मत्ती 3
3
बप्तिस्मा तेरुप यूहन्नाकी ख्याप्टाक क्यावु
(मर्कूस १:१-८; लूका ३:१-१८; यूहन्ना १:१९-२८)
1ती पेला बप्तिस्मा तेरुप यूहन्ना ति यहूदियाकी दासा पाङ्थेरीला वानी दुक सियी मीतिवाला ख्याप्टाक क्यासुङ, 2“ख्यिराङ दिक्पा ने सेम ग्युर, च्यिलासिसिन कोन्छ्योककी ग्येल्खाप चिप्ला राङ वा वे।” 3दी मी तीकी कोर्ला गोमाला के कोन्छ्योककी लुङ्तेम्बा यशैयाकी दुक सिक्या वे,
“दासा पाङ्थेरीला मी मिरा च्यिककी दुक सिनी वोरु देन्गिवी।
‘चोवो कोन्छ्योककी लाम टडिक की।
खो फेपुप लाम थेकाङ जो।’”#यशैया ४०:३
4यूहन्नाकी सेम्ज्येन वोङ्मी पु नेसुर जोवु मज्या कोन्गिनोक, केल्दाङला ति क्वाकी करा च्यिङ्गिनोक। तीकी च्युच्यु पे ताङ टाराङ सेनोक। 5तमा मीतिवा यरूशलेम ताङ यहूदियाकी तेरी दासा ताङ यर्दन चङ्बी गारी गुरी नेमा यूहन्नाकी चिप्ला वानोक। 6ते तिवी खोप्राङ दिक्छेन यिन सिनी सेम ग्युर्सालेन्सिन यूहन्नाकी तिवाला यर्दन चङ्बी नाङ्ला बप्तिस्मा बिन्सुङ।
7ते फरिसी छोक्पा ताङ सदुकी छोक्पाकी मीतिवा बङी बप्तिस्मा लङ्गुपला वुङ्यिन कितुप थोङ्नी यूहन्नाकी तिवाला दुक सिनी वोरु तेन्सुङ, “ओ, रुल कुपेङकी च्यप्रुक दोके दुक्टा वोतुपतिवा! वुङ्गुप छलुप कोन्छ्योककी पर्च्या ने टो सिनी ख्यिराङला सी सिक्यासुङ? 8ख्यिराङ ‘दाक दाक्पु दिक्छेन यिन।’ सिनी सेम ग्युर्नी कोन्छ्योकला वावु यिन्सिन तीकी पङ्बु ति छ्या तेन। 9तमा ख्यिरा सेमला ‘अब्राहाम ति दाक्पी पगावा हङ्गावा यिन।’ सिनी नासाम मातोङ, च्यिलासिसिन कोन्छ्योककी दी दोतिवाला साङ अब्राहामकी गिपा जो थुप्किवी। 10तन्दा राङ दोङ्बी शापला तरी ख्येल्नी सिन वे, तमा डेलु ल्यामु मोगोरुप दोङ्बुतिवा रे रे च्येनी मे नाङ्ला क्युर्कितो। 11ङ याङ ख्यिराङला दिक्पा ने सेम ग्युरुपकी थोक्ला छ्यु थ्वोनी बप्तिस्मा तेरिन, यिने ङे तिङ्ला फेपुप ति ङ सिनाङ ओङ छ्येवु वे। तुक क्यानी ङ याङ खोकी शप्चे साङ खुर छ्योवु मे। खोकी ख्यिराङला चाङ्मा जोपला कोन्छ्योककी थु चाङ्मा ताङ मे थ्वोनी बप्तिस्मा नङ्गिवी। 12खोकी छ्याकला ग्यालुक वे, तमा खोकी लेङाङ चेङ्गा जोनी टतिवा टाप्नी डुमातिवा ति पङाङ नाङ्ला लुकिवी, फुङ्मातिवा ति नाम्साङ मिशिवु मे नाङ्ला र्हेकिवी।”
येशूकी बप्तिस्मा लावु
(मर्कूस १:९-११; लूका ३:२१-२२; यूहन्ना १:३२-३४)
13ती पेला येशू यूहन्ना नेमा बप्तिस्मा लङ्गुपला गालील नेसुर यर्दन चङ्बुला फेप्सुङ। 14यिने यूहन्नाकी येशूला क्येक्नी, “गेकेनकी ङला बप्तिस्मा तेर गोकिवी, च्यिला गेकेनकी ङे नेसुर बप्तिस्मा लङ्गुपला फेवु यिन?” सिनी सिक्यासुङ। 15यिने येशूकी “तन्दा ति दुकै राङ कि च्यी। दाक्पी दुक राङ क्यानी कोन्छ्योककी नोवा तेरी कितुप ति ल्यामु यिन।” सिनी सुङ्सुङ। तुक क्यानी यूहन्नाकी येशूला बप्तिस्मा तेरुप ङ्येन्सुङ। 16येशू बप्तिस्मा लानी चङ्बी नाङ ने थेन्सिमा देवाच्येन पेसुङ, तमा कोन्छ्योककी थु चाङ्मा ति गम्देर दोके क्यानी खोरे खला पापुप ति खोकी थोङ्सुङ। 17ती पेला देवाच्येन नेमा “दी ति ङे ङ्यिङ्ज्येवु पुज्युङ यिनो। ङ दीकी मुला छासे गा लानी वे।” सिरुप वोरु यी ग्यप्सुङ।
Trenutno izabrano:
मत्ती 3: xsrNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2014, Wycliffe Bible Translators, Inc. All rights reserved.