Juan 4
4
Awĩwu Samaritana ika Jesúski dukudi
1 Fariseowawe dikadiwu Jesús auxũ tapibiswu ichawuwaiwawe naskatari atu bautizawaitu yurawu ichapa. Juanna ichapaba idi. 2Naskaweke Jesúspa atu bautizawadiba. Auxũ tapibiswawe atu bautizawadiwu. 3Naa dikai Jesús auxũ tapibiswuwe bai Judea aduax bai Galilea adu wudiwu. 4Judea bai aduax Galilea adu kakĩ Jesúspa Samaria winuwaĩdi. 5Naskata Samaria adu Jesús dukudi. Nadu na pexe ichapa awẽ ade Sicar adu dukudi. Nadu chaibashta Jacobpa awẽ bai ipaudi. Naa bai Jacobpa awẽ wake José inadiadu 6naduri Jacobpa pozo wadi naa kidi meradua ede wiixikĩ. Nadu Jesús dukudi. Chaikiduax uax xukenai Jesús nadu tsaudi mananawari.
7-8Jesús tedeaidu auxũ tapibiswawe pexe ichapadua peiuxũ piti witadiwu. Ma wuawudu nadu awĩwu samaritana aki dukudi ede wiiyui. Ede witi keseme Jesús tsauwadu aki dukudi. Naskaxu Jesúspa awĩwu yuidi: “Ea ede wexuwe ẽ ayanu”, wadi. 9Judíowuwe samaritanowu ũikaspananapaudiwu. Atuweta pibiswuba ipaudiwu. Naskake na awĩwawe Jesús yuidi: “Mi judío. Ẽ samaritana. Aweskakĩ mi: ‘Ea ede wexuwe’, mi ea waime”, waitu. 10Jesúspa kebadi: “Diospa bia inapaiyai mi tapiaba. Mi eari tapiaba. Mi ea ñukaitu ẽ bia ede shara inatiru. Ene shara yurawu ibapaketiru”, Jesúspa wadi. 11Naskawaitu awĩwawe Jesús kebadi: “Diaiwũ mi awayaba ede pozo uke merakui mi wipana. Wania mi ede wiime na duku ibapaketiru mi ea yuiyai keskara”, awĩwawe wadi. 12Naskata ana awĩwawe yuidi: “Nuku xidi Jacobpa da pozo duku inawaĩdi. Naaturi ayapaudi. Awẽ wakewaweri ayapaudiwu. Atũ idawuri ayabapaudiwu. Nuku xidi Jacob mi winuame”, awĩwawe wadi. 13Naskaitu Jesúspa kebadi: “Da ede pozo meradua ayax chipu awiana ma dubi. 14Na ede ẽ batu inai ayax ana ma dubidakaba. Naa ede bai meradua tsekeyai keskara ayax ma dadakaba”, Jesúspa wadi.
15Naskawaitu awĩwawe kebadi: “Diaiwũ, naa ede shara ea inawe ayax ana ẽ dubiyabanu ẽ awiana dudua ede wiyabanu”, wadi. 16Naskaxu Jesúspa yuidi: “Mewẽ wede iwitawe dudu”, waitu. 17Awĩwawe kebadi: “Ẽẽkai wedeyaba”. Jesúspa kebadi: “Ikũ. Mi chaniba. Miikai wedeyaba. 18Mi cinco wedeyabis datiã bewe ika mewẽ wedeba. Ikũkui na mi yuiyai”, Jesúspa wadi. 19Naskawaitu dikakĩ awĩwawe kebadi: “Diaiwũ iskaratiã ma ẽ bia tapia mi Dios tsai atu yuibis. 20Nuku xidi samaritanowawe da bachi aduxu Dios kiwĩpaudiwu. Mewẽ kaiwuu judíowawe: ‘Jerusalén aduxu nu Dios kiwĩtiru’, ibiswu”, awĩwawe wadi. 21Jesúspa kebadi: “Ẽ bia yuinu ea ikũira wawe. Chipu iixiwi da bachi wisti aduxu ma Dios kiwĩtiruba. Jerusalén wisti aduxuri ma Dios kiwĩtiruba. Wanira wetsa aduxu yurã Dios kiwĩtiru. 22Ma tapiaba tsua ma ikũira waimaiki. Ma nu tapibis na nu ikũira wai. Judíowu uduax Rawanaibis uuxiwi. 23Awetiãra nu Dios duikuikĩ awẽ Espíritu Santo wistichi duku tapibatiru ikũkui nu duinu. Awẽ Espíritu Santouxũ nu Epa Dios duikuiyaitu naskara Diospa dui. 24Epa Dios Espíritu. Naa ikũira wakakĩ Espíritu Santouxũ ikũira watiruwu”.
25Naskawaitu awĩwawe kebadi: “Ẽ tapia na Diospa nichixiwi awẽ ade Mesías. Naatu awarawu duku tapibaxiwi”, waitu. 26Jesúspa yuidi: “Naa ẽ. Na bewe tsaiki”, wadi. 27Naskata Jesús awĩwuwe tsaikaidu auxũ tapibiswu wediwu. Wekaxu uĩyawu Jesús awĩwu samaritanawe tsaikaitu uĩkadi peesidiwuba. Naskake tsuã ñukadiba: “Awa mi yuime. Aweskai awĩwuwe mi tsaikime”, wadiwuba.
28Naskata na awĩwu awẽ ruwe kiti putawaĩdi pexe ichapa adu kakĩ. Awẽ yurawu yuidi: 29“Ẽ awarawu yuiyaitu ea kayakawikui yuiwua na ẽ ibiswu. Naaraiki Cristo. Uĩ wukawe”, atu wadi. 30Na dikakata pexe ichapaduax Jesúski wediwu.
31Ma awĩwu kaadu auxũ tapibiswawe Jesús yuidiwu: “Maestrõ piwe”, wadiwu. 32Jesúspa atu yuidi: “Na ẽ piyai ma tapiaba”, 33Atu askawaitu dikakadi awirasi yuinadiwu: “Tsuã piti iname”, idiwu. 34Naskata Jesúspa atu yuidi: “Ewẽ Epa Diospa ea nichidi ẽ awẽ yudu shara ea abapaiyai keskara yuduxunu. Naa ẽ piyai keskara”, Jesúspa atu wadi. 35Jesúspa atu yuidi: “ ‘Cuatro uxe iyuaba. Nu wibi wipana’, ma ibis. Naskariwi akĩ ma shinaime: ‘Nu yurawu Diospa tsai yuiyadu chipu ikũira waaxikadi’, ma shinaime. Ẽ batu yui. Naatiiwixu uĩkawe. Ma iskaratiã itipinisharakuiyawu Dios Diaiwuwaaxikakĩ”, atu wadi. 36“Na xiki wiatu pei witiru. Na xiki wia naa ipadaka. Na wadai idibata na xiki wiyairi. Na rawe idibatiruwu. 37Na ẽ yuiyai ikũkui: ‘Wetsã xiki wadadu chipu wetsã witiru’. 38Ẽ batu nichi matu yuduyabaweke ma witanu. Na wadabiswawe wiawubadu ma wia”, Jesúspa atu wadi.
39“Ea uĩyabawibixakĩ na ẽ yuiyai kayakawikui ea yuiwua”, awĩwu ikaitu pexe ichapa Samaria adu ikawawe Jesús ikũira wadiwu. 40Naskata na awĩwu dikakadax Jesúski wediwu awẽ tsai dikakadi. Aki dukuxu yuidiwu: “Duwe dudu iyuwe”, wadiwu. Naskawaiwudu dikata Jesús samaritanowuwe uxarawedi. 41Awẽ tsai dikakaxu yura ichapatu ikũira wadiwu. 42Yurawawe awĩwu yuidiwu: “Na mia duku yuiya a wisti nu ikũira waiba. Nuyakui ma nu uĩya ma nu dikata awẽ tsai. Na ikũkui duku uduax Rawanaibis”.
Diaiwawe wake Jesúspa kayawadi
43Samaria adu Jesús uxarawedi. Naskata Galilea kadi. 44Naskata Jesúspa atu yuidi: “Ẽ batu yui: ‘Na Dios udua yuibiswawe atũ bai adu wukaxu atu yuiyaiwawe tsuã atu dikapaikadiba’ ”, Jesúspa atu wadi. 45Jerusalén aduax fiesta awẽ ade Pascua ikaidu Jesúspa tsuã atiruba keskara akaitu yurawawe uĩtaxakakĩ Galilea adu ikawu Jesús dukuwaitu aki idibadiwu.
46Galilea bai adua pexe ichapa awẽ ade Caná adu Jesús dasudi naduxu awẽ tsaima ene vino udiwaitadu. Nadu diaiwu wetsa Jesúski udi. Naatu awẽ wake isinidi Cafarnaúm adu ika. Naduax diaiwawe awẽ wake isiniki idi. 47Judea bai adua Jesús Galilea adu uke diaiwu wetsã dikadi. Naskata Jesúski uta ñukadi: “Ẽ mi uduax ua. Ewẽ wake ma dai. Ea kayawaxui kawe”, diaiwu wetsã Jesús wadi. 48Jesúspa kebadi: “Tsuã atiruba keskara ẽ ayabaitu ma ikũira wakeradaba”, Jesúspa atu wadi. 49Awiana diaiwu wetsã Jesús yuidi: “Diaiwũ kushi ewe kawe ewẽ wake ma daiki”, diaiwu wetsã Jesús wadi. 50Naskawaitu Jesúspa kebadi: “Mewẽ wake kayai. Mewẽ pexe adu katawe”. Diaiwu wetsã ikũira wadi Jesúspa yuiyaitu. 51Ma dukui kaidu awẽ uibatiwu aki dukukaxu yuidiwu: “Mewẽ wake daaba. Ma kaya. Ana isinikiba”, wadiwu. 52Naskawaiwawe atu ñukadi: “¿Awetiã wari ewẽ wake yudai xateame?” atu ñukaitu: “Da xawata mananawari mewẽ wake awẽ yudai xateita”, wadiwu. 53Naatiã yuiyaiwawe dikata apã shinadi: “Ikũkui Jesúspa ea yuiyaitu ma ẽ dika”. Naskata na diaiwu wetsãnu awĩnu awẽ yurawuyaxu Jesús ikũira wadiwu. 54Tsuã atiruba keskara rawe Jesúspa ma aka idi Judea aduax Galilea dukudi.
Aktualisht i përzgjedhur:
Juan 4: mtsB
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr