔ a yi 'gämö 'wlɩlɩ plɛ Lagɔ a 'yila 'klʋ a dɔ'wʋ.

42Abhʋa Falizɩɛwa, kplee 'kanyɩɛ köbhä! 'A ‑zɛpʋmöpäli 'tikïtikïyiea, a ‑kɩɩ ‑sɛɛ, ɛ ‑kä jɛja 'n ɛ ‑kä'ɛ 'buuti, 'mö a zɛlɩɛ, yɩ kʋgbänanɩɩ 'wuë 'mö a libhïä 'wʋ, 'n a nʋä, sɛ'ɛ ‑a nyɛɛ Lagɔ. A zʋ sa'a, ‑maa a 'kä nɩkpa ‑gömö a dɔ'wʋ ‑kpöö 'wʋ ‑wʋ, a 'kä'ɛ Lagɔ ‑wa, yɩ dɔ'wʋ, a gbʋ 'nɩɛ ‑mä ‑wʋ. ‑Maa 'lɩlɩlɩ a dɔ'wʋ, ‑li 'la a gbʋʋ mʋʋ kä a‑a wʋ 'kanyɩ plɛnɩ 'wë, ‑mi a nʋä da'a, a 'kɩ ‑lɛ ‑gömö 'zʋ.

43Abhʋa Falizɩɛwa, kplee 'kanyɩɛ köbhä! A ‑kä ‑mä Lagɔbïdi 'mö bhibhee mö, a yɩbhä a 'kä ‑mä 'yuku a ‑klikpï a ‑klikpïï 'mö sɛ glɩ. Dɛɛ nɩkpa suä pluplu, a yɩbhä wa nɩ bhälɩnanyɩ ‑lɛ 'klʋkpamözʋsɛ. 44Lesikpïgɔgwɩ a ‑mi nɩkpa 'nɩɛ ‑tɔnɩ, wa ghlɛnɩɛ 'klʋ 'n wa plɛɛ fɩ Lagɔ a 'yila 'klʋ a dɔ'wʋʋ, yɩ saa ‑sɩbhä a ‑wʋä.#11.44 Zwiiföwaa a dɔ'wʋ, nɩkpɛ ‑kä lesikpë 'klʋ ghlɛnɩɩ, fɩ ɔ plɛɛ Lagɔ 'yila 'klʋ a dɔ'wʋ. Zaa, kplee 'kanyɩɛ köbhä!» 45Zezwii ‑wuëë ‑sɩbhä 'dɩ 'nyɛ dɔ'wʋʋ, Moyizɩ 'a Gböö a 'cɩanyɔ ‑bhlʋ ‑wʋmö a ‑lɛ. Nɩkpɛ 'la, ɔ lɛ naa: «'Ɔɔ! ‑Atʋ, wɛlɩɩ ‑n bhïlanɩɛ da'a Falizɩɛwaa, ‑a 'wuë, ‑abhʋa ‑n gaamöaa.» 46Ɔ gbää sa'aa, Zezwii lɛ naa: «Abhʋa Moyizɩ 'a Gböö a 'cɩawa, kplee 'kanyɩɛ köbhä! 'A 'cɩacɩasaa, ‑sɩbhä ‑bhɩɛ 'gbluku 'kädɩ. A ‑kɩɩ nɩkpa 'wlu sula 'wëë, a'a kwänuë sɛ'ɛ 'tikïyie 'wʋ yɩ ‑suswee. 47Sɛ'ɛ n gbää nɩɩ, kplee 'kanyɩɛ köbhä! Lagɔ 'a bhla'mö a 'möbhïlanɩwaa, a dɩbawa a dɩbawaa 'lɩbhä a‑a 'n wa yi a‑a 'kuu, 'wa lesikpïï, 'mö a gïganɩɛ abhlɩ 'wlu 'tɩɩ. 48Sɛ a zʋä da'a, ‑sɩbhä ma‑a sɛɛ zɛmö nɩɩ: Sɛɛ a dɩbawa a dɩbawa 'zʋ a‑a, ‑sɩbhä nɛnanyɩ dlɩ yɔwʋ. Ɛ'ɛ ‑bhö nyɩasɛ, ‑maa wa 'lɩbhä a‑a, 'wa lesikpïï, 'mö a gïganɩɛ abhlɩ 'wlu. 49Lagɔ a'bhë sɛ'ɛ ɔ gbä a‑a nɩɩ, n yuë nɩkpa a ‑muë n bhïlanɩɛ 'mö 'wʋ tie, n yuë'ɛ na tietiewa 'wʋ tie. Wa yi nɩkpaa n tiuëë da'a 'wʋ a gla'mö a ‑mumuë 'klɩ 'yɩa, wa yi ‑mumuë 'lɩbhä wa yi 'ku. 50-51‑Maa wɛlɩ 'la yɩ yɛ 'yli 'wlʋnɩ 'wë. Tɛɛnɩ ‑mä dɛɛ Lagɔ ‑bhɛ a‑a 'pɩwʋ ‑këë zɩ'ɛ, Lagɔ 'a 'möbhïlanɩwaa a ‑nyɛ a dɩbawa 'sɔ, a yɛɛ 'lɩbhää, wa'aa muënɩ. ‑A 'wuë a dɩba Adaa a yowli Abɛɛlɩ, dɛ wa 'lɩbhɔɔ a 'tɛnyɩ 'mö, tɛɛnɩ ‑lɛ, wa ‑wʋ Lagɔ 'a nɩkpaa 'lɩbhä dɔ'wʋ ‑këë, 'n wa yiɛ Zakalii 'wʋ ghlɛ. Zakalii wa 'lɩbhänɩɛ ‑mä Lagɔligbëa 'mö, ‑lɛ 'pɩwʋ a bʋbɔnɩdaa ‑nyɛ Lagɔbudu 'Kɔdʋʋ 'sɔ a jijo'wʋʋ, 'mö n gaaa. 'Dɩ n nyanyɩɛ dɛ'ɛ nɩɩ, nɩkpa 'la 'wuë wa 'lɩbhää, abhʋa ‑sɩkaa a nɩkpaa, abhʋa Lagɔ 'kää wa 'lɩbhälɩbhägbʋʋ a 'pɛna 'nyɛ.

52Abhʋa Moyizɩ 'a Gböö a 'cɩawaa, kplee 'kanyɩɛ köbhä! Ɛ'ɛ ‑bhö nyɩasɛ, ‑maa 'a sɛ a 'cɩaa Lagɔwɛlɩɩ, ‑sɩbhä ma‑a kää 'nglɩ 'n ‑bɛ 'nɩ yɩbhlɩnɩɛ Lagɔ. A'bhï, a'aa 'yɩbhä a 'kɔ yɩbhlɩnɩ. ‑Wa yɩbhä a 'yɛɛ wabhlɩ wa 'kɔ yɩbhlɩnɩɩ, ‑kplikpli a klɛnuëë 'yli.» 53Moyizɩ 'a Gböö a 'cɩawaa ‑nyɛ Falizɩɛwaa 'sɔ, sa'a Zezwii 'nyʋää 'dɩ. ‑Maa 'klɛ 'mö yɩ pölʋää tenyii zaa, 'bhöönɩa'a ‑lɛ wa ‑nyɔɔ ‑käa'a 'wʋ gbanɩ, wa'a bhïloa'a 'yli, 'kïbhï a ‑bɛ wa ‑nyɔɔ kpɛnɩɛ 'mö 'yize. 54Wɛlɩ a ‑mii 'kɔɔ gbʋ köbha, 'mö wa tɛlɔɔ ngli sɛ.

Aktualisht i përzgjedhur:

Lwiikö 11: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2