Lukas 23
23
Yesus salero Pilatus whingag pabieka
(Matius 27:1-2,11-14; Markus 15:1-5; Yohanes 18:28-38)
1Nimi ni wamek nimi taneko ni sekekti, Yesus poa Pilatus whingag poa piek. 2Poa piekti, aneko Yesusag lolorop yubu lolol wa'alamek. Yubu lelamekti, “Nimi eneri nu Yahudi nimiag ka'eseptanep ina ambarelamsioa ka'elamobori ibobo. Eldi lelamonge ka'ebabongena, ‘Yubu sia leropne Kaisar kipnange sembe kamna pogto tatseng kom,’ aro ambarelamsioba ibobo. Eldamne sembe, ‘Na Kristus Allahri, “Saelbamsululam,” aro wepto pogneogne yubu sia lenne wamna,’ alamoa ka'ebabo,” aro lolomna yubu lololamek.
3Wene seekne sembe Pilatusti Yesusag hailamogti, “Anna Yahudi nimi sembe yubu sia lenne poneko te?” seog.
Wene aro haibaogpa, Yesusti samoro, “Andi leplamne pone wamna,” seog.
4Wene aro Yesusag haibaogti, ka'ebaogti nen memnang Allah sembe palirop nang sikini yaboap nikag wamek nimi maikno tanekoag Pilatus ponekori yubu lelamogti, “Nari nimi eneag tam piplomne kembanagna, olog imna kom. Elag ikinne pelengkanep nena orog,” aro wene seog.
5Wene seog aghana, sindi yubu lelamekti, “Eldi Galilea so'oag agha alniro ambarelamsiogti, wene tane babe yingkina nu Yahudi nimi mog so'o Yudea wamap nimi wana aluktop yubu yangaro suknulamsil,” aro Pilatusag lolorop yubu mikip uro ambarelamek.
Yesus Herodes whingag poa pieka
6Pilatus ponekori ka'ebaogti, nimi tanekoag, “Nimi ene Galileange te?” aro haibahiog.
7Wene aro haibahiogpa, nimiri elag, “Sik el Galileange,” aro ambarekpa, Pilatus ponekori ka'ebaogti, “Herodes ponekori mog so'o Galilea saelbamla,” aro seneraglamog. “Yesusna Herodes yubu sia leropneri saelbamlange so'oagne wamlaba, Herodes wene as Yerusalem yao,” aro el taogti Pilatusti, “Wene Herodes wamlaag poa pululom,” aro ambatsiog.
8Yesus Herodesag poa piekpa, Yesus ibogti, Herodes yeng sirik uaog. Yeng sirik uaog nena, Yesus sembe nimiri maikno yubu lelamekne ka'elamogti, Herodesti babe, “Memne mikibari uanepne kekneba nhon Yesusti uahoba, haingdi ipsene,” senelamog. “Kekneba ipsene,” senelamogpa Yesus poa yaekpa, yeng sirik uaog. 9Yesus Herodes whingag wamogpa, Herodesti Yesusag maiknoro haibaog aghana, haibaogne sembe Yesusti samoro yubu lebog kom. 10Herodes ponekori undo hailamog abeneko pere memnang Allah sembe palirop nang sikini yaboap, Musari yubu amohirop nangap taneko sekamekti, “Nimi eneri undo-undo unulamo,” aro lolorop yubu yo uro lelamek.
11Wene alamekpa Herodesap, el umag yin salero wamek nang tanekoapti Yesusag yubu neplamekti, ali nenero san tiliplamek. Undo unulamekti, “Elag og sobaukap,” aro nimi nubunangdi enektop ag Yesus nongag enekongkia Pilatusag nen samoro poghekpa, poa piek.
12Samenag Pilatusap Herodesap sin mamun aisa nenep tangka ul dalamdek aghana, sum eneko sum sin mamun, “Nangkae,” aro ma'ap tarek.
“Yesus tebalul,” aro tam karepto pibeka
(Matius 27:15-26; Markus 15:6-15; Yohanes 18:39—19:16)
13Pilatusti memnang Allah sembe palirop nang sikini yaboap, Yahudi nimi saelba uhirop nang sikini yaboap, Yahudi nimi yogneap poloro wimbitsiog. 14Poloro wimbitsiogti, yubu ambarelamsiogti, “A'undi nimi ene nanag payalomdi ambarelamnelomdi, ‘Nimi eneri, “Mo sekukap,” aro ekel ina pabihirop yubu ambarelamsil,’ aro ambatnelom. Wene aro ambatnelom aghana, nari a'undi whingag haibandi, tam nene lelekto kemero karebanag agha eldi tam yonge unne olog imna kom. 15Herodesti babe elag haibalneag agha malinge ipla kom. Ipla komdi, ‘Nen samoro pabululom,’ selba nunag samoro poa yaang. A'undam nimiri haingdi imnep nena, eldi ua ulamlange kembi agha, ‘El ya'ag tebalul,’ aro tam karepto omnepne sunsunum kom. 16Ane sembe naringe yin salerop nang na umag wamang nangag arukahineba, taeplam-taeplam lobik tanena, sae limneba pilul,” aro ambatsiog. 17Wamek sum eneko, Yahudi nimiri ik saekpare kwaneng roti walerop komne telamek. Telamek ko'o enekoag mog so'o saelba uropne ponekori sin nimi tanekoag haing sae kauptopne nhon sae lobatsinepneog wamog. 18Pilatus ponekori, “Sae limneba pilul,” seog aghana, nimi wamek nimi tanekori yubu nikne haum aro yubu lelamekti, “Yesusna kom nembae! Barabas nu sembe sae lobatsululam!” aro haum alamek. 19“Sae lobatsululam,” seek nimi Barabas nimi enekona, “Roma nimi umag wamukap komdi, mo sekukap,” aro as Yerusalem wamek nimi suknubahiogti, nimi ya'ag opsiog. Barabas ponekori nimi opsiogpa, Roma nimiri el salero haing sae kaupto kop aeag tobongkibek.
20Pilatusti, “Yesus sae lipsene,” aro nen nimi maikno tanekoag yubu lebog aghana, 21nimi tanekori yubu mikip uro samoro haum alamekti, “Kom! Kalag sipto oplulam! Kalag sipto oplulam!” aro haum alamek.
22Wene aro haum alamekpa, Pilatusti ik wilindipne sinag yubu lelamogti, “Wene alamlom aghana sa'a sembe? Nimi eneri malinge huropne uaoba, kalag sipto omnun? Nari elag haibandi, tam lelekto kembanag agha elag, ‘Ya'ag tebalul,’ aro yubu karepto tininne sunsunum uropne imna kom. Ane sembe, na umag yin salerop nangag arukahineba, taeplam-taeplam lobik tanena, sae limneba pilul,” aro ambatsiog.
23-24Wene aro ambatsiog aghana, sindi nen sap sarikto yubu mikip uro haum alamekti, “Yesus kalag sipto oplulam,” aro sarikto haum alamek. Sindi sarikto yubu mikip uro, “Kalag sipto oplulam,” alamekneag agha, Pilatusti sindi lelamek yubu sunsunum uro, “Kalag sipto obukap,” aro tam karebaog. 25El haing sae kaupto kop aeag tobongkiamek nimi eneko nimi ohiropne, “Mo sekukap,” aro uropne eneko sae lobatsiog. Aghana Yesusna, “Sinba sindi senenne uaukang,” aro Yesus sin saeag nembaog.
Yesus kalag sipto olobeka
(Matius 27:32-44; Markus 15:21-32; Yohanes 19:17-27)
26“Kalag sipto obukap,” aro inaag poa palamekti, yin salerop nang tanekori nimi nhonag, “Sipnep kal ane poplulam,” aro pobirek. Sindi elag pobirek nimi eneko sina Simon ponekoag kal pobirek. Simon pone as Kirene agha as Yerusalem yalamogpa yobekti, “Kal ane Yesusag nelepto poplulam,” aro yubu mikip uro arukaek. 27Nimi maikno babe Yesus amik palamek. El amik palamek nimi anabiagna, kelabo etpare babe elag nelepto palamekti, Yesus sembe mantuk-tuka engero palamek. 28Mantuk-tuka engero palamekpa, Yesusti tangom agha kembahiogti, yubu lelamogti, “Yerusalem kelabo, na sembe engkaneheng kom. A'undang kelabo sembe engep tamundi, a'un mabo sembe engkahilulom. 29Amik a'un Yerusalem nimi maiknoro seklebanepne sembe a'un nimi agha yubu lelapmundi, ‘Kelabo me maum tinil torop kom kelaboap, ibili tangtop kelaboap, me mangaroan komdi maum tinihirop kom kelabo awi uro wali wamang,’ sululom. 30Sum eneko sum agha
nimiri yubu lelamikti, ‘Main aneko nunag timbahori niknilahiso,’ alamukang.
Yim kongtenag mololamikti, ‘Sopto nu niknibahi,’ alamukang.#Hosea 10:8
31A'undam nimi sembe engep talulom sen nena, na wene kamag urop kal saog wamnari, walia ulamna aghana, nimiri nanag undo olamneang. Undop pagha tanena, a'un Yahudi nimi ul tangtop kal saog wamlom nimiag hulamukang?” seog.
32Wene seogpa, palameka aneko nimi phende babe yoaba ulamdek nimi, “Yesusap nikag kalag sipto opsukap,” aro poa pihiek. 33Poa palamsiekti, “Nimi Usog Ya'ol,” aro engerobag aneko poa piekti, Yesus kal nusamag kal anekoag pakuri siplobekti, yoaba ulamdek nimi abeneko nhon sae sirik sip, nhon sae waneng sip kalag siplopsiek. 34Kalag siplopsiekpa, Yesusti Allahag molona mololamogti, “Nai, sindi nanag ulamneangne nene ekondi ulamneangbana, sinag tam pimna koma wailag nembalulam,” aro Allahag molbatsiog. Molbatsiogpa Yesusti nongag enektoba kwiripto tobeka tanekona, sin nimi tanekori, “Yesusti nongag enektop ag pogtaukap aro kekneba toboghabeba, po'obale nimi enekori toro alul,” aro kekneba toboglamek.
35Nimi maikno aneko wamekti, sindi Yesusag ulamekne ni kemelamsiek. Kemelamsiekpa Yahudi nang saelba ulamsiek nang tanekori babe yubu nepto lelamekti, “Eldi nimi orange wali nenelamsil. El sik uro Allahri wepto poghogne Kristus pone wamla tanena, hae wene babe eldamne wali nenep tale,” aro wene alamekti yubu neplamek.
36Yin salerop nang tanekori babe yubu neplamekti, sindi mag anggur wana lolterop mag sekne, “Mag tululam,” aro mo'olamek. 37Anggur mag sekne mo'olamekti, yubu lelamekti, “An Yahudi nimi sembe yubu sia lenne wamlam pagha tanena, wali nenep talulam!” alamek.
38Yesus usoghag sip yubu kalag sipto mome toro pibek nena, “Nimi ene Yahudi nimi sembe yubu sia leropne wamla,” aro mome tobekti, kalag sipto pibek.
39Nimi phenderi yoaba ulamdek nimi Yesusap nhon kalag siplopsiek nimi nhondi Yesusag san tilipto lelamogti, “An Allahri wepto pogkeogne Kristus wamlam kom te? Wali nenep tamendi, nu babe taulbahilulam,” aro Yesusag san tiliplamog.
40Yesusag wene seogpa, elkae tara sip siplobekne ponekori elkaeag samoro yubu lelamogti, “An Allah sembe log kom te? Sindi elag, ‘Tebalulam,’ aro tam pelengero pibongne saog uro anag babe timbao. 41Nunag, ‘Tebarurom,’ aro tam pelengero pibongne, nundam nimiri uanomonge sembe tam porog uro karebi agha nunag tam pelengero pibong. Ot el poneag timbaongena, eldi malia uan kom aghana, elag timbao,” aro sae tara sip kalag siplobek nimi enekori elkaeag ambarog.
42Wene seogti, Yesusag molona mololamogti, “Yesus, andi alniro nimi saelba ulamsimen sum eneko, na sembe ekon tan koma yepnululam,” aro wene seog.
43Wene seogpa Yesusti, “Anag yubu sikne agha ambatnuaghen! Sumene agha olog usa anap nanap Allahri mog so'o walingeag nikag wamnunam,” seog.
Yesus tebaogha
(Matius 27:45-56; Markus 15:33-41; Yohanes 19:28-30)
44-45Heng ik mol-mol seogti, siro turu alamog abeneko heng sanubom seogti, ae iniplobog. Allahri Mem Ae lomag ag nubunge ina siramag siliplengkibek wilniroba nhon wamog. Yesus kalag wamogpa, ae iniplobogpa, ae lom wilnirop ag siliplengerop ag aneko serero payangkaogti, phende taog. Ae iniplobogpa, wamek mog so'o eneko ni iniplobogha heng ko'o wilindi piog. Heng ko'o wilindi palamogha kekman heng taolbaogti, ae sin taog. 46Ae sin taogpa, Yesus yubu haum aro yubu lelamogti, “Nai, nari hain yameap an saeag pail dalamna,” seog.
Wene seogti, hain kom taog.
47Yesusti wene seogti, hain kom taog abeneko yin salerop nang sikindo nhon wamogti, ni uro yabiogne kembi agha Allah omeklamogti, “Nimi ene sik uro wana porogne wamla,” seog.
48Nimi maikno keme longolaek nimi tanekori ni uro yabiogne haingdi ibekti, “Yaghe,” senelamekti wana ikin uro saramag optangto anekoa palamek. 49Yesus tebaog abeneko sin samen Yesusap nimi pali el wamek nimiap, kelabo mog so'o Galilea agha Yesusag nelepto palamek kelabo tanekoap, weag agha sekamekti ni uro yabiogne tiboghamek.
Yesus kirik hogtoba lomag pail piogha
(Matius 27:57-61; Markus 15:42-47; Yohanes 19:38-42)
50-51Yesus tebaog sum eneko nimi nhon si Yusup as Arimateange Yudea so'oag wamog as agha yingkiropne wamog. Yusup ponekori wana awi uro, “Allahri nimi mog so'oag nimi saelba ulamsilula ipsene,” aro nang-nangalamog. El babe Yahudi nimi sembe tam lelekto kemerop nimi Mahkamah Agama nimi nhon wamogti, el wana porogne walia ulamogne wamog. Yusup poneko Mahkamah Agama nimi nhon wamog aghana, elkabo Yahudi nimi tam lelekto kemero kareptop nimiri, “Yesus obukap,” aro karebaekti, oro ulamekne sembe Yusup poneko saekag wamog kom. 52Yusup poneko nimi nubunge Pilatusag piogti, “Yesus nong teptoba aneko tatnemenba o'obanun,” aro molol piog. 53Molol piogti, Yesus nong teptoba kalag sipto obeka aneko pelengkia nimi teptoba kelepsirop ag walinge agha kelebaog. Kelebongkia kirik lom hogtobaag pail piog. Kirik lom hogtoba anekona, nimi teptoba nhon babe samenag agha paiamek kom kirik lom hogtobaag pail piog. 54Pail piog sum eneko Yahudi nimi niri, “Inibaleba ik nhon sum ningki tektek papto wameberi, Allah yubu lebukap,” aro menekna togtop sum agha Yesus tebaogpa, tektek paptop sum Sabat sum tanuaogpa, kirik lom hogtobaag pail piog.
55Kelabo Galilea so'oag agha Yesusag nelepto yaek kelabo tanekori Yusup nelepto palamekti, Yesus kirik lom hogtobaag pibogha babe, eldi Yesus nong teptoba wirikil wa'iogne babe sindi tiboghaek. 56Tiboghaekti kelabo taneko piekti, “Yesus nong teptoba song taleagti, nong alip toman song wali neneroba pibeberi, song wali maghap ikukap,” aro wero palilamek. Wero palilamek aghana, ae imbaog abeneko pere Yahudi nimi tektek paptop sum Sabat sum taogpa, kelabo tanekori, “Allahri aruksirop yubu sunsunum uro uaukap,” aro tektek papto ulamek.
Aktualisht i përzgjedhur:
Lukas 23: kklKOS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 (Active), Wycliffe Bible Translators, Inc. All rights reserved.