Matta 4
4
Ceyɗaan jarrabake Yeesu
(Markus 1.12-13 ; Luka 4.1-13)
1Ɓaawo ma'ajum, sey *Ruhu Ceniiɗo yahari Yeesu nder ladde, gam *Ceyɗaan jarraboo mo. 2Yeesu waɗi balɗe arba'iin (40), emo suumii jemma e nyalawma. Sey veelo nanngi mo. 3Ndeen Jarrabotooɗo wari vi'i mo :
— To a *Ɓiɗɗo Allah kam, vi' ɗe'e kaaƴe laatoo nyaamdu.
4Yeesu toontii mo vi'i :
— Ɗum vinndaama : « Naa e nyaamdu tan neɗɗo foofrata, ammaa gada e koo ndeye voliinde ivoynde to Allah. »#4.4 Tokkitaaki Tawreeta 8.3
5Ndeen Ceyɗaan yahari mo si'ire *Urusaliima seniinde, darni mo dow hoore *Wuro Seniingo, 6vi'i mo :
— To a Ɓiɗɗo Allah kam, diw gada ɗo'o faa lesdi, gam ɗum vinndaama : « Allah no vi'ey malaa'ika'en muuɗum taɓɓo ma, gam to' kosngal maaɗa fii haayre. »#4.6 Jabuura 91.11-12
7Yeesu vi'i mo :
— Deftere boo ɓesdii vi'igo : « Ta'a godo Allah Jawmiraawo maaɗa. »#4.7 Tokkitaaki Tawreeta 6.16
8Kadimaa Ceyɗaan yahari mo dow vaamnde townde korey, holli mo laamuuji duuniyaaru fuu e darajja ma'aji, 9vi'i mo :
— Ɗum fuu mi hokkete ɗum, kul a diccake, a sujjidanii yam.
10Ndeen Yeesu vi'i mo :
— Sottu ɗo'o, aan Ceyɗaan ! Gam ɗum vinndaama : « Allah Jawmiraawo maaɗa tan cujjidantaa, kanko tan haani njagganoɗaa. »#4.10 Tokkitaaki Tawreeta 6.13
11Wakkaci ma'ajum Ceyɗaan woori mo, ndeen malaa'ika'en ngari to ma'ako kuwani mo.
Yeesu fuɗɗii kuuɗe muuɗum nder lesdi Gaaliili
(Markus 1.14-15 ; Luka 4.14-15)
12Nde Yeesu nani Yahayya omndaama nder kaso, o vitti lesdi *Gaaliili. 13O woori si'ire Najaratu, o yahi o jooɗii si'ire Kafarnahum wonnde fonngo maayo Gaaliili nder senndere lesdi Jaabulon e Naftalim, 14gam ɗum hebbina voliinde nde Allah volvi gada e honnduko annabi *Ecaaya biiɗo :
15« Onon lesɗe Jaabulon e Naftalim
lesɗe gonɗe dow laawol jahoowol maayo manngo,
hiirna maayo Urdun,
Gaaliili, lesdi *yimɓe ɓe laataaki Yahuudu'en :
16Jooɗiiɓe nder niɓre
ngi'ii jayngol manngol.
Jooɗiiɓe nder lesdi maayde niɓɓundi,
jayngol yaynanii ɓe. »#4.15-16 Ecaaya 8.23–9.1
17Gada wakkaci ma'ajum, Yeesu fuɗɗi wa'ajingo e vi'a :
— Tuubee, gam *laamu Allah ɓadake.
Yeesu noddii nanngooɓe liƴƴi nayo
(Markus 1.16-20 ; Luka 5.1-11)
18Yeesu e tokkiti regorde maayo *Gaaliili, sey o yi'i worɓe ɗiɗo rimdaaɓe, Simon noddirteeɗo Biiturus e minyum Anndaraawus. Eɓe pera nanngirɗum maɓɓe nder maayo, gam ɓe nanngooɓe liƴƴi. 19Yeesu vi'i ɓe :
— Tokkee yam, mi waɗa on waddeyɓe yimɓe to am.
20Ɗoon e ɗoon ɓe ngoori nanngirɗum liƴƴi maɓɓe, ɓe tokki mo. 21Kadimaa o yahi yeeso, o tawi woɓɓe rimdaaɓe ɗiɗo, ɓiɓɓe Jabadi, Yaakuubu e minyum Yahayya nder akali ndiyam. Kamɓe e baaba maɓɓe Jabadi, eɓe mo''ina nanngirɗum liƴƴi maɓɓe. Sey Yeesu noddi ɓe. 22Ɗoon e ɗoon ɓe ngoori akali kiin faa e baaba maɓɓe fuu, ɓe tokki mo.
Yeesu wa'ajinii yimɓe, o yamɗitinii nyawɓe
(Luka 6.17-19)
23Yeesu yiilii nder lesdi *Gaaliili fuu, emo wa'ajina nder *cuuɗi-ga'ajorɗi maɓɓe, emo anndina habaru *laamu Allah, emo yamɗitina koo iri nguye nyawu e liddaari. 24Habaru ma'ako sankitii nder lesdi Siiriya fuu. Ɗum waɗi ga waddango mo woonɓe nyawuuji feere-feere, ɓe nyawu paɗɗe e ɓe ginnaaji e voosɓe. Ɓe fuu o yamɗitini ɓe. 25Yimɓe ɗuuɗɓe gada lesdi Gaaliili e bi'eteeɗum ci'e sappo e *Urusaliima e *Yahuudiya e yimɓe lesdi ngonndi fu'una maayo Urdun fuu tokki mo.
Trenutno izabrano:
Matta 4: fuq
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2015, Wycliffe Bible Translators, Inc. All rights reserved.