If you have would like a copy of this version please contact info@davaraudiobibles.org

Text: Deukhuri New Testament, CC-BY-SA-4.0, The Love Fellowship. -- Audio: Deukhuri New Testament Audio Bible, CC-BY-SA-4.0, Davar Partners International, The Love Fellowship, 2023

Deukhuri New Testament

Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.

निस्तार-तिहुवारसे पैलेहेँ येशू जानलेलाँ कि यी संसारमेसे विदा होके बाबक थेन जैना हुँकार समय आगिल बा। तब् जस्तेके संसारमे रहल अपन पाछे लगुइया सक्कुहुनहे प्रेम करिँत, ओस्तेके ऊ ओइन्हे अन्त्यसम पूरा रुपमे प्रेम करलाँ। येशू और हुँकार चेलनके बेरी जुनिक खाना खाइतिहिँत। शैतान पैलेहेँसे सिमोनके छावा करियोत गाउँक यहूदक मनमे येशूहे धोखा देना विचार दार सेकल रहे। बाबा हुँकिन्हे सक्कु चिजमे अधिकार दैदेले बा, और ऊ परमेश्वरके थेनसे अइलाँ, और परमेश्वरेके थेन फिर्ता जाइतताँ कना बात येशूहे पता रहिन। तब् ऊ खाना खाई बैठल ठाउँसे उठ्गिलाँ, और बाहेर घालल कोट खोलके अपन करहिँउमे तौलिया बेहेँरलेलाँ।

तब् येशू तस्लामे पानी उल्दलाँ और चेलनके गोरा धुई लग्लाँ, और अपन बेँह्रल तौलियासे ओइन्के गोरा पोँछे लग्लाँ। जब येशू सिमोन पत्रुसके थेन अइलाँ, तब ऊ येशूहे कहल, “हे प्रभु, का अप्नि मोरिक गोरा धुइबी?” येशू उहिहे जवाफ देलाँ, “मै ज्या करतुँ, ओकर मतलब तुँ अभिन नै बुझ्बो, पर पाछे बुझ्बो।” पत्रुस येशूहे कहल, “अप्नि मोरिक गोरा कबु नै धुइबी।” तब यी सुनके येशू उहिहे जवाफ देलाँ, “यदि मै तोहाँर गोरा नै धोदेनु कलेसे तोहाँर और मोरिक कौनो सम्बन्ध नै रही।” सिमोन पत्रुस हुँकिन्हे कहल, “हे प्रभु, अप्नि मोरिक गोरा किल नै, मोरिक हाँथ और कपार फेन धोदी।” येशू उहिहे कलाँ, “जे लाहासेकल बा, उ मनैयाहे ओकर गोरा किल धुइना जरुरी बतिस: ओकर पूरा शरीर शुद्ध बतिस। और तुहुरे शुद्ध बतो, पर सक्कु जाने नै हुइतो।” काकरेकी हुँकिन्हे विश्वासघात करुइयाहे ऊ चिन्हल रहिँत। तबेकमारे ऊ कलाँ, “तुहुरे सक्कु जाने शुद्ध नै हुइतो।”

जब ओइन्के गोरा धोके सेक्लाँ ते येशू अपन बाहेर घल्ना कोट घालके फेनदोस्रे बैठ्गिलाँ। तब् ऊ ओइन्हे कलाँ, “का तुहुरे बुझ्लो कि मै तुहुरिन्के संग यी का कर्नु? तुहुरे महिन्हे ‘गुरु और प्रभु’ कथो, उ तुहुरे ठिके कथो, काकरेकी मै तुहुरिन्के प्रभु और गुरु हुइतुँ। यदि तुहुरिन्के प्रभु और गुरु होके मै तुहुरिन्के गोरा धुइल बतुँ कलेसे तुहुरे फेन अपनहे नम्र बनाके एकदोसर जहनके गोरा धुई परत। काकरेकी मै तुहुरिन्हे एकथो नमूना देखाइल बतुँ कि जसिके मै तुहुरिन्के संग करल बतुँ, तुहुरे फेन ओस्तेहेँ करो। जात्तिके मै तुहुरिन्हे कहतुँ, नोकर अपन मलिक्वासे भारी नै रहत, और निउतरह्या निउतरह्याहे पठुइयासे भारी नै रहत। आब जब तुहुरे यी बातहे जानलेले बतो कलेसे ओकर पालन करो, ताकि तुहुरे धन्य होजाऊ।”


येशू कलाँ, “मै तुहुरिन्के सक्कु जहनके बारेमे नै कहथुइतुँ, जिहिहे मै चुनल बतुँ उहिहे मै चिहिन्थुँ। पर असिके यहे कारणसे हुइता ताकि पवित्र शास्त्रमे ज्या लिखल बा उ पूरा होए। असिके कहिगिल बा, ‘जे मोरिक संग खाइल वहे महिन्हे धोखा देहल।’ आब मै यी सक्कु हुइनासे आघे तुहुरिन्हे बताइतुँ, कि जब यी सक्कु होजाई, तब तुहुरे महिन्हे विश्वास करहो कि मै वहे हुइतुँ। जात्तिके मै तुहुरिन्हे कहतुँ, ‘जिहिहे मै पठैथुँ, उहिहे स्वीकार करुइया महिन्हे स्वीकार करत, और महिन्हे स्वीकार करुइया महिन्हे पठुइया परमेश्वरहे स्वीकार करत।’”

यी बात कहिके सेकके येशू आत्मामे दुखि होगिलाँ, और ऊ अपन चेलनहे कलाँ, “जात्तिके मै तुहुरिन्हे कहतुँ, तुहुरिन्मेसे एकजाने महिन्हे पक्रादी।” येशू केकर बारेमे कलाँ कहिके दोधारमे परके चेलनके एकदोसर जहनहे हेरिकहेरा करे लग्लाँ। हुँकार चेलनमेसे एकथो चेला जिहिहे येशू प्रेम करिँत ऊ येशूक पंजरे बैठल रहे। तब् सिमोन पत्रुस उहिहे इशारा करके पुँछल, “प्रभु केकर बारेमे कहतताँ?” येशूक पंजरे बैठ्लक ओहोँरसे आकुर लग्गे होके ऊ हुँकिन्हे पुँछल, “हे प्रभु, अप्निहे पक्रा देहुइया के हो?” येशू जवाफ देलाँ, “जिहिहे मै यी रोटीक खण्टा रसमे बोरके देहम वहे हो।” तब् येशू रोटीक खण्टा रसमे बोरलाँ, और निकारके सिमोनके छावा करियोत गाउँक यहूदाहे देलाँ। यहूदा रोटीक खण्टा लेहल ते, येशू उहिहे कलाँ, “तुहिहे ज्या करना बा, उ झत्तेहेँ करदार।” तब शैतान यहूदकमे समागिलिस। पर खाई बैठुइया दोसुर चेलनमेसे केऊ फेन नै बुझ्लाँ कि येशू उहिहे असिक काकरे कलाँ। काकरेकी केऊ-केऊ यी सोँचल कि यहूदक थेन पैँसक ठैली बतिस। तबेकमारे येशू उहिहे तिहुवारके लग चाहल सामान किने या गरीबनहे कुछु देहे कलिस। तब् रोटीक खण्टा खाके सेकल ते करियोत गाउँक यहूदा जुरतेहेँ बाहेर निकरगिल, और उ रातिक समय रहे।


जब ऊ बाहेर गैल तब् येशू कलाँ, “आब मै, मनैयक छावा महिमित हुइल बतुँ, और परमेश्वर मोरिकमे महिमित हुइल बताँ। और परमेश्वर अपन छावक महिमा करहीँ, और परमेश्वर उ काम तुरुन्ते करहीँ। हे मोरिक संघरियन, मै थोरिक बेरसम तुहुरिन्के संग बतुँ! तुहुरे महिन्हे खोज्बो, और जसिके मै यहूदी दलके नेतनहे कनु, आब तुहुरिन्हे फेन मै कहतुँ ‘जहाँ मै जाइतुँ, वहाँ तुहुरे आई नै सेक्बो।’ मै तुहुरिन्हे एकथो लावा आज्ञा देहतुँ: तुहुरे एकदोसर जहनहे प्रेम करो। जसिके मै तुहुरिन्हे प्रेम करथुँ, ओस्तेके तुहुरे फेन दोसुर जहनहे प्रेम करो। यदि तुहुरे एकदोसर जहनहे प्रेम करबो कलेसे, यम्नेहेँसे सक्कु जाने जन्हीँ, कि तुहुरे मोरिक चेला हुइतो।” सिमोन पत्रुस येशूहे कहल, “हे प्रभु, अप्नि कहाँ जाइती?” येशू जवाफ देलाँ, “मै जहाँ जाइतुँ, तुँ अब्बे मोरिक पाछे आई नै सेक्बो, पर पाछे ते तुँ मोरिक पाछे अइबो।” पत्रुस येशूहे कहल, “प्रभु, मै काकरे अब्बेहेँ अप्निक पाछे आई नै सेकम? अप्निक लग ते मै मुअक लग फेन तयार बतुँ।” येशू जवाफ देलाँ, “का तुँ मोरिक लग मुए सेक्बो? जात्तिके मै तुहिन्हे कहतुँ, मुर्घा बोल्नासे आघे तुँ महिन्हे तीनचो अस्वीकार करबो।”

Slušaj यूहन्ना 13