Lwiikö 8

'Ngwlɩ a ‑bɛ ‑gänɩmö a Zezwii

1‑Mi'la 'plɩɛ 'wëë, 'n Zezwii yiɛ gwlɩ a ‑bɛ ‑gömö mö. ‑Gwlɩ 'kädɩ oo, ‑gwlɩ 'tikïyie oo, 'n ɔ yiɛ ‑mä mö, 'n ɔ bhïlanɩɛ ‑mä Lagɔwɛlɩɩ. Sa'a ɔ biaa saa 'wuë 'pɩwʋ mää Lagɔ 'kämanɩɛ a 'Mänatɩtɩɩ. 'Ɔ ‑gänɩwaa kʋgbä'sɔ ‑kpɔ muë, 2ngwlɩ ‑mumuë ‑wa kä a‑a zuzukuzoku ‑gömö, 'n ‑muë ɔ yɛmanɩ a‑a kökä, wa 'mämö. Madalaa a 'ylikwii ‑bhlʋ wa laa Malii, Zezwii kpëti a‑a zuzukuzoku ngbi'sɔ ‑gömö mɔ, 3'bhlɩlowli Eloodɩ a zɛmö a nɩkpɛ 'kɔdɔ ‑bhlʋ wa laa Kuza, ɔ 'lɛnglɛ Zaanɩ mɔ, 'nglɔ ‑bhlʋ wa laa Sizanɩ mɔ, 'n ngwlɩ ‑mumuë a ‑bɛ, ngwlɩ 'la, 'wa ‑lii wa kä a‑a, 'mö wa libhïä 'wʋ 'n wa kwänɩɛ Zezwii ‑nyɛ 'ɔ ‑gänɩwaa 'sɔ.

Glʋglʋnyɔɔ a ninea

(Matie 13.1-9; Maakö 4.1-9)

4‑Lɛ a 'tɛnyɩ 'la 'mö, ‑gwlɩɩ 'wuë ‑gömö, ‑mä nɩkpa 'bhöönɩɛ 'n wa yinɩɛ Zezwii. Wa zumanɔɔɔ yɔwʋ tenyii, 'n ɔ yuëë 'nine 'pänɩ, ɔ lɛ naa: 5«Glʋglʋnyɔ ‑bhlʋ mɔɔ möä ‑mä 'ɔ 'lagblɛɛ 'mö lile 'mlɩɛ.#8.5 ‑Mä 'wa mä'a a dɔ'wʋ, wa'aa lileyʋʋ glʋ, ‑maa 'mlɩ wa mluä. Ɔ ‑wʋ 'mlɩ dɔ'wʋ 'n lileyʋ ‑mumuu yiɛ ‑mä 'lagblɛɛ jijo'wʋ a 'yioo 'wʋ bhlinɩ. 'N 'plɩplɩwaa yuä 'wʋ nɛmönɩ, 'n zɩɩ yiɛ yi 'n yɩ yuä li. 6'N yʋ ‑mumuu yi'ɛɛ ‑lɛ kpayi 'klʋ bhlinɩ, 'n wʋ yiɛ ‑pa mi. ‑Maa ‑lɛ a dʋdʋʋ 'nɩɛ 'nyu 'mö ‑kä zaa, 'n ‑gbɔkwälɩɩ yiɛ 'wʋ si. 7'N yʋ ‑mumuu yi'ɛɛ ‑mä ‑dɛglaswi a ‑duvï jijo'wʋ bhlinɩ. ‑Duvïï tɛpɔnɩɛ 'wʋʋ, 'n yɩ yiɛ lile a ‑gbɔkwälɩɩ 'wlumö ‑gbïli, 'n yɩ yiɛ 'ku. 8‑Maa yʋ ‑mumuu bhlinɩ'ɛ ‑lɛ dʋdʋ a ‑dʋdʋ 'wʋ, 'n wʋ yiɛ 'pʋ, 'n wʋ yiɛ fötɩ. 'Gwla ‑bhlʋ kä 'yʋ a gwlɩ ngbï 'yli. Zaa, ‑ɔ ‑kä 'yukwïla 'wlu ‑kä, ɔ nɩ 'nʋa ‑bhlɛ.»

Glʋglʋnyɔɔ a ninea a zɛmösɛsaa

(Matie 13.10-23; Maakö 4.10-12)

9Zezwii 'pää nine 'la 'wëë, 'n 'ɔ ‑gänɩwaa yoo nimï 'yɩbhä. Wa lɛ naa: «Nine nɩ ‑n 'pää dɛ'ɛɛ, sʋlʋnɩnyɩɛ ‑ka a zɛmö.» 10Ɔ lɛ naa: «Abhʋa abhlɩ, Lagɔ slʋnanyɩ, nzɩɩ 'pɩwʋ mä ɔ 'kämanɩɛ a wɛlɩɩ, a 'kɩ 'mö 'nʋ. ‑Maa ‑muë'la wabhlɩ, 'nini a 'yize n 'nyɛnuë 'mö 'dɩ. Nza,

'wa yilaa lɩɛ, 'n wa 'nɩ 'yɩɛ ‑lu 'ylɩmö.

Wa ‑pʋnɩɛ 'fʋ 'yukwli, 'n wa 'nɩ 'nʋä ‑lu 'mö. # 8.10 Ezayii 6.9.

11‑Maa glʋglʋnyɔɔ a ninea a zɛmö ma‑a nɩɩ: Lileyʋʋ, mʋʋ glɩnɩɛ Lagɔ 'a wɛlɩɩ. 12‑Lɛ 'yio 'wʋ, dɛɛ lileyʋʋ bhlinɩɛ 'n zɩɩ yuä lii, ‑mumuë ‑nyɛ ‑lɛ 'wlʋnɩ. Wa ‑kä Lagɔ 'a wɛlɩɩ 'nʋ cuu, 'n Sataa yiɛ, 'n ɔ sʋänyɩɛ dlɩ zɛmö, wa tɩa Lagɔ dlɩ 'tɛɛnɩ, wa tɩa 'pʋ a za. 13‑Mumuë ‑nyɛ kpayidʋdʋ 'wlʋnɩ. Wa ‑kä Lagɔwɛlɩɩ 'nʋʋ, 'mänasɛ wa ngwliɛ 'wʋ, ‑maa wa 'niɛ sasɛ dila zɛmö 'zʋ. 'Ylɩya 'mö, wa kɩ dlɩ 'wʋ, ‑maa 'klɩyɩyɛ ‑kʋä yɩ za ghlɩ cuu, kɛ'mö wa sɩɛ. 14‑Mumuë ‑nyɛ dʋdʋʋ ‑wʋ kää ‑dɛgla 'wʋ 'wlʋnɩ'ɛ wabhlɩ. Wa nʋ Lagɔ 'a wɛlɩɩ 'wë, ‑maa mä'ä 'pɩwʋ a dlɩpäpʋ ylʋä. Wʋlʋnɔ ‑nyɛ mä'ä 'pɩwʋ a ‑lii 'wuë 'sɔ a tʋʋ lɩbhʋä, 'n yɩ gbʋ plɛnuëë tenyii 'n wa dlʋä Lagɔ 'a wɛlɩɩ 'wʋ, 'n wa teklinɔɔ 'wʋ. 15‑Maa nɩkpa ‑mumuë ‑wʋ ‑lɛ, mʋa ‑nyɛ dʋdʋ a ‑dʋdʋʋ 'wlʋnɩɛ wabhlɩ. Wa ‑kä Lagɔwɛlɩɩ 'nʋʋ, mʋa ngluniɛ dlɩ a dlɩ 'mö 'wʋ, 'n wa zwiɛ dila zɛmö. Dɛ wa kää sɛ 'n wa nyɔnʋä ‑lɛ kɛ 'n wa tlʋä 'bhï a bhï.

'Napɛɛ a ninea

(Maakö 4.21-25)

16Nɩkpɛ 'nɩ ‑dɩ 'napɛ 'yi 'wë, ɔ 'kɛ ‑lu 'wlumö ‑gbïlii, ɔ 'kɛ'ɛ ‑bhɛlɛ zɛmö 'zʋ. ‑Maa wa ‑kä 'napɛ 'yi ‑dɩɩ, ghäyɩ wa bizee, nzɩɩ ‑wa plɛɛ ‑mä ‑budu 'mö 'käa sasɛ sɛ yɩlɩ. 17'Saa ziza‑a, wʋ yi 'ylɩ ‑bhlʋ 'mö zɛmö 'wlʋ. 'Saa nɩkpa 'nɩɛ 'wʋ yɩlɩɩ, wʋ yɩ 'ylɩ ‑bhlʋ 'mö 'ylɩmö yoo. 18Zaa, a nɩ ‑yi 'yukwlipʋnɩsɛ. Ɛ'ɛ ‑bhö nyɩasɛ, ‑maa ‑ɔ kää, 'mö wa nyɛɛ. ‑Ɔɔɔ kää, 'ɔ 'saa ɔ gbää ɔ kää, 'mö wa sɔɔ kä'mö.»

‑Wa glɩnɩɛ bhä Zezwii 'a waa?

(Matie 12.46-50; Maakö 3.31-35)

19'Ylɩ ‑bhlʋ 'mö, Zezwii a ‑daayuë ‑nyɛ ɔ ‑da sɔ, mʋa mɔɔ 'ylɩmöä. ‑Maa nɩkpa 'kɔkɔmlɛ so yɔwʋ zaa, wa'aa dɛ wa 'kä ghlɛnɩ wa 'kɔ yɔwʋ ghlɛɛ ‑yi. 20'N wa yiɛ Zezwii 'dɩ 'nyɛɛ mö nɩɩ: «‑Na ‑da ‑nyɛ ‑na ‑daayuë 'sɔ, wa ‑wʋ ‑mä 'pɩwʋ. Wa yɩbhä wa ‑kamö 'ylɩmö.» 21Wa 'nyɔɔ sa'a 'dɩɩ, ɔ lɛ naa: «‑Wa ‑pʋnɩɛ Lagɔ 'a wɛlɩɩ 'yukwli, sɛ yɩ gbää ‑wa nɛmöä ‑sɩbhä, mʋa glɩnɩɛ na ‑da, mʋa glɩnɩɛ na ‑daayuë.»

Zezwii yɛ 'vuu 'kɔdʋ 'nigba

(Matie 8.23-27; Maakö 4.35-41)

22'Ylɩ ‑bhlʋ 'mö, 'n Zezwii yiɛ 'ɔ ‑gänɩwaa 'dɩ 'nyɛ nɩɩ: «A‑a nɩ 'plɩnɩ ‑mä nyuu a kïkë ‑mä'la ‑gömö.» 'N wa yiɛ 'gɔlʋ 'wʋ 'libhï 'n wa yiɛ mö. 23Wa ‑wʋ ‑lɛ 'nyu 'klʋ, 'n Zezwii yiɛ ngämö. Wa ‑wʋ mö dɔ'wʋ 'n 'vuu 'kɔdʋ 'kɔdʋ yiɛ yi. 'N nyuu a ‑gbɔkwälɩ bhlinɩɛ ‑mä gɔlʋʋ 'mö, wʋ lɛ 'kä 'wlu 'mla. Wa ‑yi sɛ nɩɩ, 'kwie 'mö wa ‑wʋä. 24Zaa, n wa yiɛ Zezwii yɔwʋ 'dio 'n wa yoo gäla. Wa lɛ: «‑Atʋ, ‑Atʋ, ‑abhʋaa kuaa!» Zezwii gɔlɔɔ, 'n ɔ yiɛ 'vuu ‑nyɛ nyuu a ‑gbɔkwälɩ 'sɔ 'wʋ 'kpanɩ 'n yɩ yiɛ donɩ. 'N saa 'wuë yiɛ vlɩɩ plɛ. 25'N ɔ yiɛ 'ɔ ‑gänɩwaa nimï 'yɩbhä nɩɩ: «Sɛ yɩ ‑wʋ ɔ 'mö 'n a 'nɩ bhä Lagɔ dlɩ 'tɛɛnɩ 'nɩ?» Wa 'wuë nganɔ, 'n zuzu yuëë ‑gömö 'bhöö 'n wa 'yɩbhäyɩbhänɩɛ nimï nɩɩ: «'Ɔ! 'Saa‑nɩkpɛ bhä sɛ ‑ma nɩ dɛ'ɛ, 'n ɔ ‑kä bhïlaa 'n 'vuu ‑nyɛ nyuu 'sɔ zo bhä 'klʋkpamö 'nɩ?»

Zezwii yɛ nɩkpɛ zuzukuzoku ‑gömö kpëti

(Matie 8.28-34; Maakö 5.1-20)

26Wa möä ‑këë, wa 'tʋä nyuu, Zelaza‑bhölɩɩ, ‑ɛ ‑nyɛ Galilee‑bhölɩɩ gögönɩɛ 'yii, 'n wa yiɛ ‑mä ghlɛ. 27-29Gɔlʋʋ köbhää 'kïkë, Zezwii kwliɛ cuu, 'n bhlɩ 'la a ‑glɔ ‑bhlʋ 'mö a nɩkpɛ yoo gbanɩɛ yi. Nɩkpɛ 'la, zuzukuzoku ɔ kää ‑gömö. Yɩ kɔ ‑gömö gwälɛ. ‑Sɩbhä a za, sɛɛ ɔ'ɔ gʋʋ ‑budu 'mö 'n ɔ glɩnɩ ‑mä lesikpï jijo'wʋ a da yɛ 'mö gwälɛ. Ɔ'ɔ päla ‑bäna 'mö. 'Ɔ bhɩɩ ‑nyɛ 'ɔ swɩɩ 'sɔ 'gogwi wa gwaniɛ 'kwädlɩ, ‑maa ‑sɩbhä ɔ diɛ 'yize. Dɛɛ nɩkpɛ 'nɩɛ ‑wʋ, 'n zuzukuzokuu ‑nyɔɔ möä ‑lɛ. Nɩkpɛ 'la mɔɔ möä Zezwii gbanɩɛ. Zezwii 'yoo 'ylɩmö cuu, 'n ɔ yiɛ gbʋ ‑dɩ, ɔ lɛ naa: «Zuzukwëzokwë, ‑nmö n nyɛɛ 'dɩ, 'bhöö nɩkpɛ nɩ ‑gömö.» Zezwii gbää ‑sɩbhä cuu, 'n nɩkpɛ yiɛ tenyii 'mö 'kpa, 'n ɔ yiɛ ‑lɛ ɔ dlɩ 'mö zɛmö bhli, 'n ɔ yiɛ nyla, ɔ lɛ naa: «Lagɔtapɛ a 'yu Zezwii, sɛ ‑n lɛ ‑kaa bhä 'wʋ gbänɩ 'nɩ? N bhiamö yɔwʋ, ‑yayaya, ‑tɩɩa 'klɩ 'yɩa.» 30'N Zezwii yoo nimï 'yɩbhä nɩɩ: «‑A 'yɩ bhä ‑na 'nglɩ?» Ɔ lɛ naa: «Na nglɩɛ 'Kɔkɔmlɛ.» Nyɩasɛ ɔ'ɔɔ ‑sɩbhä gbä, ‑maa zuzukuzokuu ‑yɩ ‑wɔɔɔ ‑gömöö, yɩ'ɩɛ muënɩ. 31'N zuzukuzoku 'la yiɛ Zezwii yɔwʋ bhibhe. Yɩ lɛ naa: «‑Yayaya, ‑tɩnyɩ ‑mä glu a ‑jie 'mö 'pä.» 32‑Lɛ wa yɔwʋ a ‑gäga ‑bhlʋ 'wlu, kokotie a ‑zɩkpa 'käda ‑wʋ a ‑mä. Yɩ ‑wʋ ‑mä 'wʋ li dɔ'wʋ. 'N zuzukuzokuu yi'ɛɛ Zezwii yɔwʋ bhibhe. Yɩ lɛ naa: «'Tatinɩnyɩ 'yi ‑a 'kä ‑mä kokotie 'la 'mö plɛ.» 'N Zezwii yiɛ 'wʋ nglu. 33'N yɩ yiɛ nɩkpɛɛ ‑gömö 'bhöö, 'n yɩ yiɛ ‑mä kokotiea 'mö plɛ. Yɩ plɩɛ 'mö cuu, kokotiea 'wuë, 'n yɩ yiɛ ‑mä ‑gägaa 'wlu 'bhöö 'n yɩ yiɛ ‑mä 'nyu 'mö sɛ 'sulo. 'N nyuu yiɛ 'lɩbhä.

34Yɩ ‑gänɩwaa 'yɩɛ ‑sɩbhä 'ylɩmöö, 'n wa yiɛ futo. ‑Mä glɔ 'mö ‑nyɛ ‑mä 'kwlɛgligbï 'wʋ 'sɔ, 'n wa yiɛ ‑mä yɩ 'dɩ bia. 35Nɩkpa 'nwiɛ 'n wa yiɛ yi wa 'kä 'saa 'plɩɛ ‑mä 'ylɩmö. Wa ghlɛɛ ‑lɛ, 'n wa yiɛ Zezwii ‑lɛ ghlɩnɩ, nɩkpɛɛ zuzukuzokuu 'bhööä ‑gömö gïlo yɔwʋ, ɔ yɛ yɛmanɩ, ɔ ‑pla 'mö, ɔ ‑wʋ 'tɩɩ. 'N nganɔ yuëë 'wʋ yinɩ. 36‑Maa ‑wa ‑wʋ a‑a ‑lɛ Zezwii yɔwʋʋ, mʋa 'nyʋää sɛɛ nɩkpɛɛ yɛmanɩɛ a 'tɩtɩ. 37Zelaza‑bhölɩɩ 'mö a nɩkpaa 'wuë, wa 'nwiɛ, nganɔ a za 'n wa yiɛ Zezwii yɔwʋ bhibhe, wa lɛ naa: «‑A bhiamö, 'bhöö mä'ä ‑a'a bhlɩɩ 'mö.» 'N Zezwii yiɛ gɔlʋʋ 'mö ‑gbälɛ ɔ 'kä mö. 38‑Maa ɔ lɛ 'kää möä yii, nɩkpɛɛ zuzukuzokuu 'bhööä ‑gömöö, ɔ lɛ naa: «N bhiamö n 'kä 'mämö.» ‑Maa Zezwii 'nɩɛ 'wʋ nglu, ɔ lɛ naa: 39«Mö 'ligbë 'mö, ‑li a ‑li 'wuë Lagɔ nʋʋmöä 'wluu, n 'kä ‑mä a ‑nʋa yɩ 'tɩtɩ 'nyɛ.» Nɩkpɛ 'la, 'n ɔ yiɛ mö, ‑mä ‑glɔɔ 'wuë 'mö, 'n ɔ yiɛ ‑mä sɛɛ Zezwii puoo a 'tɩtɩ bia.

Zezwii yɛ nglɔɔ ‑jɛzlɛzlɛɛ lɩbhää yɛmanɩ

(Matie 9.18-26; Maakö 5.21-43)

40‑Mä nyuu a kïkë ‑mä'la ‑gömö mää Zezwii 'bhöö a‑a, ‑mä ɔ möä nimï. Nɩkpa a ‑bɛ ‑kʋnɔɔ a ‑mä, zaa 'n wa yoo 'yio 'wʋ yi. 41-42'N nɩkpɛ ‑bhlʋ yoo yinɩ. Lagɔbudu a 'kifi ɔ glɩnɩɛ. Ɔ nglɩɛ Zayilwiisɩ. Ɔ kä nglʋyu ‑bhlʋ ‑kpöö. Yu 'la kä 'ylʋbö kʋgbä'sɔ a sɛ. Nɩkpɛɛ ghlɛɛ ‑lɛ Zezwii a dlɩ 'möö, 'n ɔ yiɛ ‑kokomïladigbï glu 'pä. Ɔ lɛ naa: «‑Atʋ ‑yaya, yi ‑a 'kä ‑mä 'na mä'a mö, ‑maa na nglʋyuu ‑bhʋlʋ ‑kpɔ, ɔ ‑wʋ 'ku dɔ'wʋ.» Zezwii ‑wʋä ‑mä mö dɔ'wʋʋ, nɩkpa sunɔɔ ‑gbʋgbʋ. 43‑Mä ‑bʋbʋ 'la jijo'wʋ, 'nglɔ ‑bhlʋ ‑wʋmö a ‑mä. Gu kɔɔ ‑bhlɛ 'ylʋbö kʋgbä'sɔ 'lɩbhänɩ. ‑Jɛzlɛzlɛɛ lɩbhɔɔ. 'Ɔ 'saa ɔ kä a‑a 'wuë, ɔ kʋ ‑mä ‑dʋtaawaa kä'mö plɩnɩ 'wë 'lɩlɩlɩ, ‑maa ‑bɛ 'nɔɔ yɛmanɩ. 44Lɛ a nglɔ 'la, mɔɔ ghlɛnɩɛ Zezwii nimï, 'n ɔ yiɛ 'ɔ ‑bäna 'kädaa a kpulu kɛ zɩ. Ɔ zuä kɛ, ɔ lɛ zʋ a sɛ'ɛ cuu, 'ɔ dluu yɛ donɩ. 45'N Zezwii yiɛ 'nɩgbö, ɔ lɛ naa: «‑Ɔ zɩɩɩ bhä kɛ 'nɩ?» Nɩkpa 'wuë lɛ ɛ'ɛ ‑bhö muë. 'N Piɛlɩ yiɛ gbʋ ‑dɩ, ɔ lɛ: «‑Atʋ, nɩkpa 'wuë ‑wa binɩmöä, ‑wa 'susunɩɛ ‑mä wa ‑kamö yɔwʋ 'dio a za‑a, muëë.» 46‑Maa Zezwii lɛ naa: «Sɛ'ɛ n gbää nɩɩ, nɩkpɛ ‑kaa kɛ zɩ. Ɔ zɩɩɩɛ kɛɛ, n yɩbhlɩmanɩ sɛ nɩɩ 'mötɛɛnɔ ‑kaa 'mö 'bhöö.» 47Nglɔɔ 'yɩɛ 'ylɩmö nɩɩ, ɔ'ɔa'a zizosɛ ‑kä, ɔ 'wuë nganɔ a za, ɔ ‑wʋ tɩtlɛnɩ dɔ'wʋ, 'n ɔ yiɛ yi, 'n ɔ yiɛ ‑lɛ Zezwii a dlɩ 'mö ‑kokomïladigbï glu 'pä. Nɩkpabhë a 'yila 'klʋ, sɛ yɩ ‑wʋä 'mö 'n ɔ yiɛ Zezwii kɛ zɩ, 'n ɔ zoo kɛ cuu a sɛ ɔ yɛmanɩɛ, 'n ɔ yiɛ yɩ 'wuë 'mö ‑sɛnɩ. 48Zezwii lɛ naa: «Na 'yu, sɛ ‑n 'tɛɛnɩɛ Lagɔ dlɩ a za, ‑n yɛ yɛmanɩ. Zaa, bhlɩ dlɩ sɛ ‑n 'kä mö.»

49Zezwii kɩ ngli cuu 'n nɩkpɛ ‑bhlʋ yiɛ ‑lɛ 'wʋ ghlɛnɩ. Ɔ 'bhöönɩ ‑mä Zayilwiisɩ a 'ligbë 'mö. Ɔ lɛ naa: «Zayilwiisɩ, yuu yɛ 'ku, ‑maa tɩ nyɩasɛ ‑Atʋ bʋanɩ.» 50Ɔ gbää sa'aa, Zezwii lɛ naa: «Zayilwiisɩ, tɩ ngänɩ, kä dlɩ 'wʋ 'yize ‑maa ‑na'a yu yi yɛmanɩ.» 51-53'N wa yiɛ mö. Wa ghlɛɛ ‑mä 'ligbë 'möö, wa lɛ 'bhöö'ɛ, nɩkpaa 'wuë, yuu yɛ 'ku a za, ngäzɩ lɩbhʋä, wa wi. 'N Zezwii yuëë 'dɩ 'nyɛ nɩɩ: «A gɔɔ 'wʋ, ‑maa yuu 'nɩɛ ku‑u, ‑maa ngämö ɔ ngämöä.» Ɔ gbää sa'a, wa 'wuë, wa ‑yi sɛ nɩɩ, yuu yɛ 'ku zaa, 'n wa yoo gla pälɩ. Zezwii lɛ naa: «Piɛlɩ mɔ, Zaa mɔ, Zaakö 'n yuu a ‑da ‑nyɛ ɔ dɩba 'sɔ, wa 'yize mʋa nɩ plɛmö ‑mä ‑budu 'mö, yuu a ‑gäzɛɛ nimï.» 'N wa yiɛ ‑mä plɛ. 54'N Zezwii yiɛ yuu a ‑gäzɛɛ sɔ köbhänɩ, 'n ɔ yiɛ wɛlɩ ghäyɩ 'pä, ɔ lɛ naa: «Na 'yu, gɔlɔ!» 55‑Gba ‑bhʋlʋ ‑kpɔ 'mö 'n yuu yiɛ gɔlɔ 'n ɔ yiɛ 'wʋ ‑sɔ. Zezwii lɛ naa: «A nɩ 'nyɔ lile ɔ 'kä li.» 56Yuu a ‑lowluwaa, 'n zuzu yuëë ‑gömö 'bhöö. ‑Maa Zezwii lɛ naa: «Wɛlɩ nɩ 'dɛɛ, a nɩ tia nɩkpɛ 'nyɛ.»

Aktualisht i përzgjedhur:

Lwiikö 8: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2