Matie 9

Zezwii yɛ kpälɛkpälɛnyɔ yɛmanɩ

(Maakö 2.1-12; Lwiikö 5.17-26)

1Yɩ 'plɩɛ sa'a 'wëë, 'n Zezwii yi'ɛɛ gɔlʋʋ 'wʋ 'libhï, mä ɔ 'bhöönɩ a‑a, 'n ɔ yiɛ ‑mä 'bɩwʋ mö, ‑glɔɔ 'mö mä ɔ glɩ a‑a, 'n ɔ yiɛ ‑mä mö. 2Ɔ ghlɛɛ ‑mä, 'n wa yoo nɩkpɛ ‑bhlʋ ‑lɛmö, ɔ pö ‑sɛpʋ 'mö. Kpälɛ ɔ kpälɛɛ, nɩkpaa ‑wa ‑lɛmɔɔ, Zezwii 'yɩɛ sɛ wa 'tɛɛnɔɔ dlɩ 'ylɩmöö, 'n ɔ yiɛ kpälɛkpälɛnyɔɔ 'dɩ 'nyɛ nɩɩ: «Na 'yu, bhlɩ dlɩ sɛ, ‑maa ‑na'a 'nyinylolii a gbʋʋ yɛ bhɩɛ.» 3‑Maa Moyizɩ 'a Gböö a 'cɩawaa, wa gla'mö a ‑mumuë, wa glɩmö a ‑lɛ la. Zezwii gbää sa'aa, wa dila zɛmö a dɔ'wʋ wa lɛ naa: «Nɩkpɛ ‑mɔ nɩ, Lagɔ 'a nglɩɩ 'mö ɔ nyimaa.» 4Zezwii yɩɛ 'wa dlɩpäsaa 'ylɩmöö, 'n ɔ yuëë nimï 'yɩbhä, ɔ lɛ naa: «Sɛ yɩ ‑wʋ bhä 'mö 'n 'a dlɩpäsaa ‑wʋ bhä sa'a 'zokwësɛ 'nɩ? 5N 'kä nɩkpɛ nɩ 'dɩ 'nyɛ nɩɩ, ‑na'a 'nyinylolii a gbʋʋ yɛ bhɩɛ, n 'kɔ'ɛ 'dɩ nyɛ nɩɩ ‑sɔ 'wʋ ‑n 'kä nɛmö, yɩ 'sɔɔ a dɔ'wʋ ‑yɩ 'tɛɛ bhä 'mö? 6‑Maa n yɩbhä a nɩ yɩbhɩnɩ sɛ nɩɩ, Nɩkpɛ a 'Yu, mɔɔ kää ɔ 'kä mä'ä dʋdʋ 'wʋ nɩkpɛ a 'nyinyloli a gbʋ bhɩa.» Zaa, 'n ɔ yiɛ kpälɛkpälɛnyɔɔ 'dɩ nyɛ, ɔ lɛ naa: «‑Sɔ 'wʋ, 'libhï ‑na'a ‑sɛpʋʋ 'wʋ, ‑n 'kä 'ligbë 'mö mö!» 7Zezwii gbää sa'a cuu, 'n kpälɛkpälɛnyɔɔ yiɛ 'wʋ ‑sɔ, 'n ɔ yiɛ 'ligbë 'mö mö. 8Nɩkpa 'wuë ‑wa ‑wʋä a‑a ‑lɛ, wa 'yɩɛ ‑li 'la 'ylɩmöö, nganɔɔ 'lɩbhʋää, 'n wa yiɛ Lagɔ a 'nglɩ 'ghlimanɩ, sɛ ɔ 'nyɛɛ nɩkpɛ sa'a a 'mötɛɛnɔ a za.

Zezwii yɛ Matie wäzɩ

(Maakö 2.13-17; Lwiikö 5.27-32)

9Zezwii 'bhööä da'aa 'n ɔ yiɛ mö. Ɔ ‑wʋ mö dɔ'wʋ, 'n ɔ yiɛ nɩkpɛ ‑bhlʋ 'ylɩmö, ɔ glɩ ‑mä lapoopɛnɩbuduu 'mö. Ɔ nglɩɛ Matie, 'n ɔ yoo wäzɩ, ɔ lɛ naa: «Matie, yi ‑n ‑kaa ‑gänɩ!» Ɔ gbää ‑sɩbhä cuu, 'n Matie yiɛ 'wʋ ‑sɔ 'n ɔ yoo 'bɩwʋ bhlinɩ. 10'Ylɩ ‑bhlʋ 'mö, Zezwii ‑wʋ ‑mä Matie a 'ligbë 'mö li dɔ'wʋ, lapoomoni a 'wʋbhliwa a ‑bɛ, nɩkpa ‑mumuë ‑wanyɩ nglɩɩ ‑nyimamö'ɛɛ 'n 'ɔ ‑gänɩwaa kökä, wa 'wuë, wa ‑nyɔɔ ‑wʋ 'wʋ linɩ dɔ'wʋ, 11'n Falizɩɛwaa 'yuëë 'ylɩmö, 'n wa yiɛ Zezwii 'a ‑gänɩwaa nimï 'yɩbhä nɩɩ: «Sɛ yɩ ‑wʋ ɔ 'mö, lapoomoni a 'wʋbhliwaa ‑nyɛ nɩkpaa ‑wanyɩɩ nglɩɩ ‑nyimaa 'sɔ, 'n a 'bhidɩba ‑nyʋä linɩ bhä 'wʋ 'nɩ?» 12Zezwii 'nʋä, 'n ɔ yuëë 'dɩ 'nyɛ, ɔ lɛ naa: «‑Ɔ ‑yɛɛ, ɔ'ɔ tɛlɩ göpögöpönyɔ sɛ, ‑maa ‑ɔɔɔ ‑yɛ, mɔɔ tɛlɩɛ göpögöpönyɔ sɛɛ. 13Miɛ nɩɩ, nɩkpa ‑wa zlɔnɩɛ 'möö, wa za n'n‑ä mä'ä dʋdʋ 'wʋ yi, ‑maa ‑wa glɩnɩɛ 'nyinylolinʋwaa, wa za n yiɛ, n 'kʋä wäzɩ.» Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ: Nɩma a bʋbɔnɩbʋbɔnɛ mɛ, ngäzɩdlɩkäkʋ mu, yɩ 'sɔ ‑kpɔ a dɔ'wʋ, ngäzɩdlɩkäkʋ 'mö n yɩbhää.#9.13 Ozee 6.6.

A ‑kä möö, wɛlɩkïbhë 'la, sɛ a sɛɛ zɛmöö, a nɩ 'pä sasɛ dlɩ a 'kä ‑sɩbhä 'mö nʋ.

Suplɛplʋʋ a wɛlɩɩ

(Maakö 2.18-22; Lwiikö 5.33-39)

14'Ylɩ ‑bhlʋ 'mö, Zaa Batisɩ 'a ‑gänɩwaa mʋa ghlɩɛ ‑mä Zezwii 'n wa yoo nimï 'yɩbhä. Wa lɛ naa: «‑Abhʋa, ‑a ‑nyɛ Falizɩɛwaa 'sɔ ‑a plɛ su. ‑Maa ‑na ‑nʋa ‑naa, wa'a plɛ wabhlɩ su 'lɩlɩlɩ. Zaa sɛ yɩ ‑wʋ ɔ 'mö nɩ?» 15'N Zezwii yuëë 'dɩ 'nyɛ ɔ lɛ naa: «Nɩkpɛ ‑kä 'nglɔ kwä, 'n wa ‑kä nglɔɔ 'wʋ 'bhli dɔ'wʋ ‑wʋ, nglʋkwänyɔɔ ‑kä ‑bhlɛ ‑lɛ ‑wʋʋ, nɩkpaa ‑wa yi a‑a 'bhlie, wa yi bhä wa 'naa li nʋ ‑a? N'nn! Wa 'naa 'kä ‑sɩbhä nʋ. ‑Maa 'tɛnyɩ ‑mɛmɛɛ yi ghlɛ, dɛ wa 'kʋä nglʋkwänyɔɔ jijo 'wʋ ‑sɛɛ. ‑Lɛ a 'tɛnyɩ 'la 'mö, wa yi su plɛ.»

16'N ɔ yuë'ɛɛ nine ‑mamaa 'pänɩ, ɔ lɛ naa: «Wa ‑kä ‑lɛ ‑bänagɔgɔ a ‑fële 'mö ‑yʋkʋpɩɔlulu 'kplɛnɩɩ, yɩ'ɩɛ ‑sɩbhä 'wʋ ‑ngwa. Ɛ'ɛ ‑bhö nyɩasɛ, ‑maa wa ‑kʋʋ ‑lɛ 'kplɛnɩɩ, ‑lɛ ghɔlɔ a ghlɔɔ tenyii 'n ‑fëlea 'ghlimanɩɛ 'mö. 17Wa ‑kä nʋyɔlʋ 'kplabhëgɔgɔ 'mö pälɩɩ, yɩ'ɩɛ'ɛ ‑sɩbhä 'wʋ ‑ngwa. Ɛ'ɛ ‑bhö nyɩasɛ, ‑maa wa ‑kʋʋ ‑mä pälɩɩ, 'kplabhëa ghɔlɔ a ghlɔɔ, 'n nʋʋ 'suloo sɛ, yɩ 'sɔɔ 'n yɩ nyimonɩɛ 'gämö. ‑Sɩbhä a za wa pälɩɛ nʋyɔlʋ 'kplabhëlele 'mö. ‑Sɩbhä a dɔ'wʋ yɩ kii 'sɔ ‑kpɔ 'nɩ nyimoo.»

Guzunglɔɔ ‑ɔ zɩɛ Zezwii 'a ‑bänaa kɛ ‑nyɛ yuu ‑ɔ 'ku a‑a Zezwii gälaa 'sɔ a wɛlɩɩ

(Maakö 5.21-43)

18Zezwii ‑wʋ ‑bhlɛ bhïla dɔ'wʋ 'n Zwiiföwa a 'kifi ‑bhlʋ yiɛ yi. Nɩkpɛ 'la, ‑lɛ Zezwii a dlɩ 'mö 'n ɔ yiɛ ‑lɛ ‑kokomïladigbï glu 'pä. Ɔ lɛ naa: «‑Atʋ, 'na nglʋyuu yɛ 'ku ‑lɛ 'nɩɛ ‑bhlɛ 'mö gwälɛ. Zaa, ‑yaya, yi ‑n 'kɔ kɛ zɩ, ɔ 'kä gɔlɔ.» 19'N Zezwii yiɛ 'wʋ ‑sɔ, 'ɔ ‑gänɩwaa kökä, wa ‑gänɩ nɩkpɛɛ 'n wa yiɛ mö. 20Wa ‑wʋ mö dɔ'wʋ, 'nglɔ ‑bhlʋ, ‑jɛzlɛzlɛɛ kɔɔ ‑bhlɛ 'ylʋbö kʋgbä'sɔ 'lɩbhänɩ 'n ɔ yiɛ Zezwii nimï ghlɛnɩ 'n ɔ yiɛ 'ɔ ‑bänaa a kpulu kɛ zɩ. 21Nglɔ 'la, ɔ dlɩ zɛmö a dɔ'wʋ, ɔ lɛ nɩɩ: «'N n ‑kä 'ɔ ‑bänaa a 'yize kɛ zɩɩ, n yi yɛmanɩ.» 22'N Zezwii yiɛ nimï 'lɛ, 'n ɔ yoo 'ylɩmö. Ɔ lɛ nɩɩ: «Na 'yu, bhlɩ dlɩ sɛ, ‑maa ‑na'a dlɩ'wʋkänɔɔ ‑kamö puë.» Zezwii gbää sa'a cuu, 'n nglɔɔ yiɛ yɛmanɩ.

23'N Zezwii yia'aa ‑mä Zwiiföwaa a 'kifii 'la a 'ligbë 'mö ghlɛ. Ɔ lɛ 'bhöö 'lɛ, nɩkpa ‑su ‑lɛ. Bhlɩbhlɩwa ‑wʋmö'ɛ ‑lɛ. Nɩkpa nʋ bidibidi, wa wi. Zezwii 'yuëë wa 'wuë 'ylɩmöö, 24ɔ lɛ naa: «A 'wuë, a nɩ 'wlʋ ‑mä, ‑maa yuu 'nɩɛ ku‑u, ngämö ɔ ngämöä.» Ɔ gbää sa'aa, 'n wa yoo gla pälɩ. 25Wa 'wälaa ‑mä nɩkpa 'wuë 'wëë, ‑mä ‑budukïbhëa 'mö mää yuu a ‑gäzɛɛ pöä, 'n Zezwii yiɛ ‑mä plɛ. 'N ɔ yiɛ yuu a ‑gäzɛɛ sɔ köbhänɩ, 'n yuu yiɛ gɔlɔ 'n ɔ yiɛ 'wʋ ‑sɔ. 26Wɛlɩ 'la 'n yɩ yiɛ ‑mä bhlɩɩ 'wuë 'mö gbɔlɔnɩ.

Zezwii yɛ 'kukwlekäwa 'sɔ yɛmanɩ

27Zezwii 'bhööä ‑lɛ 'n ɔ yiɛ mö. Ɔ ‑wʋ mö dɔ'wʋ, 'n 'kukwlekäwa 'sɔ yoo 'bɩwʋ bhlinɩ. Wa ‑wʋ 'mö 'kpa dɔ'wʋ, wa lɛ: «Daviidɩ a 'yu a 'yu aa, yɩlɩ ‑aa ngäzɩklʋ 'mö aa!» 28Ɔ ghlɛ ‑mä 'ligbë 'mö, 'kukwlekäwaa ghlɛ ‑lɛ ɔ yɔwʋ, 'n ɔ yuëë nimï 'yɩbhä, ɔ lɛ naa: «A kɩ bhä dlɩ 'wʋ nɩɩ n bhɛnɩ n 'kanyɩ yɛmanɩ ‑a?» Wa lɛ: «Nn, ‑Alowli, ‑a 'kɩ ‑sɩbhä dlɩ 'wʋ.» 29'N Zezwii yiɛ 'wa yilaa kɛ zɩ. Ɔ lɛ naa: «Sɛ a kää da'a Lagɔ dlɩ 'wʋ a za, 'a yilaa nɩ do.» 30Ɔ gbää sa'a cuu, 'n wa yilaa yiɛ do. 'N Zezwii yuëë kä'mö 'titli, ɔ lɛ naa: «A ‑pʋnɩ 'yukwli, wɛlɩ nɩ a nɩ ti nɩkpɛ 'nyɛ.» 31‑Maa ‑sɩbhä yɩ ‑wʋ 'mö, nɩkpa 'la, wa möä, ‑mä bhlɩ 'la 'wuë 'mö, 'n wa yiɛ ‑mä Zezwii 'a nglɩɩ mlɩmanɩ.

Zezwii yɛ ‑ɔɔwɛlɩkänyɔ yɛmanɩ

32'Kukwlekäwa 'la möä 'wë cuu, 'n wa yiɛ Zezwii nɩkpɛ ‑bhlʋ ‑lɛmö, zuzukwëzokwë ɔ kää ‑gömö. A 'nglɩ 'mö ɔ'ɔ bhïla. 33'N Zezwii yonyɩɛ ‑gömö kpëti. Cuu, 'n nɩkpɛ yiɛ bhïla. Nɩkpa 'wuë ‑wa ‑wʋä ‑lɛ, 'n ngli yuëë yɛ, wa lɛ: «'Ɔ! ‑Aaa a ‑bhlɛ tɛkäsɛ sɛ'ɛ a ‑li mä'ä Yizlaɛlɩ‑bhölɩɩ 'mö 'ylɩmö.» 34‑Maa Falizɩɛwaa wabhlɩ, wa lɛ naa: «Nɩkpɛ 'la, zuzukuzoku a 'kifi mɔɔ ‑wɔɔ ‑gömö, mɔɔ nyɔɔ 'mötɛɛnɔ 'n ɔ kpëtie zuzukuzoku nɩkpa ‑gömö.»

Sɛ'ɛ nɩkpa a ngäzɩ 'lɩbhää Zezwii

35‑Mä Bhlɩ 'la a ‑gwlɩ 'kädɩɩ ‑nyɛ ‑gwlɩ 'tikïyiea 'wuë 'sɔ 'mö, ‑sɩbhä Zezwii 'tʋä ‑mä 'wʋ. ‑Mä a Zwiiföwaa a Lagɔbïdii 'mö, 'n ɔ 'cɩanɩɛ ‑mä Lagɔwɛlɩɩ. 'Pɩwʋ mää Lagɔ 'kämanɩɛ a 'Mänatɩtɩɩ, 'n ɔ biiɛ saa 'wuë. Nɩmɛnɛkäwaa ‑nyɛ guzuwaa 'wuë 'sɔ 'n ɔ yɛmanuëë. 36Zezwii 'yɩɛ nɩkpaa a ‑bʋbʋʋ 'ylɩmöö, wa ngäzɩɩ lɩbhɔɔ tenyii. Ɛ'ɛ ‑bhö nyɩasɛ, ‑maa ɔ ‑yi sɛ nɩɩ, wa yɛ yɔlɔ, swɩ kʋä yɔwʋ 'kunɩ. Wa 'kä ‑bhɩɛ wïla a ‑mii 'nɩ 'ylizʋnɩnyɔ 'wʋ ‑kä. 37‑Sɩbhä a za, 'n ɔ yiɛ 'ɔ ‑gänɩwaa 'dɩ 'nyɛ, ɔ lɛ naa: «Lagɔ 'a 'lagblɛɛ, ɛ 'ghïli tenyii 'n ɛ yɛ zɛlɩ, ‑maa nɩkpa ‑wa 'kää ‑mä ɛ 'mö libho nʋʋ, wa'aa ‑zu. 38Zaa, a nɩ bhibhe 'lagblɛlowlii yɔwʋ, ɔ 'kä libhonʋwa ‑mumuë 'wʋ 'libhï, ɔ 'kʋä ‑mä 'ɔ 'lagblɛɛ 'mö kwä.»

Aktualisht i përzgjedhur:

Matie 9: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2

Matie 9

Vargje biblike të njohura nga
Matie 9

Dëgjoj Matie 9

Bibla:

Bété, Guiberoua

Versioni: BdG2 - bet

Matie 9

Matie 9

Vargje biblike të njohura nga Matie 9

Dëgjoj Matie 9

Bibla:

Bété, Guiberoua

Versioni: BdG2 - bet

Matie 9

Vargje biblike të njohura nga
Matie 9