Mien Bible (Thai Script) © Thailand Bible Society, 2007

เฒี้ยว ทิน-ฮู่ง เหฒย ต้าย เญย เหยียด ฒู้ง หล่ม หฒั่ง กะน้าย เซ นาง เก้า ไกว๋ เจี๋ย. นาง หน่าย ก๋า วั้ว เต้า มเซียะ ตอน, “ทิน-ฮู่ง หฒะเก้ง ก๊อง ไม้ ปุน เม่ย บัว หญั่น เยียม น้าย หฮวีง กะญั์ว เญย หาย หญู่ง เปี๊ยว ไฟ?”
วั้ว เต้า มเซียะ ตอน เตา นาง, “เยียม หฮวีง กะญั์ว เญย ฒู่งๆ เปี๊ยว เยีย บัว หญั่น ตุ๊ เญย. มป่า ทิน-ฮู่ง ก๊อง, ‘เยียม หฮวีง บุด๋ง วั้ว ฒู่ง เดี๋ยง เญย เปี๊ยว ธิน-หม่าน ไม้ ตู๋ง หญั่น, เลี่ยม ไม้ ตู๋ง มัวะ. ไม้ เฒย แอ๊ะ, เม่ย บัว ฒู้ง หฒุ ไต่ อ๊ะ.’”
นาง ก๊อง บั๋ว มเซียะ ตอน, “เม่ย บัว ไม้ ไต่ เหลาะ. ทิน-ฮู่ง ฮนั้ง น้าย ก๊อง เหว่ย หฒุ นิ่น ฮิ้ว ตุ๊ เม่ย บัว หญั่น ลิ์ว, เม่ย บัว ไฮ่ ฮนั้ม ตุ๊ ทง, เม่ย บัว ฯฒฯ ฮนั้ง ทิน-ฮู่ง นอ, ไฮ่ ฮิ้ว ตุ๊ หลง ฮิ้ว ตุ๊ เธี้ยว.”
วั้ว เต้า มเซียะ ตอน หมั่ง ปวัด วั้ว ฒู่ง เปี๊ยว เหฑว่ย เญย, ต๋าย หญั่น คู้ เญย. นิ่น หย่า ฮนั้ม ต้าย สี ก๊อง ไฮ่ ปุน เมี่ยน ไกว นอ, หฒะเก้ง หลง ไห่. นิ่น ฯฒฯ แก๊ะ ต้าย หญั่น อ๊ะ. แอ๋ง ปุน เต๋ย นิ่น เญย โหฆ หญั่น. นิ่น บัว หญั่น ลิ์ว, นิ่น บัว ไฮ่ ฮนั้ม ตุ๊ ทง. นิ่น บัว ฮิ้ว ตุ๊ กั้น แล่ง แก๊ง เญย เยียม, ฯฒฯ เฒาะ ง่ง หญอ เดี๋ยง-น่อม ลุ่น ต้าย ผง เจี๊ยน อ๊ะ.
วั้ว ฮนอย, ลู่ง ม์าน-หฮมวัง เญย เฒี่ยง โห่, นิ่น บัว ไฮ์ เฒี้ยว ทิน-ฮู่ง เยียม หฮวีง กะญั์ว ยั่ง เจ๊า. วั้ว เต้า มจั่ง ตอน เหธา นิ่น เญย เอ๊า ฯฒฯ เปียะ หฮวีง เญย เดี๋ยง-หล่ม มี่ง ปี๋ง เจี๊ยน เฒี้ยว. มป่า เฒี้ยว ทิน-ฮู่ง เห่ว วั้ว เต้า มจั่ง ตอน, “เม่ย เยียม หาย แล่?”
วั้ว เต้า มจั่ง ตอน เตา, “เยีย ไฮ์ เม่ย เยียม น้าย หฮวีง. เยีย กั้ม เหฑีย ไห่ เหว่ย หฒุ เยีย แล่ง แก๊ง เญย เยียม ฯฒฯ ปี๋ง เม่ย.”
ทิน-ฮู่ง หน่าย ก๋า, “หาย เต้า บั๋ว เม่ย, เม่ย เญย ซิน แล่ง แก๊ง เญย? เม่ย หญั่น ต้ง เยีย หัด เม่ย ไม้ ตู๋ง หญั่น วั้ว ฒู่ง เปี๊ยว หมี่ อ๊ะ ซ่าะ?”
วั้ว เต้า มจั่ง ตอน เตา, “ต้ง เม่ย ปุน ต้าย เหธา เยีย เยียม น้าย วั้ว เต้า มเซียะ ตอน, นิ่น ปุน น้าย ฒู่ง เดี๋ยง เญย เปี๊ยว เยีย, เยีย ฯฒฯ หญั่น หมี่ อ๊ะ.”
เฒี้ยว ทิน-ฮู่ง หน่าย ก๋า วั้ว เต้า มเซียะ ตอน, “เม่ย โหฒว ธ้วด หาย หญู่ง สี่ หมี่ อ๊ะ?”
วั้ว เต้า มเซียะ ตอน เตา, “นาง กั้น ดั๊ว เยีย, เยีย ฯฒฯ หญั่น.”

เฒี้ยว ทิน-ฮู่ง บั๋ว วั้ว ติ้ว นาง, “หลาย เม่ย ฮนั้ง น้าย นอ โหฒว,
“เม่ย ฯฒฯ หฒุ โฮ้ว เก้า เฮนี้ย เหยียด ฒู้ง แซง-คู้,
เก้า ธั้ม เหยียด ฒู้ง เฮยี่ย ฒ่อย.
เม่ย อ๋อย หฒุ หล่ง กะเซีย ลุ่ย เจี๊ยน กัน เดา มี่ง,
เหยียด เสย อ๋อย หฒุ หญั่น เนีย-บูง.
เยีย อ๋อย ปุน เม่ย เหธา น้าย เต้า มเซียะ ตอน ต๊า วิน,
หย่า ปุน เม่ย เญย เฒ้ย-ฟุน เหธา นิ่น เญย เฒ้ย-ฟุน โหฒว วิน-วั้ง.
นิ่น เญย เฒ้ย-ฟุน อ๋อย เบ๊าะ เม่ย เญย มฆ้อง ฮู้,
เม่ย หย่า อ๋อย เญาะ นิ่น เญย เหฒา-โฆ.”
ทิน-ฮู่ง หย่า ก๊อง บั๋ว วั้ว เต้า มเซียะ ตอน,
“ม่าย ซิน เญย เฒี่ยง โห่ เยีย อ๋อย จา ทิบ ปุน เม่ย โค้ว.
ดุ๊ด ซิน เญย เฒี่ยง โห่ เม่ย อ๋อย หฒุ มุน.
มป่า เม่ย หธ่อ อ๋อย หล่ง เม่ย เญย โหฆ.
เม่ย เญย โหฆ หย่า อ๋อย กุ๊น เจี๊ยน เม่ย.”
ทิน-ฮู่ง หย่า ก๊อง บั๋ว อา​ดัม, “หลาย เม่ย หมวัง เม่ย เญย เอ๊า เญย หว่า, หญั่น ต้ง เยีย หัด เม่ย, ‘ไม้ ตู๋ง หญั่น วั้ว ฒู่ง เปี๊ยว,’
เดา ฯฒฯ หลาย เม่ย โหฒว เญย สี่ หฒุ โฮ้ว.
เม่ย เหยียด เสย อ๋อย หฒุ ปั่ง เดา
โหฒว กง โค้ว หธีง ตุ๊ หญั่น.
เดา อ๋อย เหว่ย เม่ย ธ้วด เมี้ย ธ้วด ฌิ้ม.
เม่ย หย่า อ๋อย หฒุ หญั่น เยียม เดา ธ้วด เญย ไล-เมี้ย.
เม่ย อ๋อย หฒุ โหฒว กง โค้ว ธ้วด เหฒีย ซิน หั่น
วั้ว เต๋ย เดา หธีง ต้าย ไฮ่ ธ้วด เต๋ย กะน้าย.
โหฒว เถา เม่ย แอ๋ง หฑวน เป๋น เนีย,
เหว่ย หฒุ เม่ย เซ เนีย เป๋น ต้าย.
เม่ย เซ เนีย,
เม่ย อ๋อย หฒุ แอ๋ง เป๋น หฑุ่น เนีย อ๊ะ.”
อา​ดัม เถง นิ่น เญย เอ๊า ธ้วด บั๋ว เห่ว ฮา​วา, เหว่ย หฒุ นิ่น โหฒว ลู่ง เดี๊ย เมี่ยน เญย มา.
เฒี้ยว ทิน-ฮู่ง หล่ง แซง-คู้ เญย ด๊บ โหฒว ลุย-โหว ปุน อา​ดัม เหธา นิ่น เญย เอ๊า, ฮา​วา, ฒุ.

เฒี้ยว ทิน-ฮู่ง แอ๋ง ก๊อง, “อี้ หฒั่น วั้ว ล่าน เมี่ยน เซ ฮนั้ง บัว นอ, ฮิ้ว ตุ๊ หลง, ฮิ้ว ตุ๊ เธี้ยว. อ๋อย หฒุ ไม ตู๋ง ปุน นิ่น ซูง ปั์ว มี่ง แก๊ะ เฒี่ยง แหม่ง เญย เปี๊ยว หญั่น ฯฒฯ เหยียด ลิ์ว ตุ๊ เฒี่ยง เจี๊ยน.” เฒี้ยว ทิน-ฮู่ง ฯฒฯ หฒุ่น นิ่น ธ้วด เอ​เดน หฮวีง หย่า ปุน นิ่น โหฒว เหลียง-เด่ย เยียม ทิน-ฮู่ง หล่ง นั้น นิ่น ต้าย วั้ว เต๋ย เนีย. เฒี้ยว หฒุ่น นิ่น ธ้วด ลิ์ว, เยียม เอ​เดน หฮวีง เญย ตง ปูง แหมง, เฒี้ยว ปุน เค​ลู​บิม ฒั้ว เจี๊ยน. แอ๋ง ม่าย ฒูง ม่าย โต์ว เญย หฑุ ด๊าว กวิ้นๆ เปยย ปูง เญย, ตั๊ง เจี๊ยน มี่ง เฒี่ยง แหม่ง เปี๊ยว เญย เดี๋ยง วั้ว ติ้ว เจ๊า.

Slušaj ทิน เต่ย โต้ว 3