Matyo 10
10
Ntóm Yeso tsa Nɨghúm ntsɔb bá ghe
(Mar 3:13-19; Alu 6:12-16)
1Yeso a tɔ́ŋ bɨyɛʼ ɨbyi nɨghúm ntsɔb bá ntiʼ nga mɨtən a nkɨŋ ɨzhwi tɨbɔŋ, ɨ tsuʼ mɨghɔ abɔʼnɨ ɨzaŋnɨ ɨtsum ə. 2Mɨkum mɨ ntóm Yeso tsa nɨghúm ntsɔb bá mɛnə: a ntsambyi, Samɔn mbáʼ bɨ tɔ́ŋnə́ ngə́ Bita, Andɨrɨya mɨma ɨyi; Jemsɨ bo Yoane ɨbɔ bɨ Zebɨdi; 3Firɨbɔ bo Batəloma; Tɔməshi bo Matyo ngaŋ nkwarɨ ashɛbɨ; Jemsɨ mɔn Afasɨ, abɔʼnɨ Tadyo, 4Samɔn Nkɔŋəlaʼ nɨ Yudasɨ Iskario wa a ghɨ́nɨ́ fen a Yeso ghe.
Za ba Nɨghúm ntsɔb bá Fúnɨ́ Abyɛn a Ndǒ ghe
(Mar 6:7-13; Alu 9:1-6)
5Yeso a tyígɨ́ mbáŋnɨ́ tsa nɨghúm ntsɔb bá ghe. Wɛrə a kə́ ntyigə awa lá nga ɨtɨgɨtɨ tsenə a mbó bo ngə́, “A nɨ keʼ ghɛn a mu adiʼ a ba a se bə Yuda be zə tsɛrə, kə a mu ntáʼmbagə bə Samaria wu tsɛrə ghe. 6Lá nɨ ghɛn be a mbó bə Izrai ba bɨ benɨ tso mbyindzɨ tsa tsɨ byenɨ lá. 7Nɨ ghɛn ɨ númə́ sóŋə́ anu a Ŋwi ngə́, ‹Nɨfɔ nɨ fɔməbvurə tiʼ tsɛʼ abó ə.› 8Nɨ tsuʼ mɨghɔ, nzhwemnɨ bɨkfú, ntsuʼ ɨtɨchwen nkɨ fɨgɨ bɨdzɨŋ ə. Ka nɨ zon awən mɨtən məmen ma nɨ mɨ faʼnə nɨ mɛrə lá nɨ nkáb ə, ma lan, á nɨ kə́ ngǎ a mɛrə tə́ nkwárɨ́ nkáb ə. 9A nɨ keʼ nkáb tse tiʼtɨ, 10kə aban a ngěn a nɨghan mənen, kə atsɛʼ zə daŋ, kə ngobɨ, kə mbaŋ; mbɨ́ʼ ngə́ ŋwɔn afaʼ tsum a tsi nɨ nchyɛ nɨ azúm atsum za a lɔnə ghe.
11Be nɨ ghɛn nkon a mu ntáʼmbagə tse kə atom zə tse, á nɨ tsɔʼnɨ aku a ŋwɔn ntəm wu shiʼnɨ wa a lɔnɨ nkwarɨ bən, ntsi bɨŋ bo ɨ kɔʼ kuʼ nkfu za nɨ mɨ nyɛʼtɨ adiʼ məza. 12Ndá tsum za nɨ konɨ ɨwu, á nɨ soŋ ngə́, ‹A mbɔnɨ tsi a mbó bɨŋ ə.› 13Be ngaŋ ndá tsa kwarɨ awən ɨ shiʼnɨ, nɨ tsaʼtɨ a Ŋwi ngə́ á mbɔnɨ tsi a mbó ngaŋ ndá mətsa; lá be bo tú awɨŋ ɨ shiʼnɨ kwarɨ, atsaʼtɨ a mbɔnɨ azən ghɔŋ ayi a mbó bɨŋ ə. 14Be ndá tse kə ntáʼmbagə zɨ tse ton a nkwárɨ́ bən, kə ɨ zuʼ a mbó bən, nɨ lo adiʼ məwa, nkfutɨ abvuŋnɨ a mɨku azən ɨwu ə. 15Ma soŋə a mbó bən tsɛʼ a nkənu ngə́ a Njwi Nɨsáʼ, Ŋwi a lo diʼ akômɨlɨŋnɨ a mbó ɨbɛn bɨ Sodom bo Gomora ɨ keʼ be be a mbó ɨbɛn bɨ ntáʼmbagə məwa!”
Ndɨgə za ɨ Ghɨnɨ Yiŋə
(Mar 13:9-13; Alu 21:12-17)
16“Zuʼnə! Ma tyigə awən lá tso ma tyigɨ mbyindzɨ ngə́ á tsɨ ghɛn nkwatɨ bəngwabaʼ ə. Nɨ tsi nɨ nchyɛ nɨ zóŋ tso mɨnyo ɨ kɨ bɔnɨ tso bɨbvugɨrə-fɨkon ə. 17A nɨ lə ɨtú ɨtsən mbɨ́ʼ ngə́ ɨbɛn ghɨ kótɨ́nə́ awən, ɨ lɔgɨnə awən ɨ ghěn nɨ bən a ngɔʼ abyɛn, ɨ kə́ ləŋnə awən nɨ ngwan a mu ndáŋwi bə Yuda ghe. 18Mbɨ́ʼ atú azan, bɨ ghɨ tɔ́ŋtɨ́nə abyɛn a nye bən a ɨshi bɨta bɨ ɨlaʼ abɔʼnɨ bɨfɔ, á tiʼ mbe abárɨ́ a mbó bən a sóŋ Nkən wu Shiʼnɨ a mbó bo abɔʼnɨ ba a se bə Yuda be. 19Be nɨ shiʼtɨ ntsi a ngɔʼ abyɛn, á nɨ keʼ mbǔʼ ɨnye ɨtsən mbɨ́ʼ anu za nɨ mɨ soŋ kə adzaŋ za nɨ mɨ soŋə; nkfu ghɨ́ ngyen muŋ nɨ mɨ tsi nɨ anu zə soŋə. 20Mbɨ́ʼ ngə́ ɨnu tsa nɨ mɨ soŋ, tsɨ mɨ keʼ ɨtsən be; Azhwi a Ŋwi Ta ɨwən a fɔməbvurə ghɨ ghamnə a ntsǎ a ndzum bɨŋ ə.
21Ɨbɔmbɨma bə mbáŋnɨ́ ghɨ tíntɨ́ ɨbɔmbɨma bə mbáŋnɨ́ ɨ gha á bɨ zhwitɨ, á bɨtarɨ ghɨ ndəŋndəŋ a nye ɨbɔ ɨba; á ɨbɔ bənkɨ awa a nye bɨta ɨba nkɨ ngɨ á bɨ zhwitɨ a bɛrə ghe. 22Ŋwɔn tsum a ghɨ ban awən mbɨ́ʼ atú azə. Lá ŋwɔn tsum wa a chigɨnɨ ntəm ɨ ghɛn kuʼ a ndwitə, bɨ ghɨ loŋ ayi ɛ. 23Be bɨ dɨgɨ awən a mu ntáʼmbagə zɨ tse, nɨ kɨə ngɛn a nye zɨ mɔʼɔ ghe. Ma sóŋə́ awən tsɛʼ a nkənu ngə́ Mɔn Ŋwɔn a mɨ yen bɔŋ á nɨ mɛtɨ ɨfaʼ ɨwən ɨtsum a mu ntáʼmbagə Izrai ɨtsum ə.
24Ka ngyɛʼ a tsa ayi a ndiʼ aŋwaʼnɨ ɨyi; abuʼ a keʼ a tabuʼ ɨyi kɨ ntsaə. 25A kuʼnɨ a mbó ngyɛʼ a mbé tso ndiʼ aŋwaʼnɨ ɨyi, nkɨ mbe ndəŋndəŋ mbáʼ be abuʼ a tsi nɨ mɨtən tso tabuʼ ɨyi ɛ. Be bɨ tɔŋ a tanjwuʼ nɨ Bɛlzɛbu#10:25 Bɛlzɛbu a nɨ ɨkum wu mɔʼɔ wa bɨ tɔ́ŋnə́ a Satan nɨ wɛrə ghe. Ɨ kɨ ndiʼ lá ngə́ ɨfɔ bɨdzɨŋ ə., bɨ ghɨ tɔ́ŋ ɨbɛn bɨ ngwəgɨ za nɨ mɨkum ma mɨ bɨ́gɨ́nɨ́ ntsa lá!”
Ŋwɔn wa o Tsinɨ nɨ Mbɔgə ghe
(Alu 12:2-7)
26“Ma lan, á nɨ keʼ a ŋwɔn mɨsɔŋ a ntsu tse a mbɔ́gə́ ghe. Anu atsum za bɨ bɔmtɨnɨ tɨtsɔŋnɨ, bɨ ghɨ shwirə, anu a nkubə atsum á tiʼ ntsi asaŋəsaŋ ə. 27Anu za ma fɨʼtɨnə a mbó bən a ndzumnɨ nɨ tsi nɨ ɨ zagɨ soŋ a zɛrə a ntɨŋə azhwɨgɨnɨ, anu za nɨ zuʼnɨ a nkubə nɨ tsi nɨ ɨ tiʼə chwítɨ́nə a zɛrə be a mɨtan ə. 28A nɨ keʼ mbɔ́gɨ́ ɨbɛn ba bɨ zhwítɨ́nɨ́ mbəmnye lá nchi keʼ a gharɨ zhwitə; nɨ baŋnɨ mbɔgɨ be a Ŋwi, zɨ wa a chinɨ zhwitɨ mbəmnye bo gharɨ a mu ɨmugɨ nɨnkoŋ ə. 29Bɨ fǐŋ ŋchwaŋə tsi bá lá tsɛʼ nɨ táʼ kaba ghe, lá ka táʼ anchwaŋə a ngvǒ ayi a tɨshe tɨgha Ta ɨwən a fɔməbvurə a zhyɛ. 30A mbó bən, tsɛʼ ɨnyɔŋ atú tsa tsɨ tsinɨ atú bən bɨ kwaʼnə a tsɛrə ɨtsum ə. 31Ma lan, á nɨ keʼ mbɔ́gə́ ghe; ndvuŋ ɨwɨŋ tsi atɨ́ ntsa wu ɨnɔ ŋchwaŋə ghe!”
Ɨsoŋə ngə́ o Nɨŋ Ntəm ɨgho a nye Kristo nɨ ɨ kɨ Ton ayi ɛ
(Alu 12:8-9)
32“Mbɨ́ʼ ngə́ ŋwɔn tsum wa a bemnɨ anu azan asaŋəsaŋ, ma ghɨ kɨ́ bém anu azhi a ɨshi Ta ɨghan a fɔməbvurə ghe. 33Lá be ŋwɔn tse a tón aghan asaŋəsaŋ, ma ghɨ kɨ́ tón ayi a ɨshi Ta ɨghan a fɔməbvurə ghe.”
Yeso a Yiŋə lá be nɨ Azɔŋ nkeʼ Mbɔnɨ be
(Alu 12:51-53; 14:26-27)
34“A nɨ keʼ wiʼtɨ ngə́ ma yen lá a ngɨə á mbɔnɨ tsi a mu mbyi ɛ. Ngáŋ, ma sá yen lá ngə́ á mbɔnɨ chyɛ, ma yén be nɨ ndum ə. 35Ma yén lá a ngɨə á ɨbɔ mbáŋnɨ́ kwənkɨ bo bɨ bɨta ɨba, á ɨbɔ bəngye kwənkɨ bo bɨ bɨmá ɨba, á bəngye bɨ ɨbɔ kwənkɨ bo bɨmabɨŋ ɨba ghe; 36á ngaŋ kɨban ŋwɔn tsɨ tən be ngaŋ ngwəgɨ ɨchi ɛ.
37Ɨbɛn ba bɨ kɔŋnɨ a ta ɨwa kə a nɨmi ɨwa ntsa aghan, bɨ se kuʼnɨ a mbe bɨyɛʼ ɨbə; ɨbɛn ba bɨ kɔŋnɨ a mɔn ɨwa wu mbáŋnɨ́ kə a wu mangye ntsa aghan, bɨ se kuʼnɨ a mbe bɨyɛʼ ɨbə. 38Ŋwɔn tsum wa a se byɛʼ abaŋnɨ-baŋnɨ azhi ndzɔŋ ɨbɨŋ mɨku ɨtsan, a se kuʼnɨ a mbé ngyɛʼ ɨghə. 39Ŋwɔn tsum wa a zhwəŋtɨnɨ a ndoŋ ntsi mbyi ɨzhi, a mɨ byɛgɨ a zɛrə ghe; lá ŋwɔn tsum wa a byɛgɨnɨ ntsi mbyi ɨzhi mbɨ́ʼ atú azan, a mɨ sə́ŋ a zɛrə ghe.”
Mɨkyaŋnɨ ə
(Mar 9:41)
40“Ŋwɔn tsum wa a kwarɨnɨ awɨŋ ɨ shiʼnɨ a kwarɨ lá aghə; ŋwɔn tsum wa a kwarɨnɨ aghan ɨ shiʼnɨ a kwarɨ lá a ŋwɔn wa a tyígɨ́nɨ́ aghə. 41Ŋwɔn tsum wa a kwarɨnɨ ntom Ŋwi ɨ shiʼnɨ mbɨ́ʼ ngə́ a nɨ ntom Ŋwi, a ghɨ kɨ́ tsí nɨ bagɨ mɨkyaŋnɨ mɨ ntom Ŋwi za. Ŋwɔn tsum wa a kwarɨnɨ a ŋwɔn wu shiʼnɨ mbɨ́ʼ ngə́ a nɨ ŋwɔn wu shiʼnɨ a ghɨ kɨ́ tsí nɨ bagɨ mɨkyaŋnɨ mɨ ŋwɔn wu shiʼnɨ wa. 42Nɨ tsi nɨ njiɛ tsɛʼ a nkənu ngə́ ŋwɔn tsum wa a ghanɨ tsɛʼ ndɔ́ŋ nkyi zɨ shwetɨnɨ a mbó táʼ ngyɛʼ ɨghan wen wu tse wa a kɨgɨnɨ ntsa bɨtsum, a ghɨ zagɨ tsi nɨ mɨkyaŋnɨ ɨmyi ɛ.”
Aktualisht i përzgjedhur:
Matyo 10: MNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, CABTAL