Matie 18

'Pɩwʋ mää Lagɔ 'kämanɩɛ ‑ɔ kä bhä ‑mä dɛsɛ?

(Maakö 9.33-37; Lwiikö 9.46-48)

1‑Lɛ a 'tɛnyɩ 'la 'mö, Zezwii 'a ‑gänɩwaa, mʋa 'diooo yɔwʋ 'n wa yoo nimï 'yɩbhä, wa lɛ naa: «‑Atʋ, 'pɩwʋ mää Lagɔ 'kämanɩɛ, ‑ɔ kä bhä ‑mä dɛsɛ ‑ɔ zi ‑muë'la 'wʋ?» 2Wa gbää sa'aa, 'n Zezwii yiɛ 'ywilɛ wäzɩ, ‑lɛ wa jijo'wʋ 'n ɔ yoo ‑lɛ 'nigba. 3Ɔ lɛ naa: «‑Tiamö n nyanyɩɛ dɛ'ɛ 'dɩ nɩɩ: A 'nɩ anyɩ dʋdʋ 'wʋ ‑lɛ a 'kä 'yuë a sɛ ‑wʋʋ, 'pɩwʋ mää Lagɔ 'kämanɩɛ, a 'naa 'kä ‑mä 'bhle ghlɩ 'lɩlɩlɩ. 4‑Ɔ lɛmöä ɔnyɩ dʋdʋ 'wʋ ‑ɔ ‑wʋä 'yu a sɛɛ, 'pɩwʋ mää Lagɔ 'kämanɩɛ, mɔɔ 'kää ‑mä dɛsɛ ‑kä mɔɔ 'kää ‑muë'la 'wuë 'wʋ zi. 5Sɛ'ɛ n gbä'ɛɛ nɩɩ, sɛ'ɛ a 'ywilɛ, ‑ɔ ‑kɔɔ na 'nglɩ 'mö pälaa, na'bhë ‑amö ɔ yɛɛ päla.

‑Wa bhlɩɛ nɩkpa 'nyinyloli 'mö sɛɛ

(Maakö 9.42-48; Lwiikö 17.1-2)

6Na ‑nʋa a gla'mö a ‑nɔ ‑bhlʋ, ‑ɔɔɔ dɛsɛ ‑kä nɩkpa 'yila 'klʋ a dɔ'wʋʋ, 'n nɩkpɛ ‑kɔɔ dula 'n ɔ ‑kɔɔ na gbʋ dlɩ 'wʋ ‑sɛɛ, ɛ nɩkpɛ 'la, yɩ nɛnɩ ɔ dɔ'wʋ nɩɩ, wa nɩ gwanɔɔ kpiyigwli ‑bʋlʋ 'mö, nzɩɩ wa 'kɔ ‑mä gïnyɛ 'mö 'pä. 7Mä'ä 'pɩwʋ a nɩkpaa yɔlɔylʋ 'mö wa ‑wʋä, sɛɛ ‑li ‑mimii a ‑bɛ ‑bhölɩɛ ‑yɩ kää 'nglɩ 'n nɩkpa bhlinɩɛ 'nyinyloli 'mö a za. Sɩbhä a ‑li 'la, yɩ yia 'kwädlɩ ‑bhölɩ 'yize, ‑maa nɩkpɛ ‑mɔ yɩ 'bhöönɩɛ 'möö, ɔnyɩ ɔ jlinɩ 'kple 'wʋ. 8N nɛ naa, ‑na'a kätɩkpaa ‑kamö 'nyinyloli 'mö kwää, 'n ɛ ‑kä'ɛ ‑na'a kplea ma, ‑daa 'wʋ, ‑n 'ka 'kwlɛ 'mö 'pä. ‑N ‑kä sɔkïbhë ‑kä, 'n ɛ ‑kä'ɛ bhʋkïbhë, ‑n ‑kä 'pɩwʋ mää 'naa 'kää 'yli bhɩɛ ghlɩɩ, mɩɩ nɛnɩɛ mɩɩ ziɛ ‑na'a kpökpaa 'kä 'wʋ ‑tlunɔ, ‑kosuu ‑wʋ 'naa 'kää 'ngïmoo 'mö, ‑n ‑nyaa 'kä ‑mä mö 'wʋ. 9'N ‑na'a ylii mɛɛ ‑kamö 'nyinyloli 'mö kwää, ‑sɛɛ ‑mä ‑n 'kɛ 'kwlɛ 'mö 'pä. ‑N ‑kä 'yifa ‑kä, ‑n ‑kä 'pɩwʋ mää 'naa 'kää 'yli bhɩɛ ghlɩɩ, mɩɩ nɛnɩɛ mɩɩ ziɛ ‑n ‑nyɛ ‑na'a yilaa 'sɔ ‑kpɔ 'kä ‑mä ‑kosu 'mö mö 'wʋ.

10Sɛ'ɛ n gbä'ɛɛ nɩɩ: Na ‑nʋa a ‑muë nɩkpa ‑tɔnɩɛ ‑waa dɛsɛ ‑kää, a 'nɛmanɩ anyɩ 'wʋ, a tɩa wa gla'mö a ‑nɔ ‑bhlʋ a'bhë 'ylimö fälanɩ. Ɛ'ɛ ‑bhö nyɩasɛ, ‑maa 'wa Lagɔzuzukuu ‑yɩ kpëtuëë 'wʋ, yɩ ‑wʋ zila 'wuë 'mö ‑lɛ na dɩba Lagɔ a 'yila 'klʋ. [11Nɩkpɛ a 'Yu, ‑wa tʋʋä, ɔ 'kʋä puë a za, nza ɔ yiɛ mä'ä dʋdʋ 'wʋ.]

Wlii ‑ɛ tʋʋä a ninea

(Lwiikö 15.3-7)

12A dɔ'wʋ, nɩkpɛ ‑kä wïla a gwlɩ ngbï ‑kä, 'n yɩ gla'mö a ‑bhlʋ ‑kä tʋʋ, sɛ ɔ 'kä bhä 'zʋ 'nɩ? ‑Mi'la a gwlɩ ‑mʋäna kʋgbä ngbï‑mʋäna ‑kpɔ 'mö ɔ 'kää ‑lɛ tɩ, ‑mɛ'la ‑bhlʋ ‑kpɔ ‑ɛ tʋʋä, ɔ 'kɛ sɛ tɛlɩɛ mö. 13Ɔ ‑kɛɛ sɛ tɛlɩ ‑këë, ɔ ‑kɛɛ ghlɩɩ, ɔ 'wuë 'mäna. Wli ‑bhlʋ ‑kpɔ 'la a za, 'mäna ‑a 'kɔɔ 'lɩbhää, a yɩ tenyii ‑zu, a yi ‑mi'la 'wuë ‑yɩɩɛ tʋʋ a 'mäna ɔ kää 'mlɩ 'wʋ zi. 14Sɛ ‑bhʋlʋ ‑kpɔ 'la ‑sɩbhä yɩ ‑wʋä Lagɔ ‑ɔ ‑wʋä ‑mä 'ghäyɩ 'wʋ a dɔ'wʋ. Nɩkpɛ ‑bhlʋ a'bhë, 'n ɔ 'nɩ dɛsɛ ‑kä nɩkpa 'yila 'klʋ a dɔ'wʋ ‑kë, 'n ɔ ‑kä tʋʋ, Lagɔ 'nɩɛ 'yɩbhä ɔ nɩ tʋʋnɩ ‑mä 'lɩlɩlɩ.

‑Na Lagɔdaayu ‑kä nyinylolii nʋʋ

15‑Na lilagɔgänɩnyɔ [‑kämö] 'nyinyloli 'wlu nʋʋ, ghïlo ‑mä ‑n 'kɔ 'ɔ 'zokuu 'ylimö tulanɩ, ‑maa käbönɩkpɛ nɩ tɩa ‑lɛ ‑wʋ. ‑N ‑kɔɔ ‑na 'yize 'dɩ 'nyɛ, 'n ɔ ‑kɩɩ 'mö 'nʋʋ, ‑n kɔɔ da'a 'kwlɛ 'mö ‑sɛ Lagɔ a 'yila 'klʋ a dɔ'wʋ. 16‑Maa ɔ ‑nɩmö 'yukwli ‑pʋnɩɩ, 'libhï nɩkpɛ ‑mɔmɔɔ 'wʋ, 'n ɛ ‑kä'ɛ nɩkpa 'sɔ, 'libhuë 'wʋ, a 'kɔ ‑mä ghlɩ, wa 'kä ‑lɛ a wɛlɩ 'la 'ylɩmömö. Ɛ'ɛ ‑bhö nyɩasɛ, ‑maa wɛlɩ ‑kä 'kwädlɩ ‑lɛ ‑wʋ, nɩkpa 'sɔ, nɩkpa ta nɩ 'yɩmiɛ 'ylɩmö 'wë yɩ 'kä 'wlu 'doo. #18.16 Detlenɔɔmö 19.15. 17Nɩkpa 'la ‑n ‑nyɛɛ 'kää ‑mä möö, 'n ɔ 'nuë'ɛ 'yukwli ‑pʋnɩmöö, 'nyɛ na ‑nʋa a ‑zɩkpaa 'dɩ. ‑Maa 'n ɔ 'naa'a 'yukwli ‑pʋnɩɩ, 'libho 'nyinylolinʋnyɔ 'mö 'wʋ, 'libho'ɛ lapoomoni a 'wʋbhlinyɔ#18.17 Zezwii a 'tɛnyɩ 'mö, Zwiiföwaa a dɔ'wʋ, lapoomoni a 'wʋbhlinyɔ, 'nyinylolinʋnyɔ 'kɔdɔɔ ɔ glɩnɩɛ. 'mö 'wʋ.

18Abhʋa na ‑nʋa, ‑tiamö n nyanyɩɛ dɛ'ɛ 'dɩ nɩɩ: 'Saa a 'kää mä'ä dʋdʋ'wʋ gwaa, wʋ yi ‑mä zlɩ 'mö ‑gwa, 'Saa a 'kää mä'ä dʋdʋ 'wʋ bulonɩɩ, 'wʋ yi ‑mä ghäyɩ 'wʋ ‑bulonɩ.

19Sɛ'ɛ n gbä'ɛɛ nɩɩ: Mä'ä dʋdʋ 'wʋ, a gla'mö a nɩkpa 'sɔ, wa ‑kä dlɩ ‑bhʋlʋ 'mö na dɩba Lagɔ ‑ɔ ‑wʋ ‑mä ghäyɩ 'wʋ ‑lu 'yɩbhänɩɩ, ɔ yuënyɩ 'nyɛ. 20Ɛ'ɛ ‑bhö nyɩasɛ, ‑maa, a yi 'sɔ ‑bhli oo, a yi ta ‑bhli oo, dɛ a ‑kä na 'nglɩ 'mö 'wlu 'yɩbhänɩɩ, n ‑wʋanyɩ jijo'wʋ.»

A nɩ 'tatinɩ a 'bhɩa a 'nyinyloli a gbʋ 'yi

21Zezwii 'nyʋää sa'a 'dɩ 'wëë, 'n Piɛlɩ yoo nimï 'yɩbhää mö. Ɔ lɛ naa: «‑Atʋ, na 'lilɛ ‑kaa 'kwädlɩ ‑lizoku 'wlu nʋ, 'n ɔ ‑kaa yɔwʋ bhibhe 'yizee 'wʋ ‑zɩmö n nɩ 'tatinɩ bhä yɩ gbʋ 'yi? 'Wʋ ngbi'sɔ bhä ‑a?» 22Zezwii lɛ naa: «Ɛ'ɛ ‑bhö sa'a ma 'lɩlɩlɩ. ‑Maa sɛ ɔ nʋʋmöä 'kwädlɩ ‑lizoku 'wlu 'n ɔ ‑kamö yɔwʋ bhibhe 'yizee, 'tatinɩ ‑sɩbhä yɩ gbʋ 'yi.

'Yliwʋnyɔɔ ‑ɔɔɔ ngäzɩdlɩ ‑kä a ninea

23‑Maa ‑pʋnɩ 'yukwli, sɛɛ Lagɔ zʋä nɩkpa a dɔ'wʋ, wa 'kä 'pɩwʋ mä ɔ 'kämanɩɛ ghlɩ a za‑a, ‑sɩbhä a 'nine n 'kää 'pä. N nɛ naa: 'Bhlɩlowli ‑bhlʋ mɔɔ 'nyɛɛ 'ɔ 'yliwʋwaa moni gɔgbʋ 'mö, zaa, 'n ɔ yuëë 'ylɩ ‑bhlʋ 'mö wäzɩ, ɔ ‑nyʋä 'kä 'kɔtʋ 'pä. 24Ɔ tɛɛ cuu, 'n wa yoo nɩkpɛ ‑bhlʋ ‑lɛmö. 'Bhlɩlowli a gɔgbʋ ɔ kää, wʋ moni, ɛ'ɛɛ muënɩ. 25Ɔ'ɔɔ ‑sɛdɛ ‑kä, ɔ 'kä ɛ gɔgbʋʋ ‑sɛ. Wa ‑nyɔɔ ghlɛɛ ‑lɛ, ɔ 'bhidɩba lɛ naa: A nɩ 'pɔ 'pɛlʋ gïyi a sɛ, ɔ ‑nyɛ 'ɔ nglɔɔ 'sɔ, ɔ yuëa kökä, 'ɔ ‑lii 'wuë a nɩ 'pɩ 'pɛlʋ, a 'kä yɩ moni 'wʋ 'libhï, a 'kä 'ɔ gɔgbʋʋ ‑sɛ. 26Ɔ 'bhidɩba gbää sa'aa, 'n ɔ yiɛ ‑lɛ ɔ dlɩ 'mö ‑kokomïladigbï glu 'pä, ɔ lɛ naa: ‑Atʋ, n bhiamö yɔwʋ, ‑yayaya, ‑kpaanɩ na dɛ dlɩ 'mö, ‑maa n yi 'na gɔgbʋʋ 'wuë ‑sɛ. 27Ɔ nʋä sa'aa, 'n ɔ ngäzɩ yiɛ ɔ 'bhidɩba 'lɩbhä, ɔ lɛ naa: N kɩ 'yi 'tatinɩ, ‑maa bhlɩ dlɩ sɛ ‑n 'kä mö, tɩa'a gɔgbʋʋ a'bhë ‑sɛ. 28Nɩkpɛ 'la 'wlʋä ‑mä cuu, ɔ 'lilɛ ‑mɔmɔɔ, ɔ ‑nyɛɛ nʋä dɛ ‑bhʋlʋ libhoo, ‑ɔ kä a‑a ɔ gɔgbʋ 'tikëtikëyii, 'n ɔ ‑nyɔɔ yiɛ 'wʋ gbanɩ. Ɔ ‑nyɔɔ gbanɩɛ 'wʋ cuu, ‑gbu! 'N ɔ yoo ‑bʋlʋ 'mö bhlinɩ, ɔ ‑känɔ mleyi 'mö klɩklɩ, sɛɛ ‑mɔ'la 'kää 'ku a sɛ, ɔ lɛ naa: ‑Sɛ 'na gɔgbʋʋ. 29Ɔ 'lilɛ 'la, 'n ɔ yiɛ ‑lɛ ɔ dlɩ 'mö ‑kokomïladigbï glu 'pä, ɔ lɛ naa ‑yayaya, ‑kpaanɩ na dɛ dlɩ 'mö, ‑maa n yi 'na gɔgbʋʋ 'wuë ‑sɛ. 30Ɔ 'lilɛ bhibheoo yɔwʋʋ, ɔ'ɔɔ 'wʋ nglu, ‑maa ‑jie 'mö ɔ 'pɔɔ, ‑zlɩ ɔ ‑kä gɔgbʋʋ ‑sɛ 'wëë, ɔ 'kä ‑mä 'wlʋ. 31Ɔ 'bhɩa ‑muë'la, wa 'yiɛ ‑sɩbhä 'ylɩmöö, 'n yɩ yuëë tenyii dlɩ 'yli käla, 'n wa yiɛ ‑mä wa 'bhidɩba 'dɩ 'kwä. 32Ɔ 'bhidɩba 'nwiɛ, ɔ lɛ wa nɩ mɔ kie wa ‑nyɔɔ 'kä yi. Wa ‑nyɔɔ yiɛ, ɔ lɛ naa: ‑Nmö nɩkpɛ nɩ, kpʋkpʋ ‑n kää. 'Nɩɛ yɔwʋ ‑n bhibheaa'ɛ 'n n yiɛ ‑na'a gɔgbʋʋ a wɛlɩɩ 'wuë 'yi 'tatinɩ? 33Zaa, sɛ n 'pä a‑a ‑na ngäzɩdlɩ, sɛ yɩ ‑wʋ ɔ 'mö n‑n 'nɩ bhä ‑sɩbhä ‑na 'lilɛ ‑mɔ'la a ngäzɩdlɩ 'pämö 'nɩ? 34‑Maa 'klɛ 'mö yɩ pälɔɔ tenyii zaa, 'n ɔ yoo ‑jie 'mö 'pä, wa 'kɔ ‑mä 'klɩ 'yɩanɩ ‑këë, ‑zlɩ ɔ ‑kä ɔ'bhë 'ɔ gɔgbʋʋ 'wuë ‑sɛ 'wëë, ɔ 'kä ‑mä 'wlʋ. 35‑Maa sɛ ‑bhʋlʋ ‑kpɔ 'la ‑sɩbhä a gla'mö a ‑mɔ ɔ 'lilɛ ‑kä ‑lizoku 'wlu nʋ, 'n ɔ 'nɩ ‑mä 'ɔ dlɩɩ 'wuë zɛmö yɩ gbʋ 'yi 'tatinɩɩ, ‑sɩbhä na dɩba Lagɔ ‑ɔ ‑wʋä ‑mä ghäyɩ 'wʋ 'kɔɔ 'zʋmö.»

Aktualisht i përzgjedhur:

Matie 18: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2

Matie 18

Vargje biblike të njohura nga
Matie 18

Dëgjoj Matie 18

Bibla:

Bété, Guiberoua

Versioni: BdG2 - bet

Matie 18

Matie 18

Vargje biblike të njohura nga Matie 18

Dëgjoj Matie 18

Bibla:

Bété, Guiberoua

Versioni: BdG2 - bet

Matie 18

Vargje biblike të njohura nga
Matie 18