Luke 3
3
1ရောမဧကရာဇ်တိဗေရိယယ့်နောင်းဆဂ်ဆာ့ငေါနဂ်ဆိခှိင်မောင် ပုန်တိပိလတ်ဟော် ယုဒပှယ်ယယ့် အုတ်ချုတ်ဆူဖှဂ်ပွီး၊ ဟေရုဒ်အန်တိပaဟော် ဂါလိလဲပှယ်ယယ့် အုတ်ချုပ်ဆူဖှဂ်ရယ်။ ဟေရုဒ်အန်တိပယယ့်တေ ဖိလိပ္ပုဟော် ဣတုရဲနောင့် တရာခေါနိပှယ်ယယ့်အုတ်ချုပ်ရယ့်လူဖှဂ်ပွီး၊ လုသာနိဟော်လယ်း အဘိလင်ပှယ်မောင် အုတ်ချုပ်ရယ့်လူဖှဂ်ရယ်။ 2အန္နနောင့်ကယာဖတွို့ဟော် အကျွီးဆုန်းပုရောဟိတ်ဖှဂ်ကျော့ရယ်။ အယ်းအခှိင်မောင် ဖရောဆန်ယယ့်နွောဂ်ကပတ်တိုဟော် တိုးကန်တော်ရော့ထားမောင်နေထောင်နေရယ့် ဇာခရိယယ့်ဆောယောဟန်နောင်းကွိုယွောဂ်လော်ရယ်။ 3အယ်းယော်ကျွောင့် ယောဟန်ဟော် ဂျော်ဒန်မှဂ်တဆွောဂ်နောင်းဆိုးပွီး လူတွို့ကွို နွောင်တော့ဆောင်ဝီကော့bယော့ကျော့ဖွို့နောင့် ဆူတွို့ယယ့်အပှဂ်ဒုစရောဂ်တရောမျောခွမ့်ခွှဂ်ခှန်းခေါင်ယော့ဖွို့အတွ ယေနဂ်မန်ဂလော်ကွိုခေါင်ယူကျော့ဖွို့ ဟိုးကျောလေရယ်။ 4ပရောဖက်ဟေရှာယခေါ့ ဆူ့ယယ့်ကျောင်းမောင် ယောဟန်အကျွောင်းကွို ကျွိုတန်နမိင့်ဖတ်ရယ်းဆောထောခယ့်ခှန်းမောင် “တိုးကန်တော်ရော့ထားမောင် တစုန်တဦးခေါ့ အိုဟဂ်ကျွေးကျိုရယ့်အဆောင်မောင် ကွိုယ်တော်ယယ့်လောင်းကွို ပှန်ဆန်ကျော့လော။ ကွိုယ်တော်ယယ့်လောင်းကျွောင်းရယ်ကွို ညီညော်ဖွှောင့်တန်းစေကျော့လော့။ 5တွောင်ကျောချိုင့်ဝမ်းတောင်းကွို မှေဖွို့ပွီးတွောင်ကွိင်း၊ တွောင်တန်းမျောကွို ညီညော်စေပေါ်။ ကွောဂ်ရယ့်လောင်းမျောကွိုဖွှောင့်တန်းစေပွီး ကျောင်းတောင်းရယ့်လောင်းမျောကွို ချိုးမွဂ်စေပေါ်။ 6အယ်းနွောဂ်မောင် ဖရောဆန်စေခွှဂ်တိုမူရယ့်ကာတန်ဆန်ကွို လူတောင်းတွိမျိုယော့လောဂ်မယ်” ဆွိုပွီးဖှဂ်ရယ်။ 7အယ်းယော်ကျွောင့် ယောဟန်ခေါ့ဆူ့နောင်းမောင် ယေနဂ်မန်ဂလော်cခေါင်ယူဖွို့ ယွောဂ်လော်ကျော့ရယ့်လူအမျောတွို့ကွို “လိင်ညော်ခှယ့်စောတတ်ရယ့်လူအပွောင်းတွို့d ကှော့ယွောဂ်လော်တို့မယ့် ဖရောဆန်ယယ့်အမှဂ်တိုခေါ့နေ ရွှောင်ပှေးကျော့ဖွို့ နန်တွို့ကွိုစူခေါ့ဆတိပေးခယ့်သလော။ 8နန်တွို့ယယ့် အပှဂ်ဒုစရောက်ရယ်ကွို စွမ့်လောဂ်ပီဆွိုတော်ကွို အလုတ်နောင့်ဆဂ်ဆေပျော့ကျော့။ နန်တွို့ကွိုယ်နန်တွို့ အာဗြဟံယယ့် မျွိုးဆဂ်ဖှဂ်ရယ်ဆွိုပွီးဟိုးမနေကျော့နောင့်။ နန်တွို့ကွို ငေါ်ဟိုးမယ်။ စော်ကျွောင့်လောဟန်ကော ဖရောဆန်ခေါ့ ကွှောဂ်ခါးမျောကွို အာဗြံဟံယယ့်မျွိုးဆဂ်အဖှဂ် ပွှောင်းလားနောင်ရယ်။ 9အခုအခှိင်မောင် ဖရောဆန်ဟော် နွောင်တော့မယော့ရယ့်ဆူရယ်ကွိုအပှဂ်ပေးဖွို့ ပဆိင်တလဂ်အနေနောင့်အဆန်သင့်ဆိနေရယ်။ အယ်းယော်ကျွောင့် အဆီးကွောင်းမဆီးရယ့်အပန်နောင့်တူယန် ဖရောဆန်ဟော် အယ်းလူကွိုအပှဂ် ပေးလောဂ်မယ်။ အယ်းလူဟော် ခွိလယ်းခေါင်ယော့ပွီး မီးဆွို့ခေါင်ယော့ရယ့်ဆဂ်ပန်နောင့်တူလောဂ်မယ်” လွို့ဆွိုလေရယ်။ 10အယ်းအခေါ် လူထုပရိတ်ဆတ်တွို့ခေါ့ ယောဟန်ကွို “အယ်းလွိုဟန် ငေါ်တွို့စော်လုတ်ဆန့်သလော” လွို့ မေးကျော့လေရယ်။ 11ယောဟန်ခေါ့လယ်း “နန်တွို့ထားခေါ့ အန်းကှီနေထည်ဆိရယ့်လူဟော် အန်းကှီမဆိရယ့်ဆူကွို တထည်ပေးယော့မယ်။ နန်တွို့မောင် စောစရော်၊ ဆွောဂ်စရော်ဆိယန်လယ်း မဆိရယ့်ဆူရယ်ကွို အယ်းလွိုပယ်းမျော့ပေးယော့မယ်” လွို့ ဖှေလေရယ်။ 12တခှို့အခွမ်ကွောဂ်ဆူမျောဟော်လယ်း ယောဟန်နောင်းမောင် ယေနဂ်မန်ဂလော်ခေါင်ယူဖွို့ ယွောဂ်လော်ခယ့်ကျော့ပွီး ဆူတွို့ခေါ့ “ဆရော်၊ ငေါ်တွို့ယော် စော်လုတ်ယော့မလော” လွို့မေးကျော့ယော် 13ယောဟန်ခေါ့ “ဆူတွို့ကွို အခွမ်ရယ်ကွို သတ်မှတ်ထောရယ့်အယော်ထဂ် ပွိုပွီးမကွောဂ်ကျော့နောင့်” လွို့ ဆွိုလေရယ်။ 14တခှို့စဂ်ဆောမျောခေါ့လယ်း ဆူ့ကွို “ငေါ်တွို့ယော် စလွိုမျွိုးလုတ်ဆန့်သလော” လွို့မေးရယ့်အခေါ် ယောဟန်ခေါ့ “နန်တွို့လယ်း လူရယ်နောင်းခေါ့နေ ပိဆင်ကွို အတန်းအကျောဂ်မတွောင်းခေါင်ကျော့နောင့်။ ဘဆူ့ကွိုမောင့် မမင်မကန် မစွပ်စွားကျော့နောင့်။ နန်တွို့ယော့ရယ့်လော့စော်နောင့် ကှေနောဂ်ကျော့ပေါ်” လွို့ပှန်ဖှေလေရယ်။ 15လူတောင်းဟော် မေရှိယe မကျော်ခန်မောင် ကျို့ လော်မောင်ကွို မျိုလန့်နေကျော့ရယ့်အတွကျွောင့် ယောဟန်နောင့်ပဂ်ဆဂ်ပွီး လူတောင်းခေါ့မေရှိယ ဖှဂ်လေမလောလွို့ တွယ်းတိုးနေကျော့ရယ်။ 16အယ်းယော်ကျွောင့် ယောဟန်ခေါ့ ဆူတွို့ကွို “ငေါ်ဟော် လူရယ်ကွို ယေနောင့်ယေနဂ်မန်ဂလော်f ပှုပေးတော်မင်ရယ်။ ဟော်ပေမယ့် ငေါ့ထဂ်မှင့်မှဂ်ရယ့်လူတဦးလော်နေပီ။ ငေါ်ဟော် ဆူ့ယယ့်ဖနောဂ်ကျွိုးကွို ဖှေပေးဖွို့တအွောင်မောင့် မထောဂ်တန်ဘူး။ ဆူဟော် ယေနဂ်မန်ဂလော်ကွို ညင်အလန်းတိုနောင့်ယော၊ မီးနောင့်ယော နန်တွို့ကွို ပှုပေးလောဂ်မယ်။ 17လာဆမောဟော် ကွောဂ်တလန်းနာရယ့် ထွမ်ချဂ်ကွိုဆုန်းပွီး စပေါစယ့်နောင့် အဖျန်းကွို ခွားချောသလွိုမျွိုး မေရှိယဟော်လယ်း နွောင်တော့ဆောင်ဝီကော့ယော့ဆူမျောနောင့် အချောဆူမျောကွို ခွားချောတိုမူပွီးယန် စပေါစယ့်နောင့်တူရယ့်ဆူမျောကွို စပေါကှီထားမောင် ဆိင်းထောပွီး အဖျန်းနောင့်တူရယ့်ဆူမျောကွို မဆေနောင်ရယ့်မီးထားမောင်ထည့်လောဂ်မယ်” လွို့ ဟိုးလေရယ် 18ဟော်လွိုမျွိုး နည်းလောင်းအမျွိုးမျွိုးနောင့် ယောဟန်ဟော် မန်ဂလော်ဆတန်းကွောင်းကွို ဟိုးကျောပွီး လူအပွောင်းတွို့ကွို နွောင်တော့ဆောင်ဝီကော့ယော့စေဖွို့ တောဂ်တွမ်းနွိုးဆိုလေရယ်။ 19အယ်းယော်ကျွောင့် အုတ်ချုပ်ဆူဟေရုဒ်ဟော် မိမိယယ့်တေငါဖှဂ်ဆူယယ့်မိင်းမော့ ဟေရောဒိကွို လဂ်ထောဂ်ခှန်းအကျွောင်းနောင့် အချောမကွောင်းရယ့်အမုမျောရယ်ကွို ပှုလုတ်ရယ့်အတွ ယောဟန်ခေါ့ ပှဂ်တန်ဝေဖန်လေရယ်။ 20အယ်းယော်ကျွောင့် ဟေရုဒ်ဟော် ဆူ့ယယ့် စဂ်ဆောရယ်နောင်း ယောဟန်ကွို ဖောင်းဆီးထွောင်ခှော့စေခှန်းနောင့် တကာကွို ဆွိုးပနန်းရယ့်အပှဂ်တခုကွို ထောဂ်ပွီးကျူးလွမ်လေရယ်။ 21ထွောင်ထား အကှဉ်းခှော့မခေါင်ယော့မီမောင် ယောဟန်ဟော် လူအမျောတွို့ကွို ယေနဂ်မန်ဂလော်ပှုပေးခယ့်ရယ်။ ကွိုယ်တော်ယေရှုဟော်လယ်း ယေနဂ်မန်ဂလော်ခေါင်ယူပွီး ဆုတွောင်းနေခှိင်မောင် ကိုးကန်ဟော် ဟန်းလန်းပွမ့်ပွီး 22ညင်အလန်းတိုဟော် ခှိုးင ပုန်စောင်နောင့် ကွိုယ်တော်အပိုကွို ဆန်းသဂ်လော်လေရယ်။ ကိုးကန်ခေါ့ အဆောင်တိုဟော်လယ်း “နန်ဟော် ငေါ်ခှဂ်မှဂ်နွိုးတိုမူရယ့် ငေါ့ယယ့်ဆောတိုဖှဂ်ရယ်။ ငေါ်ဟော် နန့်ကွို ကော်တရော်ကွို ကှေနောဂ်အောရော့တိုမူရယ်” လွို့ ထွပိုလေရယ်။ 23ကွိုယ်တော်ယေရှုဟော် အမုတိုကွို စော့တန် ထောင်းဆွောင်ခှိင်မောင် အဆဂ်တို ဆုန်းဆာလွောဂ် ဆိတိုမူရယ်။ ဆူဟော် လူတွို့ယယ့် ထန်မျိုချဂ်အယော့ ယောသပ်ယယ့်ဆောဖှဂ်ပွီး ယောသပ်ဟော် ဧလိယယ့်ဆောဖှဂ်ရယ်။ 24ဧလိဟော် မဿတ်ယယ့်ဆော၊ မဿတ်ဟော် လေဝိယယ့်ဆော၊ လေဝိဟော် မေလခိယယ့်ဆော၊ မေခလိဟော် ယန္နယယ့်ဆော၊ ယန္နဟော် ယောသပ်ယယ့်ဆေ 25ယောသပ်ဟော် မတ္တသိယယ့်ဆော၊ မတ္တသိဟော် အာမုတ်ယယ့်ဆော၊ အာမုတ်ဟော် နာဟုံယယ့်ဆော၊ နာဟုံဟော် ဧသလိယယ့်ဆော၊ ဧသလိဟော် နဂ္ဂဲယယ့်ဆေ 26နဂ္ဂဲဟော် မာအတ်ယယ့်ဆော၊ မာအတ်ဟော် မတ္တသိယယ့်ဆော၊ မတ္တသိဟော် ရှေမိယယ့်ဆော၊ ရှေမိဟော် ယောသပ်ယယ့်ဆော၊ ယောသပ်ဟော် ယုဒယယ့်ဆော 27ယုဒဟော် ယောဟန္နယယ့်ဆော၊ ယောဟန္နဟော် ရေသယယ့်ဆော၊ ရေသဟော် ဇေရုဗဗေလယယ့်ဆော၊ ဇေရုဗဗေလဟော် ရှာလသေလယယ့်ဆော၊ ရှာလသေလဟော် နေရိယယ့်ဆေ 28နေရိဟော် မေလခိယယ့်ဆော၊ မေလခိဟော် အဒ္ဒိယယ့်ဆော၊ အဒ္ဒိဟော် ကောသံယယ့်ဆော၊ ကောသံဟော် ဧလမောဒံယယ့်ဆော၊ ဧလမောဒံဟော် ဧရယယ့်ဆေ 29ဧရဟော် ယောရှုယယ့်ဆော၊ ယောရှုဟော် ဧလျေဇာယယ့်ဆော၊ ဧလျေဇာဟော် ယောရိမ်ယယ့်ဆော၊ ယောရိမ်ဟော် မဿတ်ယယ့်ဆော၊ မဿတ်ဟော် လေဝိယယ့်ဆေ 30လေဝိဟော် ရှိမောင်ယယ့်ဆော၊ ရှိမောင်ဟော် ယုဒယယ့်ဆော၊ ယုဒဟော် ယောသပ်ယယ့်ဆော၊ ယောသပ်ဟော် ယောနန်ယယ့်ဆော၊ ယောနန်ဟော် ဧလျာကိမ်ယယ့်ဆော 31ဧလျာကိမ်ဟော် မေလေယယ့်ဆော၊ မေလေဟော် မဲနန်ယယ့်ဆော၊ မဲနန်ဟော် မတ္တသယယ့်ဆော၊ မတ္တသဟော် နာသန်ယယ့်ဆော၊ နာသန်ဟော် ဒါဝိဒ်ယယ့်ဆော 32ဒါဝိဒ်ဟော် ယေရှဲယယ့်ဆော၊ ယေရှဲဟော် ဩဗက်ယယ့်ဆော၊ ဩဗက်ဟော် ဗောဇယယ့်ဆော၊ ဗောဇဟော် စာလမုန်ယယ့်ဆော၊ စာလမုန်ဟော် နာရှုန်ယယ့်ဆော 33နာရှုန်ဟော် အမိနဒပ်ယယ့်ဆော၊ အမိနဒပ်ဟော် အဒ်မိန်ယယ့်ဆော၊ အဒ်မိန်ဟော် အာရံနိယယ့်ဆော၊ အာရံနိဟော် ဟေဇရုံယယ့်ဆော ၊ ဟေဇရုံဟော် ဖာရက်ယယ့်ဆော၊ ဖာရက်ဟော် ယုဒယယ့်ဆော 34ယုဒဟော် ယာကုပ်ယယ့်ဆော၊ ယာကုပ်ဟော် ဣဇက်ယယ့်ဆော၊ ဣဇက်ဟော် အာဗြံဟံယယ့်ဆော၊ အာဗြဟံဟော် တေရယယ့်ဆော၊ တေရဟော် နာခေါ်ယယ့်ဆော 35နာခေါ်ဟော် စေရောက်ယယ့်ဆော၊ စေရောက်ဟော် ရာဂေါယယ့်ဆော၊ ရာဂေါဟော် ဖာလက်ယယ့်ဆော၊ ဖာလက်ဟော် ဟေဗာယယ့်ဆော၊ ဟေဗာဟော် ရှာလယယ့်ဆော 36ရှာလဟော် ကာဣနန်ယယ့်ဆော၊ ကာဣနန်ဟော် အာဖာဇဒ်ယယ့်ဆော၊ အာဖာဇဒ်ဟော် ရှေမယယ့်ဆော၊ ရှေမဟော် နောဧယယ့်ဆော ၊ နောဧဟော် လာမက်ယယ့်ဆော 37လာမက်ဟော် မသုရှလယယ့်ဆော၊ မသုရှလဟော် ဧနောက်ယယ့်ဆော၊ ဧနောက်ဟော် ယာရက်ယယ့်ဆော၊ ယာရက်ဟော် မဟာလေလယယ့်ဆော၊ မဟာလေလဟော် ကာဣနန်ယယ့်ဆော 38ကာဣနနန်ဟော် ဧနုတ်ယယ့်ဆော၊ ဧနုတ်ဟော် ရှေသယယ့်ဆော၊ ရှေသဟော် အာဒံယယ့်ဆောဖှဂ်ပွီး အာဒံဟော် ဖရောဆန်ဖန်ဆန်းတိုမူယယ့်ဆောဖှဂ်လေရယ်။
Aktualisht i përzgjedhur:
Luke 3: ttpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.