लूकाल 13
13
पापमताल मनसु मार्सकुंटु
1अदे वेलाते अगा मत्ता लोकुल्कुनाल इच्चुर लोकुल्क वासि येसुंक, “गालिल एरियाता इच्चुर मनकालोर गुळिते मोक्कु हीसेक मननेंके पिलातुस ओना सिपाइल्कुन लोहचि ओर्कुन हव्का वेहतोर. आ सिपाइल्क ओर्कुन गुळितेन हव्कतुर. इल्हा पिलातुस ओरा नेत्तुरतुन मनम मोक्कु हियना नेत्तुरते कल्पतोर,” इंचि वेहतुर. 2अस्के येसु ओर्कु इल्हा जवाब हीतोर, “गालिल एरियाताल वाता ई मनकालोर्कुंक इसंटा हामुर वाता अय्ते, ई मनकालोर गालिल एरियाता वेरे मनकालोर्कुंकन्ना एक्को पापम कीतुर इंचि मिमेट इन्कुंचंतिरा? 3नना वेहासेक! अल्हा बिल्कुले आयो. गानि पापमताल मनसु मार्सकुंचि पेनदाहेके तिरियाकोंटे मिमेटगुडा ओरालेसींगे हासि नासडेम आंतिर. 4सरे इंदके वेहाट! सिलो इनना गोपुरम #13:4 गोपुरम इत्ते उंदि एत्तुंक एत्तु मत्ता मिद्दे आंदु.कूलसि अरताहेंका पद्देनमिदि मंदि मनकालोर हातुर. अय्ते ई गोपुरम कूलता वेलाते येरुसलेमते मत्ता वेरे मनकालोर्कुंकन्ना हासोत्ता ई पद्देनमिदि मनकालोर एक्को तप्पु कीतुर इंचि इन्कुंचंतिरा? 5हिल्ले. नना मीकु वेहनद बतल इत्ते, पापमताल मनसु मार्सकुनाकुंटे मिमेट अंटोरगुडा ओरालेसींगे हासि नासडेम आंतिर.”
कबळ्क ओज्जुवा मरा
6ओर्कु बेस तेळियनाहाटीं पजा येसु इंकुंदि वेसुड वेहालय सुरुव कीतोर. “वरोर मनकल ओना अंगुर तोटाते उंदि अंजिर मरा वाटतोर. उंदि रोज अद मरा कायां हादतना, हादा हिल्लेना, इंचि हूळालय होत्तोर, गानि अदुंक कायां हादसि मनाहिल्लें. 7अस्के आ मनकल ओना तोटाते कबळ कियना जीतागानकु, हूळा, ई अंजिर मरा कायां हादता बारे इंचि नना मूड वर्सानाल इगे दीन हूळालय वासंतन, गानि दीनकु बस्केने उंदि काया इंका नाकु दिसा हिल्ले. इसंटा मरातुन इर्सि बता पायदा? नर्किसि पोहा, इंचि वेहतोर. 8अस्के आ जीतागाड, मालक, ई उंदि वर्सामेड मन्निकांटी. नना दीन सुट्टु तव्सि बेस एरवु वाटंतन. 9अस्केनना हादते सरे, हिलाकोंटे नर्किसि पोहा वच्चु,” इंचि इत्तोर.
नोमकेम रोजुननाड येसु उंदि मुरताटुन बेस कींतोर
10उंदि नोमकेम रोजुननाड येसु उंदि दर्मसास्त्रम कराहना लोते कराहसेक मत्तोर. 11देय्यम पीताहेंका पद्देनमिदि वर्सानाल बिमार अर्सि मत्ता उंदि मुरतळ अगा मत्ता. दाना नळि वंकर आसि गूनि पेय्सि मत्ताहेंका दान्क बेस नित्ता वायाकोंदु. 12-13येसु दान हूळसि ओना दग्गेर्क केयतोर. केय्सि, “बाई! निमे नीवा रोगमताल पलाते अरतिन,” इंचि, पजा दाना तल्लापोर्रो कय इरतोर. कय इरता इरमळे अद बेस नित्तिसि पेनदुन तल्सकुनालय दल्गता.
14बिमार मत्ता मुर्ताटुन नोमकेम रोजुननाड येसु बेस कीताहेंका दर्मसास्त्रम कराहना लोता अदिकारिंक इरगा होंगु वाता.#13:14 नोमकेम रोजुननाड बतले कबळ कियमळ हिल्ले. इंका उंदि मुर्ताटुन बेस कियमळगुडा ओर्कु उंदि कबळ अनपिस्ता. अदुनहाटीं आ अदिकारिंक होंग वाता. अस्के ओर लोकुल्कुन, “कबाह्क कियालय उंदि वारमते हारुं रोजकु मंतां गदा! अय्ते आ रोजकुने वासि मिमेट मीवा बिमारकुनाल बेस आम्टु, गानि नोमकेम रोजुननाड वासि आयो,” इंचि इत्तोर.
15अस्के सामि जवाबुने ओर्कुन, “अरे डोंगि लोकुरिटा, नोमकेमनाडु मीवाव्टेटाल हरेक मनकल कोंदातुन आयि गाडदितुन आयि लेहाकुंचि एर उहालय ओयिरा? 16अय्ते पद्देनमिदि वर्सानाल पेद्दा देय्यम पीसि मत्ता अब्राहामुना वंसमता ई मुरताटुन, नोमकेम रोजुननाड बेस कीते इव्टे तप्पु बतल मंता?” इंचि इत्तोर.
17येसु वळ्कुता ई पोल्लें केंजसि बोर लोकुल्क अय्ते ओना विरोदमते मत्तुरो, ओर्क अंटोर्क सिग्गु वाता. गानि येसु कीता इचंत्रम आयना कबाह्कुन हूळसि लोकुल्क मात्रम इरगा कूस आतुर.
पेनदा राज्येम बल्हा मनंता?
(मत्तयाल 13:31-33; मरकुस 4:30-32)
18पजा येसु इल्हा वेहतोर. “पेनदा राज्येम बल्हा मनंता? नना दान बदुनलेह्का मंता इनकन? 19पेनदा राज्येम आवाल्कुना उंदि पेडेतसोंटद आंद. आ पेडेतुन बोरो वरोर मनकल ओसि ओना तोटाते वीततोर. अद मोलियसि, बेर्स्सि पेद्दा मरा आता. अस्के परियना पिट्टें दाना पंगांक गूडां दोहकुत्तां.”#13:19 इस्राएल देसेमते आवाल्कुना मरा पदि पूटकु एत्तु मनंता.
20येसु मर्रा इल्हा इत्तोर. “पेनदा राज्येमतुन नना बदुनलेह्का मंता इंचि इनकन? 21अद पुल्लटा पिंडितसोंटद आंद. बदो उंदि मुरतळ पुल्लटा इच्चुर पिंडितुन मूड तव्वना पिंडिते कल्पता. अस्के आ पिंडिअंता पुल्लगा आता,” इंचि वेहतोर.
इर्कुटोम हर्रि
(मत्तयाल 7:13-14,21-23)
22येसु येरुसलेम होननेंके वेल्लेन नाह्कुने, सहरकुने होंचि अगाटा लोकुल्कुंक पेनदा पोल्लें कराहसेक होत्तोर. 23अस्के बोरो वरोर मनकल येसुन, “सामि, पापमताल मुक्ति इच्चुर मंदिके दोर्कंतना?” इंचि पूसकीतोर.
24अस्के येसु ओन्क इल्हा वेहतोर. “मिमेट बस्केळ्क इर्कुटोम मत्ता हरदाल होळियालय इरगा कोसिस कीम्ट.#13:24 येसु पेनदा राज्येमते होळियाना बारेमते वेहचंतोर. दीना अर्तम बतल इत्ते अगा होळियमळ वेल्लेन कस्टम. नना वेहानद बतल इत्ते, आ हरदाल वेल्ले मंदि होळियालय हूळांतुर गानि ओर होळिया परुर. 25लोता मालक तेदसि उंदि मल्का तल्पु वाटानय्ते मिमेट पलाते नित्तिसि तल्पुन टोक-टोक कीसेके, ‘सामि मावाहाटीं तल्पु तेंडा,’ इंचि इंदकिर. गानि, ‘मिमेट बगाटाल वातिर? नना मीकुन एरपाट किय्योन,’ इंचि ओर मीकुन इंतोर. 26अस्के मिमेट, ‘नीवातोनि कलियसि मोमोट तित्तोम, उट्टोम. इंका निमे मावा नाटे वासि माकु बजारकुने पेनदा पोल्लें कराहतिन,’ इंचि इंदकिर. 27गानि ओर मात्रम, ‘नना मीकु वेहासेक मिमेट बगाटाल वातिरो, बोर आंदिरो नना मीकुन एरपाट किय्योन. अरे सेड्डा कबाह्क कियानोरिटा, मिमेट इगेटाल पेय्सि होंटु,’” इंचि इंतोर.
28“पेनदा राज्येमते अब्राहाम, इसाक, याकोब अल्हेने पेनदा कबुरतोर अंटोर्कुन मिमेट हूळांतिर, गानि मीकुन मात्रम अगटाल, पेन पलाते हीकटते वाटसींता. अगा सिराप अळमळ, पल्कु कोर्कमळे मनंता. 29अस्के उत्तर-दक्सिनताहेंदाल, पोळ्द पेयसनाहेंदाल, पोळ्द अर्रानाहेंदाल लोकुल्क वासि, पेनदा राज्येमते उद्दानुर. 30गानि हुळाट! मुन्ने मत्तोर इच्चुर पज्जो आयानुर आनि पज्जो मत्तोर इच्चुर मुन्ने आयानुर.”
येरुसलेमते येसुंक हामुर वांता
(मत्तयाल 23:37-39)
31अच्चोटेन इच्चुर परिसिल्क वासि येसुन, “नीकुन अंतिपस हेरोद राजाल हव्कालय हूळसंतोर, निमे इगेटाल बद्दना वेरे जेगाते पेय्सि होन,” इंचि इत्तुर.
32अस्के येसु ओर्क इल्हा वेहालय दल्गतोर. सरे! मिमेट होंचि आ नक्काकु वेहट गदा, इय्याला नाडि नना देय्याल्कुन पेचाहसि गेदमंतन, बेस हिलवोर्कुन बेस कींतन, मन्ने नावा कबाटुन महांतन. 33अयना येरुसलेम सहरता पलाते वरोर पेनदा कबुरतोंक हामुर वायमळ बेस आयो. अदुनहाटीं इय्याला, नाडि, मन्ने नाकु ताकसेकेन मना पींता.
34ए येरुसलेमतोरिटा, ए येरुसलेमतोरिटा! मिमेट पेनदा कबुरतोर्कुन हव्कानोर आंदिर, इंका पेन मिहगा लोहचीतोर पोर्रो मिमेट बंडां हुक्कानोर आंदिर. कोर्रु दाना पीसेन रेक्काना हिळु बल्हा जमा कींतनो, अल्हेन ननागुडा मीवा पिलाल्कुन जमा कियना इंचि बच्चुंगो मल्कां कोरतन. गानि मिमेट मात्रम कोराहिल्लिर. 35हूळा, मीवा लोन मीहाटीं कुल्ला होळ्समळ जर्गता. नना मीकु वेहानद बतल इत्ते, सामिना पोरोलते वायानोर आसिर्वाद दोर्कतोर इंचि बदवेरदाका अय्ते मिमेट इन्निरो अदवेरदाका नाकुन मर्रा हूळिर, इत्तोर.
Aktualisht i përzgjedhur:
लूकाल 13: esg-Deva
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2022, Wycliffe Bible Translators, Inc. All rights reserved.