If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

फसह रै साज़ै कु पैहलै, ज़ेबी यीशुऐ ज़ाणी गौ कि मैरौ बौगत आशी गौ आ कि धौतरी छ़ाड़ियौ वापिस बाबा काऐ डेऊ, ता आपणै लोगु कु ज़ुण तेस पिछ़ु हाण्डा थै ज़िणौ प्यार सेऊ छ़ाड़ा थौ, सौदा झ़ांऊ तिणौऔ प्यार कौरा। ब्याल़की रोटी खाणै रै बौगता दी, शैतानै शमौना रै छ़ोहरु यहुदा इस्करियोती रै ज़िवा दी इणी बूश पाई गोई कि तेस पकड़ावा, “यीशुऐ, इणौ ज़ाणीऔ कि बाबै सब कुछ़ मैरै हाथा दी कौरी गौ आ। और हाऊं परमेश्‍वरा रै काऐ कु आशौ औन्दौ, और परमेश्‍वरा रै काऐ वापिस डिआऊ, यीशु रोटी छ़ाड़ियौ उठौ और आपणै उपरा रै जुड़कै पोरु खोलै, और आपणी कौमरा दी गाची बानिऔ। ओखरा दी पाणी भौरीऔ च़ेलेऊ रै बांगणै धोउंदै और ज़ेज़ी गाची तेसरी कौमरा दी थी बानी ऐन्दी तेथ कौरी गुशदै लागौ।” ज़ेबी सेऊ शमौन पतरसा काऐ आशौ, तैबै पतरसै तेसलै बोलौ, “ओ प्रभु, का तू मैरै बांगणै धोआई?” यीशुऐ तेसलै ज़वाब दैऔ, “ज़ो हाऊं कौराऊ, तू एथरौ मतलब नाईं ज़ाणदौ, पर एथ बासिऐ सौमझ़ा ई।” पतरसै तेसलै बोलौ, “तू मैरै बांगणै केबी ना धोआलौ!” इणै शुणियौ यीशुऐ तेसलै बोलौ, “अगर हाऊं तैरै बांगणै नाईं धोऊ लै, ता मुं आइलै तैरौ कुछ़ भी रिश्तौ नाईं।” शमौन पतरसै बोलौ, “ओ प्रभु, ता मैरै बांगणै नाईं, पर हाथ और मूंड़ भी धोऊ।” यीशुऐ तेसलै बोलौ, “ज़ो धोउई गौ आ तेस बांगणै रै सिवाऐ ओर कुछ़ धोउणै री ज़ुरत नाईं, पर सेऊ बिलकुल साफ आ, और तुमै शुद्ध ई पर सौभी रै सौभी नाईं।” सेऊ ता आपणै पकड़ाउणै वाल़ौ ज़ाणा थौ एथीलै तिणीऐ बोलौ, “कि तुमै सौभी रै सौभी शुद्ध नाईं।” ज़ेबी तिणीऐ तिंउरै बांगणै धोई गौऐ, और आपणै जुड़कै भिड़ीयौ बोशी गौ, ता तिउंलै बोलदै लागौ, “का तुमै सौमझ़ै ई कि मुंइऐ तुमु आइलै का किऔ? तुमै मुलै गुरु और प्रभु बोलाई, और ठीक ई बोलाई, कैलैकि हाऊं सेऊ ऊ। अगर मुंइऐ प्रभु और गुरु हुइयौ तुमारै बांगणै धोऐ ई, ता तुमुऐ भी एकी दुजै रै बांगणै धोउणै च़ांई। कैलैकि मुंइऐ तुमुलै नमुनौ देखाल़ी गौ आ कि ज़िणौ मुंइऐ तुमु आइलै किऔ आ, तुमुऐ भी तिणी ई कौरणौ। हाऊं तुमुलै सौच़्च़ौ-सौच़्च़ौ बोलाऊ, नुकुर आपणै मालिका कु बौड़ौ नाईं आ, और ना भेज़ौ औन्दौ आपणै भेज़णै वाल़ै कु। तुमै एज़ी बुशै ज़ाणाई और अगर तिऊं माना भी लै, ता तुमै आशीष वाल़ै ई। हाऊं तुमु सौभी रै बारै दी नाईं बोलदौ। ज़ुण मुंइऐ च़ुनी गौऐ, तिऊं हाऊं ज़ाणाऊ। पर एऊ एथलै आ कि पवित्रशास्त्रा रौ वचन पुरौ हुआ, ‘ज़ुण मुं आइलै गोष्टुइयौ रोटी खाआ, तिणीऐ मुलै धोखौ दैऔ आ।’ आबै हाऊं एथरै हुणै कु पैहलै तुमुलै बोलाऊ ताकी ज़ेबी इणौ हुआ लौ ता तुमै विश्वास कौरा कि हाऊं सेऊ ऊ। हाऊं तुमुलै सौच़्च़ौ-सौच़्च़ौ बोलाऊ कि ज़ुण मैंरै भेज़ै औन्दै अपणावा, सेऊ मुं अपणावा। और ज़ुण मुं अपणावा सेऊ मैंरै भेज़णै वाल़ौ अपणावा।”


एज़ी बुशै बोलीयौ यीशु आत्मा दी भौरी दु:खी हुऔ और एज़ी गवाही देई, “हाऊं तुमुकै सौच़्च़ौ-सौच़्च़ौ बोलाऊ कि तुमु मांझ़िआ कु एक मुं पकड़ावा सा।” च़ेलै डौरी-डौरीयौ कि एऊ कासरै बारै दी बोला आ, एकी दुजै भिलै देखदै लागै। तेसरै च़ेलै मांझ़िआ कु एक ज़ासकु यीशु प्यार कौरा थौ, यीशु री छ़ाती भिलै झुकियौ थौ बोशौ औन्दौ। शमौन पतरसै तेस भिलै इशारै कौरीऔ तेसकु पुछ़ौ, “बोल ता, एऊ कासरै बारै दी बोला आ?” तैबै तिणीऐ तिणी ई यीशु भिलै झुकियौ तेसकु पुछ़ौ, “ओ प्रभु, सेऊ कुण आ?” यीशुऐ ज़वाव दैऔ, “ज़ासलै हाऊं एज़ी रोटी रौ गासड़ु डुबाइयौ देऊ लै सेऊ आ।” और तिणीऐ गासड़ु डुबाइयौ शमौन इस्करियोती रै छ़ोहरु यहुदा लै दैऔ। गासड़ु खांदै ऐ, शैतान तेसदी बौसी गौ। तैबै यीशुऐ तेसलै बोलौ, “ज़ो तू कौरा ई, शिगरी कर।” पर बोशै औन्दै मांझ़िआ कु कोइऐ ना ज़ाणौ कि तिणीऐ एज़ी बूश तेसलै कैलै बोली आ। यहुदा कै पैसेऊ री थोउली रौआ थी, कुणी-कुणिऐ सौमझ़ौ कि यीशु तेसकै बोलदै लागौ औन्दौ कि ज़ो कुछ़ आमुकै साज़ै लै च़ांई तेस खरीदिऔ आण, या इणौ कि कुछ़ गरीबा लै दै। और सेऊ गासड़ु खाइयौ तेबी बाइरै डैऔ। और एऊ राचकौ बौगत थौ।

ज़ेबी सेऊ बाइरै डैऔ ता यीशुऐ बोलौ, “आबै आदमी रै छ़ोहरु री बौड़ाई हुई आ, और परमेश्‍वरा री बौड़ाई तेसी दी हुई आ। अगर तेसी दी परमेश्‍वरा री बौड़ाई हुई आ, ता परमेश्‍वर भी आपु तेसरी बौड़ाई कौरा आ, और फेटी कौरा। लोल़डेउओ, हाऊं थोड़ै बौगता झ़ांऊ तुमु काऐ ऊ। तैबै तुमै मुं लोड़ाई, और ज़िणौ मुंइऐ यहुदिऊ लै बोलौ, ‘ज़िऐ हाऊं डिआऊ तिऐ तुमै नाईं आशी बौल़दै, तिणी ई, हाऊं आबै तुमुलै भी बोलाऊ।’ हाऊं तुमुलै एक नौंवौ हुकम दिआऊ, कि एकी दुजै कु प्यार कौरौ। ज़िणौ मुंइऐ तुमु आइलै प्यार किऔ आ, तिणी ई तुमै भी एकी दुजै कु प्यार कौरौ। अगर तुमैं आपु मांझ़िऐ प्यार छ़ाड़ा लै, ता इणै कौरीऐ सारै ज़ाणालै कि तुमै मैरै च़ेलै ई।”


शमौन पतरसै तेसलै बोलौ, “ओ प्रभु, तू केशी डिआई?” यीशुऐ तेसलै ज़वाब दैऔ, “ज़िऐ हाऊं डिआऊ तिऐ तू इबी नाईं आशी बौल़दौ। पर एथ बासिऐ तू मुं पिछ़ु आशा ई।” पतरसै तेसलै बोलौ, “ओ प्रभु, इबी हाऊं ताऊं पिछ़ु कैलै ना आशी सौकदौ? हाऊं ता तेरी ताइंऐ मौरणा लै भी त्यार ऊ।” यीशुऐ ज़वाब दैऔ, “का तू मुलै आपणै प्राण दिआई? हाऊं ताऊं लै सौच़्च़ौ-सौच़्च़ौ बोलाऊ कि कुखड़ै बाशणै कु पैहलै तू चिया बारै बोलाई कि तू मुं नाईं ज़ाणदौ।

Slušaj यहुन्ना 13