If you have would like a copy of this version please contact info@davaraudiobibles.org

Text: Deukhuri New Testament, CC-BY-SA-4.0, The Love Fellowship. -- Audio: Deukhuri New Testament Audio Bible, CC-BY-SA-4.0, Davar Partners International, The Love Fellowship, 2023

Deukhuri New Testament

Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.

वहाँ निकोदेमस नाउँ रहल एकथो मनैया रहे, जे यहूदिनके नेता रहे और ऊ फरिसी दलके रहे। एक दिन निकोदेमस रातके येशूक थेन आके हुँकिन्हे कहल, “गुरुजी, हम्रे जन्थी कि अप्निहे परमेश्वर हम्रिहिन्हे सिखाइक लग पठाइल बताँ। काकरेकी परमेश्वर संगे नै रहिहीँ कलेसे केऊ फेन अप्निक करल यी चमत्कार करे नै सेक्हीँ।” येशू उहिहे जवाफ देलाँ, “जात्तिके मै तुहिन्हे कहतुँ, यदि केऊ लावा होके नै जल्मल कलेसे ऊ परमेश्वरके राजमे जाई नै सेकी।” निकोदेमस हुँकिन्हे पुँछल, “बुह्राइल मनैया फेनदोस्रे कसिके जलम लेहे सेकी? का ऊ फेनदोस्रे अपन दाईक पेटेमेसे जलम लेहे सेकी?” येशू उहिहे जवाफ देलाँ, “जात्तिके मै तुहिन्हे कहतुँ, जबसम कौनो मनैया पानी और आत्मासे नै जल्मी, तबसम ऊ परमेश्वरके राजमे जाई नै सेकी। मनै अपन लर्कनहे जीवन देथाँ, पर मनैनहे लावा जीवन पवित्र आत्मासे किल मिलत। मै तुहिन्हे फेनदोस्रे जल्मे परत कनु ते अचम्म जिन मानो। बयालहे जेहोँर मन लग्थिस, ओहोँरे बहत। तुँ बयालके आवाज सुन्थो, पर तुँ नै जन्थो कि उ कहाँसे आइत, और कहाँ जाइत। पवित्रआत्मामेसे जल्मल हरेक मनैया फेन ओस्तेहेँ रहत।” निकोदेमस हुँकिन्हे पुँछल, “यी कसिके हुई सेकी?” यी सुनके येशू उहिहे जवाफ देलाँ, “तुँ इजरायलमे एकथो महान गुरु हुइतो, तुहिन्हे यी बात जात्तिकमे बुझे परना हो! जात्तिके, मै तुहुरिन्हे कहतुँ कि हम्रे ज्या जन्थी वहे कथी और हम्रे ज्या देखल बती ओक्रेहे गवाही देथी। पर हम्रे ज्या कथी तुहुरे ओम्ने विश्वास नै करथो। और जब मै तुहुरिन्हे दुनियाँमे ज्या चिज हुइत वहे बात कनु, तभुन तुहुरे विश्वास नै करथो कलेसे यदि मै तुहुरिन्हे स्वर्गमे हुइना बात बतैम कलेसे तुहुरे कसिके विश्वास करबो? केऊ फेन स्वर्गमे नै गैल हो। पर मै, मनैयक छावा किल स्वर्गमेसे तरे आइल बतुँ। जसिके मोशा उजाड़-ठाउँमे काँसक सँप्वाहे क्रूसमे टँगाइल, ओस्तेके यी जरुरी बा कि मै, मनैयक छावा फेन क्रूसमे टँगाजाऊँ। ताकि जे मोरिकमे विश्वास करी, ऊ सदाकालके जीवन भेटाई। काकरेकी परमेश्वर संसारके मनैनहे असिन प्रेम करलाँ कि ऊ अपन थेन रलक एक्केथो किल छावाहे दैदेलाँ, ताकि हुँकारमे विश्वास करुइया केऊ फेन नाश ना होए, पर ऊ सदाकालके जीवन भेटाए। काकरेकी परमेश्वर अपन छावाहे संसारके मनैनहे दण्डक आज्ञा मिलिन कहिके नै पठैलाँ। पर संसारके मनैनहे हुँकार माध्यमसे मुक्ति मिलिन कहिके पठैलाँ। जे परमेश्वरके छावकमे विश्वास करी, उहिहे दण्डक आज्ञा नै हुई। पर जे हुँकारमे विश्वास नै करी, ऊ आग्गिहीँ दोषी ठहरागिल बा। काकरेकी ऊ परमेश्वरके एक्केथो छावक नाउँमे विश्वास नै करल हो। और दण्डक आज्ञाक कारण यी हो कि ओजरार संसारमे आसेकल रहे, तभुन फेन मनै अन्धकारहे ओजरारसे धेउर मन परैलाँ। काकरेकी ओइन्के काम खराब रहिन। काकरेकी जे खराब काम करत, ऊ ओजरारहे मन नै पराइत। और ओकर काम कहुँ देखा ना परजाए कना डरकमारे ऊ ओजरारके लग्गे नै आइत। पर जे सच्चाइसे चलत ऊ ओजरारके लग्गे आइत, ताकि ओकर काम देखा परे कि उ काम परमेश्वरके इच्छा अनुसार हुइल बा।”

यकरपाछे येशू और हुँकार चेलनके यहूदिया प्रदेशमे अइलाँ, और वहाँ येशू ओइन्के संग रहिके डुब्कि देहे लग्लाँ। यूहन्ना फेन सालीम नगरके लग्गेहेँ रहल एनोन गाउँमे डुब्कि देहे। काकरेकी वहाँ बहुत्ते पानी रहे, और मनै डुब्कि लेहे आइतिहिँत। काकरेकी उ समयसम यूहन्ना झेलमे नै परल रहे। तब्बेहेँ यूहन्नक चेलनके एकथो यहूदी दलके नेतक संग यहूदिनके पुर्खनके धार्मिक चलनमे रहल हाँथ धुइना चलनके बारेमे वाद-विवाद होगिलिन। और यूहन्नक चेलनके यूहन्नक थेन आके उहिहे कलाँ, “हे गुरुजी, जोन मनैया यर्दन लदियक पूर्वक पाँजर अप्निक संग रहिँत। और ऊ के हुइँत कहिके जेकर बारेमे अप्नि हम्रिहिन्हे बताइल रही। हेरी, ऊ डुब्कि देहतताँ और सक्कु मनै हुँकार थेन जाइतताँ।” यूहन्ना जवाफ देहल, “जबसम मनैयाहे स्वर्गमेसे कुछु नै देजैहिस, तबसम् ऊ कुछु फेन नै भेटाई। तुहुरिन्हे पक्कै फेन पता बा कि मै तुहुरिन्हे कसिके बताइल रहुँ कि ‘मै ख्रीष्ट नै हुइतुँ, पर मै हुँकारसे आघेक पठागिलक हुइतुँ।’ दुल्हा दुल्हन्याँसे भोज करलेहत। पर दुल्हक संघरिया ओकर आँरितिर ठरह्याइल रहत, और दुल्हक कलक बात सुनके ऊ महा आनन्दित हुइत। ओस्तेके मोरिक मन आनन्दसे भरगिल बा। जरुरी बा कि हुँकार महत्त्व धेउर होजाए, और मोरिक महत्त्व कम होजाए।”

यूहन्ना कहल, “जे स्वर्गमेसे आइत ऊ सक्कुहुनसे भारी हो। और जे पृथ्वीमेसे आइत, ऊ पृथ्वीएके हो और पृथ्वीएके बात बत्वाइत। और जे स्वर्गमेसे आइत ऊ सक्कुहुनसे भारी हो। ज्या चिज ऊ देखल और सुनल बताँ, ओक्रेहे गवाही ऊ देथाँ, तभुन फेन बहुत कम मनै हुँकार गवाही ग्रहण करलाँ। पर जे हुँकार गवाही ग्रहण करल, ऊ यी बातहे साबित करल कि परमेश्वर सच्चा हुइताँ। काकरेकी जिहिहे परमेश्वर पठैलाँ, ऊ परमेश्वरके बात बत्वाइत। काकरेकी परमेश्वर पूरा रुपसे पवित्र आत्मा देथाँ। परमेश्वर बाबा छावाहे प्रेम करथाँ, और ऊ सक्कु चिज हुँकारे हाँथेम दैदेले बताँ। जे परमेश्वरके छावकमे विश्वास करत, उहिहे सदाकालके जीवन मिलगिल बतिस। पर जे परमेश्वरके छावक कलक नै मानत, उहिहे सदाकालके जीवन नै मिल्हिस, पर परमेश्वरके दण्ड ओकरमे पलिरही।”

Slušaj यूहन्ना 3