Luca 22
22
Zezusihi ãma, da te irosa'rata za'ra zé wasu'u, da te dasiwi iwĩrĩ da na
Mateu 26.1-5; Marcu 14.1-2; Zuwã 11.45-57
1I'u'ẽtẽ duptoi'õ, da te 're ihuri mono zéb u hã, romhuture di oto, Pascowa na dato nhisi u hã. 2'Re ihâimana u'âsi mono ma, da'ãma romhuri'wa ipire norĩ hã, te rowahutu'wa norĩ me sima ãma rosa'rata za'ra, pi'uriwi te te siwi wĩrĩ da, Zezusi hã. Dama pahi za'ra wa, te ãne sima ãma rosa'rata za'ra.
Zezusi te te dama hâiba nhomri da, Zuda hã te te irosa'ratazé wasu'u
Mateu 26.14-16; Marcu 14.10-11
3Tawamhã Satanasi hã ma tô oto Zudaha pẽ'ẽ 're ãzé. Icarioti na, Zudaha nhisi hâiba amo hã. Zezusihi me dame 're imorĩ, Zuda hã, 12 na ihâiba za'ra siré. 4Tawamhã te oto mo, sasedoti ipire norĩ u. Duré, 'Re ihâimana u'âsi mono nhorõwa 'ri 'madâ'â'wa norĩ u, te mo, ipire norĩ u, Zezusihi ãma te te sadawa pibu za'ra da, te te dama hâiba nhomri da. 5Ãhã wamhã, imreme te te wapari za'ra wamhã, tãma rowẽ za'ra di. Tahawa, te tãma ropisutu za'ra, rob'uiprazé te te tãma sõmri za'ra da. 6Tahawa, ma tô Zuda hã ãma saze za'ra, rob'uiprazé te te tãma sõmri za'ra da, sasedoti ipire norĩ hã. Tahawa, te oto rosa'rata, nimahã bâtâ na Zezusi te te dama hâiba nhomri da, danhimiza'rese õ ré.
7Tawamhã bâdâ hã ma tô iwa waptãrã oto, i'u'ẽtẽ duptoi'õ, da te 're ihuri mono zé hã. Zudeu norĩ hã te za pone'ẽrebâ 'ra hã simro, tisaihurizéb da, Pascowa na dato nhisi na da hã. 8Tahawa, te Zezusi hã Pedru norĩ ma rob'ru zahuré, Zuwãhã me, ãne:
— Mo oto ane wa'aba, wazô asipi wa'aba da, Pascowa te bâtâ na iwasaihurizéb da hã.
9Tawamhã te Pedru norĩ hã sadanharĩ zahuré, ãne:
— E momo ma tô asima irowẽ, asô iwanhipi za'ra zéb da hã.
10Tahawa, te Zezusi asa tãma nharĩ zahuré, ãne:
— Ĩwapari pese aba. 'Ri ahâ u aimasisi aba wamhã, aibâ hã te za isõpẽtẽ 'wa, piza'a â ré, te te i'âri hã. Sõpẽtẽ aba wamhã, pibui wa'aba mono za, 'ri para u isébrézéb u. 11Tame te za 'ri tede'wa hã isadanharĩ 'wa, ãne: “Rowahutu'wa hã te wama tinha, wa te asadanharĩ da: E ma niwĩ 'ri 're wa'wa hã, ĩsiré 're inomro mono norĩ me, iwa iwasaihurizéb da hã, Pascowa na dato nhisi na hã.” 12Tawamhã 'ri tede'wa, te za hâimo 'ri 're wa'wa za'ẽne hã aima pisutu 'wa, marĩ i'ubumro siromo ãma. Tame te za wazô irobza'ra pese 'wa.
13Tawamhã 'ri ahâ u simasisi wamhã, Zezusi te te tãma i'awasu'u zahuré zéb uwaibaba, ma tô uburé anhopẽtẽ zahuré. Tame ma tô dasa hã 'manharĩ zahuré, Pascowa na dato nhisi na da hã.
14Tawamhã te za oto tasaihuri ni. Tahawa, te oto Zezusi norĩ hã ai'ubumro, saihuri da, tizadawa wasu'u'wa norĩ me. 15Tawamhã te oto tãma siwasu'u za'ra, ãne:
— Wa tô ĩsima wẽ upta, aime ĩsa za'ra wa'aba da, te robzépata õ ré, Pascowa na 're idasaihuri mono zém na. 16Ãne na, ĩsa na 're ĩsai mono õ di za oto. Bâdâ iwa waptã'ã wapsi, 'Re ihâimana u'âsi mono hã uburé da'ãma 're sib'a'uwẽ mono wapsi, wa za duré 're ĩsa. Tawapsi, dasaihurizé hã marĩ te te iwasu'u hã te ĩsina uwaimrami wapsi, wa za duré 're ĩsa.
17Tawamhã ma hâsizé hã ti'â, uwa 'rãi wa'ui ré hã. 'Re ihâimana u'âsi mono ãma te tiwata, sõpru wa. Te duré tãma nharĩ za'ra, ãne:
— Ã, âhuri aba, uburé. 18Ã hã te 're hâsi mono õ di za oto, a'â. Niwapsi, wa za duré te 're hâsi, 'Re ihâimana u'âsi mono hã uburé da'ãma 're sib'a'uwẽ mono wapsi.
19I'u'ẽne hã ma duré ti'â. 'Re ihâimana u'âsi mono ãma te duré iré ãma tiwata, sõpru wa. Taha pari, ma tô te te wẽ'ẽ, i'u'ẽne hã. Te te wẽ'ẽi mono parimhã, ma tô te te tãma sõmri, tisiré 're inomro mono norĩ ma. Te duré tãma nharĩ za'ra, ãne:
— Ã, i'u'ẽne hã huri aba. Ã hã ĩhâiba, te wasu'u, za asada ĩsisõmri aba zé. Ã hã te za 're ihuri aba mo, ĩ'ãma 're asipo're pu'u u'âsi za'ra wa'aba mono zéb da hã.
20Tawamhã saihuri pari, ma duré hâsizé hã ti'â, uwa 'rãi wa'u isé ré hã. Te duré ãhã wamhã tãma nharĩ za'ra, ãne:
— 'Re ihâimana u'âsi mono te te dama iropisutuzép té, te wasu'u, rob'rãi wa'u hã. Rob'rãi wa'u za'wari ne, asada ĩdâ'â za'ra wa'aba wamhã, te za ĩwi puru, ĩwapru hã. Tô sena, te za te te dama ãma 're a'uwaimrami, te te dama iropisutuzép té hã. Ãne na waihu'u za'ra wa'aba da, te za ĩwi puru, ĩwapru hã. 21Ma'ãpé, asiwi waihu'u aba. Ni'wa hã ĩzawi'wa newa, te ĩme nhamra, wedeza na, dama ĩhâiba nhomri'wa da hã. 22Ti'ai ãma Dasiré Ipodo hã te za dârâ, 'Re ihâimana u'âsi mono te te tãma ipisutuzéb zarina. Dâ'â da, te te tãma pisutu nherẽ, aibâ ma, tãma 're ropipa uptabi mono di za, za te te dama ihâiba nhomri'wai ma hã.
23Tahawa, te 'râwi sisadanharĩ za'ra, ãne:
— E 'wa te za dama hâiba za'ré.
24Tawamhã sima i'maipire zô sima isõpré na ãma sisaze za'ra õ wa, te timreme na 'râwi si'wapé za'ra, isiré 're inomro mono norĩ hã. 25Tahawa, te Zezusi tãma nharĩ za'ra, ãne:
— Ti'ai ãma danhib'apito norĩ hã, simiwada'uri pese za'ra di. Duré, isiwaihu'u zarina, te za dama marĩ 'manharĩ wẽ 'wa na, da te 're sisi za'ra. 26Tane asima 're aihâimana za'ra wa'aba mono õ di za, a norĩ wa'wa hã. Asiré norĩ ma, aipire wa'aba nherẽ, te za tãma 're asi'ai'uté za'ra wa'aba mo. Duré dawada'uri'wa, 're anomro aba mono nherẽ, aiwapu na te za dama 're iromhuri za'ra wa'aba mo. 27E 'wa hã, dama ipire. E tisa da, wedeza na isãmra, dama ipire. E dama dasai 'wapéi'wa hã dama ipire. Tisa da, wedeza na isãmra hã, tô dama ipire. Tazahã, wa hã dama dasai 'wapéi'wa ne, wa 're mo.
28— A norĩ wa'wa hã marĩ te 're sépata mono ré, ma tô ĩsiré 're anomro u'âsi aba mo. 29Tahawa, roti'wa da, dama ĩpire na 're ĩhâimana mono da, Ĩmama te te ĩma ipisutu ne, tane wa za duré wa hã aipisutu za'ra wa'wa, dama aipire na 're aihâimana za'ra wa'aba mono da, dama roti'wa na. 30A norĩ wa'wa hã niwapsi, te za ĩsiré 're asimroi wa'aba mo, wedeza na wasiré 're wasaihuri mono da, duré wasiré wa te 're âhuri mono da zama. Danhib'apito simasisizém na, te za 're ai'ubumroi wa'aba mo, Izaraéu nhihudu norĩ ma, 're roti za'ra wa'aba mono da, wahi'rada Izaraéu hã, 12 na i'ra si'aibâ norĩ ma. Taha nhihudu norĩ hã te za 're i'madâ'â za'ra wa'aba mo.
Zezusi hã, Pedru te te ipo're pu'uzé wasu'u
Mateu 26.31-35; Marcu 14.27-31; Zuwã 13.36-38
31Tawamhã Zezusi hã te Pedruhu ma tinha, ãne:
— Sima, ĩwapari pese. Satanasi hã ma tô 'Re ihâimana u'âsi mono wi aiwaptẽrẽ za'ra wa'wa, tô sena ĩzazei uptabi 'wa zô, te te aipibu za'ra wa'aba da. Trigu hã i'rã uptabi zô, da te 're i'upõrĩ za'ra mono ne, te za te te 're aipibu za'ra wa'wa, ĩzazei uptabi 'wa zô. 32Sima, tane nherẽ, Ĩmama wi, wa tô te 're rowaptẽrẽ aima, te te 're aipawaptob u'âsi mono da, ĩ'ãma 're aimorĩ u'âsi da. Apâ ĩtẽme aipi'rai wapsi, te za asisãnawã norĩ hã 're ipawaptob za'ra mo, hâimana nhiptete na 're nomro mono da.
33Tawamhã Pedru hã te asa tãma tinha, ãne:
— Apito, wa tô ĩsima wẽ, asiré da te ĩnherẽ da, duré ĩdâ'â da, aime.
34Tahawa, te Zezusi hã asa tãma tinha, ãne:
— Pedru, ĩwapari pese. Ĩzadawa para õ nherẽ, ã bâtâ na si'a hârâ õ ré, te za si'ubdatõ dawi ĩ'udâ, aima ĩza'rese õ na.
Zezusi hã, tisiré 're inomro mono norĩ te te ipo're pu'u za'ra zé wasu'u
35Tawamhã Zezusi te sadanharĩ za'ra, tisiré 're inomro mono norĩ hã, ãne:
— Datẽme te asatõrĩ za'ra wa'aba wamhã, wa tô aré aiwi sawi za'ra wa'wa, marĩ hã asiré 'wasari aba tõ da, rob'uiprazém nhemezé hã, duré ro'wapézé hã, duré aipara'uzazé wa'wa hã. E tawamhã marĩ hã aiwi sô rowaptâ'â aba õ di.
— Marĩ zô, wawi rowaptâ'â za'ra õ di. — Ãne te asa tãma nharĩ za'ra.
36Tahawa, te Zezusi hã tãma nharĩ za'ra, ãne:
— Rob'uiprazém nhemezé, ate wamhã, te za oto i'â, duré tô ro'wapézé hã, ate wamhã. Duré sib'ézé 'wapa õ wamhã, te za asi'upsibizé dama iwe, iwa'âbâ na sib'ézé 'wapa, asima uipra da. 37E marĩ wa, wa ãne aima 'ru za'ra wa'wa. Ĩwasété newa, te za rowasété 'manharĩ'wa norĩ zu ĩma rob'manharĩ za'ra ni. Ãne, duréihã ma tô romhâ ré ĩ'ãma rob'ui'éré siromo za'ra ibaihâ na, 'Re ihâimana u'âsi mono zadawa 'mahârâ'wa norĩ hã. Tahawa, te za ĩ'ãma rob'ui'éré zarina, tô ĩ'ãma uwaimrami za'ra ni.
38Tawamhã ãne te asa tãma nharĩ za'ra, isiré 're inomro mono norĩ hã:
— Wanhib'apito, ãhãta sib'ézé 'wapa maparane.
— Tô'ã, ãma rob'é'é. — Ãne te asa tãma nharĩ za'ra, Zezusi hã.
Zezusi norĩ hã, ẽtẽ 'rãihâ ãma isi'ubumrozé wasu'u
Mateu 26.36-46; Marcu 14.32-42
39Tawamhã Zezusi hã ma oto rob u watobro, ẽtẽ 'rãihâ u morĩ da, Oriwera u. Tamomo 're ine mono zéb u te duré mo, Oriwera u. Isiré 're inomro mono norĩ hã te ime ai'aba'ré. 40Tawamhã te te sima iwẽzéb u, ma tô oto aihutu. Tame Zezusi te tãma roti za'ra, ãne:
— Ma'ãpé, asima rowaptẽrẽ za'ra wa'aba, 'Re ihâimana u'âsi mono wi, te te aipawaptob za'ra wa'aba da, Wa'uburé nhimiwada'urizé wi.
41Tawamhã isiti za'ra te mo, siwaprosi sãmra da, romhâ prã na. Tame ma hi'rãtitõ nhamra, Timama ma, mreme da. 42Ãne te Timama ma mre:
— Ĩmama, asima wẽ wamhã, ĩma ba'a ĩdâ'âzé hã, te robzépata tõ da. Tane nherẽ, te ĩsima iwẽzéb uwaibaba, ĩma pisutu õ di za. Aima iwẽzéb uwaibaba, te 'manharĩ da hã ĩma wẽ di.
43Tawamhã ma itẽme sihâi'ré, hâiwa ãma romhuri'wa hã, te te pawaptob da, siptete na 're morĩ da, Zezusi hã. 44Tiwi robzei'õ uptabi nherẽ, ma tô duré mre, Timama ma, mreme 'rãihâ na. Tahawa, ma tô 're su'u a'a, dawapru ne, ti'ai wa.
45Tawamhã Timama ma, mreme pari, ma tô wahudu, tisiré 're inomro mono norĩ u morĩ da apâ. Sõtõ za'ra ré, ma siza za'ra. Pẽ'ẽzé uptabi za'ra wa, te tinhotõ za'ra. 46Tahawa, te tãma nharĩ za'ra, ãne:
— E marĩ wa, te asõtõ za'ra wa'wa. Aiwahutu za'ra wa'aba. 'Re ihâimana u'âsi mono wi, rowaptẽrẽ za'ra wa'aba asima, Wa'uburé nhimiwada'urizé wi, te te aipawaptob za'ra wa'aba da.
Zezusi hã, da te i'ârizé wasu'u
Mateu 26.47-56; Marcu 14.43-52; Zuwã 18.3-12
47Tawamhã Zezusi te te tãma nharĩ za'ra ré, ma itẽme aihutu ni, da'ahâ na. Zuda hã 12 na Zezusihi siré 're inomro mono norĩ me aré 're imorĩ, ta hã te te sô danhimro, Zezusihi zô. Tawamhã Zezusihi u, ma ai'ré, 'râwi te te sawi da, tob'rata hârâ na. 48Tahawa, te Zezusi hã tãma tinha, ãne:
— Zuda, oro ti'ai ãma Dasiré Ipoto zawi pese 'wa za, ma tob'rata hârâ na taré isawi, dama ihâiba za'ré na da te dasiwi waihu'u da.
49Tawamhã isiré 're inomro mono norĩ hã ma tô oto waihu'u za'ra, da te oto dasiwi i'âri da na hã. Tahawa, te siwi sadanha, ãne:
— Wanhib'apito, e wa te da'wapé za'ra õ di za, wanhi'wa na, sib'ézé 'wapa na.
50Tahawa, Zezusihi siré hã ma te ni'wa hã misi da'mai'u'a, sib'ézé 'wapa na. Ãhã wamhã, sasedoti ipire uptabi ma romhuri'wa hã ma te po're nhizâri pese ni, ipo're nhimire niwĩ.
51Tawamhã ma tô Zezusi hã tãma tinha, ãne:
— Tô'ã. Tane hã 'manharĩ tõ.
Tawamhã ma tô po're upi, tinhib'rata na. Tahawa, ma tô tipo're wẽ apâ. 52Zezusihi zô isihudu hã ta norĩ hã sasedoti ipire norĩ, duré 'Re ihâimana u'âsi mono nhorõwa 'madâ'â'wa norĩ, ipire norĩ, duré zudeu norĩ ma roti'wa norĩ. Tahawa, ma tô Zezusi hã tãma nharĩ za'ra, ãne:
— E wa hã danhibrob zô dapãrĩ'wa pâ, ma bété we ĩzô aihutu 'wa, sib'ézé 'wapa ré, duré asiwãi ré zama. 53Bâtâ sidâpâsi, wa tô asõ'a wa'aba nasi aimasisi, 'Re ihâimana u'âsi mono nhorõwa 'ri ãma. E niha bâ tameb ré, asiwi ĩ'âri aba õ di bété. Ãhã na ma tô bâdâ hã iwa waptãrã, asiwi ĩ'âri aba zéb da hã, robra tede'wa hã pire na 're imorĩzéb da hã.
Pedru hã, Zezusi te te dawi i'udâzé wasu'u
Mateu 26.69-75; Marcu 14.53-54,66-72; Zuwã 18.15-18,25-27
54Tawamhã ma tô oto siwi ti'â, Zezusi hã. Te te siwi âri wamhã, ma tô siwi saprõ, sasedoti tisiré norĩ nhipai u ipire uptabi nhorõwa u. Pedru hã te romhâ na te te dapibu. 55'Ri 'wawi wa'ra 're, da te dasima ipré za'ra u, ma wi, Pedru hã. Tame te nhamra Pedru hã, uzâ, da te dasiwi i'uirĩ norĩ 'rata. 56Unhama ãma sãmra ré, ma tô pi'õ hã 'madâ, romhuri'wa hã. Tahawa, te 'madâ'â pese, te te waihu'u da. Te te waihu'u wamhã, te oto dama 'mahâ, ãne:
— Ãhã zama, te Zezusihi siré 're mo.
57Tane nherẽ, ma tô tiwi ai'udâ, ãne:
— Mare di. Ĩma sa'rese õ di, ta hã.
58Tawamhã ãma ronomro pari, te duré aibâ hã Pedru 'madâ, sãmra ré.
Tahawa, te duré Pedruhu ma ta hã tinha, ãne:
— A zama, te dasiré 're aimo.
Tazahã, Pedru te asa tãma tinha, ãne:
— Mare di. Wa hã, õ norĩ siré hãi õ di.
59Tawamhã bâtâ pibuzé hã misi te te sa'oto wi, te duré ni'wa hã tãma tinha, ãne:
— A hã te tô isiré 're aimo. A hã, Galiléa hawimhã duré.
60Tahawa, te duré Pedru hã asa tãma tinha, ãne:
— Mare di. Tane ĩma inharĩ hã, te waihu'u õ di. Sa'rese õ di.
Ãne na timreme hã te te 'rãsutu wi, ma awa'awi si'a hã hâ. 61Tahawa, ma tô Wanhib'apito hã aipi'ra. Sipi'rai wamhã, te Pedru hã 'madâ'â pese. Te te 'madâ'â wamhã, ma Wanhib'apito mreme na po're puru oto, Pedru hã. Romhâ ré, ma tô tãma waihu'u siro, te te dawi i'udâzém na, Zezusi hã. Ãne ma tô tãma tinha: “Ã bâtâ na si'a hã hârâ õ ré, te za si'ubdatõ dawi ĩ'udâ, ĩzadawa para õ nherẽ.” Ãne ma tô romhâ ré, Pedruhu ma waihu'u siro. 62Ãne na oto imreme na sina po're pu'u wamhã, ma tô watobro rob u, Pedru hã. Tahawa, te oto aiwa'õ, sina pẽ'ẽzé uptabi wa.
63Tawamhã aibâ norĩ hã ma tô Zezusihi ma nharĩ wasété za'ra, siwi i'madâ'â'wa norĩ hã. Te duré nasi siwi ahâ. 64Zazahâ na ma duré siwi 'rã ubu. Tahawa, te tãma nharĩ za'ra, ãne:
— Ma'ãpé wama waihu'u zara na, ni'wa ai'azâri'wa hã. E niha isisi hã. — Ãne te nasi tãma nharĩ za'ra, te te nasi siwi ahâri sina.
65Te duré tãma nharĩ wasété za'ra, iwasété na.
66Tawamhã mararé ma tô zudeu norĩ ma roti'wa norĩ hã si'rã'õtõ, duré sasedoti ipire norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Si'rã'õtõ wamhã, ma tô dama 'ru za'ra, Zezusi hã da te we dasiwi saprõni da, itẽmeb za'ra. 67Da te itẽme dasiwi ãwisi wamhã, te siwi sadanha, Zezusi hã, ãne:
— E a hã 'Re ihâimana u'âsi mono te te i'aipisudu, Danho'reptui'wa da. Ma'ãpé, wama asiwasu'u za'ra na.
Tahawa, te Zezusi hã asa tãma nharĩ za'ra, ãne:
— Danho'reptui'wa na aima ĩsiwasu'u za'ra wa'aba wamhã, e te za ãma ĩzaze za'ra wa'wa. Ãté ãma ĩzaze za'ra wa'aba õ di za. 68Duré, ĩzadanharĩ za'ra wa'aba wa'rãmi, te asadanharĩ za'ra wa'aba wamhã, e marĩ te za ĩma iwaihu'u za'ra wa'wa. Marĩ hã ĩma waihu'u za'ra wa'aba õ di za. 69Tane nherẽ, ti'ai ãma Dasiré Ipodo hã te za oto dama pire na 're sãmra, dama ipire uptabi 'rata. Te za oto isimire niwĩ 're sãmra, 'Re ihâimana u'âsi mono 'rata.
70Tawamhã te duré siwi sadanha, ãne:
— E tawamhã, 'Re ihâimana u'âsi mono 'ra na, ma tô 're asi'madâ'â mo.
Tahawa, te duré asa tãma nharĩ za'ra, Zezusi hã, ãne:
— A norĩ wa'wa hã te inharĩ za'ra wa'wa, tane na hã.
71Tawamhã te sima nharĩ za'ra, ãne:
— Tâibâ oto. Da te wama iwasu'u za'ra zéb zô, wanhimipari za'ra õ di za oto. Wasi'uihâ na wa tô isiwasu'uzé hã wapari za'ra ni.
Aktualisht i përzgjedhur:
Luca 22: xavBP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011, Wycliffe Bible Translators, Inc.All rights reserved.