If you have would like a copy of this version please contact info@davarpartners.org

Kulvi Outer Seraji New Testament, CC-BY-SA-4.0, The Love Fellowship (Text). Kulvi Outer Seraji New Testament Audio Bible, CC-BY-SA-4.0, Davar Partners International, 2022 (Audio).

औटर सेराजी  स्टैण्डर्ड वर्शन

This work is licensed under Creative Commons Attribution-ShareAlike 4.0 License.

पबित्र आत्मां निंयं तेभी ईशू कराहणीं उज़ल़ ज़ैगा लै और तिधी रहअ राख्स तेऊ परखदअ लागी। ईशू रहअ च़ाल़्ही धैल़ै और च़ाल़्ही राची भुखअ-नचिशअ, और च़ाल़्ही धैल़ै बाद आई तेऊ भुखै। (लुआह 34:28)
तेखअ बोलअ राख्सै ईशू लै, “ज़ै तूह परमेशरो शोहरू आसा, तै बोल तूह इना पात्थरा लै इहअ कि रोटी बण?”
ईशू दैनअ तेऊ लै ज़बाब, “पबित्र शास्त्रा दी आसा लिखअ द इहअ,
‘मणछ निं सिधअ रोटी करै ज़िऊंदअ,
पर परमेशरे बोली दी हरेक गल्ला मनी करै सका सह ज़िऊंदअ रही।’”
तेखअ निंयं राख्सै सह पबित्र येरुशलेम नगरी लै और मांदरे पुंडरी दी खल़अ करी करै बोलअ तेऊ लै, (लुआह 34:28) “ज़ै तूह परमेशरो शोहरू आसा तै पल़ इधा का ढेका! किल्हैकि पबित्र शास्त्रा दी आसा इहअ बी लिखअ द, (भज़न 91:11-12)
‘तेऊ छ़ाडणैं स्वर्ग दूत तेरी सेऊआ टैहली करदै
तिन्नां च़कणअ तूह हाथो हाथ
ताकि तेरै च़रणैं ठोहल़ नां लागे।’”
ईशू बोलअ तेऊ लै, “पबित्र शास्त्रा दी आसा इहअ बी लिखअ द कि तूह निं आपणैं बाप्पू परमेशरा परखदअ लागी।” (बधान 6:16)
तेखअ निंयं राख्सै सह एकी उछ़टी धारा दी और तेऊ ईशू का सारै संसारो राज़ और सुख रहैऊई करै बोलअ, (लुका 4:9) “ज़ै तूह मुंह सेटा माथअ टेके तै हणीं ईंयां सोभै गल्ला तेरी।”
तेखअ बोलअ ईशू राख्सा लै, “हे राख्स मेरी आछी का हअ दूर, पबित्र शास्त्रा दी आसा लिखअ द, (बधान 6:13)
‘तूह टेकै सिधअ आपणैं बाप्पू परमेशरा सेटा माथअ
सिधी तेऊए ई भगती करै।’”
तेखअ नाठअ राख्स ईशू सेटा का दूर और स्वर्ग दूत लागै ईशूए सेऊआ टैहली करदै।


ज़ांऊं ईशू शूणअ कि युहन्ना डुबकी दैणैं आल़अ पाअ कैद खानै दी, ता सह नाठअ यहूदा लाक्कै का गलील लाक्कै लै फिरी। तेखअ लागअ नासरत गराऊंआं छ़ाडी कफरनहूम नगरी समुंदरे बाढै ज़बलून और नप्तालीए लाक्कै रहंदअ। ताकि परमेशरे गूर याशायाह बोली दी गल्ला पूरी होए कि
“ज़बलून और नप्तालीए लाक्कै,
समुंदरे बाढै, जरदण नदी नेल़,
गलील लाक्कै, होरी ज़ातीए लोग;
ज़ुंण न्हैरै दी तै बेठै दै,
तिन्नैं भाल़अ बडअ च़मकदअ प्रैशअ
ज़ुंण लोग तेऊ देशै मौते छ़ैल्ली दी तै बेठै दै,
तिन्नां दी च़मकअ प्रैशअ।”
तधा पोर्ही की ईशू लोगा का एही गल्ला खोज़णीं शुरू, “पाप करनअ छ़ाडा आपणअ मन बदल़ा स्वर्गो राज़ गअ नेल़ एछी।”


एकी धैल़ी त ईशू गलील समुंदरे बाढै हांढदअ लागअ द, तेऊ भाल़ै दूई मणछ शमौन ज़हा लै पतरस बोला और तेऊओ भाऊ आन्दरू। तिंयां तै लागै दै पाणीं दी माह्छ़ली ढाकणा लै ज़ाल़ा पांदै किल्हैकि तिंयां करा तै माह्छ़ली ढाकणैं और बेच़णेंओ काम। ईशू बोलअ तिन्नां लै, “ज़ेही तम्हैं माह्छ़ली कठा करदै आसा लागै दै, मुंह संघै च़ाल्ला हुंह सखाऊं तम्हां मेरै च़ेल्लै हणां लै मणछ कठा करनै।” ता तिंयां बी लागै तेभी ज़ाल़ा छ़ाडी करै तेऊ संघै हांढदै।
तिधा का आजू डेऊई करै भाल़ै ईशू दूई होर भाई, याकूब और तेऊओ भाऊ युहन्ना, तिंयां तै लागै दै आपणैं बाप्पू जबदी संघै किश्ती प्रैंदै बेशी ज़ाल़ा सोहरदै, और तेऊ शादै तिंयां बी, ता तिंयां बी लागै तेभी किश्ती और आपणैं बाप्पू छ़ाडी तेऊ संघै हांढदै।


तेखअ नाठअ ईशू गलील लाक्कै कई ज़ैगा। सह रहअ आराधना सभा दी शिक्षा दैंदअ और स्वर्ग राज़े खुशीए समादा खोज़दअ लागी और सोभी रंगे दाह-खिज़ा दूर करदअ लागी।
ईशूए बारै ईंयां गल्ला पुजी सारै सिरीया लाक्कै। तेखअ ज़ुंण लोग कई बमारी दी, दुखा दी और कोई दी त भूत शाचअ द, और मिर्गिए बमारी आल़ै तै, तिंयां आऐ ईशू सेटा लै और ईशू किऐ तिंयां सोभ राम्बल़ै। बडै भारी खास्सै लोग आऐ गलील, दिकापुलिस, येरुशलेम नगरी, यहूदा लाक्कै, और जरदण नदी पारा बाखा का ईशू पिछ़ू।

Slušaj मत्ती 4