Matayo 7
7
Eꞌyo lizà ꞌba àloo drìa vɨɨ
(Luka 6:37-38,41-42)
1“Lè àmɨ lí eꞌyo ꞌba alóo ɨnɨ drìa kʉ, Orɨ tè muu eꞌyo lii àmɨ drìa kʉ benì. 2Àrɨ̀yɨ̀kʉ Orɨ nɨ ngaa mu eꞌyo li àmɨ drìa kòꞌbò ꞌba àmɨ nɨ ɨnɨ drìa eꞌyo lile vɨɨ ɨnɨ lé.
3“Mɨ lè patí ongóróꞌbo adrìì mulia vɨɨ pè dèè mɨ asɨɨ ùguruꞌbá mɨ ngʉlʉpɨ mulia vɨɨ yɨ̀ kʉ àrɨ eꞌyo yɨ̀ yà? 4Mɨ ɨco ꞌyo adrìì yɨ́ kɨ́nɨ̀, ‘Mɨ fè màá pè patí ongóróꞌbo mɨ mulia vɨɨ’ isú dèè mɨ ndrèe àngʉ̀ ùguruꞌbá mɨ mulia vɨɨ yɨ́ kʉ ngóni ngóni yà? 5Mɨ ɨ ꞌba lókìrí be drʉ, lè mɨ pè ngà patí ongóróꞌbo mɨ mulia vɨɨ ráká ànɨyɨ̀ mɨnɨ àngʉ̀ ndrèjʉ ndɨtɨrɨ ùguruꞌbá adrìì mulia vɨɨ pèjʉ benì.
6“Àmɨ fé àfa àloo àlátárá vɨ́ɨvɨɨ òcé yɨ́ kʉ díká àmɨ oꞌbé cècè ndrɨ̀zà àjè be vɨɨ ɨnɨ ngùrúbè yɨ́ kʉ, àrɨ̀yɨ̀kʉ ɨcó ɨka ka yɨ̀ pàbaa ti oja àvɨ́ mɨ cɨjʉ ra.
Ɨmbataa àfa zijʉ, ndrùjʉ díká jótile pàjʉ vɨɨ
(Luka 11:9-13)
7“Àmɨ zí, ꞌba ngaa fèe àmɨ yɨ́ rá; àmɨ ndrú, àmɨ ngaa isúu ra díká àmɨ pá jótile, ꞌba ngaa zìi àmɨ yɨ́ rá. 8Ànɨ ꞌba drɨ́á zile ra vɨɨ ɨnɨ ngaa isúu ra; ꞌba ndrùle ra vɨɨ ɨnɨ ngaa isúu ra díká ꞌba jótile pàle ra vɨɨ ɨnɨ yɨ́, ꞌba ngaa zìi ra.
9“Àrɨ ɨco àmɨ ɨ̀sɨlɨa mvápia yɨ́ ɨrà fe ɨ dèè mva ndee àꞌí ɨ̀rɨ bʉ mʉ̀gatɨ̀ nɨ ka vɨɨ nɨ̀ yà? 10Nòsɨ̀kʉ mva ndee tè ɨ̀rɨ bʉ ìꞌbi àꞌí, ɨco ɨ̀rɨ yɨ́ orí fe ɨ ra yà? 11Àmɨ ꞌba onzɨ drʉ, àmɨ tè nìi àfa ònyɨ̀be fèle anzɨ àmɨ ꞌyowa vɨɨ ɨnɨ yɨ́ rá, àmɨ nɨ ɨgale yɨ̀, Ata àmɨ ꞌyowa ꞌbùa vɨɨ nɨ ngaa muu àmɨ yɨ́ àfa ònyɨ̀be fèe ngòpɨ, àmɨ ꞌba zile ɨ̀rɨ tia ra vɨɨ ɨnɨ drʉ! 12Ànɨ lè àmɨ ꞌó eꞌyo káyɨ̀ ònyɨ̀be ꞌba drɨ́á yɨ́, kɨ̀le àmɨ nɨ lèle ɨnɨ ꞌó àmɨ yɨ́ vɨɨ lé. Eꞌyo ꞌdɨ̀vɨɨ ɨ̀ce àzítáá Musa awo vɨɨ ɨnɨ ɨkɨ́ ɨmbataa ꞌba eꞌyo ondrílé vɨɨ ꞌyowa vɨɨ ɨbe.
13“Àmɨ fɨ́ kalɨ tile ɨ̀zɨ́á vɨɨ yɨ̀. Àrɨ̀yɨ̀kʉ kalɨ tile mujʉ àcɨ drìjàzà nɨ vɨɨ alɨa vɨɨ ɨ̀rɨ wàlà drʉ ànɨyɨ̀ ꞌba òꞌbí ɨ́ muu alɨa yɨ̀ nɨ̀. 14Te kalɨ tile fɨjʉ ɨdrɨa vɨɨ ɨ̀rɨ ɨ̀zɨ́á drʉ díká sɨ́rɨ́á drʉ, ànɨyɨ̀ ꞌba were ɨ́ léti ndee isúu nɨ̀.
15“Àmɨ ovʉ́ mule be ꞌbà eꞌyo ondrílé ɨ̀nzò drʉ, rɨle cale àmɨ bʉ rúá yɨ̀ kɨ̀le kàbèlè lé, te isú vɨɨ dèè ɨnɨ así kɨ̀le ꞌbálúú àdrà be vɨ́ɨvɨɨ lé vɨɨ ɨnɨ yɨ̀. 16Àmɨ ngaa muu ɨnɨ nìi eꞌyo ꞌozà ꞌyowa vɨɨ yɨ̀. ꞌBa ɨco zàbíbù ɨkɨ́ òtɨ patí ocí be vɨ́ɨvɨɨ síá rá yà nòsɨ̀kʉ ɨlʉ́ʉ́ ɨco ka àsarʉʉ síá rá yà? 17Patí ònyɨ̀ be vɨɨ ɨ ɨkɨ́ ònyɨ̀be ka ɨ, díká patí onzɨ vɨɨ ɨ ɨkɨ́ ònzɨ ka ɨ. 18Patí àlá vɨɨ ɨcoo ɨkɨ́ ònzɨ ka kʉ, díká patí ònzɨ vɨɨ ɨcoo ɨkɨ́ ònyɨ̀be ka kʉ. 19Patí drɨ́á ɨkɨ́ ònyɨ̀be kale kʉ vɨɨ, ꞌba ngaa ɨnɨ ògaa nyawúá díká ꞌba oꞌbee àcɨá. 20Ànɨ àmɨ ngaa mu ꞌba eꞌyo ondrílé ɨ̀nzò drʉ ꞌdɨ̀vɨɨ ɨnɨ nìi eꞌyo ꞌozà ꞌyowa vɨɨ yɨ̀.
21“Ovʉʉ ꞌbèè ꞌba drɨ́á ma omvele, ‘Opɨ, Opɨ,’ vɨɨ ngáá drɨ́á mu fɨ Kárí ꞌBùnɨ vɨɨ alɨa nɨ̀ kʉ, te pèlʉ́ kíríá ꞌba eꞌyo Atamà ꞌbùa vɨɨ nɨ lèle vɨɨ ꞌole ra vɨɨ ɨnɨ ɨ. 22Oꞌdú eꞌyo lizà nɨ vɨɨ nɨ cajʉ naa yɨ̀, ꞌba òꞌbɨ́ nɨ ngaa muu ꞌyoo kɨ́nɨ̀ ‘Opɨ, Opɨ! Àma àyʉʉ ndráá mɨ rú eꞌyo Orɨ awo vɨɨ òlʉ̀jʉ, orɨndɨònzɨ ɨdrojʉ díká talɨ òꞌbɨ́ányá ɨdejʉ kʉ yà?’ 23Acete ma nga muu ꞌyo ɨnɨ yɨ́ kɨ́nɨ̀, ‘Ma nìi drɨ̀ò àmɨ kʉ. Àmɨ dá àmɨ ma àgaa ra, àmɨ ꞌba asíònzɨ be drʉ!’
Eꞌyo jó soti sizà drìa vɨɨ
(Luka 6:46-49)
24“Ànɨyɨ̀ ꞌba drɨ́áa àlùàlʉ ɨmbataa ma awo ꞌdɨ̀vɨɨ ɨrɨle ra díká butia òbɨ̀le ra vɨɨ ꞌonɨ kòꞌbò agú òndʉ̀a be nɨ awo jó soti ꞌbàle ɨrà drìa vɨɨ lé. 25Ozoo sʉ̀ angɨrɨ, yí tì bɨ̀lɨ̀rɨ̀ drʉ, díká òlɨ́ òkpo vɨ́ɨvɨɨ be jó ndee rúa yɨ̀ ra; te awɨɨ nɨ àsʉ kʉ, àrɨ̀yɨ̀kʉ si ɨ̀rɨ ɨrà drìa. 26Te ꞌba àloo eꞌyo ma tia ꞌdɨ̀vɨɨ ɨrɨle ra, díká butia òbɨ̀le kʉ vɨɨ o nɨ kòꞌbò kɨ̀le agú azazà drʉ nɨ awo jó sile cɨ́nyáá drìa vɨɨ lé. 27Ozoo sù angɨrɨ, yí tì bɨ̀lɨ̀rɨ̀ drʉ, díká òlɨ òkpo vɨ́ɨvɨɨ be jó ndee rúa yɨ̀ ra, ànɨyɨ̀ jó ndee àsʉ nɨ òrì òrì drʉ.”
28Yesu nɨ ace eꞌyo nzejʉ dejʉ ꞌba, òꞌbí ovʉ́ òsùtaa yɨ̀ wúrá ɨ̀rɨ nɨ ꞌba ɨmbajʉ vɨɨ yɨ̀. 29Ɨmbataa ɨ̀rɨ awo vɨɨ òkpo be, ovʉʉ ꞌba àzítáá Musa awo ɨmbale vɨɨ ꞌyowa vɨɨ lé kʉ.
Aktualisht i përzgjedhur:
Matayo 7: MADI-URL
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Wycliffe Bible Translators, Inc., © SIL Uganda, All rights reserved