Génesis 16
16
Itimaque otomi Agar
1-3Ari ocarataque 10 osarentsi isavicaque Abrama quipatsiqui Canaán. Iro cantaincha te intimeji Sarai otomi. Oshequi oquenqueshireaca. Ari otimi onampire pajitachari Agar, egiptosato. Aparo quitaiteri ocantiri ojime:
—Yoraa, te irishinetenaji Tasorentsi intime atomi. Meeca nocoacaaquempi poonayero irointi nonampire. Ariorica intimanaque otomi, nonquempetacanteri irio nashisanori.
Iquemisantaquero Abrama ocantaqueriri ijina, irosati opacantacari ijinantacaro. 4Ari yoonaaquero, irosati otsomontetantanaca. Oneantacari otsomontetaque, irosati otseencantanacaro nampitarori. Ari iotacotaquero Sarai otseencaquero, 5irosati ocantantacari ojime:
—Yoraa, oshequi otseencaquena Agar, oneaca otsomontetaque, aviro cantacaacarori otseencantaquenari. Narovetaca pacaaquempirori poonantacarori, meeca intimanaquerica otomi, ojitanaque anaacotaquena. Ioti Tasorentsi avirorica cantacaacarori, irompa narorica.
6Ari icantanaquero iriori:
—Aviroyeata, jaocarica pincanterori; irootatsi pinampire.
Ari oquisaquero, irosati oshiantanaca. 7Iro cantaincha ineaquero Inampire Tasorentsi anta caaraiteriqui pajitachari Sur otiminta nija amotoaajatatsiri oqueninta avotsi. 8Isampitapaaquero:
—Agar, overanaro Sarai, ¿jaoca piponeari? ¿Jaoca pijateri?
Acanaqueri iroori:
—Noponea quipatsiqui Canaán, noshiapitsatacaro nampitanari.
9Ari icantiro:
—Ocameetsati pimpiashitanajero, pinquemisantero maaroni paitarica oncantempiri.
10Aisati icantiro:
—Iroshequiacaasanojeiteri Tasorentsi
pishanincajeitajeari avirori coajicani.
Tecatsi ioterine jaocarica incarajeiteri.
11Meeca yora pitsomontetaquerira,
irio shirampari timatsineri.
Ariorica intimanaque, pimpajiteri Ismael;
tempa iquemaquempi Tasorentsi picavintsaaca.
12Yora pitomi iroayeritasanotanaquea catsini,
inquempeteari aashino coquianti caari ivirayeeta,
incanteani irimanatapiniteri itsipapee.
Aisati inquempejeitea irishanincajeitajeari coajicani,
irimanatavacaapinijeitea.
Tecatsi anaacoterine,
incanteani irisavicasanojeite iipatsitequi.
13Ari oquenqueshiretaca Agar, iriotaque Tasorentsi quenquetsatacaaquerori. Irotaque ocantantacari: “Iriotaque Tasorentsi neaquenari.” Aisati ocanti: “¡Noneaqueri Tasorentsi, iro cantaincha te noncameji!” 14Irotaque opajitantari aisati amotoaajatinta nija: “Inijate Aneatsiri neaquenari.” Anta amotoaajatinta omontetaro quipatsi pajitachari CadÉs aisati Bered.
15Irosati opiantanaja Agar inampiqui Abrama. Ari otimaqueri itomi Abrama, ipajitaqueri Ismael. 16Ocarataque 86 irosarentsite itimantacari.
Aktualisht i përzgjedhur:
Génesis 16: cni
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2008, 2015, Wycliffe Bible Translators, Inc. All rights reserved.