If you have would like a copy of this version please contact info@davarpartners.org

Text: Garhwali New Testament, CC-BY-SA-4.0, The Love Fellowship. -- Audio: Garhwali New Testament Audio Bible, CC-BY-SA-4.0, Davar Partners International, The Love Fellowship, 2021

Garhwali New Testament

Garhwali - Common Language Version BSI (NT) Drama

Garhwali -2018- WBT (John and James) Drama

Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.

सैरा दुनिया की सृष्टि से पैली वचन छो, जै कु वचन बुलै गै छो, अर उ वचन परमेश्वर का दगड़ा मा छो अर उ वचन परमेश्वर छो। उ शब्द आदि मा परमेश्वर का दगड़ा मा छो। परमेश्वर ल सब कुछ वे बट्टी ही पैदा कैरी और जु सृजे गै छो वामा बट्टी कुई भि चीज वेका बगैर पैदा नि हवे। उ हमारा शारीरिक अर आत्मिक जीवन कु स्रोत च अर उ ही च जु सब लुखुं तैं प्रकाश दींद। उज्यलो अंधेरा मा चमकद अर अन्धकारा ल वे तैं नि बुझै साकी। परमेश्वर ल यूहन्ना नौं कु एक आदिम तैं भेजि। उ गव्है दींणु कु आई कि उज्यला की गव्है द्यो, कि सब लोग वेका द्वारा वीं उज्यला मा विश्वास कैरा। यूहन्ना अफ त उ उज्यला नि छो पर उ वे उज्यला का बारा मा गव्है दींणु कु ऐ छो। उ जु सच्चो उज्यलो च जु हर एक आदिम तैं उज्यलो दींद जगत मा औंण वलो छो। उ दुनिया मा छो अर दुनिया वेका द्वारा पैदा हवे अर जगत का लुखुं ल वे तैं नि पैछांणि। उ अपड़ा लुखुं का संमणी ऐ अर वेका अपड़ा लुखुं ल वे तैं ठुकरै दींनि। पर जथगो ल वे तैं स्वीकार कैरी वेल ऊं तैं परमेश्वर कि सन्तान हूंणो कु अधिकार दींनि मतलब ऊं तैं जु वे पर विश्वास करदींनि। उ ल त ब्वे-बुबा या पूर्वजो बट्टी, मनिख की इच्छा बट्टी, न एक आदिम की सन्तान इच्छा बट्टी जु परमेश्वर बट्टी पैदा हवेनि। अर वचन देहधारी हवे अर दया अर सचै बट्टी पूरो हवे के हमारा बीच मा डेरो कैरी और वेकी महिमा इन छै जन बुबा (परमेश्वर) कि तरपां बट्टी अयां एकलौता नौंना की महिमा। यूहन्ना ल वेका बारा मा गव्है दींनि और चिल्लै कै बोलि, “यु उ ही च जैकू मिल ब्यौरा कैरी छो कि जु मेरा बाद औणु च उ मि बट्टी बड़ी के च, किलैकि उ मि से पैली बट्टी छो।” दया पर दया बट्टी वेकी परिपूर्णता का दगड़ी हम सभियूं ल प्राप्त कैरी मतलब आशीष पर आशीष। मूसा का द्वारा लिखीं परमेश्वर की व्यवस्था दिये गै, पर परमेश्वर ल यीशु मसीह का द्वारा दया अर सचै दिखै। परमेश्वर तैं कैल कभि नि देखि, भस वेका एकलौता नौंना ल जु सच मा परमेश्वर च, अर बुबा का सबसे नजिक च, वेल परमेश्वर तैं हम तैं दिखै।


यूहन्ना की गव्है या च कि जब यहूदियों ल यरूशलेम शहर बट्टी यहूदी याजक अर लेवियों तैं वेमा यु पुछणु कु भेजि, तु कु छै? वेल बगैर दबाव बट्टी अर बगैर कै हिचकिचाहट के बोलि, “मि मसीह नि छौं।” तब ऊंल यीशु बट्टी पूछि, तू कु छै क्य तु एलिय्याह परमेश्वर का तरपां बट्टी बुल्ण वलो छै? वेल बोलि, मि नि छौं जैका बारा मा परमेश्वर ल वादा कैरी छो, त क्य तु परमेश्वर का तरपां बट्टी बुल्ण वलो छै? अर वेल जवाब दींनि, न। तब ऊंल वे बट्टी पूछि, फिर तु कु छै? किलैकि हम अपड़ा भिजण वलो तैं जवाब द्यां तु अपड़ा बार मा क्य बुल्णी छै? यीशु ल ऊंमा बोलि, मि जन यशायाह परमेश्वर का तरपां बट्टी बुल्ण वला बोलि, एकांत जंगल मा एक पुकारण वला कु शब्द छो कि तुम प्रभु कु रस्ता सैणो कैरा। यु लोग फरीसियों का तरपां बट्टी भिजे गै छा। ऊंल यूहन्ना बट्टी यु सवाल पूछि, कि तु न मसीह छै अर न एलिय्याह अर न उ परमेश्वर का तरपां बट्टी बुल्ण वलो छै त फिर बपतिस्मा किलै दींदी? यूहन्ना ल ऊं तैं जवाब दींनि, मि त पांणी ल बपतिस्मा दींदु छों, पर तुमारा बीच मा एक मनिख खड़ो च जै तैं तुम नि जंणदा। पर जु मेरा बाद आंण वलो च, जैका जुतों का तंणखा खुलणा का लैक भि मि नि छों। या बात यरदन गाड का पार बैतनिय्याह नगर मा हवे जख यूहन्ना लुखुं तैं बपतिस्मा दींदो छो।

दुसरा दिन यूहन्ना ल यीशु तैं अपड़ी तरपां औंण देखि के बोलि, देखा यु परमेश्वर कु चिनखो दुनिया का पापों तैं ले के जांद। यु उ ही च जैका बारा मा मिल बोलि छो, कि एक मनिख मेरा पिछनै औणु च जु मि बट्टी श्रेष्ठ च किलैकि उ मि बट्टी पैली छो। अर मि त वे तैं पैछणदो नि छो की उ मसीह च पर इस्राएल का लुखुं तैं यु बतौंणु कु की उ को च मि पांणी बट्टी बपतिस्मा दींदु छों। अर यूहन्ना ल या गव्है दींनि कि मिल पवित्र आत्मा तैं कबूतर का रूप स्वर्ग बट्टी उतरद देखि जु वे पर ठैरी गै। अर मि त वे तैं पैछणदु नि छो की उ मसीह च पर जैल मि तैं पांणी बट्टी बपतिस्मा दींणु कु भेजि वेल ही मि बट्टी बोलि, कि जै पर तू आत्मा तैं उतरद अर ठैरदी देखि उ ही पवित्र आत्मा बट्टी बपतिस्मा दींण वलो च। अर मिल देखि अर मि तुम मा सच बुल्णु छो कि “यु परमेश्वर कु नौंनो च।”

दुसरा दिन फिर यूहन्ना अर वेका द्वी चेला खड़ा हुयां छा। अर यूहन्ना ल ऊं चेलों मा यीशु तैं जांण देखि के बोलि, देखा यु परमेश्वर कु चिनखो च। तब यु द्वी चेला यु सूंणि के यीशु का पिछनै हवे गैनी। यीशु ल फरिकि के ऊं तैं पिछनै औंण देखि के ऊं बट्टी बोलि, तुम कैकी खोज म छा? ऊंल यीशु मा पूछि, “हे रब्बी” मतलब हे गुरु तु कख रौंदि? वेल ऊंकु बोलि, चला अर देखि ल्या दिन का बगत लगभग चार बजि गै छा जब उ वेका दगड़ी गै अर देखि की उ बुल्णु छो इलै उ बकि दिनों कु उखि रुकि गै। ऊं द्वी मा से जु यूहन्ना कि बात सूंणि के यीशु का पिछनै हवे गै छा एक शमौन पतरस का भैय अन्द्रियास छो। वेल पैली अपड़ा सगा भैय शमौन पतरस बट्टी मिलिके वेमा बोलि, कि हम तैं ख्रिस्त मसीह मिली गै। अन्द्रियास शमौन पतरस यीशु का संमणी लैनि यीशु ल ऊं तैं देखि के बोलि, तु यूहन्ना कु नौंनो शमौन पतरस छै तु अब बट्टी कैफा मतलब पतरस कहलेली।

दुसरा दिन यीशु ल गलील जिला मा जांणु कु निर्णय कैरी अर फिलिप्पुस तैं मिली के बोलि, “मेरा पिछनै हवे जा।” फिलिप्पुस त अन्द्रियास अर पतरस बैतसैदा नगर कु रौंण वलो छो। फिलिप्पुस ल नतनएल तैं मिली के वेकु बोलि, “हम तैं उ मनिख मिल गै जैका बारा मा मूसा द्वारा लिखीं परमेश्वर की व्यवस्था मा अर परमेश्वर का तरपां बट्टी बुल्ण वलो ल लिख्युं छों नासरत नगर बट्टी यूसुफ का नौंनो यीशु छै। नतनएल ल वे बट्टी बोलि, क्य कुई भलि चीज भि नासरत नगर बट्टी निकली सकदी च? फिलिप्पुस ल वेकु बोलि चलि के देखि ले। यीशु ल नतनएल तैं अपड़ी तरपां औंण देखि कै वेका बारा मा बोलि, देखा यु इस्राएल का लुखुं का घराना कु विश्वासयोग्य वंशज च जु पूरा ढंग से ईमानदार च। नतनएल ल वेमा बोलि, तु मि तैं कख बट्टी जंणदी छै? यीशु ल वे तैं जवाब दींनि यां बट्टी पैली कि फिलिप्पुस ल त्वे तैं बुलै जब तु बेडु का डाला तौला छै तब मिल त्वे तैं देखि छो। नतनएल ल वे तैं जवाब दींनि कि, हे गुरु तु परमेश्वर कु नौंनो छै तु इस्राएल का लुखुं का घराना को महाराजा छै। यीशु ल वे तैं जवाब दे मिल जु त्वे मा बोलि, कि मिल त्वे तैं बेडु का डाला तौला देखि क्य तु इलै विश्वास कनी छै? तु यु से बड़ा-बड़ा काम तैं दिखली। फिर वे बट्टी बोलि, मि तुम मा सच-सच बुल्णु छौं कि तुम स्वर्ग तैं खुल्यूं अर परमेश्वर का स्वर्गदूतों तैं मथि जांदा अर मि मनिख कु नौंनो का मथि उतरद दिखली।”

Slušaj यूहन्ना 1