Pogsiog Nang 8
8
“Yesusag sikne aro seneragtop nimi seklebaik,” aro olamsieka
1-2Stefanus obekpa, tebaogne sembe Saulus awi sembaog. Awi sembaog aghana, yog nimi Allah yubu wali uro saelba ulamek nimi taneko wamekti, Stefanus obeka aneko keyapto so'oag sikekti, o'ona lelem engero wamek.
Stefanus obek sum eneko Stefanus obek nimiri, “Seklebaik,” aro alnibaekti, Yesusag sikne aro winil dalamek nimi tanekoag malia maikno ulamsiek. Malia ulamsiekpa, Yesusag seneragtop nimi as Yerusalem laplobi agha mog so'o Yudeaap Samariaap tala-tala nimi wamekag piekti, a'ero-a'ero wamek. Yesusti wepto pogsiog nang aobare nang taneko mo as Yerusalem wamek. 3Yerusalem wamekpa Saulusti, “Yesusag sikne aro winil dalamang nimi opsinun,” aro ae taneko toman sen-sena elamsiog. Elamsiogti nengaboap kelaboap aeag agha kiliro-kiliro kop aeag tolongolamsiog.
Yesus yubu walinge mog so'o Samaria nimi ambatsieka
4Yesusag sikne aro seneragtop nimi kop aeag tolongolamsiekpa, “Nu Yesusag seneragtop nimi opsiikag,” aro as Yerusalema lambaekti, piekag anekoa nimi tala-tala nimiag yubu walinge Yesus sembe ambarelamsiek. 5Ambarelamsiekti Yerusalema lambaekne nhon Filipus poneko babe mog so'o Samaria as nubunge nhon wamogne nenekoag piog. Nubu as anekoag piogti, Allahri wepto poghol aogne Kristus sembe mog so'o Samaria nimiag ambarelamsiog. 6-7Yubu ambarelamsiogti, Filipusti nimi whingag ulamog nena, “Allah mikibari uanepne el pere agha ulamla,” senenne kekneba ulamog. Phia yonge nimi kulomag ulamsiogne yag lanalamsiogpa, haum alamekti lanalamek. Nimi yan malinge babe, nimi lebe arop kom nimi babe Filipusti wali nenelamsiog. Undo unulamogne kembi agha Samaria nimiri sol wali, wali uro ma'ap tangto ambarelamsiogne ka'elamek. 8Ane sembe as aneko wamek nimi wana awi maikno ulamsiog.
9As aneko nimi nhon sina Simon mema mili lero phalamogne wamog. Samenag agha as anekoag mema phalamogne wamogpa, nimi sisa ni as anekoag wamek nimiri, “Yaghe, mane agha ual,” senelamek. Undo senelamekpa, Simon ponekori, “Na maneagne pone nubunge wamna,” aro ambarelamsiogti, mema mili lero phalamog. 10Mema phalamogha sembe Samaria nimi ologne nubunge ni tanekori seneraglamek nena, “Allah Eldamne mikipne Simon pone kulomag paiamlaba, Simon pone, ‘Mikip Sirikne’,” aro si lelamek. 11Simondi samenag agha hengkun taibuka taubuka ulamogha mema ulamogne kembiag agha Samaria nimi niri, “Yaghe, mane agha ulamla,” senelamek. “Mane agha ulamla,” senena ulamogne sembe eldi yubu ka'ero ulamek. 12Simondi yubu ka'elamek aghana, Filipus mog so'o Samaria yaogti, yubu walinge Allahri mog so'oag nimi saelba uhiroba sembe ambarelamsiogti, “Allahri nimi nhon si Yesus wepto, ‘Mog so'oag nimi taulbahimendi saelbamsululam,’ aro poghol aogne Kristus wamla,” aro Filipusti ambarelamsiog. Ambarelamsiogpa mog so'o Samaria wamek nimi tanekori Filipusti ambarelamsiog yubu ka'elamekti, sikne aro seneraglamek. Nengabo kelabo Samaria wamek nimi sikne aro seneraglamekti, “Filipusti ambarelamsilne saelbaukap,” aro elag yalamekpa, maghag pelengelamsiog. 13Simon poneko babe sikne aro seneraglamogpa, Filipusti maghag pelengkaog. Simon babe sop-sop Filipus nelepto elap nhon pang-yang ulamdek. Pang-yang ulamdekpa, Filipusti ulamogne, “Allah mikibari uanepne el pere agha ulamla” senenne kekneba mikip uro ulamogpa Simondi, “Yaghe, mane agha ulamla,” alamog.
14Yesusti wepto pogsiog nang as Yerusalem wameka ka'elamekpa, “Mog so'o Samaria wamang nimiri Allah yubu ka'elamangdi, sikne aro seneraglamang,” ana ka'ebaekti, Petrusap, Yohanesap wepto sinag pogsiek. 15-17Petrusap Yohanesap anam yan komag, sin Samaria nimina, nu Saelba Uhiropne Yesus siag kekhaekto nenel dalamekne sembe maghag pelengkipsiog. Maghag pelengkipsiog aghana, Allah Eldamne Yame Walinge Samaria nimi nhonag babe pelengel aog kom. Ane sembe Petrusap Yohanesap pogsiekpa, Samaria pirekti, Samaria nimiag sae palilamsirek. Sae palilamsirekti, Allahag molbarelamsirekti, “Andamne Yame Walinge sin Samaria nimi taneag tatsululam,” aro molona molbatsirek.
Wene aro molbarekpa, Allahri Eldamne Yame Walinge sin nongag palilamsiog. 18-19Yesusti wepto pogsiog nangdi nimi nongag sae pipsirekpa, Allahri Eldamne Yame Walinge sin nongag palilamsiogpa, Simon ponekori kembahiog. Kembahiogti Yesusti wepto pogsiog nangag kamna kaptoba payaogti, Simon ponekori yubu lelamogti, “A'undi nimi nongag sae palilamsiromba, Allahri Eldamne Yame Walinge nimi tane nongag palilamsil. A'undi ulamdomne saog uro nari babe uanun. Kamna ane tatsineba, mikipne ane tatnurumunba, nimi nongag nari sae palilamsineba, Allahri Eldamne Yame Walinge nimi nongag palilamsilul,” seog.
20Wene seogpa Petrusti, “Allahri, ‘Mo tatsinun,’ senelamlange nene andina, ‘Kamna kaptoba agha tomnep,’ senelamlam te? Senelamlamne ane sembe anap anenge kamna kaptoba aneap tebalulam! 21Andi wanaag Allahri seneragna sunsunum uro seneraglamlam kom. Ane sembe nuri sae nimi nongag palilamsiapne, olog babe tam andinge tanep kom. 22Andi wanaag malia seneragto ulamlamne lipsimendi, nu Saelba Uhiropneag molona mololamlulam. Elag mololapmenba, eldi malia andi wanaag seneraglamlamne neneko tam wailag nembalul to, kom to. Ane sembe, elag mololamlulam. 23Andi wanaag seneraglamlamne sembe na el tan. Andi wanaag yonge meso pungulamlaba, andi mali-malia ulamlamneri wana sao kauplangkelba ulamlam,” seog.
24Wene seogpa, Simondi sin phendeag yubu lelamogti, “A'undi leptomne nanag taleagti, a'undi na sembe yepto nu Saelba Uhiropne ponekoag molbatnururom,” seog.
25Seogpa wameka, Petrusap Yohanesapti, “Allahri nimi el uro ua unne kekneba Yesus sembe maikno ulamogpa ibubu,” aro sikne lag nenero nu Saelba Uhiropne yubu ambarelamsirekti, as Yerusalem samoro yalamdek. Yalamdekti mog so'o Samaria as maikno wa'iro yubu walinge Yesus sembe ambare-ambare Yerusalem yarek.
Filipusti Yesus sembe tibin nenero Etiopiange nimi nubunge nhon ambarogha
26Petrusap Yohanesap as Yerusalem yarekti wamdekpa, sikinkae Filipus Samaria mog so'oag wamog. Wamogpa nu Saelba Uhiropneri arukna imagne malaikat nhon poghol aogne Filipus Samaria mog so'oag wamoghag piog. Piogti Filipusag yubu lelamogti, “Sekmendi Yerusalem simbik pimendi, ina as Yerusalema as Gaza kuluptop ina waghag pululam. As Yerusalem anabi as Gaza anabiag ina pai aldesag wamlange nene toman pululam,” seog.
27Wene seogpa, Filipus sekom agha piog. Piogti tilamogpa, Etiopiange nhon nimi nubunge yalamog. Mog so'o Etiopia nimi yubu sia lerop kel si Kandake arukna wamogti, Kandake kel eneringe saeagha paiamogne yalamog. El poneko as Yerusalem Allah omekel piogti, samoro yalamog. 28Samoro yalamogti, kereta alibag pukamogpa, pham kudari kiliro payalamog. Kereta alibag pukamogti, mome nhon Yesaya Allahri yubu silimu tiptopneri mome tobog yubu Etiopiangeri eldi saeag saelbamogti, keme-keme yalamog. 29Keme-keme yalamogpa, Allah Yame Walingeri Filipusag, “Elem-elem pimendi, pham kudari kereta kiliro payalamla peramag ane pululam,” seog.
30Wene seogpa, Filipus elem-elem kereta yalamogha peramag piogti ka'elamogpa, Allahri yubu silimu tiptopne Yesayari mome toro pibogne Etiopiangeri kemero lelamogha Filipusti ka'ebaog. Ka'ebaogti, “Nani, yubu leple yalamlam yubu ene wanaag olog seneraglam te?” aro haibaog.
31Haibaogpa nimi nubunge ponekori, “Nimi amoro el nenehin nang orog wamnaba, welaro nari seneragto el tanep?” seog.
Wene seogti Filipusag, “Walelamenba nhon pinunam,” aro molbaogpa, Filipus poneko kereta alibag waelbaogti, Etiopiange peramag pulingkiog.
32Yesayari mome toro pibogne leple yalamogne lilimna ane.
“ ‘Pham domba obukap,’ aro pabirop saog uro el babe pabiek.
Nimiri pham domba hong kareplamangba, pham domba yubu lemna koma ua urop saog uro, el babe yubu koma wamogpa obek.
33El nimiri ali nenero yubu loloro lelamekpa, tam elag taog.
Elag tam pibekne wali uro kemban koma el ya'ag obekpa tebaog. Tebaogne sembe,
nimi nhondi babe, ‘Eldi mabo tane wamang,’ aro lemnep kom,”
aro mome toroba leple yalamog.#Yesaya 53:7-8
34Etiopiange ponekori Filipusag hailamogti, “Nari anag hailangkenne, Allahri yubu silimu tiplamogne poneri etne sembe mome toro paliro lebog? Eldamne sembe to, nimi orange sembe to?” seog.
35Wene aro haibaogpa, Filipusti leple yalamog yubu nenekona, Yesayari mome toro pibog yubu anekoag alnibaogti, yubu walinge Yesus sembe tibin nenero ambare-ambare palamog.
36Wene aro ambare-ambare palamogpa, inaag mag sin wamoghag pirekti, nimi nubunge Etiopiange ponekori Filipusag, “Tiboghae. Mag wamla ane. Nhondi nu iriksiropne orog tanena, andi na maghag pelengkanululam te?” aro haibaog.
[37Wene seogpa Filipusti, “Andi Yesusag sikne aro wanaag to'opto seneraglamlam tanena, maghag pelengkaghenun,” seog.
Wene seogpa, Etiopiange ponekori, “Seneraglamnange, ‘Allahri Elme Yesus wepto poghogpa, Kristus poneko sik uro wamla,’ aro seneraglamna,” seog.] 38Etiopiange poneko eldi arukna kereta pham kudari kiliro payalamogne ponekoag, “Pabitlulam,” seogpa pabog. Pabogpa, “An ane wamlulam,” seogti sin maghag yingkirekti, Filipusti Etiopiange poneko maghag pelengkibog. 39Maghag pelengkibogpa, walel alamoghag agha nu Saelba Uhiropne Yame Walingeri lo'om aro Filipus poa piogpa, Etiopiange ponekori Filipus ibog kom. Ibog komdi, Etiopiange poneko awi sene-sene elengeag sip palamog. 40Palamog aghana, Filipus as Asdod yaog. As anekoag agha, “Yubu walinge Yesus sembe ambarelamsinun,” aro as Kaisarea anabi Asdod anabiag as ni wamekne yubu walinge ambare-ambare palamsiogti, Kaisarea piog.
Aktualisht i përzgjedhur:
Pogsiog Nang 8: kklKOS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 (Active), Wycliffe Bible Translators, Inc. All rights reserved.
Pogsiog Nang 8
8
“Yesusag sikne aro seneragtop nimi seklebaik,” aro olamsieka
1-2Stefanus obekpa, tebaogne sembe Saulus awi sembaog. Awi sembaog aghana, yog nimi Allah yubu wali uro saelba ulamek nimi taneko wamekti, Stefanus obeka aneko keyapto so'oag sikekti, o'ona lelem engero wamek.
Stefanus obek sum eneko Stefanus obek nimiri, “Seklebaik,” aro alnibaekti, Yesusag sikne aro winil dalamek nimi tanekoag malia maikno ulamsiek. Malia ulamsiekpa, Yesusag seneragtop nimi as Yerusalem laplobi agha mog so'o Yudeaap Samariaap tala-tala nimi wamekag piekti, a'ero-a'ero wamek. Yesusti wepto pogsiog nang aobare nang taneko mo as Yerusalem wamek. 3Yerusalem wamekpa Saulusti, “Yesusag sikne aro winil dalamang nimi opsinun,” aro ae taneko toman sen-sena elamsiog. Elamsiogti nengaboap kelaboap aeag agha kiliro-kiliro kop aeag tolongolamsiog.
Yesus yubu walinge mog so'o Samaria nimi ambatsieka
4Yesusag sikne aro seneragtop nimi kop aeag tolongolamsiekpa, “Nu Yesusag seneragtop nimi opsiikag,” aro as Yerusalema lambaekti, piekag anekoa nimi tala-tala nimiag yubu walinge Yesus sembe ambarelamsiek. 5Ambarelamsiekti Yerusalema lambaekne nhon Filipus poneko babe mog so'o Samaria as nubunge nhon wamogne nenekoag piog. Nubu as anekoag piogti, Allahri wepto poghol aogne Kristus sembe mog so'o Samaria nimiag ambarelamsiog. 6-7Yubu ambarelamsiogti, Filipusti nimi whingag ulamog nena, “Allah mikibari uanepne el pere agha ulamla,” senenne kekneba ulamog. Phia yonge nimi kulomag ulamsiogne yag lanalamsiogpa, haum alamekti lanalamek. Nimi yan malinge babe, nimi lebe arop kom nimi babe Filipusti wali nenelamsiog. Undo unulamogne kembi agha Samaria nimiri sol wali, wali uro ma'ap tangto ambarelamsiogne ka'elamek. 8Ane sembe as aneko wamek nimi wana awi maikno ulamsiog.
9As aneko nimi nhon sina Simon mema mili lero phalamogne wamog. Samenag agha as anekoag mema phalamogne wamogpa, nimi sisa ni as anekoag wamek nimiri, “Yaghe, mane agha ual,” senelamek. Undo senelamekpa, Simon ponekori, “Na maneagne pone nubunge wamna,” aro ambarelamsiogti, mema mili lero phalamog. 10Mema phalamogha sembe Samaria nimi ologne nubunge ni tanekori seneraglamek nena, “Allah Eldamne mikipne Simon pone kulomag paiamlaba, Simon pone, ‘Mikip Sirikne’,” aro si lelamek. 11Simondi samenag agha hengkun taibuka taubuka ulamogha mema ulamogne kembiag agha Samaria nimi niri, “Yaghe, mane agha ulamla,” senelamek. “Mane agha ulamla,” senena ulamogne sembe eldi yubu ka'ero ulamek. 12Simondi yubu ka'elamek aghana, Filipus mog so'o Samaria yaogti, yubu walinge Allahri mog so'oag nimi saelba uhiroba sembe ambarelamsiogti, “Allahri nimi nhon si Yesus wepto, ‘Mog so'oag nimi taulbahimendi saelbamsululam,’ aro poghol aogne Kristus wamla,” aro Filipusti ambarelamsiog. Ambarelamsiogpa mog so'o Samaria wamek nimi tanekori Filipusti ambarelamsiog yubu ka'elamekti, sikne aro seneraglamek. Nengabo kelabo Samaria wamek nimi sikne aro seneraglamekti, “Filipusti ambarelamsilne saelbaukap,” aro elag yalamekpa, maghag pelengelamsiog. 13Simon poneko babe sikne aro seneraglamogpa, Filipusti maghag pelengkaog. Simon babe sop-sop Filipus nelepto elap nhon pang-yang ulamdek. Pang-yang ulamdekpa, Filipusti ulamogne, “Allah mikibari uanepne el pere agha ulamla” senenne kekneba mikip uro ulamogpa Simondi, “Yaghe, mane agha ulamla,” alamog.
14Yesusti wepto pogsiog nang as Yerusalem wameka ka'elamekpa, “Mog so'o Samaria wamang nimiri Allah yubu ka'elamangdi, sikne aro seneraglamang,” ana ka'ebaekti, Petrusap, Yohanesap wepto sinag pogsiek. 15-17Petrusap Yohanesap anam yan komag, sin Samaria nimina, nu Saelba Uhiropne Yesus siag kekhaekto nenel dalamekne sembe maghag pelengkipsiog. Maghag pelengkipsiog aghana, Allah Eldamne Yame Walinge Samaria nimi nhonag babe pelengel aog kom. Ane sembe Petrusap Yohanesap pogsiekpa, Samaria pirekti, Samaria nimiag sae palilamsirek. Sae palilamsirekti, Allahag molbarelamsirekti, “Andamne Yame Walinge sin Samaria nimi taneag tatsululam,” aro molona molbatsirek.
Wene aro molbarekpa, Allahri Eldamne Yame Walinge sin nongag palilamsiog. 18-19Yesusti wepto pogsiog nangdi nimi nongag sae pipsirekpa, Allahri Eldamne Yame Walinge sin nongag palilamsiogpa, Simon ponekori kembahiog. Kembahiogti Yesusti wepto pogsiog nangag kamna kaptoba payaogti, Simon ponekori yubu lelamogti, “A'undi nimi nongag sae palilamsiromba, Allahri Eldamne Yame Walinge nimi tane nongag palilamsil. A'undi ulamdomne saog uro nari babe uanun. Kamna ane tatsineba, mikipne ane tatnurumunba, nimi nongag nari sae palilamsineba, Allahri Eldamne Yame Walinge nimi nongag palilamsilul,” seog.
20Wene seogpa Petrusti, “Allahri, ‘Mo tatsinun,’ senelamlange nene andina, ‘Kamna kaptoba agha tomnep,’ senelamlam te? Senelamlamne ane sembe anap anenge kamna kaptoba aneap tebalulam! 21Andi wanaag Allahri seneragna sunsunum uro seneraglamlam kom. Ane sembe nuri sae nimi nongag palilamsiapne, olog babe tam andinge tanep kom. 22Andi wanaag malia seneragto ulamlamne lipsimendi, nu Saelba Uhiropneag molona mololamlulam. Elag mololapmenba, eldi malia andi wanaag seneraglamlamne neneko tam wailag nembalul to, kom to. Ane sembe, elag mololamlulam. 23Andi wanaag seneraglamlamne sembe na el tan. Andi wanaag yonge meso pungulamlaba, andi mali-malia ulamlamneri wana sao kauplangkelba ulamlam,” seog.
24Wene seogpa, Simondi sin phendeag yubu lelamogti, “A'undi leptomne nanag taleagti, a'undi na sembe yepto nu Saelba Uhiropne ponekoag molbatnururom,” seog.
25Seogpa wameka, Petrusap Yohanesapti, “Allahri nimi el uro ua unne kekneba Yesus sembe maikno ulamogpa ibubu,” aro sikne lag nenero nu Saelba Uhiropne yubu ambarelamsirekti, as Yerusalem samoro yalamdek. Yalamdekti mog so'o Samaria as maikno wa'iro yubu walinge Yesus sembe ambare-ambare Yerusalem yarek.
Filipusti Yesus sembe tibin nenero Etiopiange nimi nubunge nhon ambarogha
26Petrusap Yohanesap as Yerusalem yarekti wamdekpa, sikinkae Filipus Samaria mog so'oag wamog. Wamogpa nu Saelba Uhiropneri arukna imagne malaikat nhon poghol aogne Filipus Samaria mog so'oag wamoghag piog. Piogti Filipusag yubu lelamogti, “Sekmendi Yerusalem simbik pimendi, ina as Yerusalema as Gaza kuluptop ina waghag pululam. As Yerusalem anabi as Gaza anabiag ina pai aldesag wamlange nene toman pululam,” seog.
27Wene seogpa, Filipus sekom agha piog. Piogti tilamogpa, Etiopiange nhon nimi nubunge yalamog. Mog so'o Etiopia nimi yubu sia lerop kel si Kandake arukna wamogti, Kandake kel eneringe saeagha paiamogne yalamog. El poneko as Yerusalem Allah omekel piogti, samoro yalamog. 28Samoro yalamogti, kereta alibag pukamogpa, pham kudari kiliro payalamog. Kereta alibag pukamogti, mome nhon Yesaya Allahri yubu silimu tiptopneri mome tobog yubu Etiopiangeri eldi saeag saelbamogti, keme-keme yalamog. 29Keme-keme yalamogpa, Allah Yame Walingeri Filipusag, “Elem-elem pimendi, pham kudari kereta kiliro payalamla peramag ane pululam,” seog.
30Wene seogpa, Filipus elem-elem kereta yalamogha peramag piogti ka'elamogpa, Allahri yubu silimu tiptopne Yesayari mome toro pibogne Etiopiangeri kemero lelamogha Filipusti ka'ebaog. Ka'ebaogti, “Nani, yubu leple yalamlam yubu ene wanaag olog seneraglam te?” aro haibaog.
31Haibaogpa nimi nubunge ponekori, “Nimi amoro el nenehin nang orog wamnaba, welaro nari seneragto el tanep?” seog.
Wene seogti Filipusag, “Walelamenba nhon pinunam,” aro molbaogpa, Filipus poneko kereta alibag waelbaogti, Etiopiange peramag pulingkiog.
32Yesayari mome toro pibogne leple yalamogne lilimna ane.
“ ‘Pham domba obukap,’ aro pabirop saog uro el babe pabiek.
Nimiri pham domba hong kareplamangba, pham domba yubu lemna koma ua urop saog uro, el babe yubu koma wamogpa obek.
33El nimiri ali nenero yubu loloro lelamekpa, tam elag taog.
Elag tam pibekne wali uro kemban koma el ya'ag obekpa tebaog. Tebaogne sembe,
nimi nhondi babe, ‘Eldi mabo tane wamang,’ aro lemnep kom,”
aro mome toroba leple yalamog.#Yesaya 53:7-8
34Etiopiange ponekori Filipusag hailamogti, “Nari anag hailangkenne, Allahri yubu silimu tiplamogne poneri etne sembe mome toro paliro lebog? Eldamne sembe to, nimi orange sembe to?” seog.
35Wene aro haibaogpa, Filipusti leple yalamog yubu nenekona, Yesayari mome toro pibog yubu anekoag alnibaogti, yubu walinge Yesus sembe tibin nenero ambare-ambare palamog.
36Wene aro ambare-ambare palamogpa, inaag mag sin wamoghag pirekti, nimi nubunge Etiopiange ponekori Filipusag, “Tiboghae. Mag wamla ane. Nhondi nu iriksiropne orog tanena, andi na maghag pelengkanululam te?” aro haibaog.
[37Wene seogpa Filipusti, “Andi Yesusag sikne aro wanaag to'opto seneraglamlam tanena, maghag pelengkaghenun,” seog.
Wene seogpa, Etiopiange ponekori, “Seneraglamnange, ‘Allahri Elme Yesus wepto poghogpa, Kristus poneko sik uro wamla,’ aro seneraglamna,” seog.] 38Etiopiange poneko eldi arukna kereta pham kudari kiliro payalamogne ponekoag, “Pabitlulam,” seogpa pabog. Pabogpa, “An ane wamlulam,” seogti sin maghag yingkirekti, Filipusti Etiopiange poneko maghag pelengkibog. 39Maghag pelengkibogpa, walel alamoghag agha nu Saelba Uhiropne Yame Walingeri lo'om aro Filipus poa piogpa, Etiopiange ponekori Filipus ibog kom. Ibog komdi, Etiopiange poneko awi sene-sene elengeag sip palamog. 40Palamog aghana, Filipus as Asdod yaog. As anekoag agha, “Yubu walinge Yesus sembe ambarelamsinun,” aro as Kaisarea anabi Asdod anabiag as ni wamekne yubu walinge ambare-ambare palamsiogti, Kaisarea piog.
Aktualisht i përzgjedhur:
:
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 (Active), Wycliffe Bible Translators, Inc. All rights reserved.