TĨĨGI WERE 7
7
Nowe kal ɓi daage no
1Manwur wii Nowe ga : Kal ɓi daage no, nday de jar ni ɓo ɓuy, werga ndi ko ga ndo diŋ je ma de deele pel ɓi yoo jar ma ti kal mani ɓon lam no. 2Hoo wer nàyre ma bay meyeɗe wo doo ɓo jag jag wer renam, ma twar wo de ma twãy ɓe no. Hoo ma de meyeɗen jag boŋ, ma twarn wo de ma twãy ɓe no. 3Hoo weere dweere ma ciŋ wo wer jag jag renam lay, ma twar wo de ma twãy nen maga wer ɓaara mo gwaʼ ciŋ ti tamsir la. 4Werga naw gwaʼ renam, ndi rage baa yaŋ ti sir la nen naw doo naa de síilí doo naa lay. Day ndi caa ge wer fẽẽre maga ndi joŋ ra ciŋ ti sir la mo ɓuy yaŋ go. 5Nowe kal joŋge doo maga Manwur hay wããn ne hẽn no tawtaw keɗed ɓuy no.
6Kiŋgi Nowe hay kiskis hiiraʼa, de maga bii maŋgen joŋ gesiŋ lam no.
7Nowe kal ɓi daagen de weere ɓe wo, de naare weere ɓen wo, ma daŋge go jag bii maŋge no. 8Yoo horog ma bay meyeɗen wo de ma de meyeɗen wo mo kay no, weere dweere wo de fẽẽre ma seɗge de ɓil ti sirn wo ɓuy, 9kal wo wo laage ɓiŋ Nowe ɓi daagen ni, doo maga Manwur hay wããn go ne hẽn nono.
10Naw wo joŋge ge renam blam sen, joŋre bii maŋgen kal yam ngel le ti tamsir so. 11De wur maga kiŋgi Nowe kiskis hiiraʼ, nen few ma de ɓog, wur naw ma de hwal ti renam ɓen, ti wur sen, kããge bii ma ɓi tuu ma kuɗumn ndar wo jag le go ɓuy, jag ngel ma ciŋ kal bulgi le go lay. 12Baa raw rage gesiŋ ti tamsir, naw doo naa de síilí doo naa lay. 13Wur sen, Nowe Sem, Kam wo de Jafed jar ni Nowe wo, wãy mani Nowe no, de naare weere ɓe ma swaʼ wo laa wo ɓi daage no. 14De nàyren wo wer taɗ taɗ ɓuy, de horogn wo wer taɗ taɗ ɓuy, de fẽẽre maga seɗ wo de ɓil ti sir wer taɗ taɗ mo ɓuy, de weere dweere wo wer taɗ taɗ ɓuy, maga pud wo day wo de graŋ ti mono. 15Fẽẽre maga wo de hõõgese, day wo de ɓod egre tenen sug sug ɓuy, laa wo wo ɓiŋ Nowe ni jag jag ɓuy. 16Á laa wo wo ɓiŋ Nowe ni mono wer fẽẽre ma de hõõgesen wo ɓuy, ma twar ma twãy. Blam ɓe Manwur kal tẽg jag ɓe ne hẽn ti.
17Maŋge biin joŋ naw ti tamsir la doo naa. Biin de maŋge, de maŋge de maŋge, hãã maŋ daagen go ciŋ ti tamsiri. 18Biin hob kluu ciŋ ti tamsir la debaŋ, hãã gẽẽ, daagen maŋ go ciŋ ti ɓe ʼwẽẽge ga caw. 19Biin mbe jag yaɗ wer ciŋ ti tamsir doosen lam no. Húulì ma de gẽẽre maga wo wer ngel ma ciŋn lam ɓuy, luɓ wo go. 20Biin maŋ go ciŋ ti húulì wo, hãã daŋ ra wo go ciŋ nen ngaɓ meeder renam. 21Fẽẽre maga hay wo fĩɗ gi gesiŋ lam ɓuy no, weere dweere yawla, horog wo de nàyre wo yawla, fẽẽre maga hay wo de defge gesiŋ mo deŋ la ɓuy, de jar téebeere wo, sen leʼ wo jag go fẽd ɓuy tuu. 22Fẽẽre maga hay wo ɓod egre de hũy fẽd fẽd ga hay wo ti sir ma de heege mo ɓuy huɗ wo go. 23Baa caa wer fẽẽre maga hay wo ciŋ ti sir lam sug sug ɓuy go. À yeɗ wo nen go ti tamsir la. Kal gwaʼge diŋ Nowe wo de maga sen hay wo ɓiŋ ɓe ɓi daagen ni mo tawa tuu. 24Biin hob ge go ciŋ ti tamsir la nen naw kisi, ti ɓe doo dwee.
Aktualisht i përzgjedhur:
TĨĨGI WERE 7: TUP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Tupuri Bible © Bible Society of Cameroon, 2016. All rights reserved.