If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

मरियम और तियांरी बौइण मारथा रै गाऊं बैतनिय्याह रौ लाज़र नावां रौ एक आदमी बिमार थौ। इऐ सेज़ी मरियम थी ज़ुणिऐ बासिऐ प्रभु तौल़ै किमती तेल पाइयौ तेसरै बांगणै आपणै बाल़ा कौरी गुशै थै, इंयारौ भाई लाज़र बिमार थौ। तैबै तियांरी बौइणिऐ तेस औटाउणा लै आदमी भेज़ीयौ बोलौ, “ओ प्रभु, देख, ज़ास आइलै तू प्यार छ़ाड़ाई, सेऊ बिमार आ।” इणै शुणियौ यीशुऐ बोलौ, “एज़ी बिमारी मौरणै री नाईं। पर परमेश्‍वरा री बौड़ाई लै आ, कि तेथ कौरी परमेश्‍वरा रै छ़ोहरु री बौड़ाई औआ।” यीशु ता मारथा और तियांरी बौइण और लाज़रा कु प्यार कौरा थौ। पर ज़ेबी तिणीऐ शुणौ कि सेऊ बिमार आ, ता ज़ेज़ी ज़ागाह दी सेऊ थौ, तिऐ दुई दीन औज़ौ रुकी गौ। तेत बासिऐ तिणीऐ आपणै च़ेलेऊ लै बोलौ, “च़ालौ, आमै तौंइऐ यहुदिया परदेशा लै डेई।” च़ेलेउऐ यीशु लै बोलौ, “ओ गुरुजी, इबी ता यहुदी मुख्यै ताऊं ढोल़ियाउणौ च़ाहा थै, आबै का तू औज़ौ भी तिऐ डिआई?” यीशुऐ ज़वाब दैऔ, “का दिना रै बारह घंटै नाईं औन्दै? अगर कुण दुसै हाण्डा लौ, ता ठोकर नाईं लागदी, कैलैकि सेऊ इऐं धौतरी रौ प्याशौ देखा आ। पर अगर कुण राची हाण्डा लौ ता ठोकर लागा आ, कैलैकि तिउंकै कोई प्याशौ नाईं आ।” एज़ी बुशै बोलणै बासिऐ तिणीऐ तिउंलै बोलौ, “आमारौ गोश्टण लाज़र सुती गौ आ, पर हाऊं तेस उज़ीयाउंदै डिआऊ।” तैबै च़ेलेउऐ यीशु लै बोलौ, “ओ प्रभु, अगर सेऊ सुती गौ आ, ता च़ांगौ औआ सा।” यीशुऐ ता तेसरै मौरणै रै बारै दी बोलौ थौ, पर सै सौमझ़ै कि सेऊ निजा दी सुतणै रै बारै दी बोलौ। तैबै यीशुऐ तिउंकै साफ-साफ बोली गौ, “लाज़र मौरी गौ आ। और हाऊं तुमारी वज़ाह कु खुश ऊ कि हाऊं तिऐ नाईं थौ ज़ेथकु तुमै विश्वास कौरा। पर आबै च़ालौ, आमै तेस काऐ डेई।” तैबै थोमै ज़ासलै दिदुमुस भी बोला थै, आपणै साथी च़ेलेउलै बोलौ, “च़ालौ, आमै भी एस आइलै मौरदै डेई।”

बैतनिय्याह गांवा रै नज़दीक पौउंच़िऔ यीशु कै पौतौ लागौ कि लाज़रा री लाश ओडाच़ी दी छ़ाड़ियौ च़ार दीन हुई गौऐ ई। बेतनिय्याह यरुशलेमा कु कोई चीन किलोमिटर दूर थौ। भौरी यहुदी लोग मारथा और मरियमा काऐ तिंउरै भाई रौ पसताऔ दैंदै थै आशै औन्दै। ज़ेबी मारथै यीशु रै आशणै री खुशी री खौबर शुणी ता सै तेस मिलदै डेई, पर मरियम रौई घौरा कै बोशी। मारथै यीशु लै बोलौ, “ओ प्रभु, अगर तू इदै औआ थौ, ता मैरौ भाई नाईं मौरा थौ। और इबी भी हाऊं ज़ाणाऊ कि ज़ो कुछ़ तू परमेश्‍वरा कु मांगा लौ, परमेश्‍वर ताउंलै दिआ आ।” यीशुऐ तिंआलै बोलौ, “तैरौ भाई तौंइऐ ज़िउंदौ औआ आ।” मारथै यीशु लै बोलौ, “हाऊं ज़ाणाऊ कि आखरी दिना दी मौरणै बासिऐ ज़िउणै रै बौगतै सेऊ ज़िउंदौ औआ।” यीशुऐ तियांलै बोलौ, “हाऊं ऊ सेऊ ज़ो मौरै औन्दै ज़िउंदै कौराऊ। ज़ुण मुं माथै विश्वास छ़ाड़ा आ, अगर सेऊ मौरा भी लौ, तैबै भी ज़िउंदौ औआ, ज़ुण ज़िउंदै ई और मुं माथै विश्वास छ़ाड़ाई, सै केबी भी ना मौरदै। का तू एज़ी बुशा माथै विश्वास कौरा ई?” तिंआऐ यीशु लै बोलौ, “ओ प्रभु, हाऊं विश्वास कौराऊ कि परमेश्‍वरा रौ छ़ोहरु मसीहा आ ज़ुण धौतरी माथै आशणै वाल़ौ थौ सेऊ तू ई।”

इणै बोलीयौ सै डेई गोई, और आपणी बौइण मरियम औटाइयौ च़ुटुकच़ार बोलौ, “गुरु इदरी आ और ताऊं औटावा आ।” इणै शुणियौ सै फेटी उठीयौ तेस काऐ आशी। यीशु इबी झ़ांऊ गांवा दी नाईं पौउंच़ौ थौ पर सेज़ी ज़ागाह दी थौ ज़िऐ मारथा तेसकु मिली थी। तैबै ज़ो यहुदी लोग तिंआ आइलै घौरा दी थै और तियांलै पसताऔ दैंदै थै आशै औन्दै, ज़ेबी तिंउऐ देखौ कि मरियम फेटी उठीयौ बाइरै डेई गोई ता इणै सौमझ़ियौ कि सै ओडाच़ी दी लेरदै डिआ सा, ता तिंआ पिछ़ु डेई गौऐ। ज़ेबी मरियम तिऐ पौउंच़ी ज़िऐ यीशु थौ ता तेस देखीयौ ई तेसरै बांगणै माथै पौड़ी और बोलौ, “ओ प्रभु, अगर तू इदै औआ थौ, ता मैरौ भाई नाईं मौरा थौ।” ज़ेबी यीशुऐ सै और तिंआ आइलै आशै औन्दै यहुदी लोग, लेरदै देखै, ता सेऊ आत्मा दी निराश और भौरी दुखी हुऔ, और बोलौ, “तुमुऐ तेसरौ मौड़ौ किऐ आ दाबौ औन्दौ?” तिंउऐ तेसलै बोलौ, “ओ प्रभु, हाण्डीयौ देख।” यीशु लेरौ। तैबै यहुदी बोलदै लागै, “देखौ, एऊ तेस आइलै केती प्यार कौरा थौ।” पर तिऊं मांझ़िऐ कई लोगुऐ बोलौ, “का एऊ ज़ुणिऐ शेड़ै री आखी ठीक कौरी थी, इणौ भी नाईं कौरी बौल़ौ कि एऊ आदमी नाईं मौरा?”

यीशु तौंइऐ ज़िवा कु भौरी दुखी हुइयौ ओडाच़ी काऐ आशौ। सेऊ एक ढवार थौ और तेस माथै एक पात्थर थौ छ़ाड़ौ औन्दौ। यीशुऐ बोलौ, “एस पात्थर पोरु कौरौ।” तेस मौरै औन्दै री बौइण मारथै तेसलै बोलौ, “ओ प्रभु, एथकु ता आबै बास आशा आ, कैलैकि एस मारीयौ आबै च़ार दीन हुई गौऐ ई।” यीशुऐ तिंआलै बोलौ, “का मुंइऐ ताउंलै नाईं बोलौ थौ कि अगर तू विश्वास कौरा ली, ता परमेश्‍वरा री महिमा देखाल़ी।” तैबै तिंउऐ सेऊ पात्थर तिदरा कु पोरु कियौ। यीशुऐ सौरगा भिलै देखीयौ बोलौ, “ओ बाब, हाऊं तैरौ धन्यबाद कौराऊ कि ताइंऐ मेरी प्राथना शुणी गोई आ। हाऊं ज़ाणा थौ कि तू सौदा मेरी शुणाई, पर ज़ो भीड़ ओरु-पोरु खौड़ी आ, तिउंरी बजह कु मुंइऐ इणौ ज़ोरै बोलौ आ, ज़ेथ कौरी इऐ विश्वास कौरा कि ताइंऐ हाऊं भेज़ौ ऊ।” इणौ बोलीयौ यीशुऐ ज़ोरै हाका देइयौ बोलौ, “ओ लाज़र, निकल़ियौ आश!” ज़ुण मौरी गौ थौ, सेऊ कफना कौरी हाथा लाता कु बानुऔ औन्दौ निकल़ियौ आशौ, और तेसरौ मुं थौ कापड़ै दी मेटुऔ औन्दौ। यीशुऐ तिउंलै बोलौ, “एस पोरु खोलौ और डेउणै दैऔ।”


तैबै ज़ुण यहुदी लोग मरियमा काऐ थै आशै औन्दै और ज़ुणिऐ तेसरौ एज़ौ काम देखौ ज़ो तिणीऐ कियौ थौ, तिऊं मांझ़िआ कु भौरी लोगुऐ तेस माथै विश्वास कियौ। पर तिऊं मांझ़िआ कु कुछ़ लोगुऐ फरीसीउ काऐ डेइयौ यीशु रै कामा रै बारै दी बोलौ। एथीलै बौड़ै याजकु और फरीसीउऐ बौड़ी खुंबल़ी औटाई और बोलौ, “आमै कौरी का ई? एऊ आदमी ता भौरी हैरानी वाल़ै काम देखाल़ा आ। अगर आमै एस इणी छ़ाड़ुलै, ता सारै तेस माथै विश्वास कौरा ई, और रोमी राज़ आशीयौ आमारी ज़ागाह और ज़ाती, दुइया माथै राज़ कौरा।” तैबै तिऊं मांझ़िआ कु काइफा नावां रै एकी आदमीऐ ज़ुण सेज़ी साला दी परधान याजक थौ, बोलौ, “तुमै कुछ़ भी नाईं ज़ाणदै। और ना इणौ सौमझ़दै कि तुमुलै इणौ भौलौ आ कि आमारै लोगु लै एक आदमी मौरा, और सारै इस्राइली लोगु नाश ना औआ।” एज़ी बुशै तिणीऐ आपणी तौरफा कु नाईं बोली, पर सेज़ी साला रै परधान याजक हुइयौ भविष्यवाणी की, कि यीशु इस्राइली लोगु लै मौरा आ। और ना सिरफ इस्राइली लोगु लै पर एथलै भी कि परमेश्‍वरा री भटकी ऐन्दी सन्तान कौट्ठै कौरा। सेज़ै दिना कु सै यहुदी मुख्यै तेस झ़ांगणै री कोशिश कौरदै लागै। एथीलै यीशु तेबी कु यहुदिऊ मांझ़िऐ पौगड़ै हुइयौ नाईं हाण्डौ, पर तिदरा कु डेइऔ ज़ांगल़ा रै नज़दीका रै परदेशा दी इफ्राईम नावां रै एकी इलाकै दी डैऔ। और आपणै च़ेलेऊ आइलै तिदरी रौउंदै लागौ। यहुदिऊ रै फसह रौ साज़ौ नज़दीक थौ, और भौरी लोग साज़ै कु पैहलै गांवा कु यरुशलेमा दी परमेश्‍वरा रै घौरा डेवै ताकी आपु शुद्ध हुआ। बौड़ै याजकु और फरीसीउऐ एज़ौ हुकम थौ दैऔ औन्दौ कि अगर कासकै इणौ पौतौ लागा लौ कि यीशु किऐ आ, ता आमुकै बोलेऊ, ताकी आमै तेस पाकड़ी बौल़ी। तैबै बौड़ै याजक और फरीसी यीशु लोड़दै लागै और परमेश्‍वरा रै घौरा दी खौड़ै हुइयौ आपु मांझ़िऐ बोलदै लागै, “तुमै का सुंच़ाई? का सेऊ साज़ै दी नाईं आशदौ?”

Slušaj यहुन्ना 11