Luca 7
7
Romanuhu ma romhuri'wa, Zezusi hã te te ipesezé wasu'u
Mateu 8.5-13
1Tawamhã te te dama roti parimhã, te oto mo Zezusi hã, Cafanau u. Tawamhã ma tô wi. 2Tame aibâ hã te 're hâimana romanu hã, da'wapéi'wa norĩ wada'uri'wa. Tãma iromhuri'wa hã te te sawi pese di. Hâzé na te oto nomro, tãma iromhuri'wa hã. Hâzé ahâ wa, te za oto dârâ. 3Tawamhã hâzé na nomro ré, ma tô Zezusihi wasu'u hã wapa, romanu hã. Tahawa, ma tô zudeu norĩ ma roti'wa norĩ hã 'mazatõrĩ za'ra, Zezusihi zô, ihâzé ré hã te te pese da. 4Tawamhã te te sô isatõrĩ za'ra hã ma tô itẽme aihutu, Zezusihi u. Itẽme sihutu wamhã, ma tô tãma rowasu'u za'ra, ãne:
— Aibâ iwẽ, romanu hã. Wẽ wa, ma'ãpé pawapto na. 5Wasiré õ nherẽ, te te 're wa'azawi pese. Tahawa, ma tô isiminhimi'ru zarina wama 'ri za'ra ni, wate da, rowahutuzé hã. Ta hã ma tô duré pawa'âbâ za'ra, 'ri'wa norĩ hã.
6Tawamhã Zezusi te isiré timorĩ za'ra. Ma tô oto rosahutu za'ra, 'ri u. Te te rosahutu za'ra wamhã, romanu hã ma tô tisiwadi norĩ hã 'mazatõrĩ za'ra, te te tãma sadawa wasu'u za'ra da, Zezusihi ma. Tawamhã te te uzusi za'ra wamhã, ãne te tãma rowasu'u za'ra, Zezusihi ma:
— Wasiwadi hã zudeu'õ nherẽ, ãté asébré õ di za, u, isõrõwa u. A hã, u, aiwẽ di. Õ hã, u, wẽ prã ti. Wẽ prãi wa, ãté isõrõwa u asébré õ di za, u. 7Wẽ prãi wa, si'uihâ na we atẽme morĩ õ di za, u, tãma iromhuri'wa hã tãma pese da. Romhâ na nherẽ, aimreme pire wa, te za, u, aimreme na tãma ipe, rowẽ na tãma 're sãmra mono da. 8Romanu hã, damreme ipire hã tãma waihu'u pese di, u. Isib'apito norĩ mreme hã tãma pire za'ra di, u. Duré õ hã, u, imreme hã pire di, tinhib'a'uwẽ norĩ ma, da'wapéi'wa norĩ ma. Tawamhã te te 'mazatõrĩ wamhã, te za, u, mo, isadawa para. Sô hârâ wa, te za u, itẽme wi, isadawa para. Duré marĩ hã tãma iromhuri'wai ma, te te 'rui wamhã, te za, u, tãma 'manha, te te tãma i'ruzéb uwaibaba. Tahawa, aimreme hã pire wa, te za, u, tãma ipe, tãma iromhuri'wa hã, rowẽ na tãma 're sãmra mono da.
9Tawamhã Zezusi ãne hã te te wapari wamhã, ma tô ãma titob'uzu, isimirowasu'u za'ra na, romanuhu ãma hã. Tawamhã ma aipi'ra datẽme, da'ahâ uptabi na isarina isi'aba'ré norĩ u. Ãne te dama tinha:
— Tô sena, wa aima waihu'u za'ra wa'wa. Ã hã te te sina ĩ'umnhasizém na hã, niwa te i'madâ'â õ, Izaraéu nhihudu norĩ nhipti'ai ãma hã. Ta norĩ hã te te ãma siwi wabzu õ di, te te sina ĩ'umnhasizém na hã.
10Tawamhã apâ ma tô ai'aba'ré, romanu siwadi norĩ hã, isõrõwa u. Sihutu wamhã, ma tô ihâzé ré hã sabu za'ra. Rowẽ na te ãhã wamhã oto nhamra, hâzé ãna.
Imrotõ 'ra hã, Zezusi te te ihâiwa'utuzé wasu'u
11Tawamhã ãma ronomro õ ré, te Zezusi hã mo, 'ri wa'õtõ u. Naĩ na 'ri wa'õtõ nhisi u, te mo. Isiré 're inomro mono norĩ hã te isiré ai'aba'ré. Da'ahâ na te duré isiré ai'aba'ré ni. 12Tawamhã 'ri wa'õtõ 'wawi wa'ra u, ma tô rob'uwe za'ra, Zezusi norĩ hã, 'ridawa u. Tawamhã iwab'rere, ma tô dasiwi âri ni, ab're u, imrotõ 'ra idâ hã. Misire aibâ i'ra hã. Da'ahâ na te isiré ai'aba'ré ni, imrotõ siré, ab're u. 13Tawamhã imrotõ te te 'madâ'â wamhã, ma tô ãma tipẽ'ẽzé, Zezusi hã. Tawamhã ma tô tãma tinha, wawa tõ da.
14Tawamhã ma tô oto itẽme wi. Te te âri za'ra ré, ma tinhib'rata na iré upi. Tahawa, ma iré mazahâri za'ra. Tawamhã te oto 'mahâ:
— Ai'repudu, wa za aima tinha: Ai'utu.
15Tawamhã ai'repudu hã ma tô udu. Sahâ na te oto nhamra. Tawamhã tãma rowẽ wa, te oto mre. Tahawa, te Zezusi hã ina ma ti'ru, ãne:
— Ã ai'ra, ãma saprõni.
16Dâ'â zahã, oto sahâ na sãmra wa, ma tãma tapẽ'ẽwara za'ra ni. Ãne te dasima nharĩ za'ra ni:
— Tinhib'a'uwẽ norĩ hã te za we te te 're wa'apawapto, 'Re ihâimana u'âsi mono hã. Ma tô we watẽme satõ, tizadawa wasu'u'wa hã. Mreme pire uptabi di.
17Tawamhã iwasu'u hã ma tô wapari za'ra ni, daro mono bâ, Zezusi te te ihâiwa'utuzé wasu'u hã. Zudeu norĩ rob 'rata, 're idasi'ubumroi mono norĩ zama, ma tô iwasu'u hã wapari za'ra ni.
Zuwã Batista hã Zezusihi u, tizadawa wasu'u'wa norĩ te te isatõrĩ zahuré zé wasu'u
Mateu 11.2-19
18-19Tawamhã Zezusi te te ihâiwa'utuzé hã ma tô Zuwãhã ma wasu'u za'ra, isadawa 'madâ'â pese 'wa norĩ hã. Tawamhã maparane te sô tihârâ zahuré, Wanhib'apito u neb zahuré da, te te sadanharĩ zahuré da. Ãne te Zuwã hã tãma nharĩ zahuré:
— Ane wa'aba wamhã, te za isadanharĩ 'wa, ãne: “E a hã Zuwã Batista te te dama 're i'aiwasu'u mono, te we aimo. E zahadu aimawi zô, wa za 're wanhimipari za'ra.” Ãne te za tãma ĩzadawa wasu'u wa'wa.
20Tawamhã Zezusihi u, te tineb zahuré. Itẽme simasisi wamhã, ma tô sadanharĩ zahuré, ãne:
— E a hã Zuwã Batista te te dama 're aiwasu'u mono, te we aimo. E zahadu aimawi zô, wa za 're wanhimipari za'ra.
21Tawamhã isõ'a zahuré, te a'â da'apese da'ahâ na, Zezusi hã. Duré wa'uburé ré, 're idanomro mono hã ma tô dama anhamra. Duré itob'a norĩ hã ma tô ato pese, ahâ na. 22Tawamhã te te da'apese parimhã, te oto tãma nharĩ zahuré, Zuwã Batistaha mreme 'madâ'â pese 'wa norĩ ma, ãne:
— Apâ te za ane wa'wa Zuwãhã u, tãma ĩwasu'u wa'aba da. Itob'a norĩ hã to pese za'ra wa, ma tô apâ te te 're rob'madâ'â za'ra. Imorĩ'õ norĩ hã te oto para na 're nomro. Duré i'wa're ré norĩ hã ma tô tipese za'ra. Hâiba wẽ na te oto 're nomro. Duré ipo'reptõ norĩ hã te oto 're simipari za'ra. Duré 're idâ'â za'ra mono norĩ hã ma tô duré apâ 're hâiwa'utu za'ra. Ĩwasu'uwẽ hã ma tô duré isibrob'õ norĩ hã te te 're wapari za'ra. Ãne na te za tãma irowasu'u wa'wa, Zuwãhã ma. 23Ni'wam norĩ hã, wa hã 'Re ihâimana u'âsi mono zadawa para we ĩmorĩ na, 'râwi ĩ'ãma 're siwawã za'ra mono õ wamhã, ta norĩ ma si tãma 're rowẽ uptabi za'ra mono di za.
24Tawamhã apâ te tineb zahuré Zuwã Batistaha u, aibâ norĩ hã. Tawamhã isa'u zahuré si, te Zuwã hã dama wasu'u wẽ, Zezusi hã. Da'ahâ na idasi'ubumroi mono norĩ ma, te ãne tãma rowasu'u za'ra:
— A'ubuni u, ma tô 're anomro aba mo, Zuwã hã sabu za'ra wa'aba da. E tawamhã du teihi 'rãihâ hã uware wa, rowa'u te te 're ihâpâ za'ra mono ne, Zuwã Batista hã roti da, sib'uware na 're hâimana mono wa, ma tô itẽme 're anomro aba mo. Mare di. Ta hã roti da, siptete na ma tô 're hâimana. 25E uza wẽ na 're si'uza mono wa, ma tô itẽme 're anomro aba mo, 're sabu za'ra wa'aba mono da. Mare di. Uza wẽ na 're si'uza mono õ di. Uza wẽ ré 're inomro mono norĩ hã, te apito nhorõwa ãma 're si'ubumro. Uburé marĩ hã iwẽ uptabi si, te tãma 're hâimana za'ra, ta norĩ ma. 26Ma'ãpé, ĩma wasu'u za'ra wa'aba za. E 'Re ihâimana u'âsi mono zadawa wasu'u'wai wa, te itẽme 're anomro aba mo, 're sabu za'ra wa'aba mono da. Tane tô. Iwana isadawa wasu'u'wa norĩ hã, ipire na te te siwi ãma wabzu za'ra õ di, Zuwã hã. 27Duréihã ma tô 'Re ihâimana u'âsi mono zadawa 'mahârâ'wa hã ãne ãma rob'ui'éré, Zuwãhã ãma, 'Re ihâimana u'âsi mono mreme na: “Ĩzadawa wasu'u'wa, wa za aiwana satõ, te te asô ropese mono da.”
28— Uburé iwana 're inomro mono norĩ hã te te siwi ãma wabzu za'ra õ di Zuwã hã, isimiromhuri pire na hã. Tane nherẽ, 'Re ihâimana u'âsi mono te te 're ida'azawi mono zéb zarina, te te 're ida'apawapto mono zé hã, hâiba ré, te te waihu'u õ di za, Zuwã hã. Ni'wam norĩ si, 'Re ihâimana u'âsi mono nhib'a'uwẽ norĩ si te za te te sina 're waihu'u za'ra, i'uirĩ na. Tahawa, ta norĩ hã te za pire na 're hâimana za'ra, Zuwã Batistaha nhipai u. Duré ni'wam norĩ hã 'Re ihâimana u'âsi mono nhib'a'uwẽ norĩ hã, tisiré norĩ ma, wapu na 're hâimana za'ra mono nherẽ, te za pire na 're hâimana za'ra, Zuwã Batistaha nhipai u, ta norĩ si i'uirĩ na te te sina 're waihu'u za'ra mono wa, 'Re ihâimana u'âsi mono te te 're ida'apawapto mono zé hã.
29Tawamhã uburé ma tô isimirowasu'u hã wapari za'ra ni. Danhib'apito ma, rob'uiprazé arĩ ubumroi'wa norĩ zama, ma tô dame wapari za'ra. Ta norĩ hã ma tô oto wapari pese za'ra, 'Re ihâimana u'âsi mono nhimiroti hã. Tahawa, ma tô Zuwã hã â dawabzuri hã tãma 'manharĩ za'ra. 30Tazahã, farizeu norĩ hã rowahutu'wa norĩ me, ma tô siwi wẽ'õ za'ra 'râwi, 'Re ihâimana u'âsi mono te te sima ida'awẽzé hã. Tahawa, te te siwi wẽ'õ za'ra wa, â dawabzuri hã te te tãma 'manharĩ za'ra õ di, Zuwã hã.
31Tawamhã Zezusi te duré dama tinha:
— E 'wam norĩ ãma, wa za ãma simiré'é za'ra, ã nimosi dapoto tém norĩ ãma hã. 32Ãté ai'uté norĩ ãma, wa za ãma simiré'é za'ra. 'Ri nhi'riti wa, da te dasina 're i'ubumroi mono zéb ãma si'ubumroi ré, ãne ai'uté norĩ hã te za si'mahârâ za'ra: “Wa norĩ hã wa tô aima rowamreme za'ra wa'aba ni aré, dasina damro wa, rowamremezém na. Tazahã, ãma ato za'ra wa'aba õ di. Duré da te dasina 're ti'a za'ra mono wa, rowamremezém na, wa tô aré aima rowamreme za'ra wa'aba ni. Tazahã, a norĩ wa'wa hã wazu ai'ru'ru wa'aba õ di.” Ãne te za si'mahârâ za'ra. 33Tane a norĩ wa'wa hã. Zuwã Batista hã te sai ãna nasi aimasisi. Duré uwa 'rãi wa'u isé hã te te 're hâsi mono õ di. Tazahã, ãne 're hâimana mono wa, ma tô tãma 're inharĩ wasété za'ra wa'aba mo, wa'uburé ré 're imorĩ na. 34Ti'ai ãma Dasiré Ipodo hã te dasazém na 're sa. Uwa 'rãi wa'u isé hã te duré te te dame 're hâsi. Tazahã, sa za'ẽtẽ na 're isai mono na, duré uwa 'rãi wa'u isé zei 'wa na, ma tô tãma 're inharĩ wasété za'ra wa'aba mo. Duré siwa'ru 're idanomro mono norĩ siwadi na, ma tô tãma 're inharĩ wasété za'ra wa'aba mo. 35Tane tô. 'Re ihâimana u'âsi mono nhimiroti hã, wẽ di. Tawamhã isimiroti hã da te dasima 're wẽ za'ra mono wamhã, te za iwẽ hã da te 're waihu'u za'ra. Da te 're wẽ'õ za'ra mono õ di za, iwẽ hã dasiwi.
Simahã wasu'u
36Tawamhã aibâ farizeu hã ma tô Zezusihi zô hâ, ime sa da. Tahawa, te Zezusi hã isõrõwa u mo. Tawamhã ma tô nhamra tame, sa da. 37Tame 'ri wa'õtõ ãma hã ma tô iwasu'u hã wapa pi'õ hã, siwa'ru 're imorĩ hã. Farizeu nhorõwa ãma sa da, isãmra na ma tô wapa. Tahawa, ma tô simhi ti'â, Zezusihi zarina, wedewa'u zadaze ré hã. Simhi hã, ẽtẽ'a 'manharĩ. Wa'âbâ za'ẽtẽ di, wedewa'u zadaze hã. 38Tawamhã Zezusihi babarã na ma tô nhamra, wawa sina. Wawai wamhã, Zezusihi para nhisiwi, ma tô ti'upĩni a'a. Tahawa, te tizéré na tãma u'õ. Tawamhã da te 're idatob'rata hârâ za'ra mono ne, tizadawa na ma tô para hârâ. Ma tô wedewa'u zadaze hã ipara nhisiwimhã sa'wa, pi'õ hã. 39Tawamhã farizeu te te 'madâ'â wamhã, ma tô tipẽ'ẽ na tãma tinha, Zezusihi ma, ãne:
— Tô sena, 'Re ihâimana u'âsi mono zadawa wasu'u'wai 'wa'âhã, te aré iwasété na ãma waihu'u, pi'õi ãma hã. Tawamhã te aré tiwi sisawi, te te upi tõ da.
40Tawamhã isimirosa'rada hã te te sina waihu'u wa, te aibâ ma tinha, Zezusi hã, ãne:
— Sima, marĩ, wa za aima waihu'u, waihu'u da.
Tawamhã Sima te asa tãma tinha:
— Ma'ãpé, ĩma waihu'u, marĩ hã te waihu'u da.
41Tahawa, te Zezusi hã tãma rowasu'u oto, ãne:
— Aibâ norĩ hã ma tô rob'uiprazéb õ wa, taré a'â dawi 'maiwaptẽrẽ zahuré. Imorĩ'rada hã 500 na ma tô dawi waptẽ. Duré ihâiba amo hã, 50 na ma tô dawi waptẽ. Niwapsi te za isõwa're're tãma sõmri zahuré, aibâ ma. 42Tawamhã rob'uiprazéb õ wa, isõwa're're te te tãma sõmri zahuré õ di. Sõpru wa, ma tô tãma waihu'u zahuré aibâ hã, isõwa're're te te tãma sõmri zahuré tõ da. E 'wa hã te za sawi pese, aibâ isõpru hã. E 500 na te te tãma isõmri hã te za sawi pese. E 50 na te te tãma isõmri hã te za sawi pese.
43Tawamhã Sima te asa tãma tinha, ãne:
— Ãté 500 na te te tãma isõmri hã te za sawi pese.
Tawamhã Zezusi te duré asa tãma tinha:
— Tane tô. I'uwaibaba ma tô ĩma iwaihu.
44Tawamhã pi'õi u sipi'rai wamhã, te duré tãma tinha, Simahã ma, ãne:
— Ãhãta, pi'õ hã. Tãma ĩzawi pese di. A hã we ĩzébré wamhã, â hã dama 'rui õ di, da te ĩpara upsõ da. Pi'õ si ma tô ĩpara upsõ, ti'upĩni na. Ma tô duré tizéré na ĩpara u'õ. 45A hã we ĩwisi wi, ĩzawi õ di, ĩtob'rata hârâ na. Pi'õ si ĩzébré wi, ma tô ĩpara hârâ. 46A hã dama ĩ'rui õ di, azeitona 'rãi wa'ui wam na da te ĩzéré u'ré da, ĩma robze da. Pi'õ hã wedewa'u zadaze pire hã ma tô ĩpara nhisiwi sa'wa. 47Tãma ĩzawi uptabi wa, ma tô ĩma 'manharĩ wẽ. Marĩ hã te te 're i'ab'manharĩ wasété mono zé hã ahâ nherẽ, wa tô tãma tipa. Tahawa, tãma ĩzawi uptabi di, te tãma apari wa. Dawasété ahâ na 're dasisãmri za'ra mono õ wamhã, da te dasina 're waihu'u za'ra mono õ di za, 'Re ihâimana u'âsi mono, dawasété ahâ na te te dama 're i'apari mono zé hã. Tawamhã 'Re ihâimana u'âsi mono, dama sawi prã ti za. Dawasété ahâ na 're dasisãmri za'ra mono wapsi, te za da te dasina 're waihu'u za'ra, 'Re ihâimana u'âsi mono, dawasété ahâ na te te dama 're i'apari mono zé hã. Tawamhã 'Re ihâimana u'âsi mono, dama sawi uptabi di za.
48Tawamhã pi'õi ma, te oto tinha, ãne:
— Marĩ hã 're i'ab'manharĩ wasété mono zé hã wa tô oto aima tipa.
49Tawamhã Zezusihi mreme, ma tô pi'õi ãma wapari za'ra, isiré isaihuri norĩ hã. Tahawa, ma tô tipẽ'ẽ na tãma nharĩ za'ra:
— E 'wa hã õ hã, marĩ, da te 're i'manharĩ wasété za'ra mono zé, te te dama 're i'apari mono hã.
50Tawamhã Zezusi te duré pi'õi ma tinha, ãne:
— Ĩzazei wa, wa tô aipawapto, aiwasédé hã rẽme pese da. Rowẽ na te za oto 're aimo.
Aktualisht i përzgjedhur:
Luca 7: xavBP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011, Wycliffe Bible Translators, Inc.All rights reserved.